كتبت: إيمان عادل

كتير مننا لما بييجي يشتري كبة بيحتار بين الماركات الكتير الموجودة في السوق، لكن نصيحة مني ما تستعجلش واسأل كويس عن الماركات دي وشوف أكتر حاجة مناسبة ليك وتقدر تعيش؛ وده لأن الكبة مهمة جدًا في مطابخنا وده عن تجربة. أنا شخصيًا ما اقدرش استغنى عنها لإني بطحن فيها جميع بهاراتي وبفرم فيها البصل وكمان العيش الفينو عشان اعمل بقسماط وحاجات تانية كتير قوي. جربت كبة كينوود وعشان كده حبيت أعرفكم بيها وأشارككم تجربتي معاها بحلوها ومرها.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

مواصفات

مميزات

• أحسن حاجة فيها إنها زي ما بيقولوا كده «ما بتقولش لأ»، يعني تقدر تفرم وتطحن أي حاجة ممكن تتخيلها، أنا عن نفسي مفيش يوم غير وبستخدمها فيه، وما اقدرش أتخيل وقفتي في المطبخ من غيرها، وده لأنها عملية جدًا وبتفرم كل حاجة، تقدر تستخدمها عشان تجرش التلج، تفرم بهاراتك عشان تكون واثق إنها مش مخلوطة بأي حاجة لو جبتها من عند العطار، تطحن المكسرات عشان ترشّها على الحلويات والأيس كريم، مش بس كده كمان كل الأمهات يقدروا يستخدموها في طحن الأكل للأطفال المولودين.

• الكبة من كينوود بتنجز جدًا في الوقت، يعني ضربتين تلاتة بالكتير فيها وتلاقي الحاجة اتطحنت طحن ناعم على الآخر.

• الكبة حجمها صغير يعني مش هتاخد مكان في مطبخك ولا هتحسسك بوجودها خالص، مش بس كده لو انت بتحب كل حاجة في مطبخك تكون بشكل عصري ومتميز فالكبة لونها أبيض بتصميم حلو قوي يعني هتفتح نفسك كل ما تيجي تستخدمها.

• أكتر حاجة بقى مخلياني شايفة إنها أحسن كبة استخدمتها وعمري ما أفكر أبدلها بأي حاجة تانية إنها بنظام الشفرات الرباعية، يعني مش بس سكاكينها حامية وهتضمن إن الحاجة تتفرم مظبوط، لأ كمان الموضوع ده بيخلّي الكبة تشتغل بسرعة شفرتين في نفس الوقت، والنتيجة بتكون مذهلة.. جرّب واحكم بنفسك.
• دلوقتي انت مش محتاج تتعذب وانت بتحط الأكل في الكبة أو يقع منك وانت بتطلعه؛ وده عشان الكبة تصميمها بيسهل الاستخدام وكمان تشغيلها بسيط، كل اللي هتعمله إنك تضغط عليها من تحت عشان تشتغل وأول ما تضغط على الغطا لتحت هتقف.
• ميزة الكبة بقى واللي مش موجود في جهاز تاني، إن معاها كل الملحقات اللي تخليك تطلّع أحلى مايونيز وكاتشب وأي نوع صلصة نفسك فيه، وكمان بيطلع بكثافة وتقل أحسن من بتوع بره.
• لو إيدك سايبة زي ما بيقولوا، فالكبة دي بالنسبة لك هتكون اختراع لأن هيكلها كله مصنوع من البلاستيك المقاوم للصدمات يعني وقع براحتك وما تخافش.
• بالنسبة للتنضيف فكل جزء فيها بيتفك ويتركب بسهولة وبعد التنضيف سهل إنك تركّبها تاني.

عيوب

• بالنسبة لي كان أوحش حاجة لقيتها في الكبة إن حجمها صغير، مع إنه بالنسبة لباقي الأنواع اللي في السوق حجم كويس، إلا إني كان نفسي تكون أكبر من كده عشان أقدر أعمل كميات من الصلصة والمايونيز في نفس المرة من غير ما أضطر أعمل كذا مرة.

ما بعد الشراء

• في الأول كنت خايفة ما الاقيش قطع غيار، بس بعد ما سألت عرفت إن الماركة متوفر ليها أماكن وفروع صيانة في حتت كتير.

ممكن تشوف كبة كينوود من هنا.

وممكن تلاقي ماركات تانية بسعر أقل من هنا.

لو جربت كبة كينوود أو منتجات تانية مماثلة يا ريت تعرّفنا رأيك وتشاركه معانا في كومنت.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.