كتب: خالد عاصم

كمبيوتر ألعاب ولا بلاي ستيشن أو إكس بوكس؟ هو ده السؤال اللي دايمًا بيسأله عشاق ألعاب الفيديو لما بيفكروا يشتروا جهاز جديد في البيت يخليهم يقدروا يستمتعوا بالألعاب اللي بيحبوها، ولان السؤال ده فعلًا إجابته ممكن ماتكونش واضحة لكتير من الناس فاحنا قررنا نعمل مقارنة كاملة بين النوعين دول من أجهزة الألعاب عشان نساعدك تاخد القرار الصح والأنسب ليك.

من خلال المقال ده هنوريكم مقارنة كاملة بين أجهزة كمبيوتر الألعاب سواء المكتبية أو المحمولة وبين منصات الألعاب زي البلاي ستيشن أو الإكس بوكس عشان تعرف تختار ما بينهم اللي يناسبك، وسواء كان بلاي ستيشن أو اكس بوكس أو كمبيوتر ألعاب كل ده هتقدر تلافيه في ياقوطة وهتقدر تطلبه عشان يوصلك لحد باب البيت أو مكان ما تحب بأسرع وقت ممكن.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع

المقارنة الكاملة بين كمبيوتر الألعاب وبين منصات الألعاب

كمبيوتر الألعاب

لما نتكلم عن أجهزة الكمبيوتر المكتبية عندنا تلات اختيارات بتختلف على أساس أنظمة التشغيل اللي مش هتخرج عن ويندوز ولينوكس وماك، وأكترهم شهرة وانتشار طبعًا هو أجهزة الكمبيوتر اللي بتشتغل بنظام تشغيل ويندوز، عشان كده لما بنتكلم عن كمبيوتر الألعاب فأول حاجة هتيجي في دماغك هي أجهزة الكمبيوتر اللي بتشتغل بنظام تشغيل ويندوز، ورغم إن فيه ألعاب صدرت مخصوص لأجهزة كمبيوتر لينوكس وماك إلا أن محدوديتها وقلة عددها بتخلي الكلام بشكل رئيسي يبقى عن أجهزة كمبيوتر ويندوز.

غير الأجهزة المكتبية أو الديسك توب فيه أجهزة اللاب توب المخصصة للألعاب ودي اختيار ممتاز بس مشكلتها الوحيدة إنها غالية جدًا وأغلى كتير من إنك تجمع كمبيوتر ديسك توب مخصص للألعاب ومش هتقدر توصل للإمكانيات الكلية اللي ممكن يوصلها الديسك توب إلا لو هتدفع مبلغ كبير جدًا وممكن يكون مرهق بشكل كبير لميزانيتك.

البلاي ستيشن أو منصات الألعاب المختلفة

على عكس الكمبيوتر فأجهزة منصات الألعاب الخيارات ما بينها أكتر بكتير، ومن بين كل منصات الألعاب فيه جهازين تحديدًا هما الأشهر والأوسع انتشار والأكتر من حيث عدد الألعاب اللي بتدعمها، والجهازين دول هما أجهزة البلاي ستيشن PlayStation والإكس بوكس Xbox، وبينضملهم جهاز PlayStation Vita اللي بدأ كجهاز مستقل بيتمسك بالإيد واتطور عشان يبقى جهاز أقوى بمرور الوقت.

بالإضافة للمنصات الأشهر دي فيه أجهزة تانية هدفها الأساسي توفير بيئة متعة عامة للعيلة وبتهتم أكتر بالتصميم المبهر ودراعات التحكم المبتكرة، وتعتبر شركة نينتيندو أشهر الشركات في المجال ده بأجهزتها الشهيرة Switch والجهاز المحمول 3Ds، وكمان الأجيال القديمة زي Wii وDS اللي باعوا أكتر من 100 مليون وحدة خلال فترة وجودهم في الأسواق.

ومع اختلاف نوعية الألعاب الموجهة للنوعين الأول والتاني، ولأن النوع الأول اللي بيضم بلاي ستيشن وإكس بوكس بيتشاركوا نفس الألعاب اللي متوفرة على أجهزة الكمبيوتر، فهيكون كلامنا الأساسي عن الجهازين دول زي ما هيكون كلامنا عن أجهزة الكمبيوتر اللي بتشتغل بنظام تشغيل ويندوز.

المقارنة السعرية

الحقيقة هي إن منصات الألعاب هي السبب الرئيسي في إن ألعاب الفيديو حققت الانتشار الكبير ده، والسبب ببساطة هو إن أجهزة الكونسول قدرت تحقق معادلة مهمة جدًا، سهولة الاستخدام والسعر الرخيص بالمقارنة بأسعار أجهزة الكمبيوتر المحمولة أو الديسكتوب الأصلية أو المتجمعة فمثلًا متوسط أسعار أجهزة البلاي ستيشن بتكون في حدود ٧٠٠٠ جنيه مصري لحد ١٠٠٠٠ جنيه مصري، كمان متوسط أسعار أجهزة إكس بوكس مش بيختلف كتير فمثلًا جهاز Xbox One S سعره بيبدأ تقريبًا من ٧٠٠٠ جنيه مصري.

الميزة في المنصات إنها مش بس أرخص نسبيًا دي كمان مش هتحتاج تغيرها غير بعد خمس سنين على الأقل وده معناه إنك هتقدر تلعب كل الألعاب اللي هتصدر على الأقل في خلال خمس سنين من شرا الجهاز ولحد ما يظهر الجيل الجديد منه وده معناه إنك مش هتشيل هم تجديد أو ترقية أو توافق ألعاب خلال فترة طويلة.

على عكس أجهزة البلاي ستيشن والإكس بوكس صعب قوي إننا نحط سعر محدد لأجهزة الكمبيوتر ونقول إن الكمبيوتر الفلاني سعره هيبقى كده بالظبط، والسبب فيه إن تنوع مكونات الكمبيوتر بتخلي سعره يفرق، فالكمبيوتر بشكل رئيسي بيتكون من بروسيسور وكارت شاشة وماذر بورد تشيلهم ورامات تدعمهم وهارد ديسك لتخزين الألعاب وطبعًا باور سبلاي عشان يخلي كل ده يشتغل أصلًا، بس على الرغم من كده فيه شوية قواعد معروفة عن أسعار الكمبيوتر:

• الكمبيوتر الأولي إن صح التعبير وده سعره بيكون قريب من أرخص أجهزة كونسول موجودة وبيقدر يقدم الكفاءة نفسها أو أقل بشوية بس هتحتاج تطوره وترقية بأسرع وقت أو كل فترة قصيرة.
• الفئة اللي بعد كده اللي ممكن نسميها كمبيوتر اقتصادي وده بيكون أغلى شوية وبيقدم أداء أفضل شوية برضه بس ده كمان هتحتاج ترقيه على فترات قريبة.
• الكمبيوتر المتوسط وسعر تجميعه ممكن يوصل لحد ١٢ أو ١٣ ألف جنيه وده بيكون متميز جدًا في تشغيل ألعاب FHD وبيقدر يقوم ألعاب 2K لحد معين وممكن يعيش كم سنة على ما تحتاج ترقية.
• الكمبيوتر الأعلى وده سعره بيبدأ من ١٣ أو ١٤ ألف جنيه وده الأقوى على مستوى الكفاءة والأداء وبيقدر يشغل ألعاب 2K بجودة ممتازة ولو حطيت ألفين تلاته كمان هيقدر يشغل ألعاب 4K وصعب قوي تحتاج ترقيه لمدة كم سنة جايين.

ترقية الكمبيوتر وقت ما تحب من أهم الحاجات اللي بتميزة عن البلاي ستيشن لأنك بتحتاج كل فترة تشتري حاجة بعينها بدل ما تضطر إنك تشتري جهاز كامل لما ينزل، بس نفس فكرة الترقية اللي بتعتمد على فكرة وجود مكونات كتير جوه الكمبيوتر هي نفسها من بين عيوبه لأنه بيكون صعب إنك تحدد مكان الخلل في حالة وجود خلل.

من بين مميزات الكمبيوتر كمان إنك تقدر تستخدمه ككمبيوتر بشكل عام يعني تقدر تتفرج على أفلام وتشغل برامج وغيرها، بس كمان ماتنساش إن بالإضافة لسعر المكونات الداخلية فيه كمان ميزانية لشاشة كويسة وكيبورد وماوس وده بيعلي السعر المجمل للكمبيوتر.

مقارنة المميزات والعيوب

مميزات كمبيوتر الألعاب

• أداء استثنائي في القوة.
• جرافيكس أحسن.
• طرق كتير للحصول على الألعاب زي إنك تعملها داونلود أو تشتريها جديدة أو مستعملة.
• ألعاب كتير مستقله موجهة مخصوص للكمبيوتر.

عيوب كمبيوتر الألعاب

• أغلى بكتير لو عايز تجمع أفضل كمبيوتر ممكن.
• لو جمعت كمبيوتر أرخص شوية هتحتاج ترقيه كل فترة قصيرة.
• في ألعاب ممكن يكون أداءها ضعيف على الكمبيوتر بسبب اختلاف التوافق بين بعض المكونات.

مميزات البلاي ستيشن ومنصات الألعاب

• سعره أنسب من أجهزة الكمبيوتر.
• سهل في الإعداد والاستخدام.
• فيه ألعاب كتير بتكون مخصصة بس لأجهزة الكونسول.
• مش هتحتاج ترقية في فترة على الأقل خمس سنين.

عيوب البلاي ستيشن ومنصات الألعاب

• الألعاب الأقدم ممكن ماتشتغلش مع الكونسول الأحدث.
• أسعار الألعاب أغلى شوية من أسعار ألعاب الكمبيوتر.
• الأداء بشكل عام أقل من أجهزة الكمبيوتر كمان بيكون مخصص للألعاب بس مش لكل حاجة زي الكمبيوتر.

شوف عروض أسعار لابتوبات الألعاب المتوفرة على ياقوطة من هنا.

شوف عروض أسعار أجهزة البلاي ستيشن وملحقاتها المتوفرة على ياقوطة من هنا.

شوف عروض أسعار أجهزة إكس بوكس وملحقاتها الموفرة على ياقوطة من هنا.

اتعرف على عروض أسعار كل ما يتعلق بالألعاب من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.