كتبت: فاطمة نامق

كل بيت فيه بعض الأجهزة المهمة اللي ممكن نكون بنستخدمها كل يوم، لكن فيه ناس بتخاف منها وبتدّعي إنها مضرة. هل ده حقيقي؟ ولو حقيقي، إيه الدليل؟

النهارده ياقوطة اختارت كذا جهاز نتكلم عنه عليه أقاويل كتير متضاربة. هنشوف فين الصح عشان تكونوا متطمنين وhنتم بتستخدموا الأجهزة دي. في المقال الجاي هنوضحلكم إمتى الأجهزة دي بتكون مضرة وازاي نقدر نستفيد منها بشكل صحيح ومش ضار، وكل ده بيكون حسب طريقة الاستخدام.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

التكييف

مجلة إيطالية اسمها فوكاس قالتلنا رأي العلم في الموضوع ده؛ قالت إن التكييف يعتبر بمثابة منقذ لحياة المسنين، حيث إن في ظل درجة الحرارة المرتفعة وجدوا نسبة شفاء لبعض المسنين من الأمراض القلبية والتنفسية بنسبة ١٧٪ أكتر من بلاد تانية.

لكن من ناحية تانية أستاذ الصدر الدكتور عبد الحميد عوض نصحنا إننا لازم ننضف أو نغير فلترات الهوا بتاعة التكييف لإن استنشاق الهوا المحمل بالميكروبات والبكتيريا بيسبب أمراض صدرية كتيرة وإن ضروري تجديد الهواء بالمكان المقفول اللي فيه التكييف كل ساعتين.

نفس الطبيب حذر كمان من التكييف الصحراوي وقال إنه أخطر من التكييف العادي لإنه بيعتمد على خروج رذاذ الماء عشان يبرد الجو وإن الرذاذ ده بيجمع البكتيريا بشكل كبير بعدين الفرد بيستنشقها.

التكييف مش بيسحب كهربا كتير طالما درجة الحرارة مش أقل من ٢٤، ولضمان استمرار كفاءة عمل التكييف لازم نعمل صيانة دورية وكمان نحط الجزء الخارجي ليه في مكان ضل وكمان نتأكد إن ستاير الأوضة مقفولة لإن أشعة الشمس بتخليه يعمل جهد أكبر أثناء التشغيل.

وهنساعدك بمقال حلو قوي عن إزاي تختار التكييف المناسب من هنا.

وكمان هنسهل عليك إنك تعرف أسعار التكييفات المناسبة من هنا.

الدفاية

لازم نعرف إحنا حاطين الدفاية في فيشة عاملة إزاي وبنحمل عليها قد إيه؟ ماينفعش نسيب الدفاية طول النهار شغالة على مشترك فيه تليفزيون وريسيفر ونستغرب لو المشترك ضرب أو عمل قفلة وممكن يحصل كارثة.

الناس بتشتكي من إن الدفاية بتسبب العيا. المشكلة برضه في الاستخدام. حاول لما تحط الدفاية في أوضة تعملها على درجة حرارة تكسر البرد مش تطبخ اللي فيها. لما تبقى الحرارة دافية بس مش هتتعب لو خرجت من الأوضة لأي سبب.

لو نمت في الدفاية البيت هيسيح؟ لأ. لو أنا ظابط درجة الحرارة على حاجة معقولة عادي، بس يكون فيها ثرموستات، ولازم برضه مانحطش حاجة على الدفاية عشان تنشف أو نحط الدفاية على حاجة قماش أو حاجة بتحفظ بالحرارة عشان ممكن تحرقها.

الدفاية لازم تكون في مكان منخفض في الأوضة زي الأرض مثلًا عشان تعمل تأثير أكتر عكس التكييف.

جريدة اليوم السابع نشرت مقال عن الدفايات وقالت فيه إن فريق من الأطباء نصح بضرورة وضع أطباق مليانة مياه في حتت مختلفة في البيت والدفاية شغالة وشرب السوايل الدافية للحفاظ على الممرات الأنفية والشعب الهوائية والزور رطبين.

والجريدة كمان قالتلنا إن الدكتور محمد لطفي الساعي أستاذ الامراض الجلدية بالمركز القومي للبحوث قال إن عدم وجود الرطوبة في الجو مضر للبشرة؛ بيسبب جفاف الجلد، عشان كده المفروض نستخدم الكريمات المرطبة للحفاظ على البشرة.

أشهر نوعين دفايات في السوق (والناس بتحتار بينهم جدًا): الدفاية الكهربائية ودفاية الزيت. ودايمًا فيه حيرة بين مين فيهم مضر ومين فيهم التدفئة بتاعته أفضل، عشان كده هنقول نبذة بسيطة:

الدفاية الكهربائية بتدفي المكان أسرع لكن بتسحب كهربا كتير جدًا، وكمان خطر لإن الهيكل بتاعها بيسخن جدًا وغلط أي حد يلمسه.

دفاية الزيت بتاخد وقت كبير لحد ما تسخن، لكنها أمان والهيكل الخارجي بتاعها لو حد لمسه مش هتلسعه، عكس الكهربائية، ومن مميزاتها إنها مش بتحرق الأكسجين الموجود في الإوض.

شوف من هنا مقالة بتتكلم بشكل مفصل عن مميزات وعيوب كل أنواع الدفايات. وممكن تشوف كل أنواع الدفايات من هنا.

الميكروويف

الميكروويف بيفقد الأكل القيمة الغذائية بتاعته، بس ده مش حقيقي. مدير مركز الوقاية في جامعة ييل بيقول إن الموجة بتاعة الميكروويف مالهاش تأثير على القيمة الغذائية، ده إحنا بنستخدم مياه أقل واحنا بنعمل حاجة في الميكروويف وده بيخلي القيمة الغذائية زي ما هي وممكن أكتر من غليه في مياه عادية.

ممكن نطبخ أو نسوي أكل في الميكروويف؟ يستحسن نسخن الأكل بس مش نطبخه؛ الحرارة بتاعة الميكروويف مابتوصلش لكل حتة في الأكل، فممكن تسوية أكل فيه تكون خطر.

وأهم حاجة: الميكروويف بيطلع إشعاعات ممكن تموت أو تجيب عقم؟ الموجات اللي بتطلع بره الميكرويف وهو شغال نسبتها آمنة للإنسان، وده من مركز أبحاث السرطان في أمريكا، لكن بشرط التأكد إن باب الميكروويف مقفول كويس إننا نسيب مسافة ٦٠ سم بينا وبين الجهاز.

لو عندنا إسفنجة ننضف بيها ومحتاجين نعقمها، نشربها مياه ونحطها ٦٠ ثانية في الميكروويف؛ ده هيقتل نسبة كبيرة قوي من الجراثيم، عشان كده هو حلو في التعقيم.

تنضيف الميكروويف مهم جدًا لصحتنا. فيه ناس بتستصعب تنضيف الميكروويف من جوخ بسبب الأكل اللي بيطلع بخار وبيعمل فوضى جوه، لكن الحل هو إنكم تجيبوا طبق وتحطوا فيه شوية خل وتشغلوا الميكروويف خمس دقائق، وبعدين لما تخرجوا الطبق ممكن بفوطة مطبخ أو الإسفنجة تمسحوا الميكروويف.

ياقوطة سهلتها وهتقولنا أسعار الميكروويف عشان تشتري براحتك.

وتقدروا تعرفوا إزاي تختاروا الميكروويف المناسب من هنا.

غلاية المياه

صحيفة الجارديان البريطانية سنة ٢٠٠٣ نشرت بحث عملته الحكومة الإنجليزية عن إذا كانت المياه المغلية في الغلاية الكهربائية صحية ولا لأ، فلاقوا إن الضرر الأساسي هو مادة النيكل لما المياه بتتغلي جوه الغلاية، فده بيخلي مادة النيكل تدوب في المياه، وهي مادة مع الوقت الطويل بتوصل لتسمم الجسم. لأ، ومش بس كده! دول كمان اكتشفوا إن غلي مياه معدنية جوه الغلاية الكهربائية هيخلي الخطر مضاعف.

الغلاية خطر على المياه؟ ده حسب نوع الغلاية. بلاش نستخدم اللي مصنوعة من الألومنيوم أو البلاستيك القابل للتحلل.

نستخدم الغلاية المصنوعة من الاستانلس أو الألومنيوم المطلي بطبقة من التيفال الخفيف أو المصنوعة من البلاستك النضيف أو من القزاز الحراري زي ما قالت دكتورة علا محمد أخصائية التغذية العلاجية.

وكمان دكتور هاني الناظر رئيس مركز البحوث سابقًا نصحنا إننا مانستخدمش المياه المغلية أكتر من مرة من غير ما نزودها بمياه عادية؛ عشان بتكون فقدت كل المعادن المهمة واترسب فيها نسبة أملاح كبيرة.

شوف أفضل أسعار غلايات المياه الموجودة في السوق هنا.

ومجلة ياقوطة هتعرفكم على أشهر غلايات المياه الكهربائية في ٢٠١٧ من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.