كتبت: يارا الحميلي

بالإضافة للكاري كوت و سرير الأطفال، من أهم الحاجات اللي الأب والأم كتير بيفكروا يشتروها قبل ما البيبي ييجي هو كرسي العربية الخاص بالأطفال. وطبعًا مع كل الأحجام والأشكال المتنوعة لكراسي العربيات، ممكن الواحد يتوه ومايعرفش إيه المناسب لطفله ولاحتياجات الأسرة، بالذات إن الكرسي مش بيبقى ثابت وبيتغير كل ما الطفل يكبر.

وعشان نشيل الحيرة دي ياقوطة عملتلك دليل شامل عشان تساعدك بيه تعرف احتياجاتك وإيه اللي يناسبها من أنواع الكراسي المختلفة، وتعرف مواصفات ومزايا وعيوب كل نوع قبل ما تشتري. وكمان من خلال الدليل ده هتعرف ليه مهم تشتري كرسي للعربية للبيبي، وعشان فيه آباء كتير بيشتكوا إن ولادهم مش بيرضوا يقعدوا في الكرسي ودايمًا بيعيطوا، هنقولك على أهم النصايح عشان تقنع طفلك إنه يركب فيه. ولو عجبك أي نوع من المعروضين أو غيرهم تقدر من خلال ياقوطة تعرف أحسن الأسعار ليه وتقارن بينهم، وممكن كمان تطلبه من خلالنا وهيوصل لغاية عندك في أسرع وقت.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

ليه لازم نشتري كرسي العربية للطفل أو البيبي؟

كرسي العربية أكتر مكان اَمن لطفلك وهو موجود في العربية. دراسات كتير أثبتت إن وجود الطفل في كرسي العربية بيزود فرص بقائه على قيد الحياة في حالات الحوادث.

إيه الحاجات اللي مفروض ندور عليها في كرسي العربية الخاص بالطفل؟

• سهولة الاستخدام: لازم كرسي العربية يبقى سهل الاستخدام عشان البيبي بيزهق كل مرة وهو بيركب ويكرهه.
• قاعدة كرسي العربية: معظم الكراسي بتيجي مع قاعدة، ودي بتدي أمان أكتر وسهولة في تركيب وفك الكرسي.
• سهولة تعديل الكرسي: كل ما كان سهل إنك تغير مقاسات حزام الأمان كل ما بقى أسهل استخدام الكرسي.
• سهولة التنضيف: حاول تجيب كرسي يكون سهل في تنضيفه وتكون أجزاؤه بتتفك وممكن تتحط في الغسالة من غير ما تبوظ. وعامة لو عايز تريّح دماغك ممكن تنضف كرسي عربية البيبي في البنزينة.
• الراحة: حاول تجيب كرسي يكون فيه حماية للرأس وتكون مخدة دعم الرأس اللي فيه مبطنة بحيث إنها تريّح الطفل وهو قاعد فيه.
• خاصية الحماية الجانبية: الخاصية دي بتحافظ على سلامة الطفل في حالات الحوادث.

طفلك مش بيرضى يقعد في كرسي العربية؟

خلينا متفقين إن القاعدة في كرسي العربية بتاع الأطفال مش شيء لذيذ بالذات للطفل اللي مش متعود من سن الولادة يقعد فيه، عشان عادةً كرسي العربية بيبقى ساقع في الشتاء وحر في الصيف، ولكن القاعدة فيه زي ما اتفقنا ضرورية لسلامة طفلك. حاول تشتت انتباهه بأي حاجة تاني وهو قاعد في كرسي العربية مثلًا ممكن تديله لعبة بيحبها أو تشغله الموسيقى المفضلة بتاعته أو تديله كتاب أو قصة فيها أشكال وألوان تشده. ممكن لو عنده عروسة أو دبدوب مفضل ياخده معاه وهو راكب في الكرسي. ولو الطفل عمره أكبر من ٣ سنين ممكن تشغله DVD لفترة قصيرة عشان يحب القاعدة في كرسي العربية. وممكن تكلمه عن اللي بيحصل بره في الشباك عشان تشتت انتباهه. لو كل ده مش نافع، استحمل الزن شوية، كده ولا كده الطفل هيتعود بعد فترة وهيعرف إن ده مكانه الدائم في العربية.

أنواع كرسي العربية

كراسي عربيات الأطفال عامة بتتقسم لثلاث مراحل على حسب وزن الطفل، وطوله، وعمره، وطبعًا في كراسي بتبقى صالحة لمرحلتين مع بعض. بمعنى تاني ممكن نلاقي كرسي ممكن يستخدم للمرحلة الأولى والتانية لإنه بيشيل من ٠ لـ ١٨ كيلو.

في الجدول اللي تحت هنشوف المراحل المختلفة لكراسي العربية الخاصة بالأطفال ووزن كل مرحلة وعمر الطفل تقريبًا بيكون قد ايه فيها

بنعرف إن الطفل خلاص كبر على الكرسي ومحتاجين نتنقل على المرحلة اللي بعد كدة في كرسي العربية لما ارتفاع كتف الطفل يبقى أعلى من أول حتى بيبدأ فيها الحزام بتاع الكرسي.

ودلوقتي هنشوف مزايا وعيوب كل مرحلة في كراسي العربية الخاصة بالأطفال

أهم ماركات كراسي السيارة الخاصة بالأطفال

كرسي العربية مرسيدس بنز للأطفال الرضع

المواصفات

• كرسي مرحلة أولى
• يصلح لوزن من ٠ إلى ١٣ كيلو.
• العمر: من ٠ لـ ٤ شهور.
• تصميمه رائع.
• إير باج.
• ٧ مستويات لارتفاع الرأس.
• ٣ مستويات لمسند الإيد.
• معاه مظلة.
• خامات قوية.
• أجزاؤه بتتفك وتتغسل.
• خاصية التعرف التلقائي على حجم الطفل.

المزايا

• سعره معقول.
• ممكن يستخدم ككاري كوت.

العيوب

• عمره قصير قوي لإن البيبي بيكبر عليه بسرعة.

ممكن تشوف كرسي العربية ميرسيدس بنز من هنا.

كرسي العربية للأطفال من شيكو

المواصفات

• المرحلة الثانية.
• مناسب لوزن ٩-١٨ كيلو.
• وزن الكرسي:٥  كيلو.
• نظام دوران الهواء.
• مسند للرأس.
• وضعية الهز.
• حشو إضافي في الضهر وحزام أمان الكرسي.
• نظام أمان جانبي.
• اللون: أزرق.

المزايا

• الكرسي مريح جدًا للطفل بالذات في الصيف مع نظام دوران الهوا واللي مابيخليش الطفل يحس بحرارة الكرسي العالية.
• اَمن بسبب نظام الأمان الجانبي اللي بيحمي الطفل في حالة أي حادث.
• الحشو الإضافي بيحقق راحة إضافية للطفل.
• ممكن يستخدم ككاري كوت.

العيوب

• سعره غالي جدًا.
• ماينفعش يتثبت في عربية الأطفال.

ممكن تشوف كرسي العربية للأطفال من شيكو من هنا.

كرسي السيارة الجراكو

المواصفات

• المرحلة الثانية والثالثة.
• صالح لوزن من ٦ لـ ٣٦ كيلو.
• صالح من عمر ٩ شهور لحد ١٢ سنة.
• نظام أمان جانبي.
• ٥ نقط أمان.
• ارتفاع الكرسي قابل للتعديل.
• مستوى الرأس قابل للتعديل.
• ٣ مستويات للمقعد.
• معاه حامل كباية.
• الوزن: ٩ كيلو.
• الأبعاد ٥١٫٢ × ٣٢٫١ × ١٠٠٫٧ سم.

المزايا

• مريح جدًا ومبطن.
• جودة الخامات عالية والكرسي نفسه قوي وبيستحمل.
• سهل في تركيبه واستخدامه.
• فيه جيوب عشان الطفل يحط فيها اللعب بتاعته.
• بيعيش سنين طويلة.
• سهل في فكه وتنضيفه.

العيوب

• حزام الأمان ضيق شوية على الأطفال الكبار.
• ربط حزام الأمان صعب شوية.
• سعره غالي بالنسبة للكراسي المنافسة ليه في السوق والمماثلة ليه في الإمكانيات.
• صعب تغير مستوى الكرسي، فمش سهل الطفل ينام فيه.

ممكن تشوف كرسي العربية الجراكو من هنا.

ممكن شوف مجموعة من كراسي العربية الخاصة بالأطفال من هنا.

إرشادات الأمان الخاصة بكرسي العربية الخاص بالأطفال

فيه شوية نصايح لازم ناخدها في اعتبارنا لضمان سلامة الطفل وهو في كرسي العربية الخاص بالأطفال

• لازم دايمًا تتأكد إن الكرسي مقاسه متناسب مع وزن، وطول، وسن طفلك.
• لازم يكون متركب كويس بمعنى إنه مايتحركش أكتر من ٢٫٥ سم من قدام لورا ومن اليمين للشمال.
• كل الأطفال تحت سنة الـ ١٣ سنة لازم يقعدوا في الكنبة اللي ورا، وده طبعًا معناه إن ممنوع نركب كرسي العربية قدام منعًا باتًا.
• لازم تغير الكرسي لو اتعرض لحادثة أو لو اتقطع أو بقى فيه أجزاء سايبة.
• دايمًا لازم تتأكد إنك تشغل القفل بتاع العربية عشان الطفل مايقدرش يفتحه وهو قاعد في كرسي العربية الخاص بالأطفال.
• لو هتشتري كرسي عربية مستعمل اتأكد إن الكرسي ما اتعرضش لأي حادثة قبل كده أو في أي حتة مقطوعة.
• اتأكد دايمًا إنك بتدخل الطفل في كرسي العربية من الباب اللي ناحية الرصيف مش اللي ناحية الشارع، عشان سلامتك وسلامة طفلك.
• احتفظ بالكتالوج بتاع الكرسي في عربيتك عشان لو احتجت تفكه أو تركبه في أي وقت.
• أحسن مكان تحط فيه كرسي العربية هو الكرسي اللي في النص بالذات لو هو كرسي مرحلة أولى. لو عندك كذا طفل يبقى حط الكرسي بتاع أصغر طفل فيهم في النص.
• ماتسيبش الطفل ينام في كرسي العربية برة العربية. زي ما قولنا ممكن كرسي العربية يستخدم في البيت ككرسي هزاز، ولكن لا ينصح إننا نسيب الطفل ينام طول الليل ولا فيه ولا في الكرسي الهزاز.
• لو حاسس إن الدنيا برد قوي ممكن تحط بطانية على الطفل بعد ما يقعد، لكن اوعى تحط أي حاجة تحت الطفل عشان ده ممكن يخلي الكرسي مش اَمن.

دلوقتي بعد ما عرفت كل المهم في عالم كراسي السيارة الخاصة بالأطفال، تقدر تحدد أنهي كرسي أنسب لطفلك وتشتريه.

عندك كرسي سيارة للأطفال؟ لو عندك تجربة مع كرسي عربية معين ممكن تقولنا عليها عن طريق تعليق.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا فى تعليق أو من خلال صفحة Yaoota.com على فيسبوك.