إزاي تختار جزمة الكرة المناسبة ليك؟
دليلك الشامل لاختيار جزمة الكرة المناسبة لك
كتب: علاء بسيوني
الكرة هي أكثر لعبة شعبية في مصر، كلنا بنحب نتفرج علي مباريات الكرة وبنمارسها كرياضة كمان. من أهم الحاجات في لبس الكرة هي الحذاء الرياضي اللي هتلعب بيه.
*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
خلونا الأول نوضح الفرق بين ملاعب الكرة وأنواع الارضيات:
ملاعب النجيلة (طبيعي أو صناعي):
أغلب الملاعب اللي بتتأجر سواء في النوادي أو غيره بتكون نجيلة، والشباب بتفضله علشان لو وقعت وانت بتلعب ماتتصابش.
ملاعب الترتان:
دي ملاعب بتبقى الأرضية فيها معمولة من مادة البوليوريثان، عبارة عن أرضية مطاطية بحبيبات ودي بتساعد على عدم الانزلاق.
ملاعب داخلية (indoor):
دي ملاعب بتبقى الأرضية مسطحة مفيش عليها أي مواد أو حبيبات، في ناس بتحبها علشان الكرة بتبقى متحررة أكتر في مشيها.
نيجي بقى لأنواع الأحذية اللي تناسب لعبك ونوع الملعب:
أحذية الستارز:
دي بتبقى معمولة للعب على النجيلة (الصناعي و الطبيعي)، ودي ميزتها إن الأطراف اللي في أسفل الحذاء بتثبتك وانت بتجري على أرضية الملعب.
حذاء الترتان:
بتبقى معمولة علشان تلعب بيها على ملاعب الترتان، وفي ناس بتلعب بيها على ملاعب النجيلة (بس لازم عشب النجيلة يبقى قصير)، وبتتميز ببروزات أسفل الحذاء بتثبتك على أرض الملعب.
حذاء الفلات (indoor):
دي بتبقى مسطحة من الأسفل و مطاطية، وبتبقى مخصصة للعب في الأراضي المسطحة تماماً وماينفعش تلعب بيها في ملاعب النجيلة ولا الترتان.
مادة وتصميم الصنع:
أحذية الكرة دائماً بتبقى معمولة من الجلود الطبيعية والصناعية، وفي جلود متينة وجلود لينة، على حسب انت بتلعب مركز إيه (أيوه بتفرق وهنشرح ده قدام). الجلود الطبيعية بتبقى أثقل في الوزن ودي بتديك ميزة الثبات والقوة في الركلات، بس مش هتديك السرعة والخفة اللي هيوفرهالك الجلد الصناعي. وجه الحذاء بيفرق في طريق اللعب كالآتي:
-
لا تعوجات:
المهاجم ورأس الحربة (وأحيانا الجناح) هم أكتر ناس بتستخدم النوع ده من الأحذية علشان بتتميز بخفة ودقة التصويب. ويفضل يكون من نوع الجلد الصناعي.
تعوجات متوسطة:
خط الوسط وصانع الألعاب هم أكتر ناس بتستخدم الحذاء ده علشان بتتميز بثبات أكثر ودقة في التمريرات والرفعات. ويفضل يكون من نوع الجلد الطبيعي لكن لا مانع من إنه يكون من الجلد صناعي برضه.
كثير التعوجات:
ده بقي للمدافع و الليبرو وكذلك حارس المرمي، بيتميز بصلابة الوجه لركل الكرة بعيداً عن مرماه والتدخل لاستخلاص الكرة (ياقوطة بتناشد جمهورها مش لازم نكسر بعض علشان ماتش كرة)، وده بيبقى أغلبه من الجلد الطبيعي.
الماركات:
ماركات حذاء الكرة متنوعة وكل ماركة وليها مميزاتها من حيث بلد المنشأ، المواد المستخدمة، طريقة تقفيل الحذاء وآراء المستخدمين.
Nike:
اسمها معروف في السوق و ليها تاريخ في صناعة الملابس الرياضية، بتتميز بالمواد والتكنولوجيا المستخدمة في صناعة أحذية كرة القدم.
Adidas:
لا غنى عنها في ملابسنا الرياضية، تعتبر المنافس الأقوى ل Nike لتاريخها المعروف في الملابس الرياضية، تتميز بطرق وصلابة التقفيل.
ممكن تشوف حذاء كرة قدم adidas من هنا، بسعر يبدأ من 650 جنيه مصري، وممكن تشوف مقارنات أسعاره من هنا.
Puma:
انت عارف إن Puma و Adidas إخوات؟ أيوة وكل واحد فيهم عمل شركة مع نفسه لخلاف بينهم (ملناش دعوة). تاريخه يتحدث عن نفسه وبالمناسبة أغلب ملابس الفرق الممثلة لمصر بتبقى ماركة Puma فهي تتميز بطرق التقفيل والأسعار أحياناً.
ممكن تشوف حذاء كرة قدم بوما من هنا، سعره يبدأ من 990 جنيه مصري، وممكن تشوف مقارنات أسعاره من هنا.
Umbro:
الإنجليز لما يعملوا منتج يبقى هاته وانت مغمض، بتتميز بالمواد المستخدمة وطرق التقفيل والأسعار بتبقى في المتناول إلى حد كبير جداً.
في ماركات تانية كتير زي Diadora و Mikasa و غيرهم. الماركات دي بتبقى بتحاول تاخد نصيب من السوق من العمالقة اللي فوق دول، وأسعارهم كويسة جداً بس مش هتعيش معاك كتير زي الفوق دول.
المقاسات:
مش زي الأحذية التانية، خد بالك من إنك لازم تزود درجة عن مقاسك الحقيقي. يعني لو مقاسك 43 يبقي اطلبه 44 وهكذا.
ده بسبب إن وجه الجزمة بيضيق في آخره وأصابع الأرجل بتبقى محتاجة مساحة علشان تعرف تلعب و تجري، أهم حاجة طول الجزمة، وعرض الجزمة كده كده هيلين معاك مع الوقت.
الأسعار:
أسعار الأحذية بتبقى على حسب نوع الجزمة (مش شرط الماركة) يعني مثلاً ممكن حذاء Adidas ستارز يبقى أغلى من حذاء ترتان من Nike، في حين إن أغلب منتجات Nike بتبقى أغلى من Adidas.
أحذية الستارز بتبقى أغلاهم لكثرة المواد والقطع المستخدمة في الصنع، يليهم الترتان ثم الفلات.
*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com في فيسبوك.