أفضل الأجهزة الكهربائية بأقل من ٦٠٠٠ جنيه على ياقوطة
كتب: خالد عاصم
مفيش غنى عن الأجهزة الكهربائية المختلفة في أي بيت، ومع ارتفاع الأسعار الكبير الفترة اللي فاتت واللي خلى أسعار الأجهزة تتضاعف تقريبًا عن الكام سنة اللي فاتوا، بقت الأجهزة الكهربائية ممكن تمثل عبء كبير على ميزانية أي حد فينا خصوصًا لو حد لسه بيكوّن بيته وبيستعد للجواز مثلًا، وده مايختلفش كتير عن اللي عايز يجدد بيته ويغير الأجهزة القديمة بأجهزة تانية جديدة.
ولأن الأجهزة المتوفرة في مصر كتير وبتقدمها شركات مختلفة، بقت الاختيارات صعبة شوية على أكتر من مستوى، فمثلًا ممكن حد يفكر في التوفير وفي الوقت نفسه يبقى خايف من التنازل عن مميزات بتتوفر في الأجهزة الغالية، وحد تاني ممكن يفكر أكتر في المميزات دي بغض النظر عن القيمة السعرية وعن المبلغ اللي هيتدفع غي الأجهزة دي، وفي الحالتين والنموذجين بيقعوا في حيرة كبيرة هنحاول إننا نسعد على حلها النهاردة.
من خلال المقال ده هنستعرض مجموعة من الأجهزة الكهربائية المتميزة بسعر ما يزيدش عن ٦ آلاف جنيه للجهاز الواحد وهنخصص المقال للأجهزة الكبيرة زي التلاجات والبوتاجازات والغسالات. طبعًا لو عجبكم أي جهاز من الأجهزة الكهربائية اللي هنستعرضها وحبيت إنك تشتريها، هتقدر تطلبها من خلالنا في ياقوطة وهتوصلك لحد باب البيت أو مكان ما تحب بأسرع وقت ممكن.
*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.
أجهزة كهربائية بأقل من ٦٠٠٠ جنيه مصري
الثلاجات
التلاجات من أكتر الأجهزة اللي أسعارها ارتفعت جدًا الفترة اللي فاتت، بس رغم كده لسه فيه خيارات كتير ممكن تخليك تقدر تشتري تلاجة كويسة وبسعر معقول جدًا، صحيح هتضطر إنك تضحي بمميزات كتير بتقدمها التلاجات الغالية بس هتقدر تستفيد من إمكانيات كتير كمان أساسية بس متميزة بتقدمها التلاجات اللي هنتكلم عنها دلوقتي.
ثلاجة Unionaire ديجيتال نو فروست – 14 قدم
تلاجة Unionaire RN من بين أفضل التلاجات في الفئة السعرية دي وفيها مميزات كتير مختلفة أبرزها إنها نوفروست يعني مابتعملش تلج وكمان موفرة في الطاقة، التلاجة ١٢ قدم وسعتها اللترية ٣٥٠ لتر وأبوابها معمولة من الستانليس ستيل يعني غير قابلة للصدأ، وفوق كل ده عليها ضمان شامل مدته ١٠ سنين.
ممكن تشوف ثلاجة Unionaire ديجيتال نو فروست – 14 قدم – من هنا.
ثلاجة إلكتروستار برستيج بفريزر علوى – 12 قدم
تلاجة نوفروست تانية بس من إلكتروستار ودي شركة بقالها سنين شغالة في السوق المصري وعندها موثوقية ممتازة عند عدد كبير من العملاء في مصر، التلاجة ١٢ قدم وسعتها اللترية ٣٣٠ لتر وبتتميز بنظام تريد متطور بيخلي الهوا البارد يوصل لكل جزء فيها عشان الأكل يفضل طازج جواها على طول، وكمان بتتميز بنظام لتوفير الكهرباء والحفاظ على الطاقة وعلى البيئة.
ممكن تشوف ثلاجة إلكتروستار برستيج بفريزر علوى – 12 قدم من هنا.
White Point ثلاجة ديفروست – 337 لتر – 16 قدم
سعر تلاجة وايت بوينت دي ممتاز جدًا خصوصًا إنها ١٦ قدم بسعة لترية ٣٣٧ لتر، بس قصاد المميزة دي هتضحي بميزة النوفروست لأن التلاجة دي فروست يعني فيها إمكانية إذابة التلج اللي بيتكون في التلاجة والفريزر الرأسي العلوي اللي فيها، التلاجة بتتميز بنظام تبريد متطور بيحافظ على درجة الحرارة لمدة ٦ ساعات كاملة في حالة انقطاع التيار، وكمان تكوينها الداخلي والخارجي قوي جدًا وغير قابل للصدأ أو التآكل.
ممكن تشوف White Point ثلاجة ديفروست – 337 لتر – 16 قدم من هنا.
White Point WPRDF – ثلاجة – ١٠ قدم
تلاجة ديفروست تانية من وايت بوينت بسعر ممتاز جدًا بس أصغر شوية لأنها مقاس ١٠ قدم بس بس بتتميز بتصميم مدمج متميز بيخليك تقدر تستغل كل بوصة داخلية من مقاس التلاجة وده بفضل الأرفف اللي قابلة للتغير والأرفف الموجودة في باب التلاجة وكمان مساحة الفريزر اللي ممكن تستغلها بشكل فعال جدًا.
شوف White Point WPRDF – ثلاجة – ١٠ قدم من هنا.
اتعرف على أسعار التلاجات المختلفة من هنا.
البوتاجازات
في الفئة العسرية دي من الأجهزة الكهربائية الخيارات بالنسبة للبوتاجازات هتكون أوسع واكتر من التلاجات وكمان في الفئة السعرية دي هتقدر تختار من بين مجموعة ممتازة من البوتاجازات اللي هنقدملك مجموعة من أفضلها.
بوتاجاز كريستال ستانلس بنظام الحماية الكاملة ومروحة من رويال جاز -90 سم
بوتاجاز ممتاز جدًا من رويال جاز بيتميز بعدد كبير من المواصفات زي إنه ٥ شعلات مختلفة المقاسات، البوتاجاز فيه إشعال ذاتي والفرن كبير جدًا وكمان فيه مروحة وإضاءة داخلية وباب الفرن معمول من الزجاج المقوى المقاوم لدرجات الحرارة العالية، البوتاجاز كمان فيه مؤقت ديجيتال وفيه درج للتدفئة ده غير إنه بيتمتع بنظام أمان متكامل مدعوم بمكونات البوتاجاز الإيطالية.
شوف بوتاجاز كريستال ستانلس بنظام الحماية الكاملة ومروحة من رويال جاز -90 سم من هنا.
Zanussi بوتاجاز زانوسي 90 كوول
زانوسي من الشركات المعروفة جدًا في عالم الأجهزة الكهربائية والمنزلية في مصر، وده من بين أسباب اختيارنا للبوتاجاز ده اللي بيتميز بإنه بخمس شغلات معمولة من حديد الزهر القوي، والبوتاجاز نفسه معمول من الستانليس ستيل، البوتاجاز بيمتاز كمان بنظام حماية وأمان متكامل والفرن سعته كبيرة وفيه إضاءة ومروحة للتبريد والتسخين كمان، بوتاجاز زانوسي ممتاز جدًا وبفئة سعرية معقولة بشكل كبير بالنسبة لإمكانياته.
شوف Zanussi بوتاجاز زانوسي 90 كوول من هنا.
Fresh بوتاجاز فريش تانجو – 5 شعله استانليس
بوتاجاز خمسه شعلة ممتاز من فريش اللي بقالها سنين بتخدم المستهلك المصري بعدد كبير من الأجهزة الكهربائية والمنزلية الممتازة، البوتاجاز ده مش بيختلف عن أي بوتاجاز تاني في الفئة السعرية وفيه نفس إمكانيات البوتاجازات الأغلى شوية اللي استعرضناها قبل كده ومنها إنه غير قابل للصدأ وفيه إشعال ذاتي ومعمول من الستانليس ستيل وفيه مروحة وإضاءة للفرن اللي بابة معمول من زجاج قوي جدًا.
شوف Fresh بوتاجاز فريش تانجو – 5 شعله استانليس من هنا.
اتعرف على أسعار البوتاجازات المختلفة من هنا.
غسالات الملابس
بتتنوع غسالات الملابس بين نوعين أساسيين، نوع التحميل العلوي ونوع التحميل الأفقي، وعشان كده اخترنا اتنين من كل نوع من أميز الغسالات المتوفرة في الفئة السعرية اللي بنتكلم عنها النهارده.
White Point غسالة ملابس تحميل علوي – 12 كيلو
شركة وايت بوينت من الشركات المشهورة بأنها بتقدم الأجهزة الكهربائية المتميزة بأسعار أرخص من أجهزة تانية كتير بتنتمي لشركات تانية، وده اللي بيخلي غسالة زي اللي بنتكلم عنها دي منتمية لفئة سعرية أقل من إمكانياتها، الغسالة سعتها ١٢ كيلو يعني سعة ضخمة بتوفر وقت كبير وكمان بتوفر الطاقة والكهرباء بشكل ممتاز، الغسالة فيها شاشة رقمية عشان تقدر توضح البرنامج اللي شغالة عليها وبرامجها متعددة وذكية، وكمان فيها نظام للتنظيف الذاتي بيمنع تراكم الوبر في جسم الغسالة.
شوف White Point غسالة ملابس تحميل علوي – 12 كيلو -من هنا.
غسالة بيكو تحميل أمامي 7 كيلو
بيكو شركة عالمية ممتازة بتقدم لنا غسالة ملابس تحميل أفقي ممتازة سعتها ٧ كيلو جرام وحلتها عندها قدرة على الدوران بسرعة ١٠٠٠ لفة في الدقييقة عشان تضمن تنضيف ممتاز لهدومك، الغسالة بتتميز ببرامج متعددة وذكية منها اللي بيقدر يخلص دورة غسيل كاملة في ٢٨ دقيقة بس، الغسالة مناسبة أكتر للأسر الصغيرة والغسيل الخفيف بسبب سعتها المحدودة شوية، بس اخترناها لأنها بتتقدم من شركة ممتازة جدًا على مستويات كتير.
شوف غسالة ملابس تحميل أمامي بيكو سعة 7 كيلو من هنا.
Toshiba Top Load Automatic Washing Machine – 10 Kg
غسالة تحميل علوي ممتازة من توشيبا سعتها ١٠ كيلو وبتمتاز بسرعة ٨٦٠ لفة في الدقيقة وكمان فيها مجموعة من البرامج الذكية اللي بيتم التحكم فيها عن طريق نظام كمبيوتر ذكي جدًا، الغسالة كمان بتمتاز بأنظمة غسيل وعصر وتجفيف متطورة جدًا الغسالة معمولة من معدن غير قابل للصدأ وبتتمتع بأنظمة حماية وأمان وكمان تنضيف داخلي ممتاز.
شوف Toshiba Top Load Automatic Washing Machine – 10 Kg من هنا.
اتعرف على أسعار غسالات الملابس المختلفة من هنا.
شوف أسعار مختلف الأجهزة المنزلية من هنا.
*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.
عن كاتب المقال
خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.