كتبت: منى عوض

التكييفات جهاز مهم وكتير من البيوت والمكاتب مش بتستغنى عنه في حر الصيف، بس عشان تقدر تستمتع بهواء بارد ومنعش ونقي محتاج تعمل صيانة دورية للتكييف، وإحنا هنقولك تعمل ده إزاي بنفسك في البيت، وهنقولك إزاي تحافظ على التكييف في الشتاء، بجانب شوية نصائح لاستخدام التكييف بشكل صحيح، لأننا في ياقوطة يهمنا راحتك دايمًا.

بنفكرك إنك ممكن تشتري تكييف الهواء من خلال شهري أول وأسهل تطبيق تقسيط في مصر، واللي مش بيحتاج منك غير صورة البطاقة وبس، ومن غير زيارة، ولا ضامن، واستمتع كمان بتوصيل مجاني لكل مشترياتك.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

خطوات تنظيف وصيانة التكييف

• أول خطوة دايمًا لازم تكون فصل التيار الكهربائي عن التكييف عشان تشتغل بأمان تام.
• استخدم البلاور في تنظيف الوحدة الخارجية للتكييف من أي غبار أو أتربة عليها، وبعدين ابدأ امسحها بقطعة قماش مشبعة بالمنظفات المخصصة للأسطح الخارجية.
• لو عايز تنضف الأجزاء الداخلية للوحدة الخارجية بنفسك، يبقى ابدأ في فك الجزء العلوي للوحدة الخارجية بحرص شديد واستخدم المكنسة فقط في شفط الأتربة داخل الكمبريسور، وبعدين استخدم قطعة قماش مبللة خفيف في تنظيف مروحة الموتور، وتقدر كمان ترش زيت تشحيم مع الحرص على تغطية أسلاك الكمبريسور بشكل كويس بغطاء بلاستيك عشان متتأثرش بالمنظفات وزيت التشحيم، ودلوقتي استنى شوية لحد ما الكمبريسور ينشف تمامًا، وبعدين ركب الوجه الخارجي للوحدة مرة تانية.
• دلوقتي الدور جيه على الوحدة الداخلية اللي تقدر تمسح الغطاء الخارجي ليها بقطعة قماش مبللة بشكل خفيف، وبعدين تشيل الغطاء وتمسح الأجزاء الداخلية بقطعة القماش من غير ما تقرب من أي أسلاك.
• فك فلاتر التكييف واستخدم المكنسة في شفط أي أتربة وغبار عليها وبعدين انقعها في وعاء كبير فيه ماء عليه شوية خل لمدة ساعة على الأقل، ولما تحس إنها نضفت شيلها وسيبها لحد ما تنشف تمامًا وبعدين ركبها مكاها تاني.
• بص بصة سريعة على خرطوم تصريف الماء ومواسير التكييف، وممكن تنضفها وتطرد أي أتربة جواها بالبلاور، وبعدين ركب غطاء الوحدة الداخلية مرة تانية.
• دلوقتي التكييف بقى نضيف تمامًا، بس برضو ماينفعش تشغله قبل 24 ساعة عشان تضمن إنه نشف وبقى كويس تمامًا.

الحفاظ على التكييف في فصل الشتاء

• تنظيف التكييف والحفاظ عليه مش بيقتصر على فصل الشتاء وبس، لأ إنت محتاج تعمل دا في الشتاء كمان عشان تضمن طول عمره الافتراضي واستمرارية عمله بكفاءة عالية.
• لو التكييف بتاعك بارد تأكد من تغطية الوحدة الخارجية بغطاء خاص بيها ودا لحمايتها من الأتربة والأمطار وأي عوامل خارجية ممكن تأثر عليها طول فصل الشتاء.
• بالنسبة للوحدة الداخلية فممكن تغطيها أيضاً وممكن تنظفها كل فترة بقطعة قماش مبللة بشكل خفيف جدًا.

نصائح لاستخدام التكييف بشكل صحيح

• استخدم الستائر لحجب أشعة الشمس من الدخول للمكان اللي شغال فيه التكييف عشان تضمن الاستمتاع بهواء بارد ومنعش، ودا لأن أشعة الشمس بتسخن هواء الغرفة ومش هتخلي المكان يوصل لدرجات الحرارة المطلوبة وبالتالي هتضطر تغير درجة حرارة التكييف وفرض ضغط أكبر عليه وبالتالي قصر عمره الافتراضي.
• لو عايز هواء بارد بكفاءة أعلى، يبقى استخدم المراوح بجانب التكييف لأن دورها فعال جدًا في تقليب هواء التكييف البارد في جميع أنحاء المكان، ومش بنقول 500 مروحة في المكان لأ كفاية مروحة واحدة بس وهي هتقوم بالمهمة المطلوبة.
• لو استخدمت مروحة فعلاً في تقليب الهواء البارد في المكان، تأكد من أنها مش محطوطه في عكس اتجاه الهواء بحيث إنها تاخد الهواء من المكييف على طول وتقلبه في المكان.
• يفضل استخدام التكييف في مكان كمية الأثاث الموجود فيه قليل شوية، لأن الأثاث الكتير بيعيق حركة الهواء في المكان وهتحتاج وقت طويل شوية لحد ما المكان يوصل لدرجة الحرارة اللي إنت عايزها.
• اتأكد أن التكييف شغال في مكان مقفول عشان يبرد المكان بشكل أسرع وبكفاءة أعلى.
• تنظيف الفلتر شئ مهم جدًا كل أسبوعين على الأقل عشان تضمن استمرارية تدفق الهواء البارد للمكان بكفاءة عالية.
• تجنب خفض درجة حرارة التكييف إلى مستويات متدنية جدًا- اللي هي أقل من 20- لأنها ممكن تأثر على صحتك بالسلب وكمان بتأثر على العمر الافتراضي للتكييف بمرور الوقت.
• تأكد من أن قوة التكييف بتتناسب مع المساحة اللي موجود فيها عشان تضمن طول عمر التكييف وتضمن كمان تبريده للمكان بشكل كويس.

** ملحوظة مهمة: لو حسيت إنك مش هتقدر تنظف التكييف بنفسك أو حسيت بخوف، يبقى يفضل إنك تكلم مركز الصيانة وهما يعملوا المهمة المطلوبة أفضل وبكل أمان، خاصة أن وحدة التكييف الخارجية بتحتوي على موتور وأسلاك كهرباء.

تقدر تشوف عروض التكييف المتوفرة على ياقوطة من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

منى عوض، كاتبة بقالي أكتر من سنتين، بكتب عادة عن التكنولوجيا اللي بقت جزء لا يتجزأ من حياتنا اليومية، وبحب دايمًا أني أقرأ وأدور كويس جدًا عن كل حاجة قبل ما أكتب عنها عشان أكون متأكدة من كل معلومة بكتبها ولو حسيت أن المعلومات اللي لاقيتها على الإنترنت مش كافية ببدأ أنزل وأسأل سواء أشخاص جربوا الحاجة دي أو في الأماكن اللي بتكون متخصصة في بيع الحاجة اللي بكتب عنها.