نصائح لشراء وصيانة سماعات الرأس المناسبة

نصائح-لاختيار-سماعات-الأذن

كتبت: صفاء مجدي

سماعات الأذن بتكون في أحوال كتير هي ملجأك الآمن في المواصلات والزحمة، وسماعاتك هي ونيسك لما تيجي تذاكر بالليل لامتحان بكرة في ظل ما البيت كله نايم. ده غير إنها كمان صاحبك الجدع اللي بيحمسك وأنت غرقان في عرقك في الجيم. من الآخر السماعات هي رفيق مهم في حياتنا. بس مش دايماً بيكون الصديق ده وفي، وده لما سلك السماعة يعملها معاك ويتقطع، أو فردة تبوظ والتانية تشتغل عادي أو جودة الصوت تقل مع كثرة الاستخدام. أما لو اشتريت سماعات صح حياتك هتكون أسهل بكتير وهتفضل معاك سماعاتك سنة واتنين وتلاتة طول ما بتحافظ عليها. وعشان كده ياقوطة النهاردة جايبة لكم نصائح لشراء أحسن سماعات رأس مع التركيز على أفضل أنواع السماعات اللي تستخدمها وأنت بتلعب رياضة، ومش هتحتار وهتقدر تختار النوع المناسب من كل هذه التشكيلة، وهتلاقي نصائح ياقوطة للحفاظ على السماعات أطول فترة ممكنة.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

أنواع السماعات

السماعات من ناحية الشكل بتتقسم قسمين: قسم السماعات الصغيرة وبنقصد بيها السماعات اللي طرفيها بيدخلوا في أذنك وقسم السماعات الكبيرة اللي طرفيها بيغطوا أذنيك. واحتراماً للكبير هنبدأ نتكلم عن الأنواع المختلفة للسماعات الكبيرة

السماعات الكبيرة

السماعات الكبيرة (الهيدفونز)Headphones

سماعات-الأذن-الكبيرة

  • النوع ده من السماعات ميزته الرئيسية أنه جودة صوته عالية إلى حد كبير وكمان بيعمل عزل كويس للصوت.
  • ميزة تانية هي إن السماعات دي بتكون مريحة جداً ومثالية لو كنتي بنت ومحجبة لأنك هتلبسيها على راسك مباشرة ومهما كانت طرحتك سميكة الصوت هيوصلك بشكل واضح. على عكس السماعات الصغيرة اللي ممكن تواجهي مشكلة أنك تدخليها تحت الطرحة وبتحتاجي تظبطيها كل شوية.
  • لكن في نفس الوقت لو كنت من أصحاب النظارات من أمثالي فإحنا بنواجه مشكلة أن السماعات دي بتضايق النظارة وبتمسك عليها بزيادة ودي حاجة مش بتكون مريحة أوي.
  • عيب تاني في النوع ده أنه كبير في الحجم ومش عملي أنك تاخده معاك في كل حتة.

اشتري أحسن هيدفونز من هنا

أنواع السماعات الكبيرة (الهيدفونز)Headphones

النوع الأول اللي بيغطي الأذن وما حولها Over the ear

Over the ear

  • السماعات دي بتغطي أذنيك ومحيطها.
  • بتعمل عزل كويس جداً للصوت اللي جاي من برة فمش هتسمع اللي بيحصل حواليك وبتعمل كمان عزل للصوت اللي بتسمعه فمحدش جنبك هيسمع اللي بتسمعه.
    • لكن دي ممكن تكون ميزة وعيب: ميزة لو في مكان هادي زي مثلاً بتذاكر في مكتبة ومش عاوز تزعج الناس بصوت المزيكا اللي بتسمعه.
    • وعيب لو كنت مثلاً قاعد في بيتك فهتحتاج تسمع جرس الباب أو صوت التليفون أو صوت حد بيكلمك.
  • عيب تاني في النوع ده من السماعات الكبيرة أنها أحياناً بتحسسك بالحر شوية وخصوصاً لو هتغطي ودنك لفترة طويلة.
  • عادة السماعات دي بتقدر تتحكم في مقاسها من خلال الطوق اللي حوالين راسك من فوق، ودي خاصية مهمة جداً لازم تدوّرعليها لما تشتري النوع ده من السماعات عشان تكون مريحة بأكبر قدر ممكن.
  • لو هتشتري النوع ده من السماعات يبقى ضروري تقيسه الأول وتتأكد أنه مريح ليك.
  • السماعات دي مناسبة أكتر لأنشطة مفيهاش حركة زي المذاكرة أو الشغل.
  • مش عملية أوي في الأنشطة الرياضية لأنها بتمثل حمل على اللي لابسها وكمان شعورها مش حلو على راسك مع العرق والحر.

اضغط لشراء سماعات من نوع over the ear

وممكن تتفرج على sennheiser  HD229، وشوف كمان AKG K44 ، Presonus HD7

اقرأ ايضاً: دليل ياقوطة لسماعات الرأس

النوع الثاني: سماعات بتغطي الأذنين فقط On the Ear

On the Ear

  • ودي كمان سماعات كبيرة الحجم ولكنها بتكون أصغر شوية وبتغطي أذنيك بس.
  • بتكون أريح من النوع الكبير أوي لأنها مش هتخليك تحس بالحر بسرعة زي النوع الأول.
  • بس مش بتوفر نفس العزل للصوت اللي بتوفره الأنواع الأكبر.
  • وبالتالي ممكن اللي حواليك يسمعوا اللي أنت بتسمعه.
  • لكنها بتكون أخف وزناً وأقل حجماً من السماعات الكبيرة جداً.
  • مناسبة كذلك للأنشطة اللي مفيهاش حركة كبيرة.

لشراء سماعات on the ear من هنا

لو أنت من عشاق الميوزيك وبتدوّر على حاجة خاصة اتفرج على السماعات دي Bose AE 2w

Ultrasone HFI-450  ،  Shure SRH440 ،audiotechnica ATHM30X

السماعات الصغيرة

سماعات-أذن-صغيرة

  • دي السماعات الأكثر انتشاراً واللي بتيجي غالباً مع الموبايلات.
  • السماعات دي خفيفة في الحمل وبتحطها في شنطتك أو جيبك وعشان كده ممكن تاخدها معاك في أي حتة.
  • لكن في نفس الوقت كلنا عارفين أن النوع ده من السماعات لو مالوش علبة تعينها فيها فأنت كل مرة هتطلعها من شنطتك هتتخانق مع الشنطة والسماعات وسلك السماعات.
  • عيب السماعات دي كمان أنها مش بتكون بنفس جودة الصوت بالمقارنة بالسماعات الكبيرة وده لأنها مش بتوفر نفس العزل.
  • ممكن تكون مش مريحة أوي في اللبس زي السماعات الكبيرة وأحياناً بتكون مزعجة للبنات المحجبات.
  • لكن النوع ده من السماعات غالباً مناسب للي بيلبسوا النظارات لأنها مش بتمسك على دراعات النظارة.
  • أكبر مشكلة في السماعات الصغيرة أنها لو مش مقاسك بالظبط هيطلع الصوت مش حلو والسماعات هتكون زي قلتها، عشان كده لازم تجرب النوع ده من السماعات بالذات قبل ما تشتريها.
  • لاحظ أن جودة الصوت في السماعات دي بيتحكم فيها مقاس السماعة ومكانها في أذنيك وزاوية إدخالها في الأذن.

اضغط هنا لشراء سماعات أذن صغيرة

أنواع سماعات الأذن الصغيرة

Earbuds

earbuds

  • ودي السماعات اللي بتيجي مع بعض أنواع الموبايلات زي الآيفون.
  • السماعات دي مش بتدخل قناة أذنك ولكنها بتستقر على فتحة الأذن من الخارج.
  • تعتبر الأرخص سعراً في السوق.
  • مش مناسبة أوي للأنشطة الرياضية وخصوصاً لو كنت هتتحرك كتير لأنها مش بتتمتع بثبات عالي داخل الأذنين.
  • مناسبة أكتر لو كنت هتتمشى مش هتجري أو تستخدمها في المواصلات أو في المترو أو طبعاً لو كنت في البيت أو الشغل.
  • مالهاش مقاسات وبتكون نازلة مقاس واحد بس ومش دايماً هيكون المقاس المتاح ده مناسب لمقاس وقالب أذنك.
  • تجربتي الشخصية مع النوع ده من السماعات مكانش كويس على الإطلاق وعلى فترات طويلة من الاستخدام بتكون مش مريحة. ده غير إنها صوتها مش عالي في أغلب الأحيان ولما بكون في المترو أو المواصلات مش بسمع منها كويس، عموماً في ناس ممكن تفضلها وتكون مناسبة لاستخداماتهم.

هنا لشراء سماعات earbuds

ممكن تشوف sennheiser MX 170

In-ear headphones

In-ear headphones

  • دي السماعات اللي طرفيها بيدخلوا جوا القناة السمعية.
  • بيكون ليها طرف من السيليكون أو الفوم وكل نوع منهم ليه مميزات وعيوب.
    • السيليكون: من مميزاته أنه يمكن تنظيفه وغسله كل فترة لكن من عيوبه أنه ممكن يتزحلق من أذنك بسهولة وخصوصاً لو كنت بتعرق بسرعة أو بتمارس رياضة لأنها مش بتوفر ثبات عالي.
    • الفوم: عيبها أنها مش بتتغسل لكنها من أحسن الأنواع اللي بتوفر الثبات ومش بتقع بسهولة وكمان بتعمل عزل كويس للصوت.
    • من مميزاتها أنك تقدر تغير الأطراف الفوم أو السيليكون وده شئ مهم للنظافة الشخصية
  • مش مناسبة لك لو كنت من الناس اللي مش بتحب أو بتخاف تدخل حاجة في ودنها.
  • كمان لو الأطراف باظت أو اتوسخت بزيادة تقدر تغيرها وتشتري اتنين تانيين.
  • كمان هتناسب مقاس أذنك دايماً لأن الأطراف اللي بتدخل القناة السمعية موجود منها مقاسات بأحجام مختلفة وأطوال كمان مختلفة.
  • بشكل عام النوع ده من السماعات الصغيرة بيكون أريح وأفضل بالنسبة لجودة الصوت من الـ earbuds.

هنا لشراء سماعات in the ear

شوف sennheiser CS 271، واتفرج كمان على أنواع Skullcandy S2DU

كده نكون عرفناك على أنواع السماعات اللي هتلاقيها في السوق وعشان تختار السماعة اللي تتوافق مع نمط استخدامك اقرا الكام سطر الجايين دول

خطوات اختيار أحسن سماعات للأذن

  • اختيارك لنوع السماعات سواء كبيرة أو صغيرة بيتوقف على نمط اسخدامك.
  • لو بتتحرك كتير وبتمارس رياضة وأنت بتسمع مزيكا في الأغلب هتحتاج سماعات صغيرة خفيفة الوزن تقدر تاخدها معاك في كل مكان وتكون ذات عزل قوي وثبات عالي في أذنيك.
  • بتستخدم السماعات معظم الوقت في الفرجة على أفلام أو سماع مزيكا وأنت على مكتبك في الشغل أو البيت فأنت هتحتاج سماعات كبيرة بإمكانيات عالية وعزل تام للصوت.
  • لما تشتري سماعات لازم تجربها، السماعات محيلتهاش غير صوت ولازم تجربه وخصوصاً لو كانت السماعات غالية شوية.
  • لو هتشتري أونلاين فشوف مكان يكون بيقبل المرتجعات في حالة أن السماعات منفعتش معاك.
  • وأنت بتشتري السماعات تأكد أن مدخل الجهاز اللي هتوصله بيه مناسب لطرف السماعات ويُفضل تجربها على الجهاز نفسه قبل ما تشتريها.
  • في سماعات لحجب الضوضاء وغالباً السماعات دي بتكون من النوع الكبير.
    • يوجد داخل السماعات دي ميكروفونات بتلقط صوت الدوشة اللي حواليك وتغير تردد الصوت اللي خارج منها بحيث يلغي الضوضاء اللي حواليك لكن في أغلب الأمر النوع ده من السماعات بيكون غالي شوية.
    • في منها أنواع ممكن تشغل فيها خاصية حجب الضوضاء أو تقفلها زي ما تحب.
  • لو كنت بتقضي معظم مكالماتك التليفونية وأنت ايدك مشغولة فأنت في الأغلب هتحتاج سماعات يكون فيها زراير تحكم تفتح وتقفل المكالمة وقت الحاجة عشان يكون التحكم أسهل.
  • ضروري يكون في السماعات زراير لتشغيل أو إيقاف الموسيقى وطبعاً زراير للتحكم في درجة الصوت بدل ما تضطر تطلع الموبايل أو الـmp3 كل شوية.
  • موجود السماعات اللي من غير سلك ودي في الأغلب بتكون من النوع الكبير
    • آراء الناس في السماعات دي مختلفة لأن منها اللي بيشتغل كويس اوي ومنها اللي جودة صوته مش اد كده.
    • السماعات دي بتتوصل بمصدر الصوت عن طريق البلوتوث أو الـ infrared
    • الأنواع الكويسة أوي منها بتكون غالية شوية، ولو مش مستعد تصرف كتير على سماعات فبنرجح لك السماعات العادية اللي بسلك أفضل لأن جودة صوتها أحسن وسعرها في متناول ايدك.
  • لما تشتري السماعات الصغيرة اللي بتدخل الأذن تأكد أن طرفها يكون طري كفاية أنه يدخل أذنك لكن كمان يبقى سميك كفاية لأنه كل ما يزيد سمكه كل ما يكون عازل أكثر للصوت.
  • لو هتشتري سماعات بغرض استخدامها مع ممارسة الرياضة بالذات فدلوقتي في أنواع مقاومة للعرق وكمان فيها ماسك للسماعات حول أذنيك عشان تمنع السماعات من الوقوع.

اشتري سماعات مقاومة للعرق من هنا

اقرأ أيضاً: تنظيف الأجهزة الكهربائية المنزلية

نصائح للحفاظ على السماعات لأطول فترة

خلينا متفقين أن السماعات وخصوصاً السماعات الصغيرة مهما كان نوعها كويس ومهما كانت غالية إلا أنها ليها عمر افتراضي وهتبوظ بعده وخصوصاً لو كان استخدامك ليها فيه شيء من الإهمال وعشان كده النصايح الجاية دي هتساعدك تحافظ على السماعات دي بقدر الإمكان:

  • تجنب شد السماعات من سلكها لما تخلعها من التليفون أو اللابتوب، اخلع السماعات برفق.
  • ابعد سماعاتك عن الحرارة أو الرطوبة أو السوائل، والنصيحة دي للبنات بالذات لأننا في شنطنا بنكون شايلين حاجات كتير جداً والسماعات لو مش محفوظة كويسة ممكن جداً تبوظ من الحاجات اللي داخل شنطتك.
  • يُفضل أنك تنظف سماعاتك أو تمسحها بمنديل بعد كل استخدام عشان ميتراكمش عليها تراب أو شمع الأذن ويؤثر على استماعك.
  • كل فترة هات فوطة ناعمة وناشفة وبلها بنقطة مياه دافية بشوية صابون صغيرين اوي وامسح بيها السماعات كويس ونشفها كويس.
  • ممكن كمان تستخدم فرشاة صغيرة برفق عشان تنظيف الزوايا والفتحات الصعبة في السماعات وتقدر تنظفها بعيدان القطن أو خلة الأسنان بس برفق شديد.
  • لو سماعاتك من النوع اللي بيدخل في الأذن يُفضل أنك تغير الطرف الفوم أو السيليكون كل فترة أو كل ما لونه يتغير.
  • لو هتشيل سماعاتك في جيب معين في شنطتك يبقى لازم يكون الجيب ده نظيف ومفيهوش بقايا أي حاجة كانت في الجيب قبل كده أو تراب لأنها ممكن تؤثر سلباً على جودة الصوت.
  • اوعى تلف سماعاتك حوالين الموبايل أو الآيبود أو غيره لأن ده بيبوظ سلك السماعات من الداخل وبيسبب تشققات بتبوظ جودة الصوت.
  • لو أنت من الناس اللي بتحب المشاركة -وده أمر لطيف ومفهوم- لكن من أولويات النظافة الشخصية انك متشاركش سماعاتك الصغيرة مع حد لأن السماعات دي بتدخل جوا الأذن وممكن جداً تنقل أمراض احنا في غنى عنها.
  • متسيبش سماعاتك في الشمس أو جنب مصدر حرارة ممكن يبوظ المغناطيس اللي جواها أو يسيح الأسلاك.

قد تنفد المنتجات من المتاجر – out of stock-  في أي وقت لكن غالبًا تصبح متاحة بعد فترة وجيزة، إذا صادفتك مشكلة مع أي منتج من فضلك إبلاغنا فى تعليق أو من خلال صفحةYaoota.com في فيسبوك.

4 thoughts on “نصائح لشراء وصيانة سماعات الرأس المناسبة”

  1. مقال عظيم فشخ .. استفدت منه

  2. مصطفى says:

    مقال حلو انا استفدت منه كتير جداً

  3. محمد مجدي فؤاد says:

    نعم فعلا مقال رائع جدا بس الاهم تكون المعلومات مضمونة ومؤكده لانه بعض الناس ويمكن الاغلبيه الذين لايعرفوا بالموضوع ومشتقاته هيصدقوا ويقتنعوا باي كلام يرؤنه ليس هذا معناه انكم مخطيئن في شي او اشكك في معلوماتكم ولكن فقط للتذكير فيما بعد في مقاالات اخري ..شكرا مره اخري

  4. A'alaa E sayd says:

    بجد عجبني اوووي اوي ومقالات حلو جدا وياريت مقالات أكثر

Leave a Reply

Your email address will not be published. Required fields are marked *