كتبت: فاطمة نامق

النظافة هي أهم شيء بيدل علي أصحاب المكان ومهما كان المكان نظيف فالأرضيات هي أكتر حاجة بتبين النضافة، لكن ساعات بنزهق من إن كل شوية نفضل نمسح فيها ونجيب الجردل والشرشوبة أو المساحة العادية ونرجع نعيد تاني عشان ننشف وطول ما بنمسح عشان ننتقل من أوضة لأوضة نفضل نشيل في الجردل ودي حاجة بتخلينا أوقات نكسل نمسح. لكن مع الوقت بتظهرلنا حاجات بتسهّل علينا الأمور وتريحنا زي الممسحة البخاخ. ياقوطة هتقولنا ريفيو سريع عنها عشان نعرف مميزاتها وعيوبها ورأي الناس فيها.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

مواصفات الممسحة البخاخ وبعض النصائح في الاستخدام

• الممسحة البخاخ مصنوعة من البلاستيك القوي والفايبر والمواسير من المعدن الخفيف.
• ملحق بيها البادة المصنوعة من المايكروفايبر اللي بتمتص المياه، وكمان سهلة جدًا في تنظيفها وممكن غسلها في الغسالة.
• البادة القماش سهلة جدًا نشيلها عشان نغسلها ونركبها تاني لأن في سنون البادة القماش بتلزق فيها على طول.
• الإيد اللي بنمسكها هنلاقي مقبض الرشاش نضغط عليه بيخلي الزجاجة الرشاش ترش المياه.
• الزجاجة سهل جدًا نشيلها نملاها بالمياه وممكن نضيف ليها بعض المعطر أو المنظف.
• لازم الأرض تكون نضيفة مفيهاش تراب قبل استخدام الممسحة لضمان نضافة أكتر.
• من الأفضل بعد غسيل البادة أن نتركها في الهوا عشان تنشف.
• من الأفضل شراء بادة احتياطي لاستخدامها إذا تلفت القديمة.
• نصيحة مننا إن ممكن يكون عندك بادة إضافية كمان، واحدة للأرضيات وواحدة لتلميع الحوائط.

مميزات الممسحة البخاخ

• خفيفة الوزن وده بيساعدك أكتر في التحكم فيها لو هتمسح بيها الحوائط.
• موفرة للوقت جدًا لأنها بتكون أسرع في الحركة عن الأشياء التقليدية.
• القاعدة بتاعتها بتلف عشان كده بتكون سهلة لمسح تحت العفش والأماكن الضيقة.
• سهل تنضيفها لأن ممكن بكل سهولة تشيل البادة القماش وتغسلها في الغسالة.
• حلوة جدًا في تلميع الأرضيات الخشبية الباركيه والناعمة زي السيراميك والبورسلين.
• مش بتسيب أثر مسح وخطوط على الأرض غير باقي الطرق الأخرى في المسح.

عيوب الممسحة البخاخ

• لو الأرض فيها تراب الممسحة مش بتنضف كويس.
• في ناس اشتكت إن الرشاش ضعيف مش بيرش مياه كتير.
• فيه بعض الشكاوي من إن الرشاش بيبوظ بسرعة.
• برضه بعض الشكاوى كانت بخصوص إن الإيد بتتكسر إذا استخدمتها بعنف.

آراء بعض الناس في الممسحة

• سالي الشاطر: عندي بس مش بتنزل المية كتير كده كفاية رشة صغيرة، لكن حلوة للتنضيف اليومي.
• هيام أحمد: أيوه عندي وتحفة جدًا جدًا.
• سمر أبو المجد: تلميع بس.
• هند عوض الله: حلوة وسهلة قوي لتنضيف التراب من على السيراميك اللي عندي لكن للأسف باظت قبل ما تكمل سنة، السوستة بتاعت الرش عطلت وزعلانة عليها.
• إسراء مصطفى: حلوة قوي لكن كده كده هتحتاجي الشرشوبة، لو عايزة وش تنظيف بعد ما تخلصي تقومي شادّة بيها بتخلي السيراميك جميل ومفيهوش خطوط ولا حاجة.
• شيماء هندي: حلوة جدًا مش بستغني عنها.
• أمل عاطف: أنا جربتها وما كمّلتش معايا يومين وباظت، الرشاش باظ والفتحة بتاعته اتقفلت ما بقيتش بترش.

ممكن تشوف الممسحة البخاخ Healthy من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.