مميزات وعيوب لاب توب am002ne HP

مميزات وعيوب و سعر و تقييم لاب توب am002ne- HP

كتب: محمد حمدي

المراقب لسوق اللاب توب في مصر هياخد باله إن المميز في شركة HP هي قدرتها على تقديم شريحة واسعة من أجهزة اللاب توب، واللي بتناسب شرائح واسعة ومختلفة من المستخدمين، علشان كده بتقدر تستحوذ على شريحة سوقية كبيرة وتكسب كل يوم زبائن جدد.

علشان كده، حبينا نستعرض معاكم في ياقوطة تجربتنا في استخدام لاب توب HP، صاحب الـ ١٤ بوصة والـ ٤ جيجا رامات والـ ٥٠٠ جيجابايت هارد ديسك، واللي بنعتبره لاب توب مناسب لطلبة المدارس والجامعات والناس اللي بتدور على لاب توب مناسب بميزانية محدودة وبدون إمكانيات ضخمة ممكن ما يكونش ليها استخدام حقيقي على أرض الواقع.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

المواصفات الفنية للاب توب

وحدة المعالجة المركزية

رامات

هارد ديسك

الشاشة

كارت الشاشة

نظام التشغيل

Intel Celeron N3060 بسعة ١٫٦ جيجاهرتز

٤ جيجابايت

٥٠٠ جيجابايت

١٤ بوصة HD WLED‎-backlit

Intel HD Graphics 400 GPU

FreeDOS 2.0

المميزات

  • سعر الجهاز يُعتبر منخفض بالنسبة للإمكانيات اللي بيقدمها مقابل المبلغ المدفوع فيه.
  • المساحة التخزينية للجهاز (٥٠٠ جيجا) متوسطة ومناسبة لتخزين الأغاني والأفلام للناس اللي استخدامها من خفيف إلى متوسط.
  • الشاشة عالية الدقة HD وده بيدّيها قدرة عالية على تشغيل ملفات الميديا بجودة مميزة.
  • حجم الجهاز ووزنه بيخليه خفيف مقارنة بأجهزة تانية في نفس الفئة، وأسهل في الحمل والتنقل.

العيوب

  • وحدة المعالجة المركزية أو CPU مش قوية، بالتالي الجهاز مش بيقدم سرعة كبيرة في نقل البيانات أو باقي المهام اللي بيقوم بيها.
  • الجهاز مش بييجي بأي نظام تشغيل سواء Windows أو حتى Linux وده بيكلف المستخدم تكلفة إضافية لشراء نظام التشغيل.
  • حجم الشاشة صغير وده ممكن يضايق محبي مشاهدة الأفلام أو لعب الألعاب على اللاب توب.
  • إمكانيات كارت الشاشة محدودة، وده بيخلي اللاب توب مش بيشغّل الألعاب الحديثة، وبيخليه بشكل عام مش مناسب للألعاب أو استخدامات الجرافيكس العالية.

تجربة المستخدم

اللاب توب يعتبر مناسب لطلبة الجامعات والمدارس اللي عاوزين يتصفحوا الإنترنت ويكتبوا ملفات وورد وإكسيل.. إلخ، ويمارسوا الاستخدام الخفيف والمتوسط لجهاز الكمبيوتر بشكل عام، أما مصممي الجرافيكس أو هواة الألعاب الحديثة لازم يبحثوا عن موديلات أقوى وأكثر تأثيرًا، وعلى الرغم من الحجم والوزن المثالي للجهاز للناس اللي بتتحرك كتير لكن عمر البطارية مش بيدوم لوقت طويل مقارنةً بالموديلات الأحدث، كمان عدم وجود نظام تشغيل مع الجهاز هيكلف المستخدم ثمن نسخة ويندوز، لكن أنظمة لينكس المجانية ممكن تقدم نظام تشغيل قوي ومجاني في نفس الوقت لو المستخدم هيعرف يتعامل معاها.

قابلنا محمد حكيم، الطالب في كلية التجارة جامعة عين شمس واللي بيستعمل اللاب توب علشان يخلص الأبحاث ويكتب ملاحظات عن المحاضرات باستخدامه، محمد كمان بيستعمل اللاب توب لتصفح الإنترنت وفيسبوك وغيره من مواقع التواصل الاجتماعي وكانت تجربته للجهاز كويسة من وجهة نظرة وبالنسبة للميزانية اللي كان حاططها للشراء، لكن في نفس الوقت محمد حكالنا إن الجهاز تجربته بطيئة وغير عملية في بعض البرامج التقيلة زي فوتوشوب أو الألعاب الحديثة اللي بيحب يلعبها لكن الجهاز كان غير قادر في النهاية على تشغيلها.

تجربة استخدام تانية من أماني، وهى مديرة حسابات تواصل اجتماعي من القاهرة، شكرت لنا في الجهاز وقالت لنا إنها بتستخدمه علشان تدير الحسابات المسئولة عنها على مواقع فيسبوك وتويتر وإنستجرام، وعلى الرغم من إن الجهاز تقيل في فتح برامج تحرير الصور زي فوتوشوب، لكن باستخدام بعض البرامج الأبسط والأخف وتوفير استخدام الذاكرة قدرت أماني توصل للاستخدام الأمثل للجهاز.

لكن أماني بتشتكي من بطارية الجهاز اللي قالت إنها بتخلص بسرعة خاصة مع استخدام الجهاز لساعات متصلة بدون شحن، الأمر اللي بيخليها تحتاج دايمًا تكون في مكان فيه مصدر كهرباء.

شوف HP لاب توب 14-am002ne – Intel Celeron من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا فى تعليق أو من خلال صفحة Yaoota.com على فيسبوك.

2 thoughts on “مميزات وعيوب لاب توب am002ne HP”

  1. el3rod says:

    لدى لاب توب اتش بى واعانى من السخونة دائما
    هل تم حل المشكلة فى الاصدارات الجديدة؟

    1. أهلا
      el3rod
      أنا محمد حمدي كاتب المقال
      بداية أحب أن أشكرك على قراءة الموضوع والاهتمام بالرد والتعقيب
      أما بخصوص استفسارك فالاجابة عليه لها أكتر من شق
      أولا: كل صناع اجهزة الاب توب يحاولون يوما بعد يوم خفض ارتفاع حرارة الاجهزة الخاصة بهم بشكل دائم، لكن تظل الشكوى طوال الوقت من ارتفاع درجة الحرارة واحدة من أكثر استفسارات الجمهور المحيرة، لان الشعور بارتفاع الحرارة يختلف من مستخدم لأخر.
      وحتي يقدم صناع الاب توب حول العالم حلا مثاليا ونهائيا لهذه المشكلة -وهو امر لم يحدث حتى الان- هناك بعض النصائح البسيطة التي أهمس لك بها:
      1. استعمل Laptop Cooler وهي مروحة صغيرة تستخدم تحت الجهاز ولا تكلف الكثير من المال
      2. لا تقوم بتشغيل الكثير من البرامج الثقيلة والقوية مرة واحدة على الجهاز حتى لا يتعرض للسخونة الزائدة
      3. افحص الكمبيوتر باستخدام أجهزة الفحص الخاصة بالفيروسات فبعضها يزيد من سخونة الجهاز من خلال تشغيل الكثير من العمليات الخبيثة في الخلفية دون أن تشعر
      4. احرص على عدم تشغيل الجهاز لفترة طويلة خاصة في فصل الصيف. وضع الجهاز في غرفة بها مكيف هوائي قوي
      5. لا تضع الجهاز على سطح كاتم للحرارة مثل السرير أو الوسادة مثلا وحاول وضعه بحيث تكون هناك مسافة بسيطة بينه وبين المنضدة
      6. احرص على تنظيف الجهاز كل فترة من الاتربة ويمكن الاستعانة بالمتخصصين في هذا الامر
      أرجو أن يكون ردي عليك شافيا ولا تتردد في السؤال عن اي شىء لا تعرفه. وأتمني لك تجربة سعيدة مع موضوعات ياقوطة المتجددة.

Leave a Reply

Your email address will not be published. Required fields are marked *