كتبت: مي نور

كتير من شركات الإنترنت بتقدم راوتر مجاني للمشتركين الجدد معاها، وفي الأغلب بتكون الأجهزة دي كويسة ومناسبة للاستخدام المنزلي العادي، لكن لو محتاجين الإنترنت في شركة كبيرة أو مكتب صغير أو حتى في البيت بس عاوزين مميزات أكتر زي إن الراوتر يكون بيغطي مساحة أكبر أو إنه ييجي مع خصائص حماية وأمان أعلى أو إنه يقدم سرعة إنترنت أعلى، ساعتها هنفكر في شراء راوتر جديد، وطبعًا دي خطوة مش سهلة لأن دلوقتي بقى فيه عدد كبير من الأجهزة دي في الأسواق، والاختيار ما بينهم بيكون مُحير، كمان خصائص الراوتر بتكون متعددة، وكتير من الناس مش بتعرف تفرق بينهم، وعشان كده النهارده في ياقوطة هنقدملكم دليل اختيار الراوتر المناسب وهنتكلم عن أحسن أنواع الراوتر الموجودة في الأسواق لكل ميزانية مختلفة، ولو عجبكوا جهاز وعاوزين تشتروه تقدروا من خلالنا تعرفوا أحسن الأسعار ليه وتقارنوا بينهم، وكمان تطلبوه وهيوصل لغاية عندكم في أسرع وقت.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع

عشان تختاروا الراوتر المناسب لاحتياجاتكم وميزانيتكم لازم في البداية تتعرفوا على معاني بعض المصطلحات المهمة في المجال ده.

Router Range: ودي والمقصود بيها المساحة اللي بيغطيها الراوتر، وفى الغالب بيتم تحديد قيمتها برقم معين من الأمتار، بتتحسب من خلال دائرة قطرها هو عدد الأمتار دي.
Wireless Security: والمقصود بها عناصر الأمان الخاصة بالراوتر وبتتقسم لأكثر من اعداد أهمهم وأحدثهم WPA2,WPA-PSK.
Firewall Security: نوع تاني للحماية من الهجمات ضد الأجهزة المتصلة بالراوتر ويمكن تفعيله أو إلغاؤه من داخل الراوتر.
System Requirements: هي متطلبات الأجهزة اللي تقدر تتصل بالراوتر. ومعظم الراوترات الحديثة بتقبل دخول كافة أجهزة ويندوز وأبل ولينكس وغيرها.

Package Contents: ومعناها القطع الموجودة في العلبة، زي الراوتر وسلك الشحن والكتالوج الخاص بالراوتر مثلا.
WPS: نظام للدخول على الراوتر بدون كلمة سر أو إعدادات، ودايما بيكون موجود في الراوترات الحديثة.

إزاي تختار الراوتر المناسب لاحتياجاتك

فيه عوامل كتيرة بتتحكم في إمكانيات الراوتر لازم تتعرف عليها كويس الأول قبل ما تفكر تشتري راوتر جديد.

1- اختيار المعيار

فيه معيارين أساسيين لأجهزة الراوتر، الأول هو معيار 802.11n، وتقريبًا كل الأجهزة اللي ف السوق بتدعم المعيار ده، والتاني هو 802.11ac، وده أحدث معيار جديد، واللي كتير من اجهزة الراوتر في العالم دلوقتي بتدعمه لأنه بيقدم سرعات أعلى من الأجيال السابقة، وكمان بيكون متوافق بشكل أفضل مع أجهزة الموبايل والتابلت واللابتوب، وده اللي ننصحك باختياره.

2- سرعة المنفذ أو الـ Port

المقصود هنا هو سرعة منافذ الشبكات WAN و LAN واللي بتتراوح بين أرقام متفاوتة من 1000 ميجابايت في الثانية لحد 100 أو 10 ميجابايت في الثانية، وباختصار مفيش داعي لاختيار السرعات الكبيرة لو الإنترنت في البيت، لكن يُفضل اختيار سرعة أكبر من سرعة الإنترنت اللي متفقين عليها مع شركة الإنترنت، عشان الراوتر ما يأثرش على سرعة الإنترنت اللي بتيجي من الشركة، وكمان عشان تضمنوا أعلى سرعة للاتصال ونقل البيانات بين الأجهزة المشتركة على نفس شبكة الواي فاي.

3- منافذ الـ USB

فيه بعض أجهزة الراوتر الجديدة اللي بتيجي مع منفذ USB وده هيساعد في توصيل أي فلاشة خارجية أو أي جهاز مع وصلة USB بالراوتر ونقل البيانات منه وإليه بسرعة عالية جدًا مع باقي الأجهزة المتصلة بنفس الشبكة

4- تردد الراوتر

المقصود بتردد الراوتر هو ترددات بث الراوتر للإشارات، والترددات دي ممكن تكون أحادية أو ثنائية أو ثلاثية، لكن دي مش بتكون متوفرة في عدد كتير من الأجهزة، ولو الإنترنت للبيت بننصحك تختار الترددات الأحادية، لكن لو فيه عدد كبير من الناس هتستخدم الراوتر ننصحك تختار تردد أعلى من كده، وتخصص جزء أو حزمة لنقل البيانات زي الداونلود والأبلود، وجزء تاني للتصفح بس، عشان تضمن أعلى درجة استفادة من اشتراكك الشهري في الإنترنت.