كتب صفاء مجدي

حاجات كتير حوالينا مش بنكون عارفين أصلها ولا فصلها، الأيام دي خصوصًا ممكن حد يسأل نفسه هو ايه أصل مدفع الإفطار! وليه اتعمل رغم أن موعد الإفطار في رمضان معروف وسهل تحديده سواء بوقت أذان المغرب أو بغروب الشمس.. اللي حصل صدفة غريبة كانت السبب أن مدفع رمضان يستمر عقود من الزمن وينتشر في بلدان كثيرة غير مصر.. ياقوطة بتدعوكم تعرفوا أصل حكاية مدفع رمضان.

حكاية مدفع رمضان والصدفة البحتة!

العهد المملوكي

في سنة 856 هجريًا، السلطان المملوكي «خشقدم» قرر يجرب مدفع جديد وصله وصادف إن وقت تجربته كان موافق وقت أذان المغرب بالظبط. والناس فكرت وقتها أنها طريقة جديدة اخترعها الملك قصدًا عشان يعلن عن موعد الإفطار في رمضان. لكن واضح أن الناس عجبها فكرة المدفع وعبروا عن إعجابهم للسلطان، فلما السلطان شاف كده قرر أنه يستمر في تنفيذ فكرة إطلاق مدفع رمضان ومش بس كده لكنه قرر يكرره وقت السحور.

*يتم إطلاق قذيفة مدفعية صوتية وقت غروب الشمس.

عهد الخديوي اسماعيل

القصة الثانية برده بتقول أن الموضوع طلع بالصدفة، واضح إن الناس زمان كانت بتحب تجرب المدافع في وقت فراغها وتسلي صيامها! بيقولك أن الجنود في عهد الخديو «اسماعيل» كانت بتنظف المدفع وقت المغرب واللي حصل أن المدفع ضرب بالغلط وكان برده في وقت أذان المغرب. الأميرة «فاطمة بنت الخديو اسماعيل» عجبتها فكرة مدفع الإفطار أوي وأصدرت قرار إن يكون المدفع هو طريقة الإعلان عن الفطار في رمضان ووقت الإمساك وكمان في الأعياد الرسمية.

من وقتها انتشر استخدام المدفع في البلاد العربية زي القدس، ودمشق، وبغداد. صوت مدفع الإفطار ارتبط بالفرحة والبهجة مع أجيال كثيرة وأطفال وكبار كانوا بيحبوا يستنوا صوت المدفع حتى بعد انتشار الراديو والتلفزيون وكل الوسائل اللي من خلالها سهل جدًا يتعرف وقت أذان المغرب اللي هو وقت الإفطار في رمضان