كتب مصطفي خالد

إزاي تسجل ذكرياتك من خلال الكتب! في ناس بيحبوا يأخدوا صور للحظات الحلوه اللي بيعيشوها، وبيجمعوا صورهم عشان يسجلوا بيها ذكرياتهم للحظات الحلوه دي، واللي بيحبوا القراءة  بيحبوا يجمعوا الكتب الحلوه اللي قرأوها، اللي من خلالها بيفتكروا المتع اللي عاشوها والعوالم اللي استكشفوها والمعلومات والأفكار اللي عرفوها وفهموها، وبيكتشفوا كمان تأثير الكتب دي عليهم وإزاي حياتهم اتغيرت بسببها.
وبما إني بحب الكتب، فأنا هأتكلم عن أفضل الكتب اللي قرأتها خلال سنه 2015، واللي هيخلوني كل ما أفكر في 2015 أفتكرها دايما بالكتب دي.

قائمه بأفضل 12 كتاب لعام 2015

 شوق الدرويش .. للكاتب حمور زياده

« كلنا في أرض الله دراويش نبحث عن الحب، إن لم نجده في الأرض وجدناه في السماء. »

رواية الكاتب السوداني «حمور زيادة» واللي اتنشرت في النصف الثاني من عام 2014 لكنها اتعرفت في 2015 لما اترشحت لجائزة «البوكر» واللي وصلت فيها للقائمة القصيرة، بالإضافه لحصولها على جائزة «نجيب محفوظ للآداب».

بتدور أحداث الرواية خلال فترة الثورة المهديه في السودان وهى من أهم الفترات في تاريخ السودان الحديث، وفيها ادعى « محمد المهدي» بإنه المهدي المنتظر وكون جيش ضخم من أتباعه اللي صدقوا دعوته وهدد بيهم مصر وحاكمها « محمد علي» خلال القرن التاسع عشر .الرواية بتحكي عن شاب من أتباع المهدي والمؤمنين بدعوته، بيقع في حب بنت مصريه كانت في بعثه تنصيريه في السودان واللي بتُجبر على الإسلام لما بتقع في أَسْر جيش المهدي ، وده اللي بيخلي الشاب يتعاطف معاها ويحاول يساعدها وينتقم لها، فبيقع في حيرة بين علاقة الحب دي وبين دعوة المهدي اللي هو مؤمن بيها وتابع ليها، ببساطه هتلاقي في الرواية أحداث تاريخيه بتتكرر حوالينا وهتلاقي حيرة الإنسان المستمرة في بحثه عن نفسه ومراجعته لأفكاره ومعتقداته.

هتلاقي رواية شوق الدرويش هنا.

سعر الرواية 60 جنيه مصري.

فئران أمي حصة .. للكاتب سعود السنعوسي

« لسنا في وقت يسمح لنا بترف الحنين إلى زمن طفولة في ماض كان، ولكنه حنين إلى زمن رغم الخيبات فيه عشناه بأفضل ما يكون »

رواية الكاتب الكويتي «سعود السنعوسي» الحاصل على جائزة «البوكر» عن روايته السابقة « ساق البامبو».

الرواية بتدور أحداثها ما بين عام 2020 وبين ثمانينات وتسعينات القرن السابق، من خلال بطل الرواية اللي بيكتب رواية بتتكلم عنه هو وأصدقاء طفولته وأسرته وجيرانه في الماضي، ومن خلالها بتتعرف على طبيعة المجتمع الكويتي وتأثير الحرب مع العراق عليه وهى الحرب اللي كان ليها التأثير الأكبر على المجتمع الكويتي، ولكنها في رأي الكاتب ومن خلال أحداث روايته في المستقبل أقل مما ينتظر المجتمع من مشاكل وقضايا مسكوت عليها زى المشاكل الطائفية والمذهبية والسياسية ومشاكل الفقر والجهل اللي عامله زي القنبلة في انفجارها، الرواية فيها تنبؤ بالوضع السياسي والاجتماعي لمنطقة الخليج عموما.

هتلاقي رواية فئران أمي حصة هنا.

سعر الرواية 128 جنيه مصري.

 سوف أحكي عنكِ .. للكاتب أحمد مهني

« أدركنا أن النصر يعني الموت ولا شئ سوى الموت، ولم تكن فكرة مرعبة بقدر ما كانت فكرة تدعو للتأمل ، لماذا على الطيبين أن يموتوا ويتركونا نتجرع أسى البقاء في هذا العالم المقرف الذي يصيب بالغثيان؟»

رواية الكاتب والمدون “أحمد مهني” الأولى واللي صدر ليه قبلها كتاب في أدب الإعترافات بعنوان “مزاج القاهرة” وكان أحد أفضل كتب أدب الإعترافات في الفترة الأخيرة.

الرواية بتحكي عن 3 شخصيات بتجمعهم القهوة اللي دايما بيتقابلوا فيها ومنها بتروح مع قصة كل واحد فيهم واللي مرتبطه بباقي القصص. العجوز اللي كان أحد الضباط في سلاح الفرسان واللي كان صدر حكم ضده بعد ثورة الضباط الأحرار في 1952 وبعد عزل الرئيس « محمد نجيب » واتهام سلاح الفرسان بمحاولة قلب النظام  واضطراره للهروب بره مصر، ولما رجع عاش وحيد يعاني العزله والمرض والشيخوخه، والدكتور اللي اتسجن سياسيًا بسبب مشاركته في مظاهرة مع خطيبته واللي بعد ما خرج بيدور عليها ومش لاقيها، والشاب الكاتب المغمور اللي بيحاول يثبت نفسه بأي طريقة حتى لو كانت استغلاله لصديقه الدكتور .رواية درامية فيها رومانسية وسياسة وتاريخ ورغم بساطتها إلا إنها هتشدك بأسلوبها وأحداثها .

هتلاقي رواية سوف أحكى عنكِ هنا.

سعر الرواية 30  جنيه مصري.

#انستا_حياة.. للكاتب محمد صادق

« هل تعرفين مقولة «الحزن هو الوحيد الذي يولد كبيراً ثم يصغر»؟ مقوله حمقاء تمامًا تم تأليفها من أجل المواساة .. حقيقة الأمر أن الحزن لا يصغر أبدًا .. الحزن يولد كبيرًا حتى نقتل نحن الجزء الذي يتألم داخلنا .. فننسي .. ونكمل حياتنا للأبد ناقصين.»

رواية الكاتب « محمد صادق » صاحب الرواية الشهيرة «هيبتا» واللي كانت أكثر الكتب مبيعاً لعام 2014.

الرواية بتتكلم عن شخص بيدور على عشر أسباب تخليه يتمسك بالحياه وبيقرر ينتحر إذا ما قدرش يلاقي الأسباب دي، ومن خلال صفحة بينشئها على فيسبوك بيشارك بالأسباب اللي بيلاقيها وبيقبل مشاركة متابعين الصفحة في بحثه عن الأسباب العشره دي، وخلال رحلة بحثه بتكتشف ايه اللي حصله في حياته وخلاه يوصل للفكرة دي .الرواية هتخليك تفكر في الأسباب الحقيقية اللي انت ممكن تكون عايش عشانها .

هتلاقي رواية انستا حياة هنا.

سعر الرواية 35 جنيه مصري.

 الصرخة .. للكاتبه رضوى عاشور

« أسوأ ما في المرض أنه يُرْبِكُ ثقتك بنفسك فيتسرب إليك الخوف من أنك لا تصلح، ولن تستطيع»

الكتاب هو آخر ما كتبت الكاتبة الدكتور «رضوى عاشور» – صاحبة الرواية الشهيرة « ثلاثية غرناطة» – والذي لم يكتمل بسبب وفاتها.

الكتاب بيحكي عن تجربتها مع عودة المرض اللي كان اصابها واللي كانت تحدثت عنه في كتابها السابق قبل عامين « أثقل من رضوى» اللي فيه حكت عن الثلاثة أعوام اللي قضيتهم في علاجها من المرض واللي انتهت بشفائها قبل أن تعود للمرض وتحكي عنه في كتابها الأخير. الكتاب فيه إكمال لرحلة مقاومة الكاتبة للمرض بالإضافة لأفكارها ومشاعرها اللي اتولدت أثناء رحلتها دي.

هتلاقي كتاب الصرخة هنا.

سعر الكتاب 35 جنيه مصري.

إذاعة الأغاني.. للكاتب عمر طاهر

« بينما تجري الحياة .. ثمة أغنية ماتدور في الخلفية. بينما تدور أغنية ما .. ثمة حياة تجري فى الخلفية.»

«عمر طاهر» مش مجرد صحفي أو كاتب ، لكنه فيلسوف صاحب ذوق فني وشغف بالموسيقي والغناء، قدر يربط بين الأغاني الأفضل اللي استمع ليها في حياته وبين مواقف صادفته أثناء الإستماع لهذه الأغاني بالإضافة لتوثيقه لصناعة الأغاني دي نفسها، هيجبرك إنك تعيد إستماعك ليها حتي لو سمعتها قبل كده ، وهيشجعك تصنع ألبومك من الأغاني اللي إنت بتحب تسمعها واللي منها تقدر تسجل حياتك وذكرياتك ومراحل التطور والتحول في شخصيتك .

هتلاقي كتاب إذاعة الأغاني هنا.

سعر الكتاب 30 جنيه مصري.

مكتوب علي الجبين .. للكاتب جلال أمين

« من عاش مثلي ثمانين عامًا، لا بد أن يكون قد تعرَّف في حياته على عدد كبير من الناس، رجال ونساء، أغنياء وفقراء، من المتعلمين وغير المتعلمين، مصريين وأجانب، إلخ، وعندما أستعيد في ذهني ما رسخ لديَّ من انطباعات عن هذا الشخص أو ذاك، فيمن تعرفت عليهم على مرِّ السنين، يعتريني العجب»

الكتاب هو الكتاب الثالث من كتب السيرة الذاتية للكاتب الدكتور « جلال أمين» صاحب الكتاب الشهير «ماذا حدث للمصرين».
الكتاب بيحكي عن مواقف عاشها الكاتب وبيحكي عن ناس قابلها وعرفها، ومن خلال الحكايات دي هتتنقلك حيرة الكاتب في فهمه لسلوك الإنسان وأفكاره وتغيراته. وهتتنقلك حكمة الكاتب اللي جمعها خلال ثمانين سنه عاشهم في حياته.

هتلاقي كتاب مكتوب علي الجبين هنا.

سعر الكتاب 50 جنيه مصري.

فقه الحب .. للكاتب يوسف زيدان

« الإنسان جامع للمتعارضات جميعها، وفيه المراتب كلها، كامنة : السمو والسفالة ، الملائكية والشيطنة ، النبل والحقارة ، الأثرة والإيثار. ولهذا قيل إنه الكون الجامع للأمر كله. ولا ارتقاء له في تلك المراتب، إلا بالحب.»

الكتاب عبارة عن حكم وأقوال من تأليف الكاتب الدكتور « يوسف زيدان » صاحب رواية عزازيل الحائزه على جائزة البوكر، وهي تشبه أقوال شعراء الصوفية: ابن الرومي وابن عربي وابن الفارض والحلاج، وفيها شرح لفلسفة الحب ومراتبه المادية والمعنوية، البشرية والإلهية.

هتلاقي كتاب فقه الحب هنا.

سعر الكتاب  22 جنيه مصري.

الأحلام الأخيره .. للكاتب نجيب محفوظ

« وجدتني في حفل لتكريم رموز الثقافة والعلم، ووقف الرئيس وتحدث عن «أولاد حارتنا»  فنفى عنها أي شبهة إلحاد، ونوه عما فيها من تسامح واستنارة .»

الكتاب هو آخر ما كتب أديب نوبل الراحل « نجيب محفوظ» واللي كان مفقود إلي أن عثرت عليه ابنتيه بين أوراقه، وهو بمثابة جزء تاني من « أحلام فترة النقاهه » آخر ما نشر للأديب الراحل قبل وفاته، وفيه بيكمل أحلامه اللي أشبه بقصص قصيره بيتنقل فيها بين موضوعات السرد الذاتي والأفكار الصوفية والفلسفية اللي كتير عبر عنها الكاتب في كتاباته، ورغم كون الأحلام من أبسط وأصغر كتب «نجيب محفوظ»  في ظاهرها إلا إنها الأعمق والأكثر غزارة بالأفكار في رأي كثير من النقاد.

هتلاقي كتاب الأحلام الأخيرة هنا.

سعر الكتاب 42 جنيه مصري.

الفتي المتيم والمعلم .. للكاتبة أليف شافاق

« العمارة مرآة تعكس الانسجام والتوازن الذين يحفل بهما الكون، وإذا لم تحتضن هذه السجايا في فؤادك فإنك لن تتمكن من البناء.»

الرواية المترجمة حديثًا لآخر أعمال الكاتبة التركية «أليف شافاق» صاحبة الرواية الشهيرة «قواعد العشق الأربعون».

الرواية في رأي بعض النقاد هي أفضل عمل أدبي للكاتبة، وفيها بتسرد حياة « سنان » المعماري الأشهر في التاريخ العثماني وعلاقته بالخادم  « جهان » الولد الهندي الصغير اللي كان مسئول عن رعاية فيل السلطان، ولما «سنان» بيجد فيه حس معماري بيقرر يعلمه الفن المعماري وبتتطور العلاقة بينهم ليكون ليه بمثابة «الأب الروحي» اللي بيعلمه فلسفة الحياة اللي اكتسبها من سنوات عمره الطويلة، وخلال قصتهم بنتعرف على جزء كبير من تاريخ الدولة العثمانية اللي بتدور خلاله أحداث القصة.

هتلاقي رواية الفتي المتيم والمعلم هنا.

سعر الرواية  163 جنيه مصري.

في طريق الأذي .. للكاتب يسري فوده

كتبنا عنه قبل كده وهو في رأيي أفضل كتاب سياسي لعام 2015.

ممكن تقرأ عنه بالتفصيل في المقال ده : إزاي تختار كتاب تقرأه؟

هتلاقي كتاب في طريق الأذى هنا 

سعر الكتاب 40 جنيه مصري

مثل إيكاروس .. للكاتب أحمد خالد توفيق

كتبنا عنها قبل كده وهي في رأيي أفضل رواية تشويق وجريمة لعام 2015.

المعرفة تختلف عن الحكمة، ومعرفة عدد رمال الشاطيء أو عدد أشجار الغابة لن تقودك إلى الحكمة. ربما تقودك إلى الضياع الأبدي.. ثمة أمور يحسن أن تبقى تحت غطاء، والخطر كل الخطر أن يراها أمثالك، ولربما كان ثمن الحقيقة نهايتك لأن الشمس إصر على كاهل الواهنين

ممكن تقرأ عنها بالتفصيل في المقال ده : إزاي ممكن رواية تغير حياتك؟

هتلاقي رواية مثل إيكاروس هنا 

سعر الرواية 45 جنيه مصري

دي كانت أفضل كتب بالنسبه لي في 2015 واللي كان ليا حظ اني اقرأها مع العلم بإن أكيد في كتب تانيه كتير حلوه بس يمكن أكون لسه ما قرأتهاش .

عن كاتب المقال (مصطفي خالد) 

أنا بشتغل في كل الأنشطة اللي لها علاقه بالكتب من أكتر من سبع سنين وحاليا أنا مدير فرع في سلسلة مكتبات «أ» أكبر سلسلة مكتبات في مصر، بقرأ بصفة منتظمة وبمعدل قراءة كتاب في الأسبوع وأوقات كتير أسرع على حسب حجم الكتاب، بحب أقرأ في موضوعات مختلفة، وأكتر حاجه بحبها بعد القراءة هي إني أساعد الناس في إختيار الكتب اللي ممكن يقرأوها.