كتب: خالد عاصم

على الرغم من أن شهرة شركة Apple الرئيسية سببها موبايلات iPhone إلا إن قوى ابل الحقيقية على مستوى المنافسة بيكمن أكتر في أجهزة التابلت iPad والساعات الذكية Apple Watch، وعلى مستوى الساعات تحديدًا بتقدر ابل تقدم أفضل إمكانيات موجودة ورغم سعرها العالي إلا إنها الخيار المثالي لكتير من المستخدمين خصوصًا من مستخدمي موبايلات ايفون اللي صعب أوي يجربوا أي ساعة تانية مع موبايلاتهم حتى لو كانت متوافقة.

وبالنسبة للمتابعين، أكيد يعرفوا أغلب إصدارات ساعات ابل، بس من بين الإصدارات دي فيه إصدار مش معروف أوي وناس كتير بتوصفه بالإصدار المظلوم رغم سعره المثالي مقارنة بالإصدارات التانية، الإصدار ده هو Apple Watch SE اللي بيتوفر بمقاس 40 مم ومقاس 44 مم.

ساعة Apple Watch SE واحدة من الساعات الذكية اللي لازم تفكر فيها لو عندك موبايل ايفون وبتفكر تلبس ساعة من ابل من غير ماتتكلف التكاليف العالية جدًا من سعر ساعات ابل المختلفة التانية، بس قبل ما تفكر تشتريها لازم تقرا المقال ده عشان تعرف كل أسرار الساعة دي وتعرف هل هي فعلًا تستحق ولا لا.

ولو الساعة عجبتك هتقدر تطلبها من خلالنا في ياقوطة وهتوصلكم لحد باب البيت وكمان تقدروا تشتروا المنتجات دي بالتقسيط من خلال شهري أول وأسهل تطبيق للتقسيط في مصر واللي مش بيحتاج منك غير صورة البطاقة وصورة إيصال مرافق وبس، ومن غير زيارة ولا ضامن واستمتع كمان بتوصيل مجاني لكل مشترياتك من خلاله.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

مراجعة ساعة Apple Watch SE

أول حاجة بنلاحظها في ساعة Apple Watch SE إن تصميمها هو التصميم المعا لساعات ابل من غير أي اختلافات تذكر، يعني نفس التصميم المستطيل والحواف المنحنية والهيكل الدائري المصنوع من الألومنيوم وقرص التحكم الرقمي على يمين الساعة، وده معناه إن لو كان عندك ساعة ابل قبل كده أو تعرف ساعات ابل كويس فمفيش اختلاف يخليك تحس بإن الساعة أقل أو مختلفة عن باقي الإصدارات.

وتعتبر الساعة من الساعات الكبيرة من إصدارات ابل لأنها بتيجي بشاشة كبيرة نسبيًا وبمقاسات ٤٠ مم أو ٤٤ مم، وده بيخليها خيار أفضل بكتير من ساعة زي Apple Watch Series 3 من سنة ٢٠١٧ واللي لسا متوفرة لحد دلوقتي، واللي بتيجي بمقاسات ٣٨ مم أو ٤٢ مم وبشاشة أصغر، وده كمان بيخليها منافس قوي لباقي الإصدارات لو المهم بالنسبالك حجم الشاشة وكبر الساعة نفسها.

الشاشة نفسها كمان معتادة ومش مختلفة كتير عن ساعات ابل التانية، وده لانها بتعتمد على شاشة OLED واضحة وساطعة وسهل استخدامها مهما كانت ظروف الإضاءة المحيطة ودي من المميزات اللي بتميز ساعات ابل حتى لو بنعتبر الساعة دي من الساعات الأقل سعرًا من باقي الإصدارات.

إلا إن الساعة برضه فيها عيب مقارنة بغيرها من ساعات ابل الجديدة تحديدًا وهي إن مفيهاش خاصية Always-on display واللي شالتها ابل عشان تقلل من سعر الساعة، وده معناه إنه زي الساعات القديمة هتحتاج ترفع إيدك الأول عشان تقدر تشوف الشاشة وده بينطبق على أي تطبيق من تطبيقات الساعة، وعلى الرغم من إن ده بيحافظ على عمر البطارية وخلى الساعة أرخص إلا إن غياب الخاصية دي مش عملي خالص لجهاز هو في الأساس ساعة.

طبعًا لو موبايلات ايفون فأكيد مش هتنفعك قد ساعات ابل، والساعة دي بتقوم بمهامها الأساسية مع الموبايل بامتياز، يعني كل الإشعارات والتنبيهات هتوصلك فورًا وبسلاسة كبيرة، وبياناتك هيتم مشاركتها ما بين الساعة والموبايل من غير أي مشكلة وبسرعة كبيرة، ده غير توافقها مع كامل نظام الإيكو سيستم الخاصة بأبل بشكل عام.

ومع إن إمكانيات وخصائص ساعة Apple Watch SE نقدر نعتبرها نسخ مصغرة من اللي يقدر يعمله الموبايل، إلا إنها على مستوى خصائص تتبع اللياقة بتقدر تقوم بأداء مميز جدًا، فمثلًا قائمة التمارين والتدريبات الرياضية اللي بتقدر تتبعها الساعة من خلال تطبيقها الأساسي بتكبر دايمًا وكل فترة بتشمل تدريبات أكتر، وكمان الساعة متوافقة مع عدد كبير من التطبيقات الخارجية غير المطورة من خلال ابل زي Strava مثلًا.

ولو بقى عندك اشتراك في Apple Music وسماعة AirPods فهتقدر تخرج من بيتك وتمرس رياضة الجري اللي بتحبها وتسمع أغانيك المفضلة من غير حتى ما تحتاج تاخد موبايلك معاك، والخاصية دي متوفرة في الساعة دي زي غيرها من ساعات ابل وتعتبر واحدة من أكبر نقاط القوة فيها، بس ميزة الشاشة الكبيرة في الساعة دي إنك تقدر تتابع تمارينك من غير مشكلة وتقدر تتحكم في المزيكا اللي بتسمعها من غير مشكلة برضه.

زي ما للساعة دي مميزات كتير هي كمان فيها عيوب وأبرز العيوب دي هو عمر البطارية، فالبطارية بتقدر تقعد معاك لحد يوم ونص بالكتير وده مش مناسب لساعة ذكية جديدة خصوصًا إنها بتدعم خاصية تتبع النوم وده بيخليك في حيرة ما بين إنك تستغنى عنها شوية خلال اليوم عشان تشحنها أو إنك تسيبها تشحن طول الليل وتستغنى عن خاصية تتبع النوم وده بيحصل على فترات قريبة جدًا لأن يوم ونص حقيقي فترة مش كافية خالص لساعة ذكية.

الخلاصة

لو فعلًا عايز تشتري ساعة من ساعات ابل الذكية ومش عايز تصرف مبلغ ضخم مقارنة بإصدارات ساعات ابل المعتادة، فالساعة دي هتكون مناسبة ليك جدًا لأنها بتتميز بإمكانيات كويسة جدًا وقدرات رائعة على تتبع اللياقة ده غير الشاشة الكبيرة المميزة، إلا إنك لازم تحط في الحسبان مشكلة البطارية وعدم وجود خاصية الشاشة دائمة التيقظ واللي كتير من الناس بتعتبرها أساسية في الساعات.

اتعرف على عروض أسعار ساعة Apple Watch SE من هنا.

اتعرف على عروض أسعار مختلف ساعات ابل الذكية من هنا.

اتعرف على عروض أسعار مختلف الساعات الذكية المتوفرة على ياقوطة من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.