كتبت: منى عوض

كتير مننا بيعاني من تزايد حجم المعلومات والبيانات الشخصية، اللي بدورها بتتطلب مساحات تخزينية واسعة على اللاب توب الشخصي، مما أدى إلى تزايد الاعتماد على «الهارد ديسك الخارجي المحمول» أو الـ «Mobile Hard Drive»، اللي بيُعرف أيضًا باسم وحدات التخزين المنفصلة، واللي يُعتبر أسلم حل ضد مخاطر تلف ملفاتك الشخصية أو فقدانها.

لكن في ظل تعدد الشركات المنتجة للهارد ديسك المحمول على مستوى العالم، بقى إنك تلاقي هارد ديسك سهل الحمل بسعر مميز وجودة عالية حاجة صعبة بالنسبة لبعض الناس، وبقى لازم نحط حاجات كتيرة في الاعتبار عند شراء هارد ديسك جديد، منها المساحة المطلوبة، لإن كل ما كانت مساحة الهارد ديسك كبيرة كل ما كان ده أفضل لأنه هيسهّل عليك عملية الاحتفاظ بالبيانات والملفات مهما كان حجمها، ومن الحاجات التانية اللي لازم ناخد بالنا منها برضه هو اسم الشركة المنتجة للهارد ديسك، لإن جودة اسم الشركة المنتجة معناه قوة وكفاءة عمل الهارد ديسك على المدى الطويل بجانب سنوات الضمان اللي تُعتبر عامل مهم جدًا لو الهارد ديسك حصلتله مشكلة معينة.

حاجة تانية مهمة جدًا هي سرعة لفات الهارد ديسك واللي بتحددلك مدى سهولة وسرعة التعامل مع الهارد ديسك في جلب الداتا المطلوبة منه، وعادةً بتتراوح سرعة الهارد ديسك من ٥٢٠٠ لفة/دقيقة وحتى ٧٢٠٠ لفة/دقيقة.

عشان كل ده، مش هتلاقي أفضل من ياقوطة تقدملك يد العون وتزوّدك بالمعلومات المناسبة والمميزات والعيوب الخاصة ببعض الأنواع اللي في السوق.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

نقدر نقسّم أنواع الهارد ديسك الخارجي المحمول من حيث النوع إلى عدة أنواع:

١. الهارد ديسك المحمول اللي بيعمل بدعم من كابل يو إس بي «USB»، واللي بيتم توصيله باللاب توب الشخصي.

٢. الهارد ديسك المحمول اللاسلكي، اللي بيعمل بدعم من الوايرلس «Wireless»، والنوع ده بييجي بمميزات إضافية، زي أزرار الباك أب «Back-up» والتوصيل السريع وإمكانية الاتصال بعدة أجهزة ذكية في نفس الوقت.

هنوضحلكم أفضل أنواع الهارد ديسك اللي يمكن اقتنائها خلال عام ٢٠١٧ بشكل مفصّل أكتر كالآتي:

أولًا: أفضل هارد ديسك خارجي محمول بدعم من كابل USB

في الجدول الجاي، هنستعرض مجموعة من أفضل وحدات التخزين الخارجية اللي يمكن اقتنائها خلال عام ٢٠١٧، من مختلف فئات الوحدات التخزينية المتواجدة في السوق المصري.

سيجيت باك أب بلس Seagate Backup Plus Desktop Drive

المميزات:

• يتوافر منه عدة مساحات تخزينية بتبدأ من ٢ تيرابايت وبتوصل لحد ٨ تيرابايت.
• يتوافق مع الأجهزة اللي بتعمل علي نظامي التشغيل ماك وويندوز.
• كابل يو إس بي 3.0 USB، بيخليك تنقل البيانات بشكل أسرع إلى أجهزة الكمبيوتر.
• بيدعم أيضًا كابل يو إس بي 2.0 USB.
• سرعة ومرونة في الأداء بتوصل فيها سرعة دورانه إلى ٧٢٠٠ لفة في الدقيقة، وسرعة كتابة ٩٥٫٥ ميجابايت في الثانية، وبتبلغ سرعة قراءته للبيانات ١٢٧ ميجابايت لكل ثانية.
• مزوّد بلوحة سيجيت بتسمح بالقيام بنسخ احتياطية للملفات بشكل تلقائي.
• فتحات تهوية على جانب الجهاز وأسفله لسهولة تدفق الهواء.

العيوب:

• برنامج النسخ الاحتياطي المرفق مع الهارد لإدارة الملفات مش بيسمح بالاحتفاظ بأكتر من نسخة من نفس الملف، بالإضافة لإنه بيعمل مع وحدات تخزين سيجيت «Seagate» بس.
• فترة الضمان سنة واحدة بس، وهي تعتبر فترة قصيرة جدًا بالنسبة لهارد بيتمتع بإمكانيات زي دي.

تجربة المستخدم:

بيتميز الهارد ده بتصميم نحيف وخفيف الوزن، فأبعاده بتبلغ ١١٣٫٥×٧٦×١٫٢٨ ملم، ووزنه ١٥٩ جرام، عشان كده سهل حمله والتنقل بيه. كمان بيوفر مساحة تخزين إضافية بتمكنك من تخزين العديد من الملفات الرقمية الكبيرة، زي المقاطع الصوتية والفيديو والوثائق المهمة. وبيحتوي على مدخل يو إس بي 3.0 بيمكنك من نقل البيانات بسرعة عالية بعد توصيله بأجهزة الكمبيوتر، اللي بتعمل وفقًا لأحدث إصدارات الويندوز أو ماكنتوش.

كمان بيحتوي على لوحة سيجيت، اللي بتمكنك من حفظ المعلومات تلقائيًا، من خلال منحك حرية الاختيار بين الحفظ المجدول أو المستمر، فالحفظ المجدول بيساعدك على أخذ نسخ احتياطية بوقت محدد مسبقًا، أما المستمر فبيقوم بإنشاء وحفظ نسخ للمستندات.

وبشكل عام، يعتبر هارد سيجيت باك أب بلس الخارجي المحمول هو الخيار الأفضل بالنسبة لأي شخص بيتعامل مع كم هائل من البيانات.

شوف هارد سيجيت باك أب بلس، بسعر يبدأ من ٦١٠٠ جنيه مصري.

ويسترن ديجيتال ماي باسبورت Western Digital My Passport

المميزات:

• يتوفر بسعة حجمية بتبدأ من ١ تيرابايت وبتوصل إلى ٤ تيرابايت.
• متاح لمستخدمي الأجهزة اللي بتعمل بنظام التشغيل ويندوز.
• بيدعم ميزة تشفير البيانات وحماية الملفات بكلمة سر.
• بييجي ببرنامج خاص بيه بيساعد فى إجراء النسخ الإحتياطي للبيانات «WD Backup» بشكل تلقائي في كل مرة يتم توصيله بالكمبيوتر.
• رغم إنه غير مكلف، لكنه بيقدم أداء متميز ينافس المنتجات الآخرى ذات السعر التنافسي، وده بفضل منفذ اليو إس بي 3.0 USB، اللي بيسرع من نقل البيانات إلى أجهزة الكمبيوتر.
• بيدعم أيضًا كابل يو إس بي 2.0.
• بيسمح بتحقيق أقصى سرعة نقل للبيانات، مسجلًا ١٧٤ ميجابايت للقراءة، و١٦٨ ميجابايت للكتابة.
• خفيف وحجمه صغير، فبتقدر تشيله بسهولة وبشكل سلس في كف إيدك وتتنقل بيه لأي مكان.
• متوفر بمجموعة ألوان نابضة بالحياة والمرح.

العيوب:

•  مش بيعمل نسخة احتياطية للتغييرات اللي بتحصل فى الملفات لحظيًا وقت حدوثها.

تجربة المستخدم:

يعتبر أداء قرص ويسترن ديجيتال ماي باسبورت الصلب متميز، رغم إنه غير مكلف، فهو ينافس المنتجات الأخرى، وده بفضل تمتعه بمدخل يو إس بي 3.0 اللي بيمكنك من نقل البيانات بسرعة عالية بعد توصيله بأجهزة الكمبيوتر، اللي يعمل وفقًا لأحدث إصدارات الويندوز أو ماكنتوش. ويشتهر النوع ده بصلابته، ومقاومته للصدمات والارتطامات، فضلًا عن شكله الأنيق.

النوع ده من الأقراص بيتيح ليك حرية الاختيار بين عدة سعات تخزينية تتراوح من ١ تيرابايت وبتوصل لحد ٤ تيرابايت، عشان تقدر تخزّن العديد من الملفات، بما فيها المقاطع الصوتية والفيديو والوثائق المهمة، لكن مش بيقوم بإجراء نسخ احتياطية فورية للتغييرات اللي بتحصل فى الملفات وقت حدوثها.

وبيدعم الجهاز أيضًا ميزة تشفير البيانات وحماية الملفات بكلمة مرور سرية، فهو مجهز بتشفير AES Hardware Encryption، وبرمجية الأمان WD Security، فعند استخدامك لويسترن ديجيتال ماي باسبورت هتطمّن تمامًا لمدى الخصوصية والأمان التام لكافة ملفاتك.

شوف هارد ويسترن ديجيتال ماي باسبورت، بسعر يبدأ من ١٠٤٩ جنيه مصري.

لاسي راجيد ريد LaCie Rugged Raid

المميزات:

• يتوفر بسعة حجمية بتوصل لحد ٤ جيجابايت.
• كابل يو إس بي 3.0 USB، بيمكنك من نقل البيانات إلى أجهزة الكمبيوتر بسرعة تصل إلى ٢٤٠ ميجابايت.
• بيدعم أيضًا كابل يو إس بي 2.0.
• بيتمتع بهيكل خارجي مقاوم للغبار، ومقاوم للماء، وبإمكانه الصمود حتى لو وقع من على ارتفاع يصل إلى خمسة أقدام.
• التوافق مع أجهزة الكمبيوتر اللي بتعمل بنظامي التشغيل ويندوز وماكينتوش MAC.
• تقدر تسترد الملفات المتواجدة على هذا الجهاز بشكل كامل.

العيوب:

• لسوء الحظ دايمًا الصلابة بتتطلب قليلًا من الوزن، عشان كده وزن القرص الصلب ده ٨٢٠ جرام.

تجربة المستخدم:

بيتمتع قرص لاسي راجيد ريد بهيكل خارجي مقاوم للغبار وللماء، وإمكانية الصمود إذا وقع من ارتفاع خمسة أقدام، لكن تمن الصلابة دي كان تقل وزن القرص إلى حد ما، فوزنه بيوصل لـ ٨٢٠ جرام. كمان بيتمتع بأداء متميز في ظل دعمه لمدخل يو إس بي 2.0 ويو إس بي 3.0، اللي بيمكنك من نقل البيانات بسرعة عالية بعد توصيل القرص الصلب بأجهزة الكمبيوتر اللي بتعمل وفقًا لأحدث إصدارات الويندوز أو ماكنتوش.

شوف هارد لاسي راجيد ريد، بسعر يبدأ من ٢٧٨٩ جنيه مصري.

سيجيت باك أب بلس سليم Seagate Backup Plus Slim

المميزات:

• محرك أقراص غير مكلف وبيتميز بالسرعة وحجمه الصغير.
• متوفر منه عدة سعات حجمية، بتبدأ من ٥٠٠ جيجابايت، وتتدرج لـ ١ تيرابايت، ١٫٥ تيرابايت، ٢ تيرابايت ولحد ٤ تيرابايت، وهي مساحة أكتر من كافية لتخزين كميات كبيرة من الملفات.
• بيمتاز بوجود منفذ يو إس بي 3.0 بيساعد على نقل البيانات بسرعة.
• بيتوافق نظام حفظ الملفات فيه مع الأجهزة اللي بتعمل بنظامي التشغيل ويندوز وماكنتوش MAC.
• خلال عملية الاختبار، الجهاز ده ما أصدرش أي ضوضاء أو اهتزازات أو حرارة، عشان كده يُعتبر اختيار كويس أثناء الحركة والتنقل.

العيوب:

• مفيهوش خيار أمان لحماية محتويات محرك الأقراص ضد عملية الوصول غير المصرح بيه.

تجربة المستخدم:

يعتبر القرص الصلب سيجيت باك أب بلس سليم واحد من محركات الأقراص غير المكلفة، واللي بدورها بتمتاز أيضًا بالسرعة والوزن والحجم الصغير، فسمك القرص، ذو الهيكل المعدني الأنيق، أقل من نص بوصة، بينما يصل وزنه لـ ١٥٩ جرام، مقارنةً بالمنتجات المنافسة، بالإضافة لإنه مش بيصدر أي ضجيج أو اهتزاز أو حرارة عند استخدامه، اللي بيخليه منتج مناسب لاحتياجات معظم المستخدمين.

وبيمتاز القرص برضه بوجود كابل يو إس بي 3.0، بيوصل طوله إلى ١٨ إنش، واللي بيعمل على نقل البيانات بسرعة ١١٤ ميجابايت لكل ثانية و و١٢١ ميجابايت للكتابة والقراءة على الهارد، بمجرد توصيله بأجهزة الكمبيوتر اللي بتدعم نظامي التشغيل ويندوز وماكنتوش.

كمان بيتيح ليك حرية الاختيار بين مساحات تخزينية تتراوح من ٥٠٠ جيجابايت وحتى ٤ تيرابايت، فبضغطة واحدة تقدر تحمي البيانات الرقمية وتشاركها كمان على وسائل الإعلام الاجتماعي. الجهاز بييجي بمميزات فريدة، زي إنه بيوفر نسخ احتياطية  مش بس من أجهزة الكمبيوتر، لكن من الموبايل كمان.

شوف هارد سيجيت باك أب بلس سليم، بسعر يبدأ من ١٠٧٥ جنيه مصري.

ثانيًا: أفضل هارد ديسك محمول لاسلكي

بالتأكيد الهارد ديسك المحمول الي بيعمل بكابل اليو إس بي مش الحاجة الوحيدة المتوفرة في الأسواق، فيه كمان الهارد اللاسلكي، اللي بيعمل بدعم من الوايرلس، واللي بإمكانه الاتصال بأي جهاز ذكي، زي الهواتف الذكية أو أجهزة التلفزيون أو الحواسب الآلية أو مشغلات الميديا الهوائية، بالإضافة لإنه بيمكّنك من توصيل عدة أجهزة ذكية في نفس الوقت، في الجدول الجاي، هتلاقي بعض الخيارات المميزة لأفضل هارد ديسك بيعمل بخاصية الوايرلس.

سيجيت وايرلس بلس Plus Seagate Wireless

المميزات:

• يتوافر منه ٣ أجهزة بسعات تخزينية متنوعة، تشمل أجهزة سعة ٥٠٠ جيجابايت، ١ تيرابايت و٢ تيرابايت.
• إمكانية التزامن التلقائي مع تطبيقات الدروب بوكس «Dropbox» وجوجل درايف «Google Drive»، لخدمات التخزين السحابي الحاسوبي، اللي بتمكّن المستخدم من الوصول للملفات في أي وقت بدون الحاجة للاتصال بشبكة الإنترنت.
• التوافق مع أجهزة الحاسوب اللي بتعمل بنظام التشغيل ويندوز 8، بالإضافة إلى ويندوز آر تي ونظام ماك.
• التوافق مع الأجهزة المحمولة الأخرى، زي الهواتف الذكية والأجهزة اللوحية، اللي بتعمل بنظام التشغيل أندرويد، ومع أجهزة أيباد، أيفون وكيندل فاير.
• إمكانية إنشاء شبكة واي فاي شخصية بتمكنك من الوصول للمحتويات الخاصة بيك بدون الحاجة إلى أسلاك أو واي فاي خارجي.
• إمكانية استخدام وايرلس بلس كمركز توزيع للواي فاي لمشاركة الاتصال بشبكة الإنترنت مع عدد يصل إلى ٧ أجهزة في نفس الوقت.
• إمكانية استخدام كابل يو إس بي 3.0 USB.
• بطارية تدوم حتى ١٠ ساعات.

العيوب:

• تعتبر الـ ١٠ ساعات المتاحة لعمر البطارية مش كفاية، مما يتطلب حمل شاحن للجهاز باستمرار.

تجربة المستخدم:

عادةً بتتمتع الأقراص الصلبة المحمولة اللاسلكية بإمكانية الاستخدام كمركز توزيع للواي فاي لمشاركة الاتصال بشبكة الإنترنت مع عدة أجهزة في وقت واحد، وهنا ممكن لسيجيت وايرلس بلس إنه بشتغل مع عدد يصل إلى ٧ أجهزة في وقت واحد.

كمان الهارد ده بإمكانه إنشاء شبكة واي فاي شخصية بحيث يمكنك من الوصول للمحتويات الخاصة بيك بدون الحاجة إلى أسلاك أو واي فاي خارجي،  ده غير إنه بيتوافق مع أجهزة الكمبيوتر اللي بتعمل بنظام التشغيل ويندوز 8، بالإضافة إلى ويندوز آر تي ونظام ماك، والأجهزة المحمولة الأخرى، زي الهواتف الذكية والأجهزة اللوحية، اللي بتعمل بنظام التشغيل أندرويد، ومع أجهزة أيباد، أيفون وكيندل فاير.

ويقدر كمان الهارد ده يتزامن بشكل تلقائي مع تطبيقات الدروب بوكس «Dropbox» وجوجل درايف «Google Drive»، لخدمات التخزين السحابي الحاسوبي، الأمر اللي بيمكّن المستخدم من الوصول للملفات في أي وقت بدون الحاجة للاتصال بشبكة الإنترنت، لكن رغم كل المميزات دي إلا إنه بيفتقر لتدعيم كافة صيغ الفيديو الرقمية.

كمان الهارد بيتمتع ببطارية تدوم حتى ١٠ ساعات، ولكنها مدة تعتبر مش كافية، مما يتطلب حمل شاحن للجهاز باستمرار.

شوف هارد سيجيت وايرلس بلس، بسعر يبدأ من ١٩٩٩ جنيه مصري.

لاسي فويل وايرلس LaCie Fuel Wireless Drive

المميزات:

• يتوافر منه جهازين بسعات تخزينية متنوعة، تشمل سعة ١ تيرابايت و٢ تيرابايت.
• بإمكانه توصيل ما يصل إلى ٥ أجهزة في وقت واحد عبر الواي فاي المتصل بيه.
• يتضمن نظام إكسفات exFat اللي بيدعم نظام التشغيل ويندوز.
• يتوافق مع الأجهزة الذكية اللي بتعمل بنظام التشغيل ويندوز، أجهزة الأندرويد وماكينتوش MAC، الأيفون والأيباد.
• إمكانية الوصول للبيانات المخزنة على الجهاز في أي وقت بدون الحاجة إلى أي أسلاك خارجية أو الاتصال بشبكة الإنترنت.
• إمكانية استخدام كابل يو إس بي 3.0 USB لنقل البيانات بشكل أسرع.
• إمكانية تحميل تطبيق سيجيت ميديا.
• بطارية تدوم حتى ١٠ ساعات.

العيوب:

• لا توجد عيوب بالنسبة لسعره وأداءه.

تجربة المستخدم:

يتمتع قرص لاسي فويل وايرلس الصلب بوزن خفيف يصل إلى ٣٠٠ جرام، وشكل أنيق، غير إنه بيتوفر منه جهازين بسعات تخزينية متنوعة، تشمل سعة ١ تيرابايت و٢ تيرابايت.

يقدر القرص ده يوصّل ما يصل إلى ٥ أجهزة في وقت واحد عبر الواي فاي المتصل به، وكمان بيدعم نظامي التشغيل ويندوز وماكينتوش، جنبًا إلى جنب مع أجهزة الأندرويد والأيفون والأيباد.

بإمكانك الوصول للبيانات المخزنة على الجهاز في أي وقت بدون الحاجة إلى أي أسلاك خارجية أو الاتصال بشبكة الإنترنت، عبر توصيل الجهاز بالأجهزة المحمولة. كما إنه بيتمتع ببطارية تدوم حتى ١٠ ساعات، الأمر اللي بيخليه مناسب لشريحة كبيرة من المستخدمين.

شوف هارد لاسي فويل وايرلس، بسعر يبدأ من ٣٧٩٠ جنيه مصري.

ويسترن ديجيتال ماي باسبورت وايرلس WD My Passport Wireless

المميزات:

• يتوافر منه نسختين بسعات تخزينية ١ تيرابايت و٢ تيرابايت.
• يعمل كواي فاي لتوصيل ما يصل إلى ٨ أجهزة في وقت واحد بدون الحاجة لتوصيل أي أسلاك أو الاتصال بشبكة الإنترنت.

• بييجي بمنفذ SD card لنقل أو إجراء نسخ احتياطية لأي ملفات من بطاقة الذاكرة الخارجية SD للهارد مباشرةً.
• إمكانية الوصول لكافة البيانات المخزنة بسهولة من خلال الأجهة الذكية باستخدام تطبيق الهاتف المحمول «My Cloud».
• إمكانية استخدام كابل يو إس بي 3.0 USB.
• بيدعم عملية حماية الملفات المخزنة عليه بكلمة سر.
• بطارية تعمل حتى ٦ ساعات من الاستخدام المتواصل، أو ٢٠ ساعة في وضع الاستعداد في مرة الشحن الواحدة.

العيوب:

• عمر بطارية الجهاز يعتبر قصير نسبيًا.
• الجهاز بيستغرق وقت طويل لتحميل الصور.

تجربة المستخدم:

• رغم أن جهاز ويسترن ديجيتال ماي باسبورت وايرلس بيتمتع بعدة مميزات، بما فيها العمل كواي فاي لتوصيل ٨ أجهزة في وقت واحد بدون الحاجة لتوصيل أي أسلاك أو الاتصال بشبكة الإنترنت، وبيتمتع بمنفذ «SD card» لنقل أو إجراء نسخ احتياطية لأي ملفات من بطاقة الذاكرة الخارجية SD للهارد مباشرةً، وتدعيم عملية حماية الملفات المخزنة عليه بكلمة سر، إلا إنه بيستغرق وقت طويل لتحميل ما يحتويه من ملفات، ده غير إن عمر البطارية قصير نسبيًا بالنسبة لإمكانياته، فهو يحتوي على بطارية تدوم حتى ٦ ساعات من الاستخدام المتواصل.

شوف هارد ويسترن ديجيتال ماي باسبورت وايرلس، بسعر يبدأ من ٢١٩٩ جنيه مصري.