كتب: علاء بسيوني

إكسسوارات العربيات هي عبارة عن كماليات ممكن تساعد بطريقة مباشرة أو غير مباشرة في حياتك اليومية في السواقة.

اتكلمنا مع إسلام أبوبكر من موقع hatla2ee.com عن إيه الإكسسوارات اللي ممكن الواحد يستخدمها في رحلته بالعربية وإيه هي الحاجات الضرورية اللي لازم تبقى عندك في عربيتك.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

مبدأياً كده، حاول على قد ما تقدر ما تعلقش سلسلة، فواحة عربية أو سبحة في المراية اللي في النص. هتفضل تخايلك وتشغلك عن الطريق وفي النهاية هتضطر تتجاهل إنك تبص على الطريق في اتجاههم.

هنعرض عليكم بعض الإكسسوارات والأفكار اللي ممكن تحصلوا عليها وتفيدكم في حياتكم القيادية.

1. منفاخ الكاوتش بالكومبريسور:

إحساسك هيبقى إيه لو مثلاً نازل من بيتك ورايح الشغل ولقيت الكاوتش نايم؟

في خلال عشر دقائق (وممكن أقل) ممكن تزود هواء الكاوتش بالمنفاخ الكومبريسور ده ومش هتحتاج بقى إنك تفك الكاوتش وتركب الإستبن والكلام ده.

يفضل إنه يكون من النوع اللي بيتوصل ببطارية العربية علشان كفاءته بتبقى أعلى وأسرع من اللي بيتوصلوا بولاعة العربية.

ممكن تلاقي المنفاخ الكومبريسور من هنا. يبدأ السعر من 419,90 جنيه مصري.

2. كوريك (رافع العربية):

ماتجبش النوع اليدوي، هات النوع اللي بيرفع العربية بالضغط.

بيسموه دائما “التمساح” وبيسهل عليك عملية تغيير الكاوتش لو اتقطع أو فرقع

ممكن تلاقي الكوريك من هنا. يبدأ السعر من 350 جنيه مصري.

3. شنطة إسعافات:

ضرورية جداً لأي ظرف ممكن يحصل وبتبقى مفيدة في الطواريء

ممكن تلاقي الشنطة من هنا. يبدأ السعر من 30 جنيه مصري.

4. ناقل إف إم:

وبيسموه ناقل مش (راديو) علشان بينقل البيانات السمعية من الفلاش ميموري للراديو (الكاسيت)

بيكون فيه مميزات منها إنك ممكن تشغل أغاني من على موبايلك عن طريق الAUX  أو فلاش ميموري لو انت ماعندكش الخاصية دي في كاسيت العربية و بيتركب في ولاعة العربية.

ممكن تلاقي ناقل إف إم من هنا. يبدأ السعر من 57 جنيه مصري.

5. وصلة الكهرباء:

مهمة جداً وبتنفع في أوقات الزنقة سواء كان ليك أو غيرك.

ممكن تكون مسافر فترة وسايب العربية مركونة مدة كبيرة والبطارية تنام منك، فتشوف مثلاً مصدر تنعش منه البطارية من جديد (وصلة من عربية تانية).

الكابل الأحمر ده لل (+) و الكابل الأسود ده لل(-)

ممكن تلاقي الكابل من هنا. يبدأ السعر من 70 جنيه مصري.

6. مفتاح 10&12:

أغلب الصواميل في العربية بتبقي مقاس 10 و 12، لازم يبقى معاك مفاتيح علشان تعرف تتعامل في الأزمات

ممكن تلاقي مفتاح 10 من هنا. يبدأ السعر من 28 جنيه مصري.

ممكن تلاقي مفتاح 12 من هنا. يبدأ السعر من 17 جنيه مصري.

7. شماسة:

الشمس ممكن تتلف تابلوه العربية عندك وتقشره لتعرضه للشمس لفترة طويلة.

و ممكن تلاقي الشماسة من هنا. يبدأ السعر من 56 جنيه مصري.

8. كراسي الأطفال:

خدوا بالكم وانتو سايقيين وخاصة لو معاكم أطفال، لازم كرسي الطفل يبقى موجود علشان الحماية مش أكتر.

مكانه بيبقى على الكنبة اللي في الخلف سواء خلف السواق أو الناحية التانية وتفادوا تماماً إنه يبقى في نص الكنبة علشان الفرامل المفاجئة.

ممكن تلاقيها من هنا. يبدأ السعر من 999 جنيه مصري.

9. كاميرا خلفية:

وانت بترجع بضهرك بالعربية وارد جداً تخبط في حجر، رصيف أو عربية تانية.

الكاميرا دي هتخليك شايف العربية من الخلف وتتفادى العوائق.

ممكن تلاقيها من هنا. يبدأ السعر من 650 جنيه مصري.

10. مشغل DVD:

طبيعي لو مسافر طريق طويل ومعاك أطفال يبقوا زهقانين، ممكن يتفرجوا على فيلم أو كارتون من خلال ال DVD Player

ممكن تلاقيه من هنا. يبدأ السعر من 2650 جنيه مصري.

11. معطر جو:

حاول تعلقها في أي حتة غير مراية العربية اللي في النص.

ممكن تلاقيها من هنا. يبدأ السعر من 429 جنيه مصري. (11 قطعة)

12. حامل الموبايل:

ضرورية جداً علشان تتبع الطريق عن طريق الGPS و بتشيل عنك مسئولية إنك تفضل ماسك الموبايل في إيدك وانت سايق

ممكن تلاقيه من هنا. يبدأ السعر من 40 جنيه مصري.

 نتمنى لكم قيادة آمنة ومسلية.

قد تنفذ المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com في فيسبوك.