كتبت: منى عوض

الصيف هجم علينا من غير أي مقدمات ودا معناه إنك لازم تكون مستعد بشتى الطرق لاستقبال أحر أيامه من خلال ملابس قطنية خفيفة ومشروبات باردة واستعدادت مختلفة للعناية بالبشرة والشعر، وكمان استعدادات مختلفة للأجهزة الكهربائية خصوصًا التكييف اللي من غيره مش هنقدر نعدي أيام الحر بسلام.

وبما أن موسم التكييفات بدأ خلاص، ضروري تعمل صيانة التكييف قبل تشغيله ودا عشان تضمن أمان تام أثناء استخدامه وكمان هواء بارد بفعالية كبيرة ومن غير أي مشاكل. ومن هنا، حبينا في ياقوطة إننا نشارككم شوية نصائح بسيطة عشان تعمل صيانة التكييف في المنزل بكل سهولة.

بنفكرك إنك ممكن تشتري التكييف الكهربائي من خلال شهري أول وأسهل تطبيق تقسيط في مصر، واللي مش بيحتاج منك غير صورة البطاقة وبس، ومن غير زيارة، ولا ضامن، واستمتع كمان بتوصيل مجاني لكل مشترياتك.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

تنظيف الوحدة الداخلية

• تنظيف الوحدة الداخلية بينقسم لجزئين جزء خارجي ودا متعلق بسطح التكييف واللي تقدر تمسحه بقطعة قماش نظيفة ومندية بشكل خفيف جدًا لضمان التخلص من الأتربة وعدم انتشارها في المكان أثناء التنظيف.
• الجزء الثاني متعلق بالجزء الداخلي للوحدة، وبداية من هنا تقدر تشيل غطاء التكييف وتفك فلاتر التكييف وتغسلها وتسيبها لحد ما تنشف كويس قوي وبعدين ركبها تاني، بس خد بالك من عدلتها عشان تضمن إن التكييف يشتغل بفعالية.
• ممكن كمان تستخدم المكنسة الكهربائية لشفط أي أتربة متراكمة داخل الوحدة، لكن ضروري تتجنب استخدام البلاور لأن قوة الدفع بتاعته قوية وممكن تسبب تلف في الوحدة أو تقطع أي أسلاك.
• تقدر كمان تستخدم قطعة قماش مندية لتنظف الأجزاء الداخلية للوحدة وتجنب استخدامها مع أي أسلاك كهربائية.
• ابدأ بقى في خطوة تنظيف خرطوم تصريف الماء ومواسير التكييف من خلال ضخ مياه فيها وتنظيفها بفرشاة رفيعة وطويلة أو لو هتعرف تفك الخرطوم وتنظفه وتركبه تاني دا هيكون عظيم جدًا.
• يُفضل عدم تشغيل التكييف قبل 24 ساعة من عملية التنظيف.

تنظيف الوحدة الخارجية

• تنظيف الوحدة الخارجية معقد ومش سهل زي الوحدة الداخلية، بس تقدر تعمل حاجات خفيفة زي استخدام البلاور في تنظيفها من الأتربة وبعدين تمسحها بقطعة قماش مندية خفيف قوي.
• ممكن كمان تفك غطاء الوحدة الخارجية وتشفط الأتربة المتراكمة داخل الكمبريسور باستخدام المكنسة الكهربائية واستخدم قطعة قماش جافة لتنظيف المروحة الداخلية للوحدة، وبعدين ركب الغطاء تاني، وضروري تعرف إن البلاور ممكن يتسبب في قطع أي أسلاك أو تلف أي أجزاء داخلية في الوحدة الخارجية لأن الهواء الخارج منه قوي جدًا بس الفنيين ممكن يستخدموه لأنهم متخصصين وعارفين هما بيعملوا إيه كويس قوي.

إزاي تحافظ على العمر الافتراضي للتكييف؟

• نظف فلاتر التكييف بشكل دوري سواء بالماء أو بالمكنسة الكهربائية لضمان خروج هواء نقي ومنعش في المكان.
• مش طبيعي إنك تبقى عايز تظبط درجة حرارة المكان عند مستوى منخفض وسط الحرارة الشديدة اللي موجودة برا، لأنك كدا بتطلب من كومبرسور التكييف إنه يشتغل بأقصى جهد من غير راحة لتبريد المكان بشكل مستمر وبالشكل اللي إنت عايزه، وبالتالي التكييف هيبوظ بسرعة.
• استخدم الستائر لحجب أشعة الشمس من الدخول للمكان اللي موجود فيه التكييف لأن أشعة الشمس بتسخن المكان ومش هتخلي التكييف يشتغل بفعالية بل بالعكس دا هيبذل مجهود فوق الطبيعي عشان يبرد المكان ودي حاجة هتقصر عمره الافتراضي.
• استخدم مروحة لتقليب الهواء البارد الخارج من التكييف للحفاظ على برودة الجو لأطول فترة ممكنة.
• تأكد إن قوة التكييف مناسبة لمساحة المكان مش أقل منها لضمان إنه يشتغل بفعالية أكبر وعمره ميتقصفش بدري.
• تأكد إن المكان المستخدم فيه التكييف مقفول عشان تحافظ على برودة المكان وتضمن إن التكييف يفصل تلقائي كل شوية ويبرد المكان ويفصل براحته بحيث يريح كل شوية.
• اقفل التكييف لو مكنتش موجود في المكان اللي هو شغال فيه.

حاول متشغلش التكييف قبل مرور 24 ساعة على عملية التنظيف الدورية.

 تأكد من فصل التيار الكهربائي تمامًا قبل البدء في عملية التنظيف والصيانة.

 تقدر تستخدم غطاء مخصص لتغطية الوحدة الخارجية للتكييف طوال العام بحيث تكون عملية تنظيفها أسهل مع بداية فصل الشتاء.

 لو حسيت ولو بشكل بسيط إنك مش هتعرف تعمل صيانة التكييف بنفسك، يبقى أفضل حل هو اللجوء لمركز صيانة متخصص أو الشركة اللي ضمان التكييف تابع ليها.

شحن الفريون من الحاجات اللي ضروري تكلم الشركة أو فني متخصص عشان يجي يعمله ليك لأنك مش هتعرف أبدًا تعمل دا بنفسك في البيت.

 تأكد من صيانة التكييف بشكل دوري قبل بداية الصيف عشان تضمن إنه يشتغل معاك بفعالية طول الصيف وتضمن الحفاظ على عمره الافتراضي.

شوف عروض التكييف المختلفة المتوفرة على ياقوطة من هنا.

شوف دليل ياقوطة لكيفية شراء التكييف المناسب.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

منى عوض، كاتبة بقالي أكتر من سنتين، بكتب عادة عن التكنولوجيا اللي بقت جزء لا يتجزأ من حياتنا اليومية، وبحب دايمًا أني أقرأ وأدور كويس جدًا عن كل حاجة قبل ما أكتب عنها عشان أكون متأكدة من كل معلومة بكتبها ولو حسيت أن المعلومات اللي لاقيتها على الإنترنت مش كافية ببدأ أنزل وأسأل سواء أشخاص جربوا الحاجة دي أو في الأماكن اللي بتكون متخصصة في بيع الحاجة اللي بكتب عنها.