كتب: خالد عاصم

سلسلة ProBook واحدة من أكبر وأهم سلاسل أجهزة اللابتوب اللي بتقدمها HP، واللي من خلالها قدرت تنتشر لقطاع كبير جدًا من المستخدمين بمختلف احتياجاتهم واهتماماتهم، ومن بين الأجهزة المنتشرة بشكل كبير من السلسلة دي لابتوب HP ProBook 640 G2 اللي رغم انتشاره إلا إن عليه ملاحظات كتير بعضها سلبي وبعضها إيجابي، وده هيحتاج مننا تدخل سريع عشان نقدر نحسم الجدل ونرد على الملاحظات دي.

والتدخل ده هيكون من خلال مراجعتنا الكاملة للابتوب HP ProBook 640 G2 واللي هنتعرف من خلال عن كل تفاصيل اللابتوب، ونقدر نحدد إن كان لسا يستاهل تشتريه دلوقتي وبالسعر ده ولا لا.

وما تنساش إن لو اللابتوب عجبك هتقدر تطلبه من خلالنا في ياقوطة وهيوصلك لحد باب البيت وكمان تقدر تشتري المنتجات دي بالتقسيط من خلال شهري أول وأسهل تطبيق للتقسيط في مصر واللي مش بيحتاج منك غير صورة البطاقة وصورة إيصال مرافق وبس، ومن غير زيارة ولا ضامن واستمتع كمان بتوصيل مجاني لكل مشترياتك من خلاله.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

لابتوب HP ProBook 640 G2

المواصفات

• الشاشة: شاشة IPS ليد بإضاءة خلفية بقطر ١٤ بوصة بجودة HD Plus بدقة ١٣٦٦ × ٧٦٨ بيكسل بمعدل تحديث ٦٠ هيرتز مضادة للانعكاس والتوهج 
• المعالج المركزي: معالج Intel Core i3-6100U رباعي الخيوط بنواتين بتردد ٢.٣ جيجا هيرتز وبكاشات ٣ ميجابايت كاش
• الرامات: ٤ جيجابايت رام فئة DDR4 
• كارت الفيجا: كارت فيجا داخلي مدمج Intel HD Graphics
• الذاكرة الداخلية: هارد HDD سعة ١ تيرابايت
• لوحة المفاتيح: عربي وإنجليزي من غير لوحة الأرقام
• البطارية: سعة ٤٥ وات في الساعة
• المنافذ والمستشعرات: منفذ ٣٫٥ مم – ٣ منافذ USB مختلفة – منفذ Display Port – قارئ كروت ميموري – منفذ VGA

مراجعة لابتوب HP ProBook 640 G2

لابتوب HP ProBook 640 G2 من الأجهزة القديمة نسبيًا واللي بقالها فترة مش قليلة في الأسواق، وده بيتضح جدًا من اعتماد اللابتوب على معالج من الجيل السادس، مع العلم إن أكتر الأجهزة الجديدة المنتشرة حاليًا وصلت للجيل العاشر حتى من المعالجات الأساسية الاقتصادية Core i3، وطالما بدأنا بالكلام عن المعالج فخلينا نتعرف عليه الأول.

بيعتمد لابتوب HP ProBook 640 G2 على معالج Intel Core i3-6100U وده معالج قديم شوية زي ما قلنا، بيعتمد على معمارية ١٤ نانوميتر وبيعتمد على أربع خيوط، أما تكوينه فمن نواتين بتردد ٢٫٣ جيجا هيرتز ودي السرعة الأساسية والقصوى، لان المعالج مش بيدعم خاصية أقصى تردد اللي بتخليه يقدر يرفع من سرعته في بعض المواقف، اما كاشات المعالج فسعتها 3 ميجابايت من فئة Smart Cache وده لا يعني أي شيء فعلي هيأثر على تجربة استخدامك للجهاز.

وزي ما قلنا من شوية فإن المعالج من الفئة الاقتصادية وقديم، بس د مش معناه إن الجهاز هيكون ضعيف أوي أو عاجز، لا الجهاز هيقدر يقدم أداء مقبول طالما هيكون المستخدم فاهم هو عايز منه ايه وفاهم الإمكانيات اللي هيقدر يقدمها، يعني قدرات المعالج هتكون كافة بس للاستخدامات الأولية ولحد المتوسطة أو جزء من المتوسطة، مش هتقابل مشكلة مع التطبيقات الأساسية مثلًا، بس هتبدأ تحس بالمشكلة مع أي تطبيق تقيل وكتير منهم مش هيشتغل أصلًا، كمان هتحس بمشكلة لو متعود بسبب شغلك أو دراستك إنك تفتح صفحات إنترنت كتير في وقت واحد، ده طبعًا غير عدم قدرته على تشغيل الألعاب.

والسبب في الضعف ده مش بس في المعالج، لا فيه سببين تانيين مهمين، وأولهم إن الجهاز مش بيعتمد على معالج رسوميات منفصل وبيكتفي بكارت شاشة مدمج Intel HD Graphics اللي كلنا عارفين حدود إمكانياته إيه، أما السبب التاني فهي إن الجهاز بيكتفي بذاكرة عشوائية سعتها ٤ جيجابايت رام DDR4 وإن كانت السعة دي معتادة في الأجهزة المنتمية للفئة دي، بس من ناحية تانية الجهاز بيقدم سعة تخزين كويسة جدًا من خلال هارد HDD سعة ١ تيرابايت بسرعة ٥٤٠٠ لفة في الدقيقة.

الجهاز بيعتمد على شاشة IPS LCD بقطر ١٤ بوصة ويمكن دي تكون من مميزاته عشان بتخليه مناسب جدًا للتنقل والحركة، وده بيخليه كمان مناسب للطلبة وللشغل البسيط للمتوسط، ولكن على الرغم من إن ده المفترض إلا إن وزن الجهاز مش خفيف، لإن وزنه 2 كيلو جرام تقريبًا وده وزن مش خفيف، وإن كان مسألة الوزن وتحمله بتختلف من مستخدم لأخر.

إجمالًا الجهاز مش من الأجهزة اللي هتخليك تقع في غرامها من أول لحظة، ويمكن مايكونش الخيار الأفضل رغم إن شركة HP ليها تقلها وتميزها، إلا إن المنافسين بقوا أقوياء جدًا وبيقدموا بدايل ممكن تكون أفضل.

اتعرف على عروض أسعار لابتوب HP ProBook 640 G2 من هنا.

اتعرف على عروض أسعار مختلف أجهزة لابتوب HP من هنا.

اتعرف على عروض أسعار مختلف أجهزة اللابتوب المتوفرة على ياقوطة من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.