كتب: خالد عاصم

في سنة ١٨٨٦ قدر العالم الألماني كارل جاسنر إنه يطور البطاريات المعروفة النهارده باسم البطاريات الجافة بعد عشرين سنة بالظبط من ظهور البطاريات السائلة المكونة من الزنك والكربون عن طريق العالم جورج ليكلانشيه سنة ١٨٦٦ تحديدًا، ومن الوقت بقى ومع تطور البطاريات الجافة بقى عندنا واحد من أهم مصادر تزويد الطاقة اللي بنستخدمها في حاجات كتير حوالينا من غير ما نعرف التاريخ اللي وصلنا ليها واللي خلالنا نقدر نستغلها في كل حاجة حوالينا من أول الريموت كنترول لحد الموبايل.

في المقال ده هنتكلم عن البطاريات الجافة وهنتعرف على تاريخها وتكوينها وطريقة عملها وكمان هنتعرف مع بعض عن أبرز المنتجات اللي بتعتمد على البطاريات الجافة واللي طبعًا في منها كتير أوي هتلاقوه من خلال ياقوطة، وطبعًا لو عجبكم أي منتج من اللي بتعتمد على البطاريات الجافة واللي هنتكلم عن بعضها في المقال هتقدروا تطلبوها من خلالنا في ياقوطة وهتوصلكم لحد باب البيت أو مكان ما تحبوا بأسرع وقت ممكن.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

البطاريات الجافة

تاريخ البطاريات الجافة

سنة ١٨٠٠ ميلادية نشر العالم ألساندرو فولتا ورقة بحثية عرض فيها تفاصيل أول بطارية كهربائية عرفها التاريخ واللي كانت بتنتج الكهربا عن طريق تفاعل كيميائي بين محاليل معينة وبين الٌطاب الكهربائية المعدنية المعروفة باسم الإلكترودات، وكانت البطارية اللي اخترعها فولتا بتتكون من أقراص من الزنك أو الفضة أو النحاس وكلها معادن قابلة لتوصيل الكهرباء، وبيفصل بين الآقراص دي فوصل مبللة بحمض مخفف أو محلول ملحي وكانت الكهربا بتتنقل من خلال سلك بيربط بين القرصين، ومن التصميم ده انطلقت كل أنواع البطاريات بما فيها البطاريات الجافة اللي اتكلمنا عن وصول البشرية ليها في أول المقال.

قبل نجاح كارل جاسنر كان فيه محاولات سابقة لتطوير البطاريات الجافة وكان أبرزها سنة ١٨١٢ لما ظهرت بطارية جافة بفولت عالي جدًا بس بتقدر توصل الكهرباء لدقيقة واحدة بس وطبعًا ده مكانتش نهاية عملية ولكنها بكل تأكيد كانت محاولة مهمة جدًا قدرت في النهاية تخطو خطوة في طريق البطاريات الجافة اللي نعرفها النهارده.

أنواع البطاريات الجافة

بتنقسم البطاريات الجافة لنوعين أساسيين:

النوع الأول: البطاريات الرئيسية ودي بتتكون من مجموعة من البطاريات:

• بطارية زنك كربون.
• بطارية ألكالين.
• بطارية الليثيوم.
• بطارية الزئبق.
• بطارية أوكسيد الفضة.

النوع التاني: البطاريات الثانوية ودي بتتكون من مجموعة من البطاريات:

• بطارية النيكل كادميوم.
• بطارية الليثيوم أيون.
• بطارية النيكل المعدني الهجينة.

الفروق بين أنواع البطاريات الجافة

فيه فرق واحد بيفرق بين البطاريات الجافة الرئيسية والبطاريات الجافة الثانوية، وهو إن النوع الأول مش قابل للشحن يعني بتستخدم لمرة واحدة ولمدة محددة مهما كانت طويلة وبعد كده بتترمي، أما النوع التاني فقابل للشحن يعني ممكن استخدامها عدد مرات كبير من خلال شحنها كل ما بتفضى زي بطاريات الليثيوم أيون المستخدمة في الموبايلات واللي بنقدر نشحنها كل ما بتفضل لمئات المرات قبل ما قدرتها تضعف وكفاءتها تقل.

أنواع البطاريات الجافة على أساس الشكل والمقاس والاستخدام

البطاريات الجافة مش بس بتختلف على مستوى الأنواع الرئيسية اللي اتكلمنا عنها والأنواع الفرعية جوه كل نوع رئيسي واللي بتختلف على حسب المواد المستخدمة في صناعتها، دي كمان بتختلف على مستوى الشكل والحجم واللي منها بتفرق كمان على مستوى الاستخدام زي ما هنعرف.

البطاريات الاسطوانية هي النوع الأول ودي بتكون عبارة عن أسطوانة طولها أكبر من عرضها في مختلف المقاسات ودي اللي بنقدر نلاقيها في أي سوبر ماركت ولو فتحت ريموت التليفزيون أو الريسيفر أو أي ريموت تاني أو لعبة أطفال أو ساعة حائط هتلاقيها بمختلف مقاساتها، سواء المقاسات الصغيرة أو الكبيرة، وأشهر المقاسات دي واللي بنلاقيها في مختلف الأجهزة حوالينا، مقاسات AA وAAA وزي ما قلنا دول النوع الأكتر شيوع واستخدام وبيتكون من نوعين نوع من الليثيوم ونوع ألكالين، وبتتراوح قوة الفولت اللي بتقدمه من ١٫٥ فولت لحد ١٢ فولت في حالة بطاريات ألكالين اللي بتتكون من ٨ خلايا كهربائية.

النوع التاني من البطاريات هو البطاريات المستطيلة ودي مش منتشرة قوي بس لو دققت هتلاقيها برضة في بعض أجهزة الراديو وفي الكشافات اللي بتقبل الشحن زي كشافات البيوت اللي بتخزن كهرباء عشان تشتغل لما النور يقطع، والنوع ده بيقدم قوة كهربائية أعلى من النوع اللي قبله يعني بتبدأ من ٤٫٥ فولت وبتوصل لحد ٩ فولت وده لأنها بتتكون من خلايا متعددة منها اللي بيتكون من ٣ خلايا ومنها ٦ ومنها اللي بيوصل لحد ٩ خلايا كهربائية.

بطاريات الكاميرات هي النوع التالت ومن اسمها ممكن تتخيل إن هي دي اللي بتستخدم في كل الكاميرات اللي حوالينا زي الكاميرات الاحترافية، بس ده مش دقيق قوي لأن النوع ده من البطاريات بيكون من النوع الرئيسي غير القابل للشحن وعشان كده بتستخدم في عدد من الكاميرات الرقمية الأولية وكمان بتستخدم في بعض المنتجات التانية زي كشافات البطارية القوية وزي بعض الأجهزة الإلكترونية المحمولة وغيرها، ودي مقاسها الأساسي قريب من مقاس AA في النوع الأول بس بتختلف عنه في بعض أشكالها زي الشكل المزدوج اللي بيتكون من بطاريتين AA في جسم واحد.

بطاريات الساعات هي النوع الرابع وكمان بتتعرف في بعض الأسواق باسم بطاريات الأزرار أو بطاريات العملة المعدنية وده لأن شكلها بيشبه العملة المعدنية بحث إنها دائرية وسمكها أقل من قطرها، ودي كمان بطاريات منتشرة جدا يعني هتلاقيها في ساعتك الشخصية، هتلاقيها في الآلة الحاسبة، ولو عندك عربية فهتلاقيها في ريموت العربية وكمان هتلاقيها في ألعاب الأطفال وكمان في بعض الإكسسوارات المختلفة زي مؤشر الليزر مثلًا، وبتختلف وبتتنوع مقاسات البطاريات دي بشكل كبير جدًا.

النوع اللي بعد كده ويعتبر من أهم أنواع البطاريات هو البطاريات القابلة للشحن من نوع ليثيوم أيون ودي مش زي ما ممكن تتخيل إنها بس مبططة زي اللي بتستخدم في الموبايلات، لأن النوع ده من البطاريات بيتنوع بشكل كبير على مستوى الحجم والمقاس ودي من أهم مميزاتها من ناحية بس بتصعب علينا نعمل حصر لمقاساتها من ناحية تانية، يعني مثلا بطاريات الموبايلات ممكن تختلف بعشر مقاسات في عشر موبايلات مختلفة على حسب أبعاد الموبايل وعلى حسب عدد الخلايا اللي بتتكون منها، كمان بطاريات اللاب توب بتعتبر من نفس النوع وزي ما احنا عارفين إن شكلها وحجمها بيختلف من لاب توب للتاني، ده غير بطاريات الكاميرات الاحترافية اللي كمان بتختلف من حيث الشكل.

فوائد البطاريات الجافة بمختلف أنواعها

• خفيفة مهما كان حجمها أو مقاسها.
• متوفرة بأشكال وأحجام كتير جدًا.
• بتقدر تقدم طاقة عالية جدًا.
• سعتها كبيرة في بعض أنواعها.
• طاقتها الكهربائية مستمرة ومتواصلة بنفس القوة وما بتتأثرش إلا في حالة انتهاء سعتها لو هي من النوع غير القابل للشحن وأما لو كانت من النوع القابل للشحن فبتقدر تعيش لمدد طويلة جدًا.
• عمر البطاريات الجافة بشكل عام أطول من غيرها.
• أسعار البطاريات الجافة رخيصة وده من بين المميزات اللي خلتها منتشرة بشكل كبير وخلت أجهزة كتير تعتمد عليها.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.