كتب: خالد عاصم

إيه أكتر مكان ممكن نكون بنستخدمه في بيتنا على مدار اليوم ويكون بيعتمد على أجهزة كتير ومختلفة؟ طبعًا الإجابة هي المطبخ، فالمطبخ هو أكتر مكان في بيوتنا فيه أجهزة ومعدات وتقريبًا أكتر مكان بنقضي وقت في استخدام أدواته وأجهزته دي، وعشان كده ممكن حد يضحي بإنه مايجيبش التليفزيون اللي نفسه فيه بس ماينفعش يتهاون في جودة التلاجة أو قوة البوتاجاز وأمانه، فدايمًا بيكون المطبخ هو أكتر مكان بنفكر فيه كويس وفي الاستثمار الصح في أجهزته.

مطابخ كتير دلوقتي بقت تعتمد على نظام البلت إن وهو نظام تصميم المطبخ الوحدوي واللي بتنتشر فيه الأجهزة في أماكن مخصصة جوه تصميم المطبخ نفسه، وده خلى البوتاجازات المسطحة والأفران تنتشر بشكل كبير في البيوت العصرية أكتر من انتشار البوتاجازات العادية اللي بيكون فيها الشعلات فوق والفرن تحت، وده خلق سؤال مهم عندنا لما ينيجي نشتري الفرن تحديداً، وهو هل الأفران الكهربائية هي الأنسب ولا الأفران الغاز هي الأنسب؟ وإيه أصلًا الفروق بينهم؟

من خلال المقال ده هنجاوب على كل الأسئلة المتعلق بالأفران من خلال مقارنتنا الكاملة بين الأفران الكهربائية والأفران الغاز وكمان هنعرف إزاي نختار الأنسب، وخلال المقال هنستعرض مجموعة من الأفران اللي ممكن تختاروا اللي يناسبكم منها من خلالنا في ياقوطة وهيوصلكم لحد باب البيت أو مكان ما تحبوا بأسرع وقت ممكن.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع

مقارنة بين الأفران الكهربائية والأفران الغاز

مسألة التفضيل بين حاجة والتانية بيكون ليها عوامل كتير والعوامل دي بتتوقف على مميزات وعيوب كل حاجة، والمميزات والعيوب عشان نقدر نحطها في مكانها وسياقها المناسب لازم تكون في إطار مقارنة متكاملة وده اللي هنعملها من خلال السطور الجاية في المقال وهنقسم المقارنة بين الأفران الكهربائية والأفران الغاز لمجموعة من عناصر المقارنة الأساسية.

التكلفة

أول عناصر المقارنة بين الأفران الكهربائية والأفران الغاز هو التكلفة، والتكلفة بتنقسم لقسمين، القسم الأولاني هو التكلفة الأولية أو تكلف شراء الفرن نفسه، والتانية هي التكلفة المستمرة أو تكلفة التشغيل اللي بيستهلكها الفرن على مدى تشغيله.

بالنسبة للتكلفة الأولية أو تكلفة الشراء فعلى مستوى الحد الأدني لسعر الفرن بيبدأ مع الأفران الغاز والحد الأعلى للسعر بينتهي برضه عن الأفران الغاز، يعني لو قيسنا متوسط الأسعار العالمية، هنلاقي إن الأفران الغاز بتبدأ من سعر ٥٥٠ دولار أمريكي وبتوصل لحد ٣٢٠٠ دولار أمريكي، أما الأفران الكهربائية فالحد الأدنى بتاعها بيبدأ من ٧٠٠ دولار أمريكي أما الحد الأعلى فبيوصل لحد ١٥٠٠ دولار أمريكي، وده معناه إن الأفران الغاز أعلى وأغلى من حيث التكلفة الأولية أو تكلفة الشرا.

كمان كون الأفران الغاز بتعتمد على الغاز فده معناه إنها بتحتاج لتوصيلات خاصة توصل الفرن بخط الغاز اللي داخل لمطبخك وده معناه تكلفة إضافية كمان لانك هتحتاج لتوصيلات ولخبير متخصص ولو معندكش غاز طبيعي فالموضوع هيكون مكلف أكتر بانك هتضطر تشتري أنبوبة بوتاجاز إضافية ودي تمنها لوحده في مصر حوالي ٥٠٠ جنيه، أما الأفران الكهربائية فمش محتاجة غير فيشة بس ومش محتاجة أي خبرة في تركيبها وتشغيلها لأول مرة.

الموضوع بيختلف تماماً في حالة التكلفة المستمرة أو تكلفة التشغيل، لأن في الحالة دي بتكون تكلفة تشغيل الأفران الكهربائية أعلى بشكل واضح من أفران الغاز، يعني الأرقام العالمية مثلًا بتقوم إن تشغيل الفرن لمدة ٣٠ دقيقة في اليوم بيكلف حوالي ١٤ دولار أمريكي في السنة في حالة الفرن الغاز، وبيكلف حوالي ٤٤ دولار أمريكي في السنة في حالة الفرن الكهربائي برضه في حالة تشغيله لمدة نص ساعة في اليوم عند قوة ٢٤٠٠ وات، وده بينطبق برضه على السوق المصري لأن معروف إن تكلفة استهلاك الغاز أقل بكتير من تكلفة استهلاك الكهرباء حتى لو كنت بتعتمد على أنبوبة مش على غاز طبيعي.

مدة التسخين والبرودة

الأفران الكهربائية بتعتمد على ملف كهربي بيتسخن عشان يوصل لدرجة حرارة معينة، وده معناه إن الملف ده بيبدأ من مرحلة التبريد وبيوصل لمرحلة درجة الحرارة العالية جدًا قبل ما تبتدي تتحكم في درجة الحرارة المطلوبة عشان بداية استخدام الفرن، أما الأفران الغاز بمجرد ما الشعلة بتشتغل بتقدر تتحكم على طول في درجة حرارة الفرن من خلال التحكم في حجم الشعلة، وده معناه إن الفرن الغاز أسرع في الاستخدام من الفرن الكهربائي وكمان إمكانية التحكم فيه أفضل على الرغم من إن قدرة توزيع الفرن الكهربائي للحرارة أفضل.

زي ما الفرن الكهربائي بياخد مدة أطول عشان يسخن فهو كمان بياخد مدة أطول عشان يبرد وده فيه ميزة وعيب، الميزة هي إنك لو طفيت الفرن وحبيت تشغله تاني فالوقت هيكون قصير مش طويل زي ما بتيجي تشغل الفرن لأول مرة، والعيب إن الفرن بياخد مدة أطول عشان يبرد وده بيزود شوية استمرار درجة الحرارة العالية في المطبخ.

أسلوب الطبخ

العنصر الأساسي في الفرق بين الأفران الكهربائية وبين الأفران الغاز هو أسلوب الطبخ وده معناه تأثير الفرن على الأكل وتجربة الطبخ نفسها بتكون عامله إزاي، وحتى في الجزء ده فيه فرق بين الأفران الكهربائية والأفران الغاز، فالأفران الغاز مثلًا بتتميز بإنها بتوفر حرارة ربطة مش جافة وده بيحمي الأكل من الجفاف خلال تسويته، أما الأفران الكهربائية فحرارتها جافة وده بيخليها مثالية لو عايز تعمل حاجة مقرمشة زي الكوكيز أو البطاطس المخبوزة.

الراحة والسهولة

على الرغم من إنه مش من المعتاد إن حد يحتاج يحرك الفرن أو يغير مكانه، إلا أنه في حالة لو احتجت تغيير المكان لأي سبب فده هيكون سهل جدًا ومتاح مع الفرن الكهربائي لأنه مش بيحتاج غير إنه يكن قريب من فيشة كهرباء، أما فرن الغاز فعشان تنقله لازم تتصل بالمتخصصين اللي هيفكوا وصلة الغاز ويطولوها أو يغيروا مكانها عشان تناسب المكان الجديد وده موضوع صعب ومكلف.

بس في مسألة السهولة والراحة فيه ميزة في الفرن الغاز مش متوفرة في الفرن الكهربائي وخصوصًا في الأماكن اللي ممكن الكهرباء تقطع فيها كتير أو بشكل مستمر، لأن في حالة ما لو الكهرباء قطعت مش هتقدر طبعًا تستخدم الفرن، بس نادر جدًا لما بيحصل عطل في الغاز بيأدي لفصله عن الشقة.

الأمان

أي تعامل مع غاز وإشعار بيصاحبه نسب خطورة أكبر، ففي حالة مثلًا لو حصل لا قدر الله تسريب أو مشكلة في التوصيلات ممكن ده يأدي لاستنشاق غازات سامة وخانقة، وممكن كمان لا قدر الله يوصل لنتايج أسوأ، بس ده مش موجود مع الأفران الكهربائية اللي نسبة الأمان فيها أعلى، صحيح الشركات المنتجة لأفران الغاز بتهتم بعوامل السلامة بس لازم انت كمان تهتم بيها أكتر وبشكل مستمر، وده بيكون أسهل في حالة الرفن الكهربائي اللي مش بيأدي لأي خطورة إلا في الة وجود مشكلة في توصيل الكهرباء وده ممكن ملاحظته بسهولة وتفاديه من خلال الاعتماد على فيشه أمنه وعدم لاعتماد على أي توصيلات إضافية أو مشتركات ضعيفة.

الخلاصة

من العناصر وفقرات المقارنة اللي فاتت عرفنا إيه مميزات كل نوع وإيه الفروق ما بينهم، ورغم كده ممكن يكون من الصعب الاختيار بين الأفران الكهربائية والأفران الغاز في المطلق، فالاختيار في النهاية مربوط باستخدامك ومتطلباتك، فلو عايز حاجة أرخص وأسهل ومعندكش مشكلة كبيرة في مصاريف التشغيل، فالأفران الكهربائية هتكون هي الأنسب، أما لو مستعد تصرف في الأول أكتر شوية عشان توفر مصاريف تشغيل فيكون الغاز هو الأنسب.

في النهاية الاختيار ليك وعلى حسب متطلباتك.

اتعرف على عروض أسعار مختلف أنواع الأفران الكهربائية المتوفرة على ياقوطة من هنا.

اتعرف على عروض أسعار مختلف أنواع الأفران الغاز المتوفرة على ياقوطة من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.