كتب: محمد عبد الرحمن

شركة تكنو من الشركات الجديدة في سوق الموبايلات المصري، لكنها وفي وقت قصير قدرت تبني ثقة معقولة بينها وبين المشتري وده مش من فراغ، لكن بفضل موديلاتها المتنوعة من الموبايلات وتميز السعر اللي بتخاطب بيه فئات كتيرة من المشتريين.

 من ضمن الموديلات اللي بتوجهها تكنو للمستخدم اللي محتاج موبايل بسعر مناسب وإمكانيات كبيرة قدمت موبايل Tecno Camon CX Air، واللي جمعت فيه بين الشكل المميز والإمكانيات اللي هترضي ناس كتير، وما نسيتش تهتم بتفاصيل صغيرة زي الإكسسوارات اللي بتزوّد من جمال الموبايل.

في الريفيو ده هنتعرف أكتر على مزايا وعيوب الموبايل وتقدر تعرف عن طريق ياقوطة أفضل سعر ليه وممكن كمان تطلبه ويوصل لغاية عندك.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

مواصفات موبايل Tecno Camon CX Air

*ممكن تشوف مواصفات الموبايلات بالتفصيل من mobihub من هنا.

موقع mobihub هو موقع مصري بيعرض عليك تشكيلة كبيرة من الموبايلات لأكبر وأشهر الشركات في مصر والعالم وتقدر تعرف من خلاله مختلف أنواع الموبايلات وإمكانياتها ومميزاتها وعيوبها وكمان أسعارها وتقدر تقارن بين أسعار الموبايلات من عليه.

تقييم موبايل Tecno Camon CX Air

• الموبايل مصمم بالكامل من البلاستيك.
• الجهة اليمنى للموبايل هنلاقي زراير الصوت وزرار الباور.
• الجهة الشمال للموبايل موجود فيها منفذ لشريحتين الاتصال، ومنفذ مستقل للميموري الخارجي.
• الجهة العليا للموبايل هنلاقي منفذ لسماعات الأذن.
• الجهة السفلية للموبايل هنلاقي ميكروفون المكالمات، منفذ الشحن وسماعة الموبايل الخارجية.
• شاشة الموبايل فيها كاميرا سيلفي بفلاش مزدوج، ولمبة إشعارات LED.
• ضهر الموبايل فيه كاميرا وفلاش LED، ومستشعر لبصمة الإصبع.

التصميم

المزايا

• وزن الموبايل خفيف.
• الموبايل فيه مكان مستقل للميموري الخارجي.
• الموبايل مزوّد ببصمة الإصبع، ولمبة إشعارات LED.

العيوب

• الموبايل مش مزوّد بميكروفون إضافي مانع للضجيج.

تجربة المستخدم

• الموبايل وزنه خفيف ومريح تمامًا في حمله لأوقات طويلة ومش هتحس بأي تعب بسبب تصميمه المناسب لإيدك.
• رغم إن الموبايل مصمم من البلاستيك لكنه بلاستيك لامع وقريب جدًا من المعدن لدرجة إن مستخدمين كتير هيقولوا عليه موبايل بتصميم معدني.
• مكان بصمة الموبايل موجود في ضهر الموبايل تحت الكاميرا والمكان ده مناسب لمستخدمين كتير، وبتستجيب للمسة المستخدم بسرعة، ومن خلالها تقدر ترد على المكالمات، وتحمي صورك الخاصة.
• بييجي مع الموبايل Smart Cover بيحمي جسم الموبايل كله وتقدر من خلال الكوفر ده إنك تفتح الكشاف، أو تشغل منه ملفات الموسيقى وممكن كمان ترد على المكالمات، ده غير إنك تقدر من خلاله تعرض الوقت والتاريخ.

الشاشة

المزايا

• الموبايل بييجي بشاشة بحجم ٥٫٥ بوصة، ودقة وضوح ١٢٨٠×٧٢٠ بكسل، وكثافة بكسلات ٢٦٧ بكسل، وبتيجي بتقنية 5 D.
• الشاشة بتدعم لغاية ١٠ نقاط.

العيوب

• الشاشة مش مزوّدة بطبقة حماية إضافية ضد الكسر.
• دقة وضوح الشاشة HD، مش FHD.

تجربة المستخدم

• دقة وحجم الشاشة مناسبين، وزوايا الرؤية والوضوح مقبولين.
• زراير التحكم في الموبايل موجودين جوه مساحة الشاشة وده بيقلل من مساحتها، خصوصًا إن فيه مساحة كافية لحواف الموبايل تحت الشاشة وكان من الممكن إن الزراير دي تكون فيها.
• استجابة الشاشة للمس سريعة والمستخدم مش هيحس بأي تقل خالص.
• بييجي مع الموبايل لزقة حماية للشاشة موجودة معاه ومش هتحتاج تشتري واحدة إضافية في الأول.

الأداء

المزايا

• الموبايل بييجي ببروسيسور رباعي النواة بتردد ١٫٢ جيجاهرتز، وبيقبل تشغيل شريحتين اتصال، وميموري خارجي، وبييجي برام بسعة ٢ جيجابايت، وميموري داخلي بسعة ١٦ جيجابايت، وبأحدث نظام تشغيل نوجا.
• الموبايل مزود براديو FM، وبيدعم تقنية الاتصال للجيل الرابع، وبيدعم تقنية الـ OTG.

العيوب

• الموبايل مش بيدعم تقنية الجيروكسوب.
• بروسيسور الموبايل رباعي النواة مش ثماني.
• المعالج الرسومي للموبايل Mali T720 واللي مش الأفضل في السوق.
• الموبايل مش بيدعم مستشعر البوصلة.

تجربة المستخدم

• سرعة الموبايل وأداءه في فتح البرامج المختلفة مرضي وإن كان المستخدم هيلاحظ وجود بطء بسيط في فتح بعض البرامج بتاخد حوالي ٢ ثانية.
• رغم كده ممكن جدًا تفتح برنامجين في نفس الوقت على الشاشة، لكن لو جربت تتنقل بين أكتر من برنامج وترجع ليه تاني هتلاحظ إنه بيقفل ويفتح من الأول (لو فتحت ملف فيديو على اليوتيوب وسيبته وروحت لبرنامج تاني ورجعت ليه هتلاقيه قفل وبيفتح من الأول).
• المستخدم يقدر يشغل على الموبايل شريحتين اتصال وميموري خارجي في نفس الوقت.
• الموبايل مش اختيار مناسب لعشاق الألعاب وده بسبب ضعف المعالج الرسومي اللي في الموبايل.
• تقدر عن طريق النقر مرتين على الشاشة تفتحها وتقفلها وبكده هتحمي زرار الباور من الضغط عليه كتير.
• عن طريق السحب بـ ٣ صوابع تقدر تاخد Screen Shot.
• مكان سماعة الموبايل مش مناسب لهواة الألعاب لإنها ممكن تتكتم مع مسكة الإيد.
• صوت سماعة المكالمات أقل من المتوسط.
• ميموري الموبايل الداخلي ١٦ جيجابايت، واللي بيتبقى للمستخدم منهم ٨٫٥ جيجابايت بس، وللأسف ما تقدرش تنقل برامجك على الميموري الخارجي.

الكاميرا

المزايا

• الموبايل بييجي بكاميرا خلفية وأمامية بدقة ١٣ ميجابكسل، مزوّدين بفلاش LED مزدوج.

العيوب

• دقة تصوير الفيديو ٧٢٠ بكسل بس.

تجربة المستخدم

• سيلفي الموبايل أفضل سيلفي متاح في الموبايلات المنافسة ودقة التصوير من خلالها مميزة جدًا وزاوية العدسة واسعة، والصور مليانة تفاصيل ولو كنت غاوي تصوير في الإضاءة الضعيفة فالصور منورة بسبب الفلاش.
• الكاميرا الخلفية صورها متوسطة حتى في الإضاءة العالية لكن هنلاحظ وجود بكسلات رغم عن الألوان بتكون زاهية، أما الصور الليلية فالصور هيكون فيها Noise واضح.
• تكنو بتسمح لعمل زووم للصور لغاية 2X بس وده علشان المستخدم ما يلاحظش وجود بكسلات في الصور.

البطارية

المزايا

• بطارية بسعة كبيرة ٣٢٠٠ مللي أمبير.

العيوب

• ما تقدرش تغير البطارية بنفسك لو كفاءتها قلت ولازم تروح بيها التوكيل.
• البطارية مش بتدعم تقنية الشحن السريع.

تجربة المستخدم

• بطارية الموبايل بتدي للمستخدم وضع Screen On ٦ ساعات تقريبًا.
• بتكفي لغاية ١٢ ساعة تشغيل واي فاي.
• أكبر مشكلة للبطارية هو وقت شحنها واللي بيوصل لغاية ٦ ساعات كاملة، ودي مدة طويلة جدًا ومش هتمسح للمستخدم بشحن الموبايل شحنة كاملة غير وقت النوم بس.

شوف موبايل Tecno Camon CX Air من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.