مميزات وعيوب بوتاجاز فريش بروفيشنال استانلس ستيل الـ ٤ شعلة
كتبت: أمنية عزمي
من أهم الأجهزة في المطبخ البوتاجاز، اللي من خلاله بنقدر نبدع ونطلع أشهى الوصفات. وكل ما البوتاجاز كانت إمكانياته مناسبة كل ما ساعدك أكتر في العزومات والمناسبات الكبيرة، وكمان ساعدك في الاستعمال اليومي.
ولإننا في ياقوطة يهمنا مساعدتك في معرفة أفضل المنتجاتا المتاجة في السوق عمومًا، هنعرض عليك مراجعة كاملة لبوتاجاز فريش بروفيشنال استانلس ستيل الـ ٤ شعلة ، وفيها هنتعرف على أهم مميزاته وعيوبه وسعره في السوق، ولو عجبك ممكن تشتريه من خلال ياقوطة وهيكون عندك في أقرب وقت.
*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
المواصفات
| النوع | بوتاجاز فريش. |
| الحجم | ٦٠ × ٦٥. |
| عدد الشعلات | ٤ شعلة. |
| إضافات | شاشة ديجيتال، إشعال ذاتي، تايمر. |
| الخامة | استانلس ستيل. |
| الغطاء العلوي | زجاج مرايا |
| الضمان | ٧ سنين. |
المميزات
- فيه خاصية الإشعال الذاتي. ودي بتسهل عملية الإشعال سواء للفرن أو الشواية، أو عيون البوتاجاز.الأول ماكانش فيه إشعال ذاتي للفرن وكان لازم تستخدم كبريت أو ولاعة، لكن دلوقتي فريش زودت فيه إشعال الفرن الذاتي كمان.
- مزود بعامل الأمان. ده اللي بيطفي الغاز والنار لو أي حاجة من الأكل أو السوايل فارت على النار، ومحدش واخد باله. وقتها بيفصل لوحده ويمنع تسريب الغاز.
- الغطا العلوي زجاج مرايا. غطا البوتاجاز معمول زجاج مرايا، وده بيعكس ويوسع المساحة بشكل أكبر وشكله شيك.
- مزود بحامل أواني زهر. الحوامل اللي بنحط عليها الحلل نوعها زهر، وده بيديها تقل وثبات على البوتاجاز.
- معاه شواية متعددة الأغراض. وبتكون مميزة بحجمها وإنها محطوطة بزاوية معينة، وده بيخليها تستوعب فرختين على السيخ. وفيها عدد ٤ شوكة اللي بتستخدمهم لتثبيت الفراخ في السيخ.
- فيه تايمر وشاشة علشان تظبط التوقيت وتشوفه قدامك وتبقى عارف البرنامج إيه وفاضل قد ايه.
- مزود بلمبة داخلية ودي تساعدك تشوف الأكل والفرن مقفول علشان تقدر تعرف استوى بالقدر اللي محتاجة ولا لأ، ومن غير ما تفتح الفرن وتخرج حرارته وتسخن المكان كل شوية وتزود من وقت التسوية. لإنك بتخفض درجة الحرارة لما تفتح كل شوية.
- باب الفرن زجاج ومقاوم للحرارة، وده بيسمحلك تشوف الأكل من غير ما تفتح عليه.
- مقبض الفرن ستانل ستيل. وده مديله شكل جميل وبيخليه سهل في التنضيف.
- بروفيشنال هو الوحيد اللي مزود بتايمر للغاز يفصل بعدها. يعني ممكن تستخدم التايمر علشان لو بتنسى الأكل على النار وهو يفصل لوحده في الوقت اللي حددته له.
- الفرن فيه مروحة داخلية. ودي ميزة حلوة جدًا فيه لإنها بتساعد على توزيع الحرارة في الفرن بشكل كامل وتوصل الحرارة لكل أجزاء الأكل، وتخليه يستوي بشكل مميز من كل الاتجاهات.
تجربة المستخدم
فيه مجموعة شكاوى مكررة، تم رصدها ومن المشاكل دي.
- لمبة الفرن لما بتشغلها بتشغل الشواية معاها من غير لازمة. كان الأفضل إن يكون ليهم زرارين منفصلين.
- إن عيون البوتاجاز حرارتها ضعيفة.
- لما الفرن بيكون شغال بيسخن إيد الفرن جدًا، لإنها استانلس ستيل وهو موصل للحرارة ودي بتسبب حروق لو اللي بيفتح معملش حسابه وهو بيمسك المقبض.
- الفرن مش بيقفل كويس وفي ناس اشتكت إن قزاز الفرن فرقع.
- التقفيل الداخلي رديء.
- لو جيت تولع الفرن وما ولعش من أول مرة زرار الأمان هيمنع تشغيله ولازم وقتها تفصل الكهربا وتشغلها تاني. هي ميزة علشان أمان للأطفال لو حد بيلعب فيه بس لازم تفهم إنه لما يمنع تشغيله لازم تفصله من الكهربا علشان يشتغل.
- الحوامل الزهر بتزحلق الحلل من عليها.
خدمة ما بعد البيع
- مراكز الصيانة مش متوفرة بشكل كافي في كل مكان. بمعنى إن خارج القاهرة بتضطر تتعامل عن طريق وكيل صيانة مش مع الشركة بشكل مباشر.
- أسعار قطع الغيار تعتبر أعلى من مثيلاتها في السوق.
شوف بوتاجاز فريش بروفيشنال استانلس ستيل الـ ٤ شعلة من هنا.
*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.
عن كاتب المقال