ازاي تختار وتشتري ياميش رمضان؟
كتب: صفاء مجدي
السنة لفت بسرعة وهوب لقينا رمضان دخل علينا وسط زحمة الامتحانات وسفريات الصيف وجوازاته، ووسط الزحمة دي في حاجات ضروري تعرفها عشان تشتري ياميش رمضان من نوع جيد، سواء هتستخدمه بنفسك أو هتقدمه هدية لأي شخص عزيز عليك. ياقوطة هتشارككم خبرتها في شراء الياميش واختيار أفضل الأنواع.
التمر
التمر هو أكثر نوع أساسي من الياميش ومن السُنة أنك تكسر صيامك على التمر، التمر له فوائد عظيمة للجسم لأنه بيقوي المناعة وكمان مضاد للأكسدة وعشان تحصل على الفائدة الكاملة من التمر لازم تختار نوع كويس.
مواصفات التمر الجيد
ناعمة وتقيلة وناشفة
- من حظنا أن النوع المصري من التمر كويس جدًا وأشهر مدينة في إنتاج التمر هي أسوان؛ نتيجة لارتفاع درجة الحرارة هناك واللي بتنشف التمر.
- ثمرة التمر الجيدة مش مهم حجمها ممكن تكون رفيعة وطويلة أو قصيرة وصغيرة، النوعين كويسين ولك الاختيار على حسب الاستخدام وعلى حسب تفضيلك.
- التمر الكويس بيكون ناعم وقشره متماسك.
- التمر الجيد مش لازم يكون ناشف أوي لكن النوع الناشف مفضل أكتر خصوصًا لو كنت هتستخدمه في عمل الخشاف بالذات لكن التمر الطري برضه كويس.
- لو مش بتحب التمر الناشف ممكن كمان تشتري التمر التقيل اللي قلبه لحمه ولكن ده بيكون سعره أغلى أكتر.
- لون التمر مش بيفرق أوي بس أهم حاجة يكون لونه بني بدرجاته مش أسمر، مع العلم أن التمر الغامق بيكون نسبة السكر فيه أعلى.
- وأنت بتشتري التمر افتح ثمرة التمر وشوف قلبها واتأكد إنها مش مسوسة أو بيضاء من الداخل.
تقدر تشوف وتقارن أسعار التمر من هنا.
قمر الدين
قمر الدين من المشروبات الرمضانية واللي يمكن مش بنشربه طول السنة غير في رمضان، وهو مش بيتعمل منه مشروب بس لكن كمان بيدخل في صناعة بعض الحلويات زي الكنافة أو المهلبية. قمر الدين مصنوع من المشمش وتُعتبر سوريا هي البلد الأول في صناعة قمر الدين لأن السوريين هما اللي اخترعوه في الأساس.
مواصفات قمر الدين المثالي
تعرف إن كان قمر الدين كويس أو لأ من رائحته، امسك اللفة وشمها ولما تكون رائحته مشمش ظاهر يبقى نوع قمر الدين دا كويس ومش مركون، و كمان يكون لونه لون المشمش.
هتلاقي في السوق نوعين: المصري والسوري، يُعتبر المصري درجة ثانية بعد السوري اللي هو الدرجة الأولى.
المشمشية
المشمشية كمان من المكونات الأساسية في الياميش وبنستخدمها في الخشاف على الإفطار أو بتدخل مكون في بعض الحلويات.
اختيار المشمشية
اسأل عن النوع التركي لأنه أحسن الأنواع والمشمشية الجديدة بيكون لونها فاتح، لكن لو لونها غامق وشكلها ذابلة فهي على الأغلب مركونة وقديمة.
الزبيب
الزبيب من المنتجات اللي موجودة طول السنة ويستخدم في وصفات كثيرة حلو وحادق، يستخدم في رمضان بزيادة في الحلويات، والكنافة، والقطايف، والخشاف.
اختيار الزبيب
- هتلاقي في السوق نوعين من الزبيب: الأحمر والأصفر.
- النوع الأحمر هو النوع المصري المعمول من العنب البناتي.
- النوع الأصفر هو النوع الإيراني وغالبًا بيكون سعره وجودته أعلى من المصري.
- أي كان النوع اختار الزبيب اللي لونه فاتح وممكن كمان تتذوقه عشان تشوف لو كان طازة أو لأ.
القراصيا
القراصيا من الياميش اللي مش مصري في الأصل ولكنه لقى قبول كبير، وكثير من المصريين بيحبوا يحطوها على الخشاف.
القراصيا الجيدة بتكون كبيرة نسبيًا، وشكلها كويس، وطعمها حلو وفيه مزازة.
المكسرات
سواء كان بندق أو لوز أو عين جمل أو فول سوداني فالمكسرات أساسية في رمضان؛ لأنها مكون أساسي في أغلب الحلويات الرمضانية وكمان لأنها تسالي حلوة بين الإفطار والسحور.
اختيار المكسرات
بشكل عام اختار المكسرات اللي بقشرها لأنها هتكون محفوظة أكتر، وكمان هتكون أرخص بكتير من المكسرات المقشرة الجاهزة، الحكم على النوع الكويس بيكون بس من خلال أنك تدوقها بنفسك وتحدد مدى جودتها. ولازم تكون القشرة سليمة ومش مسوسة.
عين الجمل لازم يكون لونه فاتح من الداخل مش لونه أسود.
تقدر تشتري المكسرات من هنا.
جوز الهند
جوز الهند من المكونات المهمة والمفيدة جدًا في رمضان وطول السنة وله فوائد للبشرة والشعر.
اختيار جوز الهند
جوز الهند لازم يكون لونها أبيض ناصع ولو لونها أصفر يبقى بايتة ومش كويسة، وجوز الهند الجيدة بنستوردها من فيتنام أو سريلانكا.
ياقوطة بتتمنى لكم صومًا مقبولًا وافطارًا شهيًا!