كتب: خالد عاصم

وأخيرًا نزل بلايستيشن 5 مصر بعد طول انتظار في العالم كله ومن أول ما ظهرت الأخبار عن تطوير سوني لمنصة ألعابها الجديدة، بس مع ظهور الجهاز أخيرًا في مصر ومع سعره الأولي العالي جدًا بيظهر السؤال، هل محتاج فعلًا إني اشتريه دلوقتي لو عندي جهاز بلايستيشن 4 او حتى ما عنديش وعايز أجيب جهاز جديد ولا محتاج استنى شوية على الشراء، وفي المقال ده هنحاول نجاوب على السؤال ده سواء كان عندك جهاز بلايستيشن 4 فعلا ولا لا.

ولو أي منصة ألعاب هنتكلم عنها عجبتكم هتقدروا تطلبوها من خلالنا في ياقوطة وهتوصلكم لحد باب البيت وكمان تقدروا تشتروا المنتجات دي بالتقسيط من خلال شهري أول وأسهل تطبيق للتقسيط في مصر واللي مش بيحتاج منك غير صورة البطاقة وصورة إيصال مرافق وبس، ومن غير زيارة ولا ضامن واستمتع كمان بتوصيل مجاني لكل مشترياتك من خلاله.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

المقارنة بين بلايستيشن ٥ وبلايستيشن ٤

المواصفات والمكونات الداخلية

بتعتمد منصة الألعاب الجديدة بلايستيشن ٥ على مجموعة ممتازة واستثنائية من المواصفات فالمنصة بتعتمد على المعالج المركزي AMD Zen 2-based ثماني النواة بتردد ٣٫٥ جيجا هيرتز، ومعاه معالج الرسوميات المعدل RDNA 2 بإمكانيات ١٠٫٢٨ TFLOPs و36CU بتردد ٢٫٢٣ جيج هيرتز، اما رامات الجهاز فسعتها ١٦ جيجابايت رام فئة GDDR6 ببنية ٢٥٦ بت، وبتعتمد المنصة على ذاكرة داخلية سعتها ٨٢٥ جيجابايت من فئة SSD بسرعة 5.5 جيجابايت في الثانية وممكن زيادة السعة دي من خلال كروت الميموري أو من خلال الهاردات الخارجية ود بينطبق بس على ألعاب PS4، والمنصة فيها قارئ بلو راي بجودة 4K UHD وبيقدر يشغل طبعًا الجودة دي بتردد ١٢٠ هيرتز ده غير دعمه لجودة 4K.

المنصة كمان بتدعم مجموعة من التقنيات الممتازة والجديدة في عالم الألعاب زي تقنية Ray Tracing واللي بتخلي عدد كبير من الألعاب تظهر بشكل ممتاز وقريب جدًا من الطبيعي وده بينطبق على الألعاب اللي بتدعم التقنية دي وكمان على عدد من الألعاب التانية اللي بيتحسن أداء رسومياتها بشكل ملحوظ.

المنصة كمان زي ما قلنا بتدعم جودة 8K ودي ممكن تكون ميزة مستقبلية أكتر منها ميزة حالية لأن الاعتماد على جودة 8K لسا ادامه كتير أوي على ما يبدأ يظهر بشكل كبير في أجهزة التليفزيون والألعاب، ده غير إنه رغم دعم المنصة للتقنية دي إلا أن التحويل ليها مش متاح دلوقتي وهيبقى متاح من خلال تحديث في المستقبل.

من التحديثات التانية للمنصة الجديدة اعتمادها على هاردات فئة SSD وده طبعًا تطور واضح عن الهاردات العادية لانها أسرع بحوالي ١٩ مرةـ وده مش بس الاختلافات الوحيدة بين المنصتين، فالمنصة الجديدة مش بس أفضل على المستويات اللي اتكلمنا عنها لا كمان أفضل على مستوى محركات الصوت باعتمادها على خاصية Tempest 3D وكمان المنصات القديمة مفيهاش مشغل أقراص 4K Blu Ray.

اما عن مواصفات المنصات القديمة فهي الاعتماد على المعالج المركزي AMD Jaguar ثماني النواة ومعالج رسوميات AMD Radeon بسعة ٤٫٢ teraflops أما الرامات فسعتها ٨ جيجابايت رام والهارد ديسك سعته ١ تيرابايت، وواضح طبعًا إن إمكانيات المنصة الجديدة أقوى بس لو القوة المطلقة هي اللي تفرق معاك بجد فممكن أصلًا تفكر في المنصة الأقوى على الإطلاق في العالم حاليًا Xbox X.

التصميم

مسألة التصميم مسألة نسبية وكتير من الناس مختلفة على تصميم المنصة الجديدة وخصوصًا اللي شايفين إنها تخلت عن فكرة تصميم منصات سوني من ساعة ما طلعت وكتير شايفين إن حجم المنصة كبير جدًا وهي الأكبر من بين منصات سوني على الإطلاق وكمان تصميمها بيخليها تتحط بشكل واحد بس ودي مميزات فقدتها المنصة لجديدة في مقابل المنصات السابقة.

الألعاب

في عدد من الألعاب اللي هتكون حصرية حاليًا ومستقبلًا لمنصات بلايستيشن ٥ بس القطاع الأكبر من الألعاب هيكون متاح عليها وعلى منصة بلايستيشن 4 بأنواعها، ولو كان عندك بلايستيشن ٤ أو ٤ برو فانت لسا عندك وقت طويل أوي على ما تلاقي ألعاب كبيرة بأسماء معروفة مش متوافقة على منصتك أما لو كنت بتفكر تشتري منصة ألعاب بلايستيشن 5 فالميزة الأبرز إنها هتكون متوافقة مع مجموعة ضخمة من ألعاب بلاي ستيشن 4 يعني مفيش مشكلة كبيرة في موضوع الألعاب ده.

السعر

سعر منصات بلايستيشن ٤ في السوق حاليً بيتراوح ما بين ٦٠٠٠ جنيه و٩٠٠٠ جنيه تقريبًا على حسب الإصدار والسعة وإن كان معاه ألعاب ولا لا، زي الجهاز ده مثلًا.

منصة ألعاب بلاي ستيشن ٤ سليم سعة ٥٠٠ جيجابايت مع لعبة سبايدر مان

دي منصة ألعاب بلاي ستيشن ٤ سليم سعة ٥٠٠ جيجابايت معاها دراع تحكم واحد وعليها لعبة Marvel’s Spiderman.

اتعرف على عروض أسعار منصات ألعاب PS4 على ياقوطة من هنا.

أما منصة ألعاب بلايستيشن ٥ فسعرها متغير على حسب المكان بس متوفرة على ياقوطة مثلًا بسعر ١٩ ألف جنيه تقريبًا.

منصة ألعاب بلايستيشن ٥

منصة ألعاب بلايستيشن نسخة الشرق الأوسط بدراع تحكم واحد.

اتعرف على عروض أسعار منصة ألعاب PS5 على ياقوطة من هنا.

وطبعًا واضح جدًا فارق لأسعار بين المنصتين.

الخلاصة

الخلاصة باختصار هي إنك لو كنت لسا ماشترتش منصة ألعاب خاصة بيك فالسبب الوحيد اللي يخليك تشتري PS4 هو إن ميزانيتك ماتكونش تسمح بشراء منصة PS5 دلوقتي وده مش هيكون خيار سيء برضه لأن منصات ألعاب PS4 لسا ادامها كتير أوي على ما تبقى غير صالحة مثلًا أو تفقد عدد كبير من الألعاب المتميزة، فلو مش قادر دلوقتي تشتري منصة ألعاب PS5 مش مشكلة وممكن تشتري منصة PS4.

أما لو ناوي ترقي من المنصة دي للمنصة دي فدي بقى الحاجة اللي محتاج تصبر عليها شوية وده لان فارق السعر الكبير مع فارق إمكانيات مش هتحس بيه دلوقتي ممكن يخليك تستنى شوية أحسن.

اتعرف على عروض أسعار كل حاجة تخص ألعاب الفيديو من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.