كتبت: منى عوض

الجو بقى فيه لسعة برد ممتعة، وده دليل على إن الشتاء خلاص على الأبواب، ولازم يكون فيه منقذ من الجو البارد وكتير من الناس بتعتمد على الدفاية، ده طبعًا بجانب الهدوم التقيلة والمشروبات الساخنة اللذيذة.

وبما إن دفايات الزيت فيه منها أنواع وموديلات كتير في السوق،هنقدملك من خلال ياقوطة دليلك الأمثل لاختيار دفاية الزيت المناسبة.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

الخبراء أكدوا كتير جدًا على إن دفايات الزيت هي أفضل دفاية ممكن أي حد يستخدمها لأنها بتقدر تقدم العديد من المميزات لمستخديمها، زي:

• استهلاك الكهرباء بمعدلات أقل يعني مفيش قلق من الفواتير.
• بتشتغل بهدوء ومش بتسبب أي ازعاج وهي شغالة.
• من السهل نقل دفايات الزيت من مكان لآخر، ده لأنها بتكون مزودة عادة بعجلات لدفعها.
• دفايات الزيت آمنة تمامًا خصوصا على الأطفال، ده لأنها بتفصل بمجرد وصول الغرفة لدرجة حرارة معينة وبالتالي توفير مزيد من الكهرباء وتحقيق درجة أمان عالية.
• إمكانية الاختيار بين مستويات مختلفة لدرجات الحرارة.
• النوع ده من الدفايات بيشتغل من خلال تسخين الزيت الموجود في ريشها كهربائيًا وبالتالي تدفئة الغرفة، مع العلم إن الزيت بيحافظ على درجة حرارته الدافية لفترة زمنية طويلة.

وطبعًا زي ما كل حاجة في الدنيا ليها مميزات بيكون ليها عيوب، أكيد الدفايات الزيت ليها عيوب أيضًا، ومن بين العيوب دي:

• مش بتقدر تدفي درجة حرارة الغرفة الموجودة فيها بنفس سرعة الدفايات الكهربائية الأخرى.
• حجمها أحيانا بيكون كبير.
• الدفاية الزيت لازم تتحط في مكان قابل للتهوية لتجديد هواء الغرفة بصفة مستمرة.

 وبعد المميزات والعيوب هتلاقي ناس كتير بتسأل نفسها طيب إزاي اختار دفاية الزيت المناسبة؟؟ .. عشان كده ياقوطة هتوضح شوية نقط من الضروري وضعها في الحسبان خلال عملية شراء الدفايات.

أولًا: المساحة

حجم الغرفة أو المكان اللي عايز أحط فيه الدفاية بيحدد بشكل أكبر مقدار الطاقة اللي هكون محتاجها من الدفاية، فكلما زادت مساحة الغرفة كلما زادت الحاجة لمزيد من الطاقة.

ثانيًا: السلامة

خطوة السلامة والأمان مهمة جدًا وهو عنصر من الممكن تحقيقه من خلال التأكد إن الدفاية اللي بنشتريها فيها مستشعر بيساعد في فصل الدفاية بمجرد وصولها لدرجة حرارة معينة.

ومن الممكن التأكد كمان من وجود صمام أمان بيساعد في وقف عمل الدفاية إذا اتعرضت للميل أو وقعت بشكل مفاجئ.

ثالثًا: المؤقت

الدفاية مع المؤقت بتُعتبر أكتر جهاز مثالي للاستخدام في الوجود، ده لأن المؤقت بيساعد في تحديد وقت معين لتشغيل الجهاز بصفة مستمرة أو وضع وقت محدد مسبقا لتشغيل الجهاز لمدة محددة أو تحديد أوقات متعددة لتدفئة الغرفة في الأوقات المختلفة دي.

رابعًا: مفاتيح تحكم في درجة الحرارة

يفضل طبعًا إن الدفاية تكون بتتميز بوجود مفتاح للتحكم في درجة الحرارة، لأن المفتاح ده بيساعد في الحد من الاستهلاك الكبير للتيار الكهربائي، وبالتالي راحة بال كبيرة جدًا وعدم خوف من فواتير الكهرباء.

خامسًا: جهاز التحكم عن بعد

الموضوع هنا بيتوقف عليك يعني بتفضل دفاية بجهاز تحكم عن بعد يريحك ويخليك تتحكم في الدفاية من بعيد ولا مش فارق معاك الموضوع.

سادسًا: السلك الكهربائي

يفضل إن طول السلك الكهربائي بتاع الدفاية ما يزيدش عن ٢ متر ومايقلش سمكه عن ٢٫٥ مم وده عشان يحقق أعلى درجة أمان وسلامة بالنسبة للأفراد الموجودين في المكان خاصًة الأطفال.

رأي الخبراء

وعشان نقدر نفهم أكتر عن الدفايات كان لازم نسأل الخبراء، ومن هنا قررنا إننا نسأل المهندس محمد الدالي عن أهم الحاجات اللي المستخدم لازم ياخد باله منها وهو بيشتري الدفاية الزيت عشان مايتعبش وهو بيستخدمها بعد كدا وعشان يقدر يجيب أكتر حاجة مناسبة فعلًا ليه ومريحة بالنسبة ليه، وكان رده كالآتي:

• لازم يكون مقدار الطاقة “الوات” بتاع الدفاية متناسب مع المساحة الموجود فيها الدفاية يعني لو المساحة كبيرة لازم يكون الوات بتاع الدفاية كبير ولو المساحة صغيرة يكون الوات صغير وهكذا.
• لازم يكون في الدفاية عوامل سلامة زي أنها تفصل لما تقع وتفصل لما توصل لدرجة حرارة معينة.
• خامات صنع الدفاية لازم تكون عالية الجودة عشان تقدر تعيش عمر أطول.
• ماركة الدفاية لازم تكون معروفة عشان توفر خدمة مريحة لما بعد البيع.

شوف موديلات الدفايات المختلفة من هنا.

شوف دليل شراء الدفايات الكهربائية.

شوف قائمة بأهم مواصفات الدفايات من هنا.

شوف أهم النصائح اللي ياقوطة بتقدمهالك عشان تقدر تتمتع بشتاء دافئ في البيت.

من الممكن كمان إنك تستمتع بشتاء دافىء مع خمس منتجات على ياقوطة.

ودي بقى نصائح ياقوطة للتغلب على أضرار الأجهزة المنزلية الكهربائية المهمة.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

منى عوض، كاتبة بقالي أكتر من سنتين، بكتب عادة عن التكنولوجيا اللي بقت جزء لا يتجزأ من حياتنا اليومية، وبحب دايمًا أني أقرأ وأدور كويس جدًا عن كل حاجة قبل ما أكتب عنها عشان أكون متأكدة من كل معلومة بكتبها ولو حسيت أن المعلومات اللي لاقيتها على الإنترنت مش كافية ببدأ أنزل وأسأل سواء أشخاص جربوا الحاجة دي أو في الأماكن اللي بتكون متخصصة في بيع الحاجة اللي بكتب عنها.