دليل ياقوطة لاختيار أفضل جهاز بروجيكتور بالأسواق
كتبت: منى عوض
البروجيكتور أو أجهزة العرض بقت منتشرة من فترة في كتير من النوادي والكفايهات، وفيه بعض الناس بتعتمد عليها كمان في البيوت. وفي ظل التنوع وكثرة المميزات اللي بتتميز بيها أجهزة البروجيكتور هنلاقي إن فيه ناس كتير بتحتار وبتتلغبط ومش بتعترف تشتري أيه بالظبط أو تختار بناءا على أيه.
عشان كده ياقوطة هتساعدكم النهارده وتقدم دليل بسيط لأهم النقط اللي مهم نفكر فيها ونخليها في بالنا لما نيجي نشتري جهاز بروجيكتور، وتقدروا تعرفوا وتختاروا الجهاز المناسب ليكم من خلالنا وتعرفوا أفضل لأسعار ليه وتطلبوه من خلالنا وهيوصل لغاية عندكم في أسرع وقت.
*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.
تعريف البروجكتور
خلينا نوضح في الأول إن البروجكتور هو جهاز عرض البيانات من خلال الكمبيوتر أو التليفزيون أو كاميرا فيديو على شاشة عرض كبيرة أو على حائط أبيض، يعني هتقدر تستخدمه في عرض الصور أو الفيديوهات وفي المحاضرات وفي الأغراض العملية أو الأغراض الترفيهية زي عرض الأفلام عشان تقدر تخلق جو زي السينما وهكذا.
معايير اختيار البروجكتور
دقة ووضوح عرض الصور على البروجكتور Resolution
دقة العرض واحدة من أهم الأشياء اللي من الضروري التركيز فيها جدًا لأن جودة الصور أو الحاجات اللي إنت عايز تعرضها من خلال البروجيكتور هيتوقف عليها، وهي بتقاس بوحدة البكسل، وبالتالي مهم وإنت بتشتري البروجكتور تشوف أعلى دقة ممكنة للحصول على أفضل جودة عرض لأنه كلما زاد عدد البكسل كلما كانت تفاصيل الصورة أفضل.
مستوى سطوع البروجكتور Brightness Level
مستوى سطوع البروجكتور بيقاس بوحدة اللومنز وبيختلف حسب شدة الإضاءة المحيطة، يعني لو كانت شدة الإضاءة في المكان اللي هتستخدم فيه البروجكتور عالية هتلاقي إنك محتاج درجة سطوع أعلى ولو كانت شدة الإضاءة منخفضة هتلاقي أنك مش محتاج بروجكتور بدرجة سطوع عالية لأن البروجيكتور عادة مش بيواجه أي صعوبة في عرض صور كويسة في الإضاءات المنخفضة.
نسبة التباين Contrast Ratio
نسبة التباين مقصود بيها النسبة بين الأجزاء السوداء والبيضاء اللون في الصورة، ولازم تعرف إنه كلما زادت نسبة التباين في الصورة كلما كانت جودة الصور أفضل ودرجة تباين ألوانها أفضل خاصة الأبيض والأسود.
نسبة الإسقاط Throw Ratio
نسبة الإسقاط بتحدد حجم المسافة المناسبة بين البروجكتور عن شاشة العرض أو المكان اللي هيتعرض عليه الحاجة، ولازم تعرف إن لو المكان اللي هتستخدم فيه البروجكتور صغير ومش هتقدر تسيب مسافة كبيرة بين شاشة العرض والبروجيكتور يبقى إنت في الحالة دي هتحتاج بروجكتور بيتمتع بنسبة إسقاط أقل.
عدسة التكبير Zoom Ratio
عدسة التكبير بتعمل على تكبير حجم الحاجة اللي معروضة بدون الحاجة إلى تقريب أو إبعاد البروجيكتور من الحائط أو شاشة العرض.
خاصية التصحيح التلقائي Keystone Correction
التصحيح التلقائي للعدسة خاصية مهمة جدًا ومن الضروري التأكد أن البروجكتور بيدعمها لأنها بتعمل على تصحيح طريقة عرض الصورة وجعلها تتخذ شكل مربع مهما كانت الزاوية اللي إنت حاطط فيها البروجكتور، وده بيسهل من استخدام البروجكتور جدًا فبعد ما كنت بتضطر وتتعب في ظبط زوايا العرض دلوقتي بقت تتم بشكل تلقائي.
عمر مصباح البروجكتور الافتراضي
اتأكد أن البروجكتور بتاعك جديد وتقنياته حديثة لأن أجهزة البروجكتور القديمة كانت بتشتغل من خلال لمبة إضاءة بتحتاج تتغير كل فترة وكانت تكلفة اللمبة دي عالية جدًا، بس الأجهزة الحديثة بقت تعتمد بشكل كبير جدًا على شرائح LED اللي بتشتغل لآلاف الساعات ولو احتجت تغيرها في أي وقت هتلاقي إن تكلفتها بسيطة جدًا جدًا.
عدد المنافذ
يفضل دايمًا اللجوء إلى أجهزة البروجكتور ذات المنافذ المتعددة عشان تقدر تناسب احتياجاتك المختلفة في المستقبل.
كمان منفذ HDMI بيُعتبر منفذ مهم جدًا لأنك هتقدر من خلاله توصل البروجيكتور بأجهزة الحاسوب الهواتف الذكية وأجهزة الألعاب وما إلى ذلك، أما منفذ USB فهيسمحلك بتوصيل كروت الذاكرة الخارجية والهاردات الخارجية والفلاشات الخارجية بالبروجكتور لعرض أي محتوى أنت عايزه.
وفيه كمان منفذ VGA اللي هيسمحلك بتوصيل البروجكتور بأجهزة الحاسب الآلي القديمة، أما منفذ RCA/AV فبيُعتبر وجوده مهم لأنه هيسمحلك بعرض أي حاجة من أجهزة الفيديو والريسيفرات والكاميرات وما إلى ذلك.
ممكن تشوف 6 من أفضل أجهزة البروجكتور المتاحة على ياقوطة من هنا.
*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.
عن كاتب المقال
منى عوض، كاتبة بقالي أكتر من سنتين، بكتب عادة عن التكنولوجيا اللي بقت جزء لا يتجزأ من حياتنا اليومية، وبحب دايمًا أني أقرأ وأدور كويس جدًا عن كل حاجة قبل ما أكتب عنها عشان أكون متأكدة من كل معلومة بكتبها ولو حسيت أن المعلومات اللي لاقيتها على الإنترنت مش كافية ببدأ أنزل وأسأل سواء أشخاص جربوا الحاجة دي أو في الأماكن اللي بتكون متخصصة في بيع الحاجة اللي بكتب عنها.