مفيش حاجة هتضيع منّك تاني: كل ما تريد معرفته عن جهاز التعقب (Chipolo)
كتبت: شذا وليد
كثير مننا بيصحى الصبح مستعجل سواء رايح الشغل أو وراه حاجة تانية، وبعد دُش سريع وفطار أسرع بنجري على الباب عشان ننزل بس فجأة نلاقي إن في حاجة مهمة مش موجودة! مثلاً: راحت فين المفاتيح؟ بندوّر في كل مكان وبنسأل بقية أفراد الأسرة عليهم عشان يدوّروا معانا، بداية مش لطيفة لليوم، صح؟ مش ساعات بتتمنى يبقي فيه أداة تساعدك تلاقي حاجتك الضائعة بسهولة؟ في الواقع، الأداة دي موجودة بالفعل واسمها تشيبولو.
أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق. .
فكرة تشيبولو -Chipolo- جات إزاي؟
سألنا أصحاب الفكرة ومؤسسي شركة تشيبولو عشان نعرف أصل الحكاية، وكانوا متعاونين معانا جداً وجاوبوا على كل أسئلتنا التي تخص جهاز Chipolo، تعالوا نشوف مؤسس تشيبولو قال لنا ايه من أسرار حول هذا الابتكار
السيناريو اللي اتكلمنا عليه ممكن يحصَل مع أي حد فينا، حتى لو واحد من مؤسسي شركة تشيبولو.
وضح تادِچ چيفسيفار، مؤسس مُشارك والرئيس التنفيذي لمنتج تشيبولو «تشيبولو هو ثمرة محاولة ستة أفراد إنهم يساعدوا صديقهم يلاقي الحاجات اللي بتضيع منه، صاحبنا «دومين» كان بيضيّع أشيائه باستمرار، الحاجات اللي بتضيع منه كانت كتير جدًا وكُلنا كنا عايزين نساعده. ومن هنا جات فكرة تشيبولو: جهاز صغير وسعره معقول الناس تقدر تحُطه على الأشياء اللي مش عايزاها تضيع.”
على طول بنضيّع أشياء مننا أو بننسي مكانها بعدين وبناخد وقت طويل ندوّر عليهم. والأسوأ لو ضيّعناها في مكان عام عشان ممكن تتسرق.
وأضاف تادِچ “الشخص العادي بيضيّع أو ينسي أماكن حوالي 3,000 شيء في السنة وبيستغرق تقريبًا 60 ساعة في السنة عشان يحاول يلاقيهم! احنا كنا عايزين نَضَع حَد للموضوع ده،”
ما هو تشيبولو Chipolo
- تشيبولو هو الحل المناسب للمشكلة. تشيبولو هو جهاز تعقب صغير، خفيف، وملوّن ممكن تحُطه أو تعلقه على الأشياء الثمينة اللي مش عايزها تضيع.
- وقد شَرَح المؤسس المُشارك “اسم تشيبولو جيه من دَمج اسمي شرائح إليكترونية أو تشيب مع لون، عشان الجهاز مبني من لوحة دوائر مطبوعة ومتوفر ب 9 ألوان مختلفة،”
- الجهاز سُمكه 5 ميليمتر فقط ومصنوع من البلاستيك.
- الجهاز متوَصَل بتطبيق تشيبولو واللي تقدر تحملّه على موبايلك (أندرويد أو آبل أو ويندوز) ومن خلاله تقدر تحَدد مكان أشيائك.
وأخبرنا تادِچ “احنا بنحاول ننشئ أكبر شبكة للأشياء المفقودة في العالم واللي يقدر من خلالها مستخدمو تشيبولو يساعدوا بعض يلاقوا أشيائهم المفقودة، الشبكة دي مُستَخدَمة حاليًا في أكتر من 200 بلد حول العالم. الناس بتحب تحُط تشيبولو على أشيائها عشان تلاقيها بسهولة.”
خصائص تشيبولو Chipolo
- تصميم سلس ومريح.
- تسعة ألوان تختار منهم (الأزرق، الزهري، الأبيض، الأحمر، البرتقالي، الأصفر، الأخضر، البنفسجي، والأسود).
- بطارية طويلة الأمد (ستة أشهر).
- العلبة بييجي فيها بطارية إضافية فمش هتحتاج تغيّر البطارية لمدة سنة.
- يتميز الجهاز باتصال بلوتوث منخفض الطاقة (نفس قوة اتصال البلوتوث العادي لكن باستهلاك طاقة أقل).
- مُكَبر صوت بقوة 90 ديسيبل عشان لما يرّن تقدر تحَدد أماكن حاجاتك بسهولة.
- يغطي مساحة 60 متر.
- ممكن تستخدمه عشان تتعَقَب أي من ممتلكاتك اللي بتخاف تضيع زي الموبايل أو المحفظة أو المفاتيح أو الشنطة أو اللاب توب أو الجهاز اللوحي أو حتى حيوانك الأليف.
- يأتي بجهاز استشعار درجة الحرارة عشان تقدر تحَدّد إذا كانت الحاجة اللي ضايعة منك في مكان برة أو جوه.
- ممكن تستخدم تطبيق الموبايل عشان تاخد سيلفي عن طريق إنك تهِز جهاز تشيبولو.
أقدر أجيب الجهاز منين؟
تقدر بسهولة تختار لون تشيبولو اللي يعجبك من على ياقوطة ويوصلّك لحد باب البيت. سعره 319 جنيه مصري.
إزاي الجهاز بيشتغل؟
شاهد فيديو بيوضّح طريقة عمل تشيبولو:
يَعمَل تشيبولو عن طريق اتصال بلوتوث بيخليك توصَل لأشيائك المفقودة، كل اللي عليك تعمله إنك تحمّل تطبيق تشيبولو المجاني وتوّصله مع جهاز التشيبولو وتحُط الجهاز على الشيء اللي مش عايز تفقده وبكده تبقي تمام، ممكن توصّل لحد 9 أجهزة تشيبولو على كذا حاجة من بتاعتك على تطبيق واحد.
- عشان تقدَر تلاقي موبايلك، قم بهَز جهاز التشيبولو الخاص بك وهتلاقي الموبايل بيرن بصوت مسموع فتعرف تلاقيه، حتى لو كان أصلاَ معمول صامت.
- لو موبايلك أبعد من 60 متر، تقدر تدخل على الحساب الخاص بالتشيبولو بتاعك وتشوف آخر مكان مُسَجَل للموبايل قبل ما يخرج بره نطاق الـ 60 متر. ممكن ساعتها تخليه يرن أو تبعت رسالة على الموبايل عشان اللي يلاقيه يعرَف إنه مفقود.
- أما بالنسبة لأدواتك الأخرى أو لو مش لاقي جهاز التشيبولو نفسه، هتحتاج تدخل على حسابك وهتطلعلك خريطة تبيّن مكان الشيء الخاص بك في نطاق 60 متر، لو الحاجة بتاعتك مش موجودة في نطاق المسافة دي، هتقدر برضه تشوف آخر مكان مُسَجّل ليه عشان تعرف هتدوّر فين.
- لو برضه مش قادر تلاقي الشيء الخاص بك، فريق تشيبولو زوّدوا خاصية جديدة وهي إنك مش بس تقدر تدوّر على الشيء المفقود من خلال موبايلك لكن من خلال موبايل أي حد عنده التطبيق. ومش محتاج تقلق عشان الخاصية سرية 100% فمفيش حد هيعرف إنك بتدوّر علي شيء مفقود غيرك.
أكّد تادِچ “احنا بنطمح إن فقدان الأشياء المفقودة يبقى من الماضي، احنا مؤمنين إن لما كل حاجة يبقى لها مكان إليكتروني، العالم هيبقى أسهل وأسعد للجميع،”
مميزات تشيبولو Chipolo
- ألوانه الزاهية هتساعدك تلاقيه بسهولة.
- هيجيلك رسالة على موبايلك لما جهاز تشيبولو يبعِد عن نطاق الـ 60 متر، عشان تعرف على طول إن حاجتك مش قريبة منك.
- تصميم سلس وخفيف.
- البطارية مدتها 6 شهور.
- التطبيق هيبعتلك رسالة لما تكون البطارية محتاجة تتغير.
- التطبيق سهل الاستخدام.
- متوافق مع آندرويد وآيفون وويندوز.
عيوب تشيبولو Chipolo
- مكان الشيء المفقود مبيبقاش دقيق في كل الأوقات، ده غير إن مش على طول الجهاز بيغطي الـ 60 متر.
- سعر الجهاز غالي لو هتشتري واحد بس (أحياناً بتاخد تخفيض معقول لما تشتري جهازين أو أكتر في نفس الوقت).
- تشيبولو مش من الأجهزة اللي هتستخدمها كل يوم لكن لو أنت من الأشخاص اللي بيضيّعوا أشيائهم باستمرار، يبقى الجهاز ده مناسب جدًا ليك.
- لما بتيجي تغيّر البطارية، ممكن تكسَر جهاز تشيبولو عشان بلاستيك خفيف، كن حذر أثناء العملية دي.
- لما بتبعد عن الشيء الخاص بك للأسف صوت الرنة بيكون مش مسموع بوضوح.
- التطبيق أحياناً مش بيبقى شغال بطريقة صحيحة مع جهاز تشيبولو.
قد تنفد بعض المنتجات من المتاجر في أي وقت لكن غالبًا تصبح متاحة بعد فترة وجيزة، إذا صادفتك مشكلة مع أي منتج، من فضلك أبلغنا في تعليق أو من خلال صفحة ياقوطة على فيسبوك.