كتب: عمر مدني

شركة Rockstar Games فاجئتنا في 2013 بلعبة Grand Theft Auto 5 أو زي ما هي معروفة GTA V واللي بتعتبر طفرة في عالم الألعاب وفي رأيي محظوظ جداً اللي لسه ملعبهاش حتى بعد 9 سنين من نزول اللعبة لأن اللعبة اتميزت بجرافيك وواقعية رهيبة جداً وسابقة عصرها ولما تلعب اللعبة هتحس إنها لسه نازلة من واقعية وجمال اللعبة ولحد دلوقتي تصنف من أفصل ألعاب الفيديو ، لو عايز تتعرف أكتر عن لعبة GTA V ، المقال ده ليك وما تقلقش من هنحرق عليك متعة اللعبة عشان تستمتع بيها، بس خلي بالك إن اللعبة ديه لا تصلح لأقل من 18 سنة غير بإشراف أبوي عشان فيها مشاهد عنيفة ومشاهد تانية غير مقبولة.

ماتنسوش إنكم لو قررتوا تشتروا لعبة GTA V هتقدروا تطلبوها من خلالنا في ياقوطة وهيوصلكم لحد باب البيت وكمان تقدروا تشتروا المنتجات دي بالتقسيط من خلال شهري أول وأسهل تطبيق للتقسيط في مصر واللي مش بيحتاج منك غير صورة البطاقة وصورة إيصال مرافق وبس، ومن غير زيارة ولا ضامن واستمتع كمان بتوصيل مجاني لكل مشترياتك من خلاله.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

التعريف بشخصيات اللعبة الأساسية

• أول مشهد في اللعبة هتحس إنت مش فاهم أي حاجة لأن أول ما بتفتح اللعبة هتدخل على إن في 3 أشخاص بيسرقوا بنك في مدينة إسمها North Yankton في سنة 2004، ولكنها هي بداية القصة هتعرف في المهمة ديه إن 3 أشخاص دول اسمهم Michael Townley  و Trevor Philips ركزوا مع الإسمين دول والتالت مش مهم أوي وهو اسمه Brad Snider ومش مهم عشان هيموت في أول مهمة ، هتفشل عملية السرقة وينتج عنها إن براد هيتقتل من الشرطة وتريفور هيقدر يهرب ومايكل كان عامل مؤامرة على الإتنين التانين مع البوليس عشان يتقبض عليهم ويهرب هو بالفلوس ويبدأ حياة جديدة، فبالنسبة لتريفور مايكل وديف ماتوا لكن الحقيقة مايكل هرب لمدينة Los Santos مع مراته أماندا وبنته تريسي وإبنه جيمي ويقرر يعيش حياة هادية بعيدة بعيدًا عن السرقة والعصابات فبكده مايكل بقى حرامي بنوك معتزل من 9 سنين بعد مهمة بنك نورث يانكتون وعايش في لوس سانتوس تحت اسم جديد وهو Michael De Santa.
• تاني شخصية من شخصيات اللعبة الأساسية هو Franklin ، فرانكلين شاب من مدينة Strawberry وكان فرد من أفراد عصابة Groove Street لو نرجع بالزمن للعبة GTA San Andreas ونفتكر شخصية CJ أعظم شخصية من شخصيات سلسلة GTA وعصابة جروف ستريت، المهم ظهرت على الإنترنت اشاعات بتقول إن فرانكلين بيكون إبن CJ لكن في اللعبة مظهرش أي حاجة فعلية بتثبت ده ، وبعد ما ساب جروف ستريت بقى بيشتغل حرامي عربيات لمتجر عربيات في لوس سانتوس واللي هيدخله في قصة اللعبة إنه هيسرق عربية من مايكل دي سانتا.
• أما الشخص التالت والأخير هو Trevor Philips وهو شخص مجنون وعصبي وعنده دايما رغبة وحشية في القتال والانتقام وكان بيشتغل طيار في الجيش قبل ما يعمل شيفت كارير في المخدرات وتكوين عصابة مع مايكل وبراد، فضل تريفور بعد مهمة نورث يانكتون ب9 سنين فاكر إن مايكل مات في العملية ميعرفش إنه غدر بيه لحد ما هيعرف بالصدفة من التليفزيون إنه عايش ونقل وغير اسمه.

قصة اللعبة بدون حرق

• سنة 2013 هتشهد عودة أكبر سارق بنوك متقاعد وهو مايكل دي سانتا بعد ما إكتشف إن مراته أماندا بتخونه مع مدرب التنس فهيطارده هو وفرانكلين لحد ما يوصلوا لبيت المدرب ويكسروا البيت عليه ويفتكروا الموضوع خلص لكن اللي هيسببلهم مشاكل هو إن البيت الي دخله المدرب ده بيت يرجع لرجل أعمال ليه نفوذ كبيرة جداً إسمه مارتين مادرازو هيطلب تعويض من مايكل أو إنه يسببله مشاكل كبيرة والتعويض ده كان 5 مليون دولار، وطبعا مايكل مش معاه المبلغ ، فمبقاش في حل ليه غير إنه يرجع للسرقة بمساعدة رجل المهام والعقل المدبر ليستر ومساعدة فرانكلين وباقي أفراد العصابة عشان يسرقوا محل مجوهرات وهتتم العملية بنجاح ويرد لمادرازو فلوسه وهيسمع عن عمليه السرقة ديه تريفور اللي كان معتقد إنه مات وهيزيد جنونه ويقرر يدور عليه في لوس سانتوس ويوصله عشان يعرف الحقيقة أولاً تاني حاجة محاولة للإنتقام ، هيجمع التلات شخصيات مهمات كتير لحد ما يوصلوا لنهاية اللعبة هتديلك تلات نهايات وإنت تختار بشخصية فرانكلين ، تقتل مايكل لأنه السبب في المشاكل الي بيمر بيها فرانكلين، ولا تقتل تريفور اللي لسه بيهدد حياة مايكل والنهاية التالتة تعمل تحالف من جديد بين الـ3 شخصيات وتحارب كل أعدائهم وديه النهاية الأفضل عشان تقدر بعد ما تختم اللعبة تلعب المهمات الجانبية لكل شخصية.

مميزات اللعبة

• اللعبة بتوفرلك نظامين وهما نظام Story Mode واللي بتقدر تختم اللعبة منه، و Online Mode وده تقدر تلعبه مع أصحابك وتعملوا مهمات سوا.
• الجرافيك والواقعية في اللعبة حقيقي من أحسن الألعاب الي ممكن تشوفها.
• العربيات وتجربة سواقة حقيقية وممتازة جداً.
• تقدر تشتري عربيات أو بيوت أو مراكب وتتصفح الإنترنت من الموبايل أو اللابتوب في اللعبة.
• اللعبة تعتبر من ألعاب العالم المفتوح وعندك خريطة كبيرة جداً وفي وسائل تنقل زي الطيارات والقطار لو مش عايز تسوق مسافة كبيرة.
• بتقدر تتنقل في شخصيات الأساسية للعبة وتتحكم فيهم زي ما انت عايز.
• تفاعل الشخصيات زي إنك تقدر تزود مهاراتهم وقدراتهم، زي ما بتقدر تختار هدومهم وعربياتهم وتتحكم زي ما انت بتحب.
• اللعبة في مهمات كتير بتديلك حرية اختيار تكنيك التسلل والهجوم في تخطيط عمليات السرقة وبتوفرلك كذا شكل لنهاية اللعبة.
• قصة وأحداث اللعبة والشخصيات حقيقة إبداع من روك ستار زي إن يوصل بيك الحال تتعاطف مع مجرم ومهرب وتعيش الأحداث بواقعية كبيرة.

عيوب اللعبة

• GTA V تعتبر لعبة غير مناسبة لأي حد أقل من 18 سنة ، لأنها بتحتوي على مشاهد عنف ومشاهد غير لائقة وأماكن مش مناسبة للأطفال زي Night Club أو وجود prostitute (فتيات ليل بمقابل مادي) في كل شوارع المدينة ، ومشاهد تريفور وهو يهشم جمجمة أعدائه، مش أحسن شيء للأطفال.
• في مزايا كانت موجودة في GTA 4 وSan Andreas مش موجودة حالياً زي لو روحت الجيم البطل عضلاته بتزيد ولو كل كتير بيزيد في الوزن ويتخن وتفاصيل صغيرة كانت في GTA 4 زي لو ضربت نار على كاوتش العربية بيفضى الهوا الي فيه بشكل واقعي أكتر من GTA 5 وغيرها من التفاصيل البسيطة.

متطلبات تشغيل اللعبة

• بالنسبة للكونسول فاللعبة متاحة من أول PS3 و X-box 360.
• أما للـPC فيكون الحد الأدنى من متطلبات التشغيل هي:

1. نظام التشغيل: Windows 10 64 Bit، Windows 8.1 64 Bit، Windows 8 64 Bit، Windows 7 64 Bit Service Pack 1
2. المعالج: Intel Core 2 Quad CPU Q6600 @ 2.40GHz (4 CPUs) / AMD Phenom 9850 Quad-Core Processor (4 CPUs) @ 2.5GHz
3. الذاكرة: 4 جيجابايت رام
4. الرسومات (كارت الشاشة): NVIDIA 9800 GT 1GB / AMD HD 4870 1GB (DX 10 ، 10.1 ، 11)
5. التخزين: 107 جيجا بايت مساحة متوفرة
6. بطاقة الصوت: 100٪ متوافق مع DirectX 10

السعر

تقدر تشوف لعبة Grand Theft Auto V من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن الكاتب

عمر مدني، تقريباً أنا أصغر مراجع تكنولوجيا في مصر، سني 20 سنة طالب وبدرس تكنولوجيا حيوية وجيمر ومحب للتكنولوجيا ، بدأت شغل في موقع Mobihall  من عام 2019، وليا مقالات على موقع Mobilesgateلأني إشتغلت فيه فترة في السنة الي فاتت وكان لشغفي دور كبير في اختيار مجال التكنولوجيا وبستنى كل جديد عشان أعرف عنه أكتر، أتمنى أكون نلت إعجابكم.