كتبت: صفاء مجدي

في مقال سابق، ياقوطة اتكلمت بالتفصيل عن ساعات اليد وطريقة اختيارها بشكل صحيح. لكن المقال ده خصصناه بالتحديد للساعات الرياضية وده لأن فيها مميزات كتيرة قوي بتخليها مش مجرد ساعة تعرفك الوقت والتاريخ لكن كمان هتساعدك تمارس تمريناتك الرياضية وتعلي أداءك.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

ليه تشتري ساعة رياضية؟

• لأن الساعات الرياضية الحديثة تعتبر أكتر من جهاز في جهاز واحد صغير، هتعرفك ضربات قلبك وسرعتك لو بتجري أو بتتحرك وبيانات تانية كتير مهمة لكل واحد رياضي وهتحسن من أداءك.
• لأن الساعات العادية مابتليقش على لبس وظروف ممارسة الرياضة من حركة وعرق وغيره. لا تكوينها ولا طريقة شغلها تنفع لكده. وفيه بعض الرياضات اللي ممكن تؤثر على أداء الساعة أو تبوظها تماماً زي مثلاً رياضة السباحة وعشان كده لازم يكون عندك ساعة رياضية.
• كمان الساعة الرياضية الكويسة هتحل محل الموبايل اللي بيكون صعب تمسكه في إيدك بسبب ظروف التمرين أو ظروف العرق والحركة الكتير.

ممكن تشوف الساعات الرياضية من هنا، بسعر يبدأ من 515 جنيه مصري.

الوظايف المختلفة للساعات الرياضية

هتعرفك الوقت

وده شئ بديهي في الساعات الرياضية، وفيها أكتر من طريقة عشان تعرفك الوقت؛ طريقة تناظرية بعقارب أو طريقة رقمية أو مؤخراً كمان بقى فيه ساعات بتنور بنور LED وتعرفك الوقت وكمان فيه ساعات بتجمع بين الطريقة التناظرية والرقمية في نفس الوقت.

هتعرفك سرعتك

اسمها tachymeter ودي مناسبة جداً للرياضات اللي فيها حركة زي السباحة والجري وغيرها.

هتعرفك مكانك

وده من خلال خاصية ال GPS. الساعات الحديثة تقدر تقولك مكانك فين بالظبط ودي مناسبة جداً للناس اللي بتحب تجري وتستكشف أماكن جديدة غير معتادة. وبكده تقدر تستغنى عن موبايلك في الوظيفة دي.

هتكون ساعة إيقاف

ودي مناسبة جداً لو كانت تمريناتك بتحتاج ستوب ووتش stop watch تحدد وقت تمرينك. وأكيد ساعة على إيدك هتكون أسهل في استخدامها من ستوب ووتش منفصلة أو ستوب ووتش على موبايلك. والنوع ده من الساعات بيكون فيه عقرب منفصل للغرض ده. النوع ده من الساعات اسمه chronograph.

هتقيس دقات قلبك

وده شئ مهم جداً بالذات لو كنت بتمارس رياضة عنيفة أو لو كنت لا قدر الله بتعاني من مشكلة صحية ومحتاج تعرف حالة قلبك طول مانت بتتمرن عشان ماتزودش التمارين زيادة عن اللزوم.

هتقيس سعراتك الحرارية

ودي من أكتر الحاجات اللي عجبتني في الساعات الرياضية. الساعات من النوع ده بتقيس السعرات بناءً على وزنك وطولك ونشاطك الرياضي ودقات قلبك، وكل ما تدخلها بيانات عن نشاطك وصحتك كل ما هتقيس ضربات قلبك بشكل أفضل.

هتعرفك اتجاهاتك

وده لأن فيها بوصلة ودي مناسبة جداً للناس اللي بتطلع رحلات في الصحراء أو بتسافر بالعربية أو بتطلع رحلات مائية.

هتعرفك الضغط الجوي

النوع ده من الساعات اسمها بارومتر، ودي هتقيس الضغط الجوي وعلى أساسه تقدر تتنبأ منها بحالة الجو وتعتبر برضه ضرورية للي بيمارس رياضات برة البيت زي التزحلق على الأمواج أو الجري أو ركوب العجل.

هتظبط عليها مواعيدك

لأنها هتكون منبه وكتير من الرياضيين بيعتمدوا على منبه ساعاتهم الرياضية أكتر من المنبه العادي أو منبه الموبايل وده لأنها غالباً مش بتفارقهم.

هتنزل معاك المياه

وخلينا النقطة دي للآخر لأن فيها تفاصيل كتير. مبدئياً مش أي ساعة مكتوب عليها Water resistant تقوم تنزل تعمل بيها diving. لأن مقاومة المياه في الساعات درجات مختلفة.

• فيه ساعات آخرها في المية الطرطشة اللي بتحصل لو غسلت إيدك أو نزلت في المطرة ودي مالهاش في الغوص ولا السباحة.
• وفيه ساعات تانية تنفع بس للسباحة لكن متستحملش الغوص.
• وساعات تانية تنفع للغوص على مسافات معينة بس وماتنفعش على مسافات أبعد وممكن ببساطة تبوظ لأن ضغط المياه بيؤثر سلباً على أداء الساعة.

طيب دلوقتي تعرف منين تشتري الساعة المناسبة للرياضات المائية؟

• مبدئياً في أي مكان في العالم الساعة المعمولة للغوص هيكون مكتوب عليها بصراحة كده إنها بتاعة غوص ودي حاجة عالمية.
• كل ساعة بتتحمل ضغط معين والناس بتوع الساعات بيقيسوا الضغط بحاجتين:

البار Bar وده اللي بيساوي ضغط عمود من الهواء طوله 10 متر

الأتموسفير A.T.M وده نفس قيمة البار.

ودي بعض العلامات اللي بتكون مكتوبة على الساعات المقاومة للماء ومعناها

Water resistant 30m-50m: تعرض بسيط للمياه ومناسبة للاستخدام العادي.

Water resistant 100m: للأنشطة المائية البسيطة.

Water resistant 200m: للرياضات المائية المحترفة.

التلاتة اللي فوق دول مناسبين للمياه لكن مش مناسبين للغوص لأعماق بعيدة.

Diver’s 100m: مناسبة للScuba diving.

Diver’s 200m, 300m: مناسبة للScuba diving.

Diver’s 300m+, Helium safe: مناسبة للScuba diving وفي بيئة هيليوم.

لما تيجي تشتري الساعة الرياضية خلي بالك من الآتي:

• من أحسن الماركات في الساعات الرياضية بشكل عام: Timex,  Polar, Garmin, Casio والأنواع دي كلها هتلاقيها على ياقوطة.
• اشتري ساعة الأوستيك بتاعها مريح يتحمل العرق والبهدلة والساعات الرياضية عموماً بتكون معمولة من المطاط أو التيتانيوم.
• الساعات الرياضية عشات بتقوم بمهام كتير زي ما سبق شرحنا بيكون وشها مزحوم قوي ومكلكع شوية ودي حاجة مش كويسة عشان هتتوهك عشان تعرف الوقت أو تقيس دقات قلبك أو غيره وعشان كده اختار ساعة يكون وشها بسيط وواضح تفهمه من بصة واحدة عشان تفضل مركز في تمرينك.
• اشتري ساعات تكون بتنور في الضلمة بالذات لو كت بتحب تمارس رياضة بالليل.
• ادخل على ياقوطة اتفرج على أسعار الساعات الرياضية  بأسعار تبدأ من 125 جنيه مصري. واعرف وظايفها المختلفة.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com في فيسبوك.