كتب: خالد عاصم

عندك أوضة فاضية في شقتك ومش عارف تستغلها في حاجة، بتحب السينما للدرجة اللي تخليك ممكن تصرف شوية فلوس عشان تتمتع بأحسن تجربة مشاهدة للأفلام في بيتم ومن غير ما تحتاج تروح السينما كل شوية، يبقى هو ده الوقت المناسب إنك تعمل سينما منزلية في بيتك وهي خطوة ممكن تحتاج منك شوية وقت ومجهود وفلوس بس أكيد هتكون نتيجتها استثنائية وهتخلي سهراتك مع العيلة ومع الصحاب مختلفة تمامًا عن أي وقت قبل كده.

من خلال المقال ده هنعرفك إزاي تقدر تعمل سينما منزلية في بيتك بالخطوات التفصيلية من أول تجهيز الأوضة لحد المعدات والأجهزة اللي هتحتاجها، وخلال المقال هنستعرض مجموعة من الأجهزة اللي هتنفعك في العملية دي واللي هتقدر تطلبها من خلالنا في ياقوطة وهتوصلك لحد باب البيت أو مكان ما تحب بأسرع وقت ممكن.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

إزاي تعمل سينما منزلية في بيتك

اختيار الأوضة الأنسب

في المجمل أي أوضة ممكن تكون مناسبة عشان تعمل سينما منزلية في بيتك بس عشان تقدر توصل لأفضل تجربة ممكنة فيفضل إن مساحة الأوضة تكون ما بين متوسط لكبيرة، ويفضل كمان إنها تكون مستطيلة وده عشان الشكل المستطيل هو الأفضل على مستوى توصيل الصوتيات بأحسن طريقة ممكنة وخصوصًا في صوت البيس، طبعًا لو الأوضة مربعة أو دائرية مش هيكون مستحيل إنك تعمل فيها سينما بس الأفضل الأوضع المستطيلة وده التصميم الأساسي الموجود في السينيمات.

حاول تختار أوضة ماتكونش بتفتح على أوضة تانية أو تكون جوا أوضة أصلًا وده عشان تقلل إمكانيات تسرب الصوت وكمان عشان متزعجش أي حد معاك في البيت، وحاول تختار أوضة يكون فيها أصغر شباك أو بلكونة أو أقل عدد من الفتحات في المجمل.

تعديل وتنظيم الأوضة

الميزة الأبرز في السينما هي الصوتيات أكتر حتى من المرئيات، ده كمان فيه ناس بتشوف إن الفرجة على فيلم على تليفزيون قوي أفضل من الفرجة عليه في السينما بس بغض النظر عن الرأي ده فاهم ميزة فعلًا هي الصوتيات وعشان كده وقبل أي حاجة لازم تهتم بصوتيات الأوضة وإزاي تقدر تنظم الأوضة في الأول عشان تقدر توصل أفضل تجربة صوت ممكنة وكمان من خلال التنظيم ده هنلاقي الطريقة اللي ممكن نخبي بيها الأسلاك الكتير اللي هتكون موجودة في الأوضة، وكمان نعدل الأوضة بحيث إنها تناسب العرض نفسه من حيث الإضاءة على سبيل المثال.

السقف

خلال تنظيمنا للأوضة هنحط عاملين أساسيين للتنظيم وهما التعديل عشان الصوتيات والتعديل عشان الإضاءة، وأول حاجة هنطبق عليها العاملين دول هو السقف، والسقف هنستفيد منه في حاجتين، الحاجة الأولانية هي الإيحاء بتكبير مساحة الأوضة والتانية هي إخفاء كل الأسلاك والتالتة هي دعم صوتيات الأوضة، والحاجة اللي ممكن توفر حلول لكل الحاجات دي هي استخدام السقف الساقط وده معناه استخدام ألواح من الفايبر جلاس تكن ساقطة عن السقف نفسه زي اللي بنشوفها في كل المكاتب على سبيل المثال، وي هنقدر إننا نخبي فيها كل الأسلاك وممكن ندهنها باللون الأسود عشان تدي إيحاء بزيادة مساحة أو حجم الأوضة وده اللي بنلاحطة في أي دور عرض.

الحوائط للي موجودة في بيوتنا من أكتر العناصر اللي بتأثر بشكل سلبي جدًا على الصوتيات، فهي مثلًا بتمتص الصوت مش بتعكسه وكمات بتكتمه وده بيخلي تجربة المشاهدة ناقصة حاجة دايمًا، والعلاج للأزمة دي هو اللوحات الصوتية، ودي لوحات موجودة في كل المحلات المتخصصة في الصوتيات ودي بيكون ليها تصميم معين ومعموله من مادة بتقدر تعكس الصوت وتزود قوة البيس، أما لو كانت مكلفة بالنسبالك فممكن تستعين بكراتين البيض المدهونة ودي صحيح مش هتقوم بنفس الغرض بالظبط بس هتكون بداية مش بطالة، وممكن بعد كده تغطي الألواح دي بأي حاجة زي ورق الحائط أو السجاجيد اللي بتتعلق على الحيطان.

لو الأوضة فيها شبابيك أو بلكونة فلازم تستخدم ستارة مانعة للإضاءة وتكون سوداء أو كحلي عشان تمنع الانعكاسات اللي ممكن تحصل على الشاشة وتأثر بكل سلبي على الرؤية، ممكن كمان قبل ما تركب الستارة تلصق أي نوع من أنواع اللاصقات المانعة للانعكاس وتسرب الضوء واللي بتتلزق على الزجاج ودي متوفرة في أماكن كتيرة.

عشان تقدر توصل لأفضل تجربة صوتية ممكنة فأرضية الأوضة يفضل تكون مصنوعة من الخشب أو الخرسانة أو المشمع، وفي حالة ما إن كان ده مش متوفر فممكن تستخدم سجاجيد تكون سميكة شوية اللي معمولة من مواد شبه القطيفة وممكن تستعين بموكيت تخين وده بيدينا برضة تشبيه بدور العرض العادية.

بالنسبة للألوان والإضاءات فزي ما قلنا يفضل دايمًا إنك تعتمد على الألوان الغامقة، فالسقف يفضل يكون أسود والحيطان ممكن تكون أزرق غامق زي السينمات والأرضية ممكن تكون رمادي أو أوف وايت وحاول إنك ماتخرجش بره الألوان دي عشان تقلل الانعكاس وتدي إيحاء بكبر حجم الأوضة، أما بالنسبة للإضاءات فزي ما قلنا حاول ما تخليش في أي إضاءة في السقف واستخدام إضاءات غير مباشرة ويكون لونها أزرق خفيف جدًا ده لو مش عايز تخلي الأوضة مظلمة تمامًا وقت تشغيل الفيلم، ويفضل إنك تعمل ريموت كنترول للتحكم في الإضاءة عشان ماتضطرش إنك تتحرك في الضلمة ودي حاجة ممكن يعملها كهربائي بسهولة.

أثاث وفرش السينما المنزلية

فيه شركات عالمية كتير بتوفر أثاث مخصص للي عايز يعمل سينما منزلية في بيته ودي طبعًا بتكون أكتر من رائعة بس فيها عيب رئيسي وهو إن سعرها بيكون ضخم ومكلف جدًا، وعشان كده ممكن تستعين بأي كنب موجود عندك في البيت أو تشتري كنب جديد مريح أو حتى تشتري كم كرسي ليزي بوي لو تقدر تكلف نفسك شويه كمان وعايز تعمل حاجه تديك أفضل تجربة ممكنة.

في حالة او أوضتك كبيرة وتستحمل تعمل أكتر من صف كراسي أو كنب فيفضل إنك تعمل مسطبة خشب طولها ما بين ١٥ سم و٣٠ سم عشان تعلي كل صف عن الصف اللي أدامه عشان توفر تجربة مشاهدة مناسبة للكل، وماتنساش إنك توفر ترابيزات صغيرة عشان تحط عليها الشرب والأكل والفشار مثلًا.

تقدر كمان تكمل تجربة سينما منزلية متميزة من خلال إنك تزين الأوضة بشوية حاجات زي إنك تحط بوسترات الأفلام اللي بتحبها أو تحط مجسمات لشخصيات أفلام بتفضلها وكمان ممكن تحط ستارتين حمر على جوانب الشاشة عشان تدي إيحاء السينما الفعلية.

الأجهزة والمعدات

سينما يعني فيديو في المقام الأول وده معناه الاهتمام بالفيديو بأكبر شكل ممكن، وممكن تستعين بحاجة من اتنين في الحالة دي، إما إنك تشتري تليفزيون ضخم وده هيكون مكلف حبتين، أو إنك تشتري بروجيكتور يكون عالي الجودة وده هتكون تكلفته أقل وهيفيدك إنك تزود مساحة الرؤية اللي عايزها يعني ممكن مثلا توصل لحد ١٠٠ بوصة أو أكتر لو تحب، وده باستخدام أبسط السبل بإنك تستخدم قماش أبيض تقيل أو تشتري سكرينة مخصصة لعروض البروجيكتور ومش هتكون مكلفة أوي.

اتعرف على عروض أسعار مختلف التليفزيونات المتوفرة على ياقوطة من هنا.

اتعرف على مختلف عروض أسعار أجهزة البروجيكتور المتوفرة على ياقوطة من هنا.

طبعًا من أهم المعدات اللي تحتاجها الوسيط اللي هتشغل عليه الأفلام، وأفضل حاجة ممكن تستعين بيها هي أجهزة البلو راي لأنها بشتغل أعلى جودة ممكنة وكمان بتوفر إمكانيات ممتازة منها إنها بتدعم الأفلام ثلاثية الأبعاد، وطبعًا أوعى تسترخص في الكابلات سواء في معدات الفيديو أو الأوديو.

المعدات الصوتية بتتكون أولًا من جهاز استقبال/إرسال صوت وبتتكون من السماعات، وطبعًا لازم برضه تهتم بالجزء ده لأنه زي ما قلنا الصوت من أهم العناصر للي بتتميز بيها السينما ولازم لما تعمل سنما منزلية تكون مهتم بالصوت جدًا، والأنظمة الصوتية فيها ٥٫١ وفيها ٧٫١ وممكن تصرف أكتر شوية وتجيب نظام بيدعم دولبي اتموس وتبقى كأنك في السينما بالظبط.

اتعرف على مختلف عروض أسعار أجهزة المسرح المنزلي المتوفرة على ياقوطة من هنا.

التركيبات

حاجات كتير من اللي اتكلمنا عنها في المقال هتقدر تعملها لوحدك وفيه حاجات هتلاقي طريقة تركيبها في المانيوال بتاعها وفيه حاجات تانية لازم هتحتاج فيها لخبراء، اهم حاجة إن اللي متقدرش تعمله استعين فيه بخبير عشان تقدر توصل لأفضل تجربة متعة ممكنة.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.