أرميها ولا أسيبها!
كتب: صفاء مجدي
حاجات كتير في البيت بنستخدمها بشكل يومي أو يمكن في اليوم أكتر من مرة زي فرش الأسنان أو الفوط أو غيرها وساعات كتير بننسى نغيرها أو على النقيض في ناس تانية بتقلق بزيادة من النظافة والصحة فممكن تغير الحاجات دي بشكل زايد عن اللزوم. عشان كده ياقوطة النهاردة جايبالكم دليل جمعت فيه معظم المستلزمات الأساسية في كل بيت وهتعرفك إن كان لازم تغيرها ولا بس محتاج تنظفها وهنشرح لك تقوم بالعملية دي كل أد ايه.
1. فرشاة الأسنان
فرشاة الأسنان أساسية جدًا وينصح باستخدامها مرتين في اليوم أو مرة واحدة على الأقل، عن نفسي أنا من الناس اللي بحب اشتري فرشاة أسنان لونها حلو وشكلها حلو بس بنسى أو بيصعب عليه أرميها لكن النهاردة عرفت أد ايه فرشاة الأسنان ممكن تشيل وتعبي بكتيريا بشكل مؤذي جدًا لمستخدمها، وكمان فرشاة الأسنان المكشوفة ممكن تجمع بكتيريا أو فيروسات من الجو بسهولة وتنقل العدوى.
ازاي اغسل فرشاة الأسنان عشان متنقلش عدوى؟
- فرشاة الأسنان لازم تتغسل كويس جدًا تحت حنفية المياه بعد كل استخدام ولازم تسيبها تنشف في الهواء.
- ولو كنت أصبت بالبرد أو أي عدوى شديدة واستخدمتها وقت المرض يفضل تغييرها أو على الأقل تنقعها في مياه مع خل أبيض أو منظف وغسول للفم.
- لازم يكون كل فرشاة بعيدة عن التانية عشان متنقلش أي أمراض.
*من الحاجات اللي الناس بتغفل عنها هي الكوباية أو العلبة اللي فيها فرش الأسنان نفسها، دي كمان محتاجة غسيل بمياه وصابون كل فترة.
هتلاقي حوامل مختلفة لفرش الأسنان على ياقوطة من هنا.
امتى أغير فرشاة الأسنان؟
الجمعية الأمريكية لطب الأسنان بتنصح بتغيير فرشاة الأسنان مرة كل 3 شهور أو لو شعر الفرشاة بدأ يتغير لونه أو شكله بقى ضعيف.
لو عايز تشوف فرش أسنان من هنا.
2. شنطة اليد
كواحدة من البنات لازم أعترف أن معظم شنط البنات بيكون فيها حاجات كتيرة وأحيانًا ممكن نشيل فيها حاجات ملهاش لازمة، ياقوطة مش هتقولك غيري الشنطة كل فترة لكن هتقولك أن لازم تنظيف الشنطة ولو مرتين في الأسبوع على الأقل. وإن كانت الشنطة مينفعش تتغسل في الغسالة يبقى لازم تنفضيها الأول وبعدين تمسحيها بمياه وصابون أو مناديل – wipes– معقمة.
لو عايز تشوف شنط يد حريمي من هنا.
3. الموبايل
مفيش حد دلوقتي مش مرتبط بموبايله وبياخده معاه تقريباً كل حتة وعشان كده الموبايل لازم يتنظف أول بأول، وده بأننا نفصله عن الكهرباء ونطفيه تمامًا وبعدين نمسحه بمناديل معقمة – wipes- أو منظف الالكترونيات واللابات.. ومنشغلهوش لحد ما ينشف خالص.
تقدر تشتري مناديل معقمة –Wipes- من هنا.
4. رباط الجزمة
دي حاجة من الحاجات الصغيرة أوي في تفاصيل حياتنا ويمكن بنغفل عنها رغم أنه دائم التعرض للتراب في الشارع أو غيره من الأماكن العامة! وأن كنت بتنظف وتلمع الجزمة أو الكوتشي كل يوم فأنت أكيد محتاج تغسل الرباط كل ما يتوسخ، يا إما بمياه وصابون على إيدك أو تحطه في كيس الغسيل في الغسالة عشان ميضعش في الغسيل أو يبوظ الغسالة.
في حالة أن رباط الجزمة لونه اتغير أو خامته باظت طبعًا لازم يتغير.
5. ملايات السرير وأكياس المخدة
دي لازم تتغير مرة واحدة كل أسبوع وتتغسل كويس جدًا على درجة حرارة 60 درجة مئوية؛ لقتل البكتيريا لأنها بتلم جلد ميت وبتكون تربة خصبة جدًا للجراثيم.
لو عايز تشوف ملايات السرير من هنا.
6. الفرشاة أو مشط الشعر
- بعد كل استخدام لازم تنظيف الفرشاة أو المشط من الشعر اللي ماسك فيهم.
- تنظيف فرشاة الشعر: لازم يكون بصفة دورية وخصوصًا لو كنت بتغسل شعرك بشكل قليل أو بتستخدم الشامبو الجاف.. خلي بالك لو بتستخدم منتجات كثيرة للعناية بالشعر وقتها الفرشاة أو المشط ممكن تكون بيئة ملائمة جدًا لنمو البكتيريا والفطريات اللي ممكن تسبب مشاكل أقلها هتكون ريحة الشعر الوحشة.
- طريقة التنظيف: بتكون الأول أنك تشيل منها أي شعر ماسك فيها وبعديها تحرك أسنان المشط أو الفرشاة بإيدك بحيث تنزل بواقي المواد الكيميائية اللي لزقت في أسنان المشط أو الفرشاة، بعدين تغسلها تحت المياه وبعديها تنشفها في الهواء أو بمجفف الشعر.
- كرر عملية التنظيف مرة أسبوعيًا.
- بشكل عام يجب تغيير الفرشاة مرة في السنة أو لو لقيت أن أسنانها بقت ضعيفة ومتهالكة.
لو عايز تشوف فرشاة للشعر من هنا.
7. ليفة المواعين
- مبدئيًا عشان تحافظي عليها انقعيها كل فترة في مياه مع شوية خل أبيض عادي وده هيقلل من البكتيريا فيها.
- بشكل عام لازم تنشفيها وتعصريها كويس بعد كل استخدام.
- ممكن كمان تعقميها بأنك تحطيها في الميكرويف لمدة 30 ثانية، ده طبعًا لو مفيهاش معادن ممكن تبوظ الميكرويف.
- الصح أنها تتغير كل أسبوع أو أسبوعين أو كل ما يكون لها ريحة.
8. فرش الماكياج
- يجب تنظيفها ومسحها بشكل دوري بعد كل استخدام.
- ضروري تتغير لو لاحظتي أن شعرها بيقع أو لونها اتغير وكمان لو الماكياج مبيطلعش منها مهما غسلتيها.
لو عايزة فرش الماكياج من هنا.
9. ستارة البانيو
دي من الحاجات اللي في ناس ممكن تهملها وبيعتقدوا أن مش مهم تنظيفها! لأنها كده كده في المياه معظم الوقت، على العكس تمامًا ستارة البانيو ممكن تكون بيئة خصبة جدًا للفطريات لوجود مياه ودفء خصوصًا لو بتستحم بمياه دافئة.
عشان كده يجب تتغير كل ما لونها يتغير أو خامتها تبدأ تبوظ وتتشقق أو يظهر عليها دواير سوداء واللي بتدل على نمو فطريات ضارة.
لو عايز ستارة للبانيو من هنا.
10. ملابس الجيم والرياضة
جميل أنك تلعب رياضة أكتر من مرة في الأسبوع لكن مش جميل خالص أنك متغيرش ملابس الرياضة بشكل دوري، قاعدة عامة ضروري تعرفها لبس الجيم آخره معاك مرتين بدون غسيل، بالتأكيد يُفضل أنه يتغسل بعد كل استخدام وده لو بتعرق فيه كتير.
لو عايز تشوف ملابس الجيم والرياضة من هنا.
11. سماعات الأذن
سماعات الأذن من الحاجات اللي برده بنغفل عنها وطريقة تنظيفها بتكون بأي منظف فيه كحول.. طبعًا قبل كل استخدام تتأكد من نظافتها من أي شمع أو رواسب مش نضيفة عليها.
لو عايز تشوف سماعات الأذن من هنا.
12. لوح التقطيع
أكيد مش هنقولك تغيري لوح التقطيع بعد كل استخدام ولكن لازم تغسليه بعد كل استخدام بصابون ومياه سخنة. يُفضل يكون فيه لوح تقطيع لكل قسم من الأكل يعني واحد للخضروات، وواحد للحوم، وواحد للدجاج وهكذا.
لو عايز تشوف لوح تقطيع من هنا.
13. زجاجة الماء
نقصد زجاجة الماء اللي من البلاستيك المخصوص اللي بينفع تستخدمها أكتر من مرة، ودي معمولة مخصوص عشان متغيرهاش لكن ضروري تغسلها بعد كل مرة استخدام بالمياه والصابون وتسيبها تنشف في الهواء. وخلي بالك أن كل زجاجة لها عدد معين من مرات الاستخدام ودا بيكون على حسب جودة ونوع البلاستيك المصنوعة منه.
لازم تغيرها لو البلاستيك بتاعها ساح أو لونه اتغير.
لو عايز تشوف زجاجة الماء من هنا.
14. ليفة الاستحمام
من شروط استخدامها بشكل سليم هو أنه لازم تسيبها تنشف كويس بعد كل استخدام عشان متكونش مكمكمة.
ضروري تغيرها لو طلع لها ريحة مش كويسة أو لو بدأت تفك من نفسها.
لو عايز تشوف ليفة الاستحمام من هنا.