إزاي تقدر تحدد إمكانيات موبايل قبل ما تشتريه من خلال مواصفاته – الجزء الثاني
كتب: خالد عاصم
النهارده هنكمل مقال إزاي تقدر تحدد إمكانيات موبايل من خلال مواصفاته وهنتكلم عن الكاميرات تحديدًا بعد ما كنا غطينا كل حاجة ليها علاقة بالموبايل في المقال اللي فات، وخلال المقال هنستعرض مجموعة من الموبايلات المختلفة اللي هنستعين بيها عشان نقدر نقرب المفاهيم اللي هنتكلم عنها خلال المقال، ولو عجبكم أي موبايل من الموبايلات اللي هنتكلم عنها هتقدروا تطلبوه من خلالنا في ياقوطة وهيوصلكم لحد باب البيت أو مكان ما تحبوا بأسرع وقت ممكن.
*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.
إزاي تقدر تحدد إمكانيات موبايل من مواصفاته
الكاميرات
على مدى تطور الموبايلات كانت الكاميرات من أبرز ملامح التطور ده، وبعد ما كانت مجرد وسيلة مساعدة في الموبايلات بقت واحدة من أهم العناصر اللي ممكن تأثر على قرارك في اختيار موبايل عن موبايل تاني، فبعد ما كانت الموبايلات بتيجي بكاميرا واحدة بس خلفية ضعيفة، بقت تيجي بكاميرا خلفية وأمامية، وبعد كده الكاميرا الخلفية بقت مزدوجة وثلاثية ورباعية وكمان خماسية زي موبايلات كتير تم الإعلان عنها في الفترة اللي فاتت، وحتى الكاميرا الأمامية بقت هي كمان مزدوجة في موبايلات حديثة ورائدة زي Samsung Galaxy S10 Plus.
اتعرف على عروض أسعار موبايل Samsung Galaxy S10 Plus من هنا.
غير إن الكاميرات اتطورت على مستوى عددها، فهي اتطورت كمان على مستوى إمكانياتها وإمكانيات التقنيات والعناصر اللي بتدعمها، فقوة العدسات دلوقتي وصلت لحد ١٠٨ ميجا بيكسل وبقت التقنيات اللي بتعتمد عليها متطورة جدًا زي تقنيات التركيز التلقائي المختلفة وتقنيات تثبيت الصورة وكمان إمكانيات وخصائص كل عدسة.
من خلال السطور الجاية هنستعرض أهم سمات الكاميرات الخاصة بالموبايلات وهنتعرف على معاني المسميات الأساسية للكاميرات، ومن غير ما نخوض كتير في تقنيات معقدة هنحاول نوصل المعلومة بشكل سلس وسهل ومبسط على أي قارئ.
مواصفات كاميرات الموبايل
لما بنيجي نقرا مواصفات أي عدسة كاميرا بنقراها بالشكل التالي: عدسة عريضة بقوة ٤٨ ميجا بيكسل بفتحة عدسة f/1.8 مدعومة بتقنية التركيز التلقائي PDAF وبتقنية التركيز التلقائي بأشعة الليزر وبمثبت الصورة البصري.
ده كان مثال على واحدة من عدسات الكاميرات اللي على الأغلب عدسة خلفية لواحد من الموبايلات اللي بتتمتع بكاميرا بعدسة قوتها ٤٨ ميجا بيكسل، وفيه موبايلات كتير بتمتع بالعدسة دلوقتي زي Redmi Note 7 على سبيل المثال مع اختلاف إنها مش مدعومة بكل الإمكانيات دي.
اتعرف على عروض أسعار موبايل Redmi Note 7من هنا.
المهم إيه اللي نقدر نفهمه من الجملة دي ومن اختلافاتها، فالعدسة ممكن تكون عريضة وممكن تكون بالغة العرض أو مقربة أو غيرها، والقوة كمان بتختلف وزيها فتحة العدسة والتقنيات المساعدة، بس إيه معنى كل حاجة من دول.
نوع العدسة
بتختلف العدسات في الموبايلات على حسب وظيفتها، وبتتنوع العدسات بين العدسة العريضة والبالغة العرض والمقربة والخاصة باستعشار عمق الصورة والخاصة بتصوير صور الماكرو، دي الأنواع الأساسية، العدسة العريضة بتكون ليها زاوية رؤية معينة يعني الإطار أو الكادر بتاعها بيكون ليه أبعاد معينة بتزيد عليها العدسة بالغة العرض اللي بيكون الكادر بتاعها أوسع على عس العدسة المقربة اللي الكادر بتاعها بيكون أصغر لأنها بتقرب الصورة بقوة بتختلف على حسب طبيعة العدسة فمنها اللي بتقرب لضعفين أو تلاتة أو حتى خمسة، أما العدسات الخاصة بتصوير صور الماكرو فدي مخصصة لتصوير العناصر القريبة جدًا واللي بتكون على بعد قريب أوي من العدسة وعلى الرغم من إنها فعالة إلا أنها لسه مش متطورة بالقدر اللي يخليها تنافس العدسات المخصصة للاستخدام ده في الكاميرات الاحترافية، أما العدسة الخاصة باستشعار عمق الصورة فدي بتكون مسؤولة عن تأثير العزل المعروف باسم بوكيه أو بورتريه واللي بيتم فيه فصل مقدمة الصورة عن الخلفية.
في كمان أنواع من العدسات التانية زي العدسة أحادية اللون ودي بيكون هدفها إنها تحسن من جودة الصورة اللي بتلقطها العدسة الرئيسية، وفيه كمان عدسات البريسكوب وده نوع متطور من عدسات التقريب اللي بتعتمد على ميكانيزم مختلف شوية ومتطور أكتر من العدسات المقربة العادية، ودي موجودة في موبايلات زي Huawei P30 Pro.
اتعرف على عروض أسعار موبايل Huawei P30 Pro من هنا.
القوة/الدقة
قوة أو دقة العدسة واللي بيشار ليها برقم وحدة قياسه الميجا بيكسل زي ٤٨ ميجا بيكسل أو ١٢ ميجا بيكسل أو غيرها، فدي بتشير بشكل رئيسي لعدد البيكسلات اللي موجودة في الصورة وبتترجم بشكل رئيسي لدقة معينة مكونة من عدد بيكسلات للعرض × عدد بيكسلات للطول، وعلاقة الدقة أو القوة طردية مع حجم الصورة والمساحة اللي بتستغلها من المساحة الداخلية، والمفترض إنها بتكون طردية كمان مع جودة الصورة بس ده مش شرط لأن فيه عناصر تانية بتأثر على جودة الصورة، يعني مش غريب إنك تلاقي عدسة قوتها ١٦ ميجا بيكسل قادرة تلقط صور أفضل من عدسة قوتها ٤٨ ميجا بيكسل، ومن بين الموبايلات المتوفرة في السوق واللي وصلت لدقة كبيرة في عدستها الرئيسية موبايل Redmi Note 8 Pro اللي بيعتمد على عدسة رئيسية بقوة ٦٤ ميجا بيكسل بتعتمد على تقنية بتجمع كل أربع بيكسلات في بيكسل واحد يعني بتكون قوة الصورة الفعلية ١٦ ميجا بيكسل.
اتعرف على عروض أسعار موبايل Redmi Note 8 Pro من هنا.
من بين العناصر المؤثرة بشكل رئيسي على جودة الصورة هو حجم البيكسل الواحد واللي بيتقاس بالميكرومتر، وكل ما كان حجم البيكسل أكبر كل ما كانت جودة الصورة أفضل والعكس بالعكس، بس برضه مش ده العنصر الوحيد اللي بيأثر على جودة الصورة.
فتحة العدسة
من العناصر المؤثرة بشكل رئيسي على جودة الصورة وخصوصًا عند التصوير في الإضاءة المنخفضة، ودي اللي بيرمز ليها بحرف f بعده رقم سواء بالطريقة دي f/1.8 أو بالطريقة دي F1.8، وفتحة العدسة غير حجم المستشعر اللي كل ما كان كبير كل ما كانت جودة الصورة أحسن، بس ده عنصر مش متداول كتير في الموبايلات زي الكاميرا الاحترافية، اما فتحة العدسة فهو قطر الفتحة اللي بتسمح بمرور الضوء، وكل ما كان الرقم اللي بعد حرف f صغير كل ما كانت فتحة العدسة أكبر، بمعنى إن فتحة عدسة f/1.6 أكبر من فتحة عدسة f/1.8 اللي أكبر من f/2.0 وهكذا، ومعنى إن فتحة العدسة كبيرة إن نسبة الضوء اللي بتدخل لمستشعر الكاميرا أكتر وده بيخلي الكاميرا قادرة تلقط صور أفضل حتى في الإضاءة المحيطة المنخفضة، وأبرز التقنيات في القطاع ده و العدسة متغيرة الفتحة اللي بتقدمها سامسونج في موبايلات كتير رائدة في عدستها الرئيسية زي Samsung Galaxy Note10 Plus مثلًا.
اتعرف على عروض أسعار موبايل Samsung Galaxy Note10 Plus من هنا.
التقنيات المساعدة
أبرز التقنيات المساعدة لكاميرات الموبايل هي تقنية التركيز التلقائي PDAF أو dual pixel PDAF ودي تقنية بتتميز بسرعتها ودقتها في التركيز التلقائي اللي بيخلي الكاميرا تركز بشكل أوتوماتيكي على عنصر معين وده ليه استخدامات في الفيديو وفي الصور الثابتة، أما التركيز التلقائي بأشعة لليزر فده بيعتمد على مستشعر بيقوم بإرسال أشعة الليزر على العنصر اللي عايز العدسة تركز عليه ومن خلال الأشعة دي بيتم تحديد مكان العنصر والتركيز عليه بدقة أكبر.
تقنية HDR أو High Dynamic Range متوفرة دلوقتي قي كل الموبايلات تقريبًا سواء في الكاميرات الخلفية أو الأمامية، والتقنية دي بتقوم بالتقاط كذا لقطة لنفس الصورة في نفس الوقت وبإعدادات مختلفة وبعد كده بتقوم بتجميع الصور دي كلها في صورة واحدة عشان تنتج صورة نهائية بجودة أفضل.
مثبت الصورة البصري هو المستشعر المسؤول عن تثبيت الصورة بشكل كبير في حالة تصوير الصور الفوتوغرافية وكمان في حالة تصوير الفيديو، وفيه كمان مثبت الصورة الإلكتروني المستخدم في موبايلات كتير لتثبيت الفيديو وده مش بيعتمد على مستشعر على قد ما بيعتمد على برمجيات مساعدة بتساهم في عملية تثبيت الفيديو عند الحركة.
الإعدادات اليدوية
موبايلات كتير دلوقتي فيها إمكانية التصوير بإعدادات يدوية زي موبايل Xiaomi Mi 9T مثلًا.
اتعرف على عروض أسعار موبايل Xiaomi Mi 9T من هنا.
الوضع اليدوي أو الاحترافي على حسب تسميته، بيخليك تقدر تتحكم في مختلف إعدادات الكاميرا زي فتحة العدسة والتركيز وتوازن اللون الأبيض وكمان سرعة الشاتر أو السرعة اللي بيستغرقها التقاط الصورة، والوضع ده شبيه جدًا بالكاميرا الاحترافية مع اختلاف إمكانياته طبعًا، بس بيحتاج معرفة مسبقة بخصائص ووظائف الحاجات دي كلها، وممكن لو موبايلك فيه الوضع ده تقدر تجرب عشان تفهم كل حاجة بتعمل إيه.
دي كانت العناصر الأساسية المكونة لكاميرات الموبايلات واللي حاولنا إننا نشرحها بأبسط وأسهل وسيلة ممكنة.
اتعرف على عروض أسعار مختلف الموبايلات المتوفرة على ياقوطة من هنا.
*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.
عن كاتب المقال
خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.