إزاي تقدر تحدد إمكانيات موبايل قبل ما تشتريه من خلال مواصفاته – الجزء الأول
كتب: خالد عاصم
لما بنيجي نشتري موبايل جديد فيه كام خطوة اتعودنا نعملهم الأول، يعني بعد ما بتحدد الفئة السعرية المناسبة لميزانيتك، وبعد ما بتشوف إيه الموبايلات الموفرة في الفئة دي، بتبدي تاخد كل موبايل على حدا وتشوف مواصفاته وبعد كده تشوف مراجعاته سواء المقروئة على المواقع أو المرئية على يوتيوب، وبعد كده ممكن كمان تشوف مقارنات بينه وبين الموبايلات المنافسة في الفئة السعرية نفسها.
بس كتير من المستخدمين لما بيتفرجوا على المراجعات أو يقروها بياخدوا كلام المراجع زي ما هو، يعني لما يقول ده كويس يبقى كويس ولما يقول ده وحش يبقى وحش، من غير ما كتير مننا يبقى عارف معنى وتفاصيل العناصر اللي على أساسها بيحدد المراجع ليه العنصر ده كويس وليه العنصر ده وحش في الموبايل نفسه، بس النهارده من خلال المقال ده هنحاول إننا نعرّفك ازاي تقدر تحدد إمكانيات موبايل قبل ما تشتريه من خلال مواصفاته وإزاي تقدر انت بنفسك تراجع موبايل وممكن تعمل تجربة عملية على موبايلك الحالي، وفي خلال المقال هنستخدم مجموعة من الموبايلات كأمثلة، ولو عجبك أي موبايل منهم هتقدر تطلبه من خلالنا في ياقوطة وهيوصلك لحد باب البيت أو مكان ما تحب في أسرع وقت ممكن.
*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.
ازاي تقدر تحدد إمكانيات موبايل قبل ما تشتريه من خلال مواصفاته
البناء والصناعة والتصميم
في مواد أساسية بتستخدم في صناعة الموبايلات، المواد دي هي البلاستيك والألومنيوم والزجاج، ففي الوقت اللي بتعتمد فيه الموبايلات الرائدة وجزء من الموبايلات المتوسطة على الألومنيوم في صناعة الهيكل والزجاج في الضهر والشاشة، بتعتمد الموبايلات المتوسطة التانية والموبايلات الاقتصادية على البلاستيك في صناعة الهيكل وأحيانًا عليه برضه في صناعة الضهر وأحيانًا على الزجاج في صناعة الضهر.
من التقسيمة دي بيتضح إن استخدام الألومنيوم والزجاج هو الأفضل بطبيعة إن استخدامه في الموبايلات الرائدة بيقول كده، بس ده مش معناه إن البلاستيك مالوش مميزات زي ما الزجاج ليه عيوب، يعني لو الموبايل مصنوع بالكامل من الزجاج بتكون نسبة إنه يتكسر في حالة وقوعه عالية حتى لو كان محمي بأي نوع من أنواع الزجاج المقوى، وكمان الصهر المصنوع من الزجاج بيطبع بسرعة بمعنى إنه بيلقط بصمات الإيد وبيحتاج لتنضيفه كل شوية، اما البلاستيك فعيبه إنه بيتخدش بسرعة جدَا وممكن من أقل حاجة، وإنه بيبان شكله أرخص وملمسه أقل من الزجاج.
طبعًا استخدام الألومنيوم في صناعة الهيكل أفضل بكتير من البلاستيك لأنه بيوفر شكل وملمس رائدين وغاليين وكمان بيوفر حماية أفضل بكتير للموبايل عن البلاستيك، وعلى ذكر الحماية فطبعًا لكل حماية تمنها، يعني الموبايلات الرائدة بس تقريبًا هي اللي بتبقى محمية ضد الغبار والغمر في المياه، وفي موبايلات متوسطة وكمان اقتصادية بتكون محمي ضد التعرق ونقط المياه، في الوقت اللي فيه موبايلات تانية مش بتتمتع بأي حماية، وده بينطبق كمان على الاعتماد على الزجاج المقوى اللي بيختلف ما بين موبايل والتاني.
كنموذج متوسط عن اللي اتكلمنا عنه، موبايل Xiaomi Mi 9T وهو موبايل منتمي للفئة فوق المتوسطة وبيمتاز بهيكل من الألومنيوم وزجاج كورنينج جوريلا جلاس الإصدار الخامس في الضهر وفي حماية الشاشة، بس من ناحية تانية مش بيتمتع بحماية ضد الغبار والغمر في المياه.
شوف عروض أسعار موبايل Xiaomi Mi 9T من هنا.
بيعتبر نفس الموبايل ده، Xiaomi Mi 9T، من بين الموبايلات اللي بتقدم تصميم من بين التصاميم اللي بتعتمد عليه الموبايلات المختلفة وهو تصميم الشاشة الكاملة اللي بيعتمد على كاميرا منبثقة من الأعلى، في الوقت نفسه في موبايلات بتعتمد على شق قطرة المياه وموبايلات لسه بتعتمد على الشق العريض زي موبايلات iPhone 11 اللي لسه متمسكة بالتصميم ده اللي تخلت عنه موبايلات تانية، وفي النهاية موضوع التصميم ده بيكون متروك للمستخدم يعني التصميم اللي يعجبك هاته سواء كان شق عريض أو صغير أو ثقب أو كاميرا منبثقة من الأعلى.
الشاشة
مواصفات الشاشات متعددة، وكل مواصفة أو عنصر فيهم ليه تأثير معين على الشاشة، أول العناصر وأهمهم هو نوع الشاشة نفسه واللي بينقسم دلوقتي لنوعين، AMOLED باختلاف أنواعها وأشهرهم Super AMOLED وLCD باختلاف أنواعها وأشهرهم IPS LCD، ومن غير ما نخوض في تفاصيل فنية ممكن تكون معقدة هنتعرف على الفرق الرئيسي بين النوعين أو مميزات وعيوب كل نوع.
النوع الأبرز والأفضل واللي مستخدم في الموبايلات الرائدة المختلفة وجزء كبير من الموبايلات المتوسطة هو نوع AMOLED، والنوع ده بيتميز بعدد كبير من المميزات أبرزها إنه النوع ده بينتج اللون الأسود عن طريق إنه بيطفي البيكسلات المسؤولة عن اللون في الصورة وده بيخلي اللون الأسود يكون طبيعي على عكس شاشات LCD اللي بتنتج اللون الأسود بشكل عادي زي أي لون، والميزة دي نفسها ليها مميزات تانية زي خاصية Always on Display أو الشاشة دائمة التيقظ ودي الشاشة اللي بتفضل منورة طول الوقت أو في وقت محدد وبتعرض الساعة والتاريخ وبيانات تانية ولأن الصورة بيكون أغلبها من اللون الأسود فالخاصية دي مش بتستهلك كتير من الطاقة، وده كمان بينطبق على الوضع الليلي اللي كمان بيوفر الطاقة بشكل كبير.
النوع ده من الشاشات كمان بيكون أفضل كتير على مستوى السطوع الطبيعي وعلى مستوى الحدة، وعلى مستوى وضوح الشاشة وسطوعها وقت استخدام الموبايل تحت ضوء الشمس المباشر، أما نوع LCD فينتج ألوان قريبة جدًا من الطبيعي، وعشان تعوض شاشات AMOLED ده بتستعين بتقنيات مختلفة بتخليها ألونها زاهية وقريبة جدًا من الطبيعي برضه زي نطاق ألوان DCI-P3 اللي بيعتبر من بين التقنيات اللي بتتضاف في بعض الموبايلات زي دعم تقنية HDR اللي بتساعد الموبايل إنه يشغل أي محتوى فيديو بيدعم التقنية دي، وشاشات AMOLED مش حكر على الموبايلات الرائدة أو فوق المتوسطة بس، لا كمان فيه موبايلات كتير متوسطة بتعتمد عليها زي Samsung Galaxy A30 مثلًا.
شوف عروض أسعار موبايل Samsung Galaxy A30 من هنا.
المعدلات اللي زي ١٩.٥:٩ أو ٢٠:٩ وغيرها بتمثل نسبة طول الشاشة لعرضها، وده مع قطر الشاشة ومع شكل الحواف المحيطة بيها وسمكها بيكون متروك ليك، يعني امسك الموبايل الأول وشوف هيكون مناسب ليك ولاستخدامك ولحجم إيدك ولا لا.
المكونات الداخلية
المكونات الداخلية لأي موبايل بتنقسم لأربع عناصر أساسية، البروسيسور أو المعالج المركزي واللي بيبقى مدمج بيه معالج الرسوميات، الذاكرة العشوائية أو الرامات، والذاكرة الداخلية، وأخيرًا البطارية، ولو أنت ليك معرفة بمكونات الكمبيوتر فهتقدر بسهولة تفهم الفرق بين العناصر دي، وخلينا نبدأ بأسهلهم وهي الذاكرة الداخلية اللي بتحدد السعة اللي بتقدر تخزن عليها بياناتك وملفاتك المختلفة على الموبايل، ودي اختيارها متروك ليك، بس لو اخترت موبايل سعته التخزينية ضعيفة خليك متأكد إن الموبايل بيدعم كروت الميموري، أما لو سعته التخزينية كبيرة فحاول إنك أصلًا ماتعتمدش قوي على كروت الميموري اللي سرعتها بتكون أقل من المساحة التخزينية للموبايل، وبتبدأ السعات التخزينية للموبايلات من أول ١٦ جيجابايت في الموبايلات الاقتصادية لحد ٢٥٦ أو ٥١٢ جيجابايت زي iPhone 11 Pro Max ده غير إن فيه إصدارات خاصة من بعض الموبايلات الرائدة بتوصل سعتها لحد ١ تيرابايت.
شوف عروض أسعار موبايل iPhone 11 Pro Max من هنا.
الذاكرة العشوائية أو الرامات هي المسئولة بشكل رئيسي على سرعة نقل البيانات وقرايتها على الموبايل، والعلاقة ما بين سعة الرامات وبين سرعة الموبايل علاقة طردية، بمعنى إن كل ما الرامات زادت كل ما سرعة الموبايل زادت، والسرعة دي بتشمل كل حاجه ليها علاقة بالاستخدام الطبيعي اليومي للموبايل، من أول التمرير على الشاشة لحد فتح التطبيقات ودعم سرعة الألعاب وغيرها، وطبعًا العلاقة بين الرامات وبين السعر كمان طردية، ومتوقفة على احتياجاتك واستخدامك، يعني لو استخدامك عادي متعلق بالمكالمات واستخدام تطبيقات التواصل الاجتماعي العادية فرامات ٣ جيجابايت أو ٤ جيجابايت هتكون بالنسبالك كافية جدًا، أما لو بتستخدم تطبيقات معقدة شوية وألعاب كتير فهتحتاج رامات سعتها ٦ جيجابايت رام، وطبعًا رامات ٨ جيجابايت رام و١٢ جيجابايت رام محجوزة للموبايلات الرائدة وإن كانت في الاستخدام اليومي لحد فوق المتوسط مش هتفرق كتير عن رامات ٦ جيجابايت رام وممكن ما تحسش بتأثيرها أصلًا.
العنصر الأساسي والمحرك لكل حاجة في الموبايل هو البروسيسور أو المعالج المركزي، وده عشان نتكلم عنه باستفاضه هنحتاج لمقال كامل مفصل، بس خلينا نبسط الأمور شوية، المعالجات المركزية من اسمها بنقدر نفهم وظيفتها وهي معالجة البيانات والبيانات هنا معناها كل حاجة متعلقة بالموبايل، يعني المعالج المركزي بالإضافة لأنه بيكون مدمج بيه معالج الرسوميات اللي بيقابل كارت الفيجا أو الجرافيكس في الكمبيوتر، بيكون كمان مسئول عن تقنيات الاتصال ونوع المودم، الذكار الاصطناعي بمختلف تطبيقاته، الكاميرا وقدرة الموبايل على تحميل عدد معين من العدسات وبحد أقصى لقوة كل عدسة، وغيرها كتير من العناصر المتداخلة في كل حاجة ليها علاقة بالموبايل.
بتنقسم المعالجات المركزية لتلات أنواع رئيسية، الاقتصادي، المتوسط والرائد، بالإضافة إلى فئة جديدة بيتقال عليها فوق المتوسطة، ومن بين أشهر شركات صناعة المعالجات شركة كوالكوم ومعالجاتها المعروفة باسم سنابدراجون بفئاتها الأساسية سنابدراجون ××4 اللي بتمثل الفئة الاقتصادية، وسنابدراجون ××6 اللي بتمثل الفئة المتوسطة وسنابدراجون ××7 اللي بتمصل الفئة فوق المتوسطة المستحدثة وأخيرًا سنابدراجون ××8 اللي بتمصل الفئة الرائدة واحدثها معالج كوالكوم سنابدراجون ٨٥٥ بلس اللي بيدعم موبايلات كتير دلوقتي زي OnePlus 7T Pro.
شوف عروض أسعار موبايل OnePlus 7T Pro من هنا.
طبعًا فيه معالجات تانية كتير معروفة زي معالجات Apple A اللي بتستخدم في موبايلات أيفون بس، ومعالجات موبايلات هواوي وهونو والمعروفة باسم HiSilicon Kirin وكمان معالجات MediaTek باختلاف أنواعها، وبغض النظر عن ترتيب معالج Apple اللي مابيخضعش للمقارنة مع المعالجات التانية لعدة أسباب أبرزهم إنه مابيشتغلش على موبايلات اندرويد، فالزعامة لمعالجات كوالكوم بشكل عام بيختلف أحيانًا في بعض التفاصيل، وعشان تقدر تعرف إذا كان أداء البروسيسور كويس ولا لا دور على نتيجته على اختبارات GeekBench وAnTuTu وشوف نتيجته وموقعه من بين الموبايلات التانية المختلفة.
آخر عنصر من العناصر الداخلية الأساسية لأي موبايل هي البطارية ودي طبعًا عارفين إن كل ما السعة بتاعتها زادت كل ما عدد ساعات عمل الموبايل المستمرة زادت، بس مش ده العنصر الوحيد اللي بيأثر على أداء البطارية، فالشاشة ليها عامل مهم جدًا وكمان البروسيسور اللي كل ما كانت معماريته اللي بتتقاس بالنانوميتر أو nm أقل كل ما كان استهلاكه للطاقة أقل، وطبعًا العنصر الرئيسي هو طبيعة استخدامك للموبايل.
من العناصر المرتبطة بالبطارية هي منفذ الشحن وتقنيات الشحن السريع. بالنسبة لمنفذ الشحن فمنفذ USB Type-C أفضل من microUSB لأنه أسرع سواء في الشحن أو نقل البيانات ولأنه كمان سهل الاستخدام لأن طرفين الشاحن بيكونوا زي بعض يعني حطيت الشاحن عدل أو مقلوب هي هي مش هتفرق على عكس باقي أنواع التوصيلات، أما تقنية الشحن السريع فبتبدأ من ١٨ وات وبتوصل دلوقتي لحد ٤٠ وات أعتقد إنها بقت عنصر ضروري عند اختيارك لأي موبايل عايز تشتريه.
فيه عناصر تانية كتير ممكن تأثير على اختيارك للموبايل حتى لو بدرجة بسيطة أو بدرجات متفاوته، يعني مثلًا لو بتحب ألعاب وتطبيقات الواقع الافتراضي فلازم تتأكد إن الموبايل فيه مستشعر الدوران أو Gyroscope، وكمان لازم تعرف إذا كان الموبايل فيه ماسح بصمة ولا لأ وإيه نوعه وتعرف أراء الناس في أداءه لأن حتى لو الموبايل فيه خاصية Face ID فالاعتماد على ماسح البصمة لحد دلوقتي هو الأسرع والأكتر أمان في أي موبايل مهما كان نوعه ومهما كانت تقنية Face ID المستخدمة فيه.
كدا مايتبقاش من العناصر المكونة لأي موبايل غير الكاميرا، ولأن الكاميرا علم مستقل وبحره واسع جدًا فهنخصصلها مقال لوحده هنعرف فيه إزاي تقدر تفهم كاميرات الموبايلات وتعرف إيه الفرق بين الدقة وبين فتحة العدسة وإيه التقنيات المستخدمة في كاميرات الموبايلات، فاستنونا في مقال جاي قريب جدًا.
اتعرف على عروض أسعار مختلف الموبايلات المتوفرة على ياقوطة من هنا.
*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.
عن كاتب المقال
خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.