كتب: خالد عاصم

زمان كان البوتاجاز ليه شكل واحد تقريبًا ونوع واحد تقريبًا، فهو بيشتغل بالغاز سواء بالأنابيب أو بالغاز الطبيعي، وكان ليه شكل محدد مصنوع من نوع واحد من المعدن وبإمكانيات بدائية جدًا. بس دلوقتي زاد عدد أشكال وموديلات البوتاجاز بشكل كبير جدًا ممكن يتسبب في حيرة كبيرة لما تيجي تشتري بوتاجاز جديد خصوصًا إن الأنواع والموديلات تنوعت بشكل كبير، فبقى عندنا الغاز والكهرباء وعندنا أنواع مختلفة من الأفران وعندنا تصاميم متنوعة عن التصميم الأصلي القديم ده غير إن بقى فيه بوتاجازات ديجيتال وبتتوصل بالإنترنت، وكل ده هيخليك تقف كده أدام صف البوتاجازات في أي محل كبير وانت مش عارف تختار إيه بالظبط.

بس القضاء على الحيرة دي أمر سهل جدًا، خصوصًا إننا قررنا نخلي الصعب علينا والسهل عليك، فاحنا في المقال ده هنعرف كل حاجة ليها علاقة بالبوتاجاز وإيه هي أنواعه وأشكاله وموديلاته وإزاي تختاره، وانت عليك إنك تقرا المقال ده ومن خلال النصايح اللي فيه تقرر انت محتاج إيه وبالتالي بكل سهولة تقرر إيه البوتاجاز الأنسب ليك.

ماتنسوش إنكم لو قررتوا تشتروا بوتاجاز جديد هتقدروا تطلبوه من خلالنا في ياقوطة وهيوصلكم لحد باب البيت وكمان تقدروا تشتروا المنتجات دي بالتقسيط من خلال شهري أول وأسهل تطبيق للتقسيط في مصر واللي مش بيحتاج منك غير صورة البطاقة وصورة إيصال مرافق وبس، ومن غير زيارة ولا ضامن واستمتع كمان بتوصيل مجاني لكل مشترياتك من خلاله.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

دليلك الكامل لكيفية شراء البوتاجاز الجديد

قبل ما نتكلم عن كيفية شراء البوتاجاز المناسب لاحتياجاتك، محتاجين الأول نحدد مجموعة من المسميات والمصطلحات عشان تبقى كل حاجة في المقال محددة وواضحة من البداية، والمصطلحات دي متعلقة بتكوين البوتاجاز بشكله اللي نعرفه حاليًا:

• الفرن Oven، وده الجزء السفلي من البوتاجاز واللي بيستخدم في الخبز أو الشوي أحيانًا، وده بيكون جزء من البوتاجاز وأحيانًا بيكون جهاز منفصل ممكن شراءه لوحده خصوصًا في المطابخ المدمجة اللي الأجهزة بتتحط فيها جوا خشب المطبخ
• الشعلات أو سطح البوتاجاز Stovetop/Cooktop، وده الجزء العلوي من البوتاجاز المكون من عدد من الشعلات وبيستخدم في الطبخ والتحمير وخلافه وده كمان بقى متاح للشراء منفصل دلوقتي وفيه منه أنواع زي الفرن بالظبط
• البوتاجاز الكامل Range/Stove، وده البوتاجاز العادي الموجود في بيوتنا اللي بيضم الجزئين الأول والتاني اللي اتكلمنا عنهم فوق

أنواع البوتاجازات

باختلاف أنواع البوتاجازت وعدد الشعلات وإمكانيات البوتاجاز بتختلف كمان أسعارها، وعشان كده أول حاجة انت محتاج تعرفها هي أنواع البوتاجازت، وأول فروق بتحدد أنواع البوتاجازات هي كيفية مدها بالطاقة أو طريقتها في التسخين، أما تاني الفروق فهي تصميم البوتاجاز نفسه وده بيتوقف على طبيعة مطبخك والمساحة المخصصة للبوتاجاز في مطبخك، وكل ده هنتعرف عليه دلوقتي.

البوتاجاز الكهربائي Electric Cooking Ranges

البوتاجاز الكهربائي هو عبارة عن بوتاجاز بيتضمن عنصر حراري بيعتمد على تحويل الطاقة من الكهربائية إلى الحرارية وكانت الأنواع التقليدية أو القديمة منه بيكون ملف التسخين فيها ظاهر، بس الأنواع الجديدة بقت بتتضمن عناصر تخين مخفية أسفل سطح البوتاجاز اللي بيتميز بنعومة ملمسه وسهولة تنضيفه، والنوع ده منتشر جدًا في البوتاجازات المسطحة اللي من غير فرن وبيكون في الحالة دي أرخص من البوتاجازات المسطحة اللي بتشتغل بالغاز، وفي جميع الأحوال بيكون تركيبها سهل لأنك مش محتاج شركة غاز أو عامل متخصص يركبلك وصلات الغاز، بس النوع ده وخصوصًا الكلاسيكي منه بيكون أبطأ في الطبخ والتسخين مقارنة بالغاز ده غير إنه بيستهلك كهرباء عالية جدًا وفي حالة انقطاع التيار مش بيشتغل طبعًا.

بوتاجازات Induction Cooking Ranges

النوع ده هو الأحدث والأغلى وبيعتمد في تشغيله على مرور تيار كهربائي بيمر في مجال مغناطيسي عشان يقوم بالتسخين، وللطريقة دي مميزات كتير منها أولها إنه مش بيسخن النطاق المحيط بيه وده بيخليه أمن للأطفال والحيوانات الأليفة وكمان صديق للبيئة، أما الميزة التانية فهو السرعة، فعشان تغلي شوية مياه عليه هتستهلك نص الوقت اللي بيحتاجه بوتاجاز الغاز أو الكهرباء، أما عيوبه فهي ارتفاع سعره واحتياجه لادوات طبخ وتسخين معينة وكمان صوته عالي شوية مع بداية تشغيله.

بوتاجازات الغاز Gas Cooking Ranges

النوع الأوسع انتشارًا والأشهر واللي غالبًا موجود في مطبخك دلوقتي فعليًا، والنوع ده بيعتمد على التسخين من خلال إشعال الغاز اللي بيخرج من أنابيب مخصصة سواء في البوتاجاز من فوق أو داخل الفرن، والنوع ده بيتميز بسرعته وإنه بيقوم بعملية التسخين بشكل متساوي للحاجة اللي محطوطه عليه أو جوا الفرن وكمان فيه تنويع كبير في أنواع الشعلات، ده غير إنه بيشتغل في أي وقت حتى لو الكهرباء مقطوعة لإنه مش بيعتمد على الكهرباء غير في حالات معينة ومنها تشغيل الإشعال الذاتي أو تشغيل الشواية أو تشغيل المروحة والإضاءة الخاصة بالفرن، بس ده طبعًا بيحتاج إنه يكون فيه خط غاز طبيعي أو إنك تشتري أنبوبة بوتاجاز، وطبعًا لازم تاخد بالك من عدم انطفاء الشعلة من غير قفل الغاز.

البوتاجازات مزدوجة الطاقة Dual Fuel Cooking Ranges

النوع ده بقى بيعتمد على النوعين الأساسيين من الطاقة، الغاز اللي بيشغل الشعلات والكهرباء اللي بتشغل الفرن، وده هدفه توفير تنوع في استهلاك الطاقة وكمان بيقدر يحافظ على درجة الحرارة بشكل كويس مع التسخين السريع يعني بيقدر يقدم الأفضل من العالمين، بس ده طبعًا معناه إن سعره بيكون أعلى من النوعين واحيانًا أعلى منهم مجتمعين.

أنواع تصميم البوتاجازات

زي ما بتختلف البوتاجازات من حيث نوع الطاقة المستخدمة في تشغيلها فهي كمان بتختلف على مستوى تصميمها.

البوتاجازات المستقلة Freestanding Range

وده النوع المعتاد اللي عشنا واتربينا واحنا شايفينه قدامنا وبنشوفه لحد دلوقتي في أغلب بيوتنا، والنوع ده بيكون متصمم عشان يتحط في أي مكان في المطبخ يعني مش من الضروري إنه يكون داخل خشب المطبخ أو ما بين جهازين بشكل معين، وعشان كده فتصميمه بيكون مهتم بالشكل الخارجي من كل الجانبين، والنوع ده بيكون إما غاز أو كهرباء وغالبًا بتكون بكرات أو أزرار التشغيل أمامية وأحيانًا بتكون علوية في بعض البوتاجازات الجديدة.

بوتاجازات Slide-In Range

وده نوع بيكون مصمم عشان يتحط جوا خشب المطبخ وعشان كده مابتكونش الجوانب واخدة نفس التصميم النهائي للبوتاجاز بشكل عام لإنها مش بتكون باينة، وكمان بيكون ضهر البوتاجاز ملاصق للحيطه وعشان كده بيكون منتشر أكتر بالكهرباء مش بالغاز، وعلى الأغلب بتكون عناصر التحكم علوية مش أمامية.

المسطحات والأفران

ودي الأنواع اللي بيكون البوتاجاز فيها منفصل عن الفرن وممكن شراء كل واحد منهم على حدا وده مصمم عشان يبقى مدمج في تصميم المطبخ ومش بالضرورة يكون البوتاجاز والفرن موجودين في نفس المربع وده بيكون مناسب جدًا للمطابخ الكبيرة والعصرية زي ما بنشوف كده في برامج الطبخ في التليفزيون، وعلى الأغلب النوع ده بيعتمد على الكهرباء أكتر من الغاز.

عوامل اختيار البوتاجاز المناسب

بعد ما عرفنا أنواع البوتاجازات جيه وقت معرفة العناصر الأساسية والأهم في اختيار البوتاجاز المناسب، والعناصر دي أولها المساحة اللي هتحط فيها البوتاجاز واللي بتحدد مساحة ومقاس البوتاجاز نفسه، وكل اللي عليك عشان تحدد العنصر ده إنك تختار المكان المناسب وعلى أساسه كده هتختار أولًا نوع تصميم البوتاجاز من الأنواع اللي اتكلمنا عنها، وهتعرف كمان مساحة البوتاجاز نفسه لو قررت تجيب بوتاجاز مستقل، فالبوتاجاز الأربعة شعله بيكون أصغر في حجمه من الخمسة شعلة وهكذا.

تاني حاجة مهمة هي طبيعة استخدامك للبوتاجاز، يعني لو انت طباخ جامد وبتعمل عزومات بقى كل شوية فهتحتاج طبعًا بوتاجاز بخمسة شعلة على الأقل وهتحتاج فرن كبير وإمكانيات تكون قوية، أما لو الموضوع بالنسبالك قلي وتسخين والكلام ده بس فممكن تتنازل عن كتير من الإمكانيات دي وممكن تختار حجم صغير وممكن أصلًا تجيب مسطح وفرن صغير.

كمان لازم تاخد بالك من الطاقة اللي هتعتمد عليها، هل الأنسب ليك ولميزانيتك اختيار بوتاجاز غاز لا كهرباء ولازم تفهم مزايا وعيوب كل نوع، ومن هنا لازم تهتم بإمكانيات البوتاجاز نفسه زي فيه شواية ولا لا ومدى عمليتها، هل فيه حماية للأطفال ولا لا، هل ضمانه كويس ومراجعات الناس ليه كويسه ولا فيه شكاوى كبير منه وهكذا.

اتعرف على عروض أسعار البوتاجازات المتوفرة على ياقوطة من هنا.

اتعرف على عروض أسعار مختلف الأجهزة المنزلية المتوفرة على ياقوطة من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.