كتب: خالد عاصم

إنك تمتلك تليفزيون سمارت دي أكيد حاجة بتفتحلك أفق جديدة ومختلفة من الاستمتاع والترفيه، فمن خلال أي تليفزيون سمارت باختلاف نوعه أو نظام تشغيله بتقدر تكون على اتصال بالإنترنت وبالتالي بتقدر تستخدم أي خدمة من خدمات البث المباشر زي نتفليكس وأمازون وغيرها من الخدمات التانية المختلفة. بس المشكلة إن النوع ده من التليفزيونات معروف بارتفاع أسعاره عن التليفزيونات العادية وأحيانًا بيكون فرق السعر بين أي تليفزيون سمارت وأي تليفزيون عادي زيه في القطر والمواصفات بيكون كبير جدًا بشكل ملحوظ بيخلينا للأسف نضحي بالإمكانيات الممتازة اللي بتقدمهلنا التليفزيونات الذكية مقابل إننا نوفر فرق السعر الكبير ده.

بس هل يا ترى الطريقة الوحيدة اللي نقدر نستمتع بيها بإمكانيات النوع ده من التليفزيونات هي بالضرورة إننا نشتري تليفزيون سمارت جديد؟ الإجابة لا، وفي طرق كتير تانية ممكن نحصل بيها على نفس الإمكانيات أو أقل شوية ونقدر من خلالها نحول أي تليفزيون عادي لتليفزيون ذكي بقدرة على الاتصال بالإنترنت والاستفادة بخدمات كتير جدًا ممكن نحصل عليها من خلال الاتصال ده.

في المقال ده هنستعرض كل الطرق المختلفة اللي بنقدر من خلالها نحول أي تليفزيون عادي إلى تليفزيون سمارت متصل بالإنترنت ومستفيد من كل الخدمات اللي بيقدمها التليفزيون الذكي، وفي خلال المقال هنعرض مجموعة من الأدوات اللي هتقدروا تطلبوها من خلالنا في ياقوطة وهتوصلكم بحد باب البيت أو مكان ما تحبوا بأسرع وقت ممكن.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

تحويل أي تليفزيون عادي إلى تليفزيون سمارت

زي ما قلنا فيه أكتر من طريقة نقدر من خلالها إننا نحول التليفزيون العادي إلى تليفزيون سمارت والطرق دي بتختلف من حيث عنصرين أساسيين، أولهم السعر وتانيهم الإمكانيات اللي بتتيحها الطرق دي واللي بتختلف من طريقة للتانية زي ما هنشوف خلال السطور الجاية من المقال.

استخدام أجهزة TV Box

أجهزة TV Box عبارة عن أجهزة ممكن نشبهها بالريسيفر والأجهزة دي بمجرد توصيلها لأي تليفزيون بتخليه تليفزيون سمارت فورًا من خلال إنها بحتوي على نظام تشغيل وقدرة على الاتصال بالإنترنت، وطبعًا طالما فيها نظام تشغيل فبيكون عليها عدد كبير من التطبيقات وكمان نقدر ننزل عليها تطبيقات تانية كتير نقدر من خلالنا نستغل كل الإمكانيات المتاحة والمتوافقة عبر الإنترنت.

 بيتم توصيل الأجهزة دي بالتليفزيون عن طريق منفذ HDMI اللي بيكون متوفر منه منفذين أو منفذ على الأقل في أي تليفزيون جديد، ولو تليفزيونك مفيهوش منفذ HDMI تقدر تشتري محول من HDMI إلى RCA وهي عبارة عن المنافذ التلاتة المعروفة والموجودة في أي تليفزيون بالألوان الأحمر والأصفر والأبيض، بعد التوصيل بتكون طريقة التشغيل عن طريق التليفزيون واحدة مع كل الأنواع، فكل اللي عليك إنك تمسك الريموت ومن زرار Source تختار منفذ HDMI اللي وصلت ليه جهازك ده طبعًا بعد ما تكون وصلت الجهاز بالكهرباء وشغلته عن طريق الريموت الخاص بيه، بعد ما تظهر شاشة جهاز TV Box هتقدر تتحكم فيه من خلال الريموت الخاص بيه.

دلوقتى هنتكلم عن مجموعة من أجهزة TV Box المختلفة المتوفرة في الأسواق وتقدروا تطلبوها من ياقوطة.

جهاز Apple TV

جهاز TV Box الأبرز اللي بتقدمه آبل واللي بيمتاز بقوة خارقة بفضل اعتماده على بروسيسور A10X Fusion اللي بيساعده إنه يعرض محتوى الفيديو بجودة 4K وبيدعم كمان تقنية HDR اللي بتخليك تستمتع بمشاهدة فيديوهات بجودة ممتازة وألوان واضحة وساطعة جدًا، والجهاز عليه نسخة خاصة من متجر آبل App Store بتقدر من خلالها تحمل كل التطبيقات اللي بتتضمن تطبيقات تشغيل فيديو وتطبيقات البث المباشر وكمان مجموعة من الألعاب، وبيمتاز الجهاز بريموت كنترول ذكي بتقدر من خلالها تتكلم مع المساعدة الذكية سيري.

شوف أسعار أجهزة Apple TV Box من هنا.

جهاز Amazon Fire TV Stick

أصغر أجهزة TV Box على الإطلاق واللي بتدعمه أمازون بمجموعة من الإمكانيات المتميزة زي البروسيسور القوي والذاكرة العشوائية اللي بتبلغ ٢ جيجابايت رام والذاكرة الداخلية سعة ٨ جيجابايت واللي ممكن تزيد لحد ٢٠٠ جيجابايت، الجهاز رغم صغر حجمه اللي بيخليه شبه الفلاشة شوية إلا أنه بيتميز بإمكانيات رائعة بتخليه يدعم الفيديو بجودة 1080p من خلال مجموعة كبيرة من خدمات البث، الجهاز عليه متجر تقدر من خلاله توصل لعدد ضخم من القنوات المختلفة وكمان أكتر من ١٢٠٠ لعبة.

شوف  أسعار Amazon Fire TV Stick من هنا.

جهاز Xiaomi Mi TV Box

جهاز رائع من Xiaomi بيدعم جودة الفيديو 4K وبيتميز بتقنية الاتصال اللاسلكي بلوتوث اللي بتخليك تقدر توصل دراعات الألعاب أو الريموت كنترول اللي بيتضمن كيبورد وماوس وكمان السماعات اللاسلكية وغيرها من الملحقات، الجهاز بيعتمد على بروسيسور رباعي النواة وراماته ٢ جيجابايت رام وبيعتمد على نظام تشغيل Android TV 6.0 اللي بيتضمن مساعد جوجل الذكي اللي بتقدر تتواصل معاه من خلال الريموت كنترول الذكي واللي بيتضمن كمان متجر جوجل بلاي اللي تقدر من خلاله تحمل أي تطبيق أو لعبة، الجهاز ده بيحول التليفزيون إلى تليفزيون سمارت كامل بيشتغل بنظام تشغيل أندرويد.

شوف أسعار Xiaomi Mi TV Box من هنا.

وهنا مجموعة من أجهزة TV Box التانية اللي بتختلف اختلافات بسيطة على مستوى الإمكانيات الداخلية وبتفق كلها على إنها بتشتغل بنظام تشغيل أندرويد تي في وبتتضمن متجر بلاي ستور اللي بيفتح أفاق كبيرة جدًا لتحميل كل تطبيقات البث المباشر.

شوف أسعار مختلف أجهزة TV Box من هنا.

استخدام Chromecast والأجهزة المشابهة

أجهزة كروم كاست والأجهزة الشبيهة اللي بتعتمد على تقنية DLNA أو ميراكاست أو Screen Mirroring كلها بتقوم بنفس الوظيفة وهي إنها بتنقل الصورة اللي شغالة على تليفونك أو على اللاب توب اللي بيدعم نفس التقنية للتليفزيون، وده بيحول تليفزيونك إلى تليفزيون سمارت بشكل غير مباشر أو بمعنى أصح بيخليه عبارة عن شاشة خارجية بتعرض اللي انت مشغله على الموبايل أو اللاب توب، والتقنية دي بتكون محدودة ببعض المحتوي يعني مش بتشغل كل الإمكانيات اللي بنقدر نحصل عليها من خلال أجهزة TV Box لكنها بتكون كافية لو الغرض الفعلي من الاتصال هو مشاهدة الفيديوهات أكتر من أي حاجة تانية.

أبرز الأجهزة دي هو جهاز Chromecast من جوجل واللي بيتوصل بالتليفزيون زي باقي الأجهزة عن طريق منفذ HDMI.

كمان في أجهزة تانية أرخص بتقوم بنفس المهمة تقدروا تشوفوها من اللينك الجاي، ودي بتكون أضعف شوية على مستوى السرعة وأحيانًا بيبقى فيها ضعف في سرعة الاستجابة في حالة تشغيل محتوى بجودة عالية أوي.

شوف أسعار Chromecast والأجهزة المشابهة من هنا.

استخدام الكمبيوتر

أبسط وأسهل طريقة ممكن تحول بيها تليفزيونك إلى تليفزيون سمارت هي إنك توصل الكمبيوتر بتاعك بالتليفزيون عن طريق كابل HDMI وعشان تقدر تحصل على أفضل صورة ممكن وأسرع استجابة ممكنة كمان، لازم تختار كابل HDMI كويس، وتقدر تستخدم الكمبيوتر بطريقتين، الطريقة الأولى هي توصيل اللاب توب وقت الحاجة لما تبقى بس محتاج إنك تستخدم شاشة كبيرة لأي غرض، والطريقة التانية إن يكون فيه ديسكتوب أو كمبيوتر مكتبي متوصل دايمًا بالتليفزيون وتقدر تستخدمه كجهاز كمبيوتر متكامل يخليك تشغل أي حاجة على شاشة التليفزيون ومن بينها الألعاب القوية لو جهاز الكمبيوتر بيدعمها.

شوف أسعار كابلات HDMI المتوفرة على ياقوطة من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.