الألعاب الرقمية: ما بين الأصلي والقرصنة
دليلك لمعرفة الفرق بين الألعاب الاصلية والمقرصنة
كتب:علاء بسيوني
الترفيه واللعب جزء ضرورى لأي شخص مهما كان عمره. محدش يقدر يكمل حياته من غير هدنة مع الشغل ومسئوليات الحياة، واللعب على الموبايل مش كفاية. في أجهزة مخصصة للألعاب، منها أجهزة محمولة وأجهزة أكثر تطورًا للألعاب المنزلية وفي كمان أجهزة كمبيوتر مصنعة عشان الألعاب بمواصفات عالية جدًا. أكيد انت كلاعب بتحتاج تشتري ألعاب كل فترة، هنا بيكون فى شوية مشاكل بترجع للأسعار، سرعة إصدار اللعبة ووصولها فى مصر، قيود بتحطها الشركات أو ألعاب بيتم حظرها فى مناطق معينة. وأكيد انت كلاعب برضه واجهت واحدة من المشاكل دي.
الحصول على الألعاب
النسخة الأصلية: لا تتوفر فور صدورها، وإذا توفرت سعرها حوالى 500 جنيه مصرى!
النسخة المقرصنة: يلجأ بعض اللاعبين إلى تحميل الألعاب المقرصنة أون لاين للتغلب على مشكلة الثمن أو تأخر صدروها.
النسخة الإلكترونية (أصلية): أكواد رقمية أو ما يعرف ب CD Key و يتم شرائها من على مواقع متعددة مثل G2A.com.
لماذا تُعتبر النسخ الأصلية مهمة للاعبين؟
النسخة الأصلية من أي لعبة تتيح لك اللعب أون لاين خاصة فى نمط اللعب المتعدد ومنافسة لاعبين من كل أنحاء العالم – بالنسبة للألعاب الجماعية – وهى متعة يدرك قيمتها جيدًا عشاق الألعاب. كما يأتي معها خرائط وموسوعات ما يُعرف بالـ”DLC” وهو اختصار لـDownloadable Content وفي بعض الأحيان تأتي مع الألعاب أو يتم شرائها وتحميلها من على الإنترنت.
الألعاب الأصلية والألعاب المقرصنة
ياقوطة اتكلمت مع إبراهيم حمدي، رئيس شركة عرب هاردوير وأحد مؤسسيها، اللي سألناه عن الألعاب في مصر وعوائق الحصول عليها. عرب هاردوير أفادتنا بمعلومات حبينا نشاركها معاكم عشان نقدر نوضحلكم مستقبل الألعاب في مصر هيبقي شكله إيه.
بس تعالوا الأول نعرف:
من هم عرب هاردوير؟
“عرب هاردوير بدايته كانت في سنة 2002، كان مجرد منتدى للمناقشة وخصوصاً الهاردوير، بمرور الأيام أصبح المنتدى يهتم بشكل أشمل بالتقنية عمومًا من هواتف، ألعاب، هارودوير، شبكات اجتماعية وغيره. الموقع حاليًا فيه كتير من الأقسام اللي منها البوابة الرئيسية، المنتدى، المتجر، قسم المراجعات وأخيرًا الفيديوهات. الموقع اسمه معروف على مستوى الوطن العربي بشكل كبيربعدد زيارات يتعدى مليون ونصف زائر شهريًا، ومتابعوه على شبكات التواصل الاجتماعي وصلوا لمليون ونصف متابع بين فيسبوك، تويتر، إنستجرام وغيره من القنوات المختلفة”.
إيه اللي عرب هاردوير بتقدمه للجمهور؟
“عرب هاردوير يُعتبر بوابة تقنية للجمهور، بنتابع كل الجديد في عالم التقنية وننقله للناس على حسب اهتماماتهم وبنساعدهم في اختيار منتجاتهم اللي هيتم شرائها وإيصالهم بالناس اللي عندها نفس الاهتمامات لفتح مجال للحوار والنقاش، على جانب آخر، عرب هاردوير من خلال فريقه المتخصص بيقوم بعمل مراجعات للهاردوير والهواتف الذكية والألعاب وإعطاء تقييمات للمنتجات على حسب رأينا في المنتج ومدى توافقه مع المستخدم العربي سواء من ناحية السعر أو الكفاءة أو غيره من المعايير اللي عندنا منذ سنوات واللي بسببها الناس إدّت الثقة لاسم عرب هاردوير. جزء المتجر هو جزء يعتبر من أجدد الحاجات اللي في الموقع واهتمامه منصب على قطع ال PC اللي بتهم فئة اللاعبين والفئة العالية من المستخدمين المهتميين بالتقنية”.
نبذة عن ال”gaming” في مصر
“مجتمع اللاعبين في مصر في نمو دائم واللاعبون المصريون على مستوى كويس جدًا وكتيير منهم نافسوا في مسابقات عالمية لكن للأسف العوائق اللي بتواجهم كتيرة جدًا من ضمنها قلة الدعم لأن في ناس عندها منطق إن الألعاب لصغار السن فقط، كمان أسعار الألعاب المرتفعة نظرًا لدخل اللاعب المصري اللي غالبًا هو طالب في المدرسة أو الجامعة أو لسه في بداية شغله، والحاجة الأخيرة مشاكل الإنترنت المستمرة في مصر بما أن الألعاب والمنافسات أصبحت تتطلب اتصالًا دائمًا بالإنترنت”.
إيه قصة الألعاب المقرصنة وحجم المستخدميين وتأثيره على شركات الألعاب؟
الألعاب غير الشرعية أو قرصنة الألعاب هي من أكثر المشاكل اللي موجودة ومصر معروفة بها عالميًا وده يرجع إلى غلاء أسعار الألعاب، زي ما وضحنا، واللي بتخلي عدد كبير من اللاعبين بيلجأوا إلى تحميل غير شرعي للألعاب، لكن الموضوع ده قل بشكل كبير جدًا في السنوات الأخيرة نظرًا لأن كتير من الألعاب بتتطلب اتصالًا على سيرفراتها الخاصة، فلو مش شاري اللعبة مش هيقدر يلعب أو على الأقل يلعب مع أصحابه أون لاين، فأصبحنا نسمع إن كتير من الأشخاص فعلاً بدأوا مؤخرًا شراء الألعاب اللي هم مهتمين يلعبوها، يعني ما بين كل 5 العاب ممكن يشتري لعبة أو اتنين. والموضوع ده طبعًا لكل لاعبي الـ PC أما لاعبي الكونسول ماعندهمش مجال إلا شراء أو استعارة الألعاب لأن تقريبًا شبه مفيش قرصنة للألعاب على منصات الألعاب زي البلايستيشن والإكس بوكس.
تأثير قرصنة الألعاب على الشركات هو تأثير كبير ممكن ينتج عنه إنهم يتجاهلوا الاهتمام بالبلد بالكامل نظرًا لأن اللاعبين فيها مش مهتمين بشراء الألعاب الأصلية، وكتير جدًا من الشركات بره مش عارفة طبعًا العوائق اللي بتواجه اللاعب المصري أو العربي وده اللي بنحاول دايمًا ننقله ليهم.
طيب السيديهات بتبقى غالية، إيه البدائل؟
“البدائل هو إن في عدد كبير من اللاعبين بيستنوا مواسم التخفيضات زي الـ Black Friday أو أيام العروض على متجر زي PlayStation أو منصة Steam واللي غالبًا بيكون فيه أسعار ممتازة جدًا والناس أصبحت بتلجأ إلى الأكواد الرقمية عشان مايتعرضوش لمشاكل الجمارك والشحن والتكلفة الإضافية للإسطوانات”.
إيه هو مستقبل الألعاب غير الشرعية؟
“الألعاب غير الشرعية أصبحت بتقل يوم بعد يوم ، مثلاً فيه نظام حماية قوي اسمه “دينوفو” بعض الألعاب بتستعمله بالفعل وأثبت نجاحه بشكل كبير وصموده أمام القرصنة لفترة طويلة، بالإضافة إلى إن أي لعبة فيها نظام أون لاين هيكون شبه مستحيل قرصنتها بعد كده بسبب إنك عشان تلعب اللعبة لازم تكون متصل بسيرفرات خاصة بشركة الألعاب اللي لازم تدخل عليها بيوزر وباسوورد، واللي مش هيتم عملهم ليك إلا بعد شراء اللعبة”.
نصائح عامة
“صناعة الألعاب أصبحت واحدة من أكبر الصناعات في العالم بدخل وصل إلى 100 مليار دولار في سنة 2016 بزيادة تقدر 8.5% عن سنة 2015، وده يتضمن جميع أنواع الألعاب بما فيها ألعاب الهواتف الذكية اللي أصبحت مصدر دخل كبير جدًا للشركات.
الألعاب دلوقتي مش حاجة لصغار السن بس، في ألعاب كتير جدًا بتعلمك وتنمي مواهبك وقدراتك ومعلوماتك في مجالات مختلفة، بالتأكيد فيه بعض الألعاب التي لا تناسبنا كمجتمع شرقي لكن دي نسبة مش كبيرة”.
البطولات العالمية اللي بتًسمى بـ eSports أصبحت حاجة مشهورة جدًا في العالم وممكن تلاقي صور استاد كبير كل متابعيه مجرد ناس بيتفرجوا على فريقين قدام بعض بيلعبوا لعبة معينة مع تشجيع وجوائز تَقدر بملايين الدولارات، بل كان في تخمينات إنهم ممكن في يوم من الأيام تكون ليها دورة أوليمبية أو تدخل بشكل أكبر في مجال البطولات. الاهتمام في الوطن العربي بالموضوع ده أصبح ممتازًا والشركات الكبيرة أصبحت مهتمة بالمنطقة بشكل عام زي وجود مكاتب إقليمية ليها وفتح سيرفرات خاصة بالشرق الأوسط عشان يكون الاتصال أفضل وإقامة تصفيات محلية وتصعيد الفائزين عالميًا، وبالفعل شفنا لاعبين عرب تم تصعيدهم وحصلوا على ألقاب عالمية مؤخرًا في ألعاب زي Mortal Combat X وFifa وغيرهم”.
بعض متاجر بيع الألعاب فى مصر أونلاين
جايم فالي
عندهم أكبر صالة ألعاب فى الشرق الأوسط. شراء الألعاب ممتع جدًا معاهم لأنهم بيقدموا خدمة مميزة من خلال تصنيف الألعاب بأكثر من طريقة؛ تقسيم على حسب نوع اللعبة (مغامرات، أكشن… إلخ)، تقسيم آخر على حسب الفئة العمرية وتقسيم ثالث مهم للاسطوانات على حسب نوع الجهاز المخصص للعبة.
جي تو إيه G2A
منصة توفر لك الأكواد الرقمية للألعاب، الدفع ببطاقات الائتمان وغيرها من العديد من طرق الدفع (عدا الدفع عند الاستلام أو نقديًا). تقدر تشتري برضه ال”DLC” من على موقعهم.
لمعلومات أكتر عن المتجر ومنتجاته من هنا.
جايمرز لونج
بيوفر لك شراء الألعاب أون لاين وأحدث اسطوانات الألعاب وشخصيات أفلامك الأكشن المفضلة. ومتاح إنك تحجز ألعاب جديدة لتصلك فور إصدارها. ولو في ألعاب خلصت من المتجر ممكن تقدم لهم طلب ليتم إبلاغك فور توفرها مرة أخرى. وفي مميزات تانية وتخفيضات على طلباتك في حالة عمل ترويج لمنتجاتهم على شبكات التواصل الاجتماعى. ومع نشراتهم الأسبوعية بينشروا أكواد تخفيضات بطريقة مخفية داخل النشرة وعليك العثور عليها لتستمتع بالتخفيض. وفي خاصية تجميع النقاط واستبدالها مثلاًً بتخفيضات على مشترياتك.
لمزيد من مميزات ومنتجات ( جايمرز لونج).
ياريت بعد ما تقرا مقال ياقوطة.كوم لو عندك زيادة تشاركنا بيها.