كتبت: سارة عمار

درج العدد والأجهزة لازم يكون فيه الجهاز بتاع النهارده، وخصوصًا البيوت اللي أهلها بيحبوا يزينوا حوايطهم بلوح وبراويز كتيرة، أو اللي بيعزّلوا وينقلوا كتير من بيت لبيت، أكيد مش في كل نقلة هتستنى الفني عشان ييجي يدقلك مسمار!

ياقوطة جايبالكم الدريل أو الشنيور لحد عندكم، عشان تعرّفكم عليه عن قرب وترد على كل اللي عايزين تعرفوه عنه.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

مواصفاته

الحلو فيه

• مش محتاج كهرباء، بيشتغل بالشحن وده في حد ذاته ميزة ليها كذا اتجاه، أولهم أمان عشان أقدر استخدمه في الشتاء في البلكونة وأنا بعلق جنش للخرطوم، أو فوق السطوح من غير ما المطر يحرق الشنيور العادي اللي بيكون شغال بكهرباء، وحاجة تانيه أنه موفر للكهرباء وده شيء كويس وفكرة ذكية.
• بيدق المسامير الدقاقي زي المسامير الخشابي،  وبيعمل اخرام في الحيطة ببنطة قطرها لحد ١٢ ملم، ويفك المسامير في اتجاه الفك أو عكس الاتجاه عشان يربطها يعني شغال في الاتجاهين، وطبعًا كل ده بسرعات أنا بتحكم فيها زي ما المسمار يحتاج.
• للناس اللي معندهاش خبرة زيي ولا تعرف إزاي تشغل الشنيور وامتى نبدأ وامتى نخلص الشنيور ده حلو ليهم، عشان فيه ميزة أنه وقت ما المسمار يتربط هوا الشنيور حيوقف اتوماتيك من نفسه وبرضه وقت ما يفكه خلاص حيوقف برضه، وده خلاني بعد فترة ابقى خبرة في التعامل معاه.

الوحش فيه

• البطارية بتفضى بسرعة وبتخليه لما تقرب تفضى بطيء وقوته بتبدأ تضعف، وده بيحتاج وقت عشان أرجع اشحنها من تاني واستنى لحد مايشتغل بكل قوته وبكل كفاؤته، لو سعة البطارية كانت أكبر كان حيبقى أحلى بكتير.
• في استخدام البنط صعب للي ماعندهومش خبرة زيي لأني ححتاج حد يقولي المسمار ده محتاج بنطة قد ايه تعملي فتحة مناسبة ليه؟.

اللي بعد الشراء

القطع المنفصلة لقيت ليها قطع غيار، لكن الجهاز نفسه مالقيتش ليه لا صيانه ولا قطع غيار، بس معاه ضمان وبالنسبة ليا الضمان مش حيفيد طول ماهوا مالوش خدمة عملاء ولا توكيل قوي.

شوف شنيور دقاق من هنا.

ولحد دلوقتي الماركة دي فارضة سيطرتها في الأدوات والعدد، والمنافس بتاعها جينريك منزل برضه شنيورات أقل في الثمن، لكن لو عايز تطلع بقى لحاجة أعلى يبقى عليك ببوش واللي ممكن تشوفه من هنا.

غاوي عدد؟ قولنا تجربتك في التعليقات.