كتبت: هايدي سليمان ويارا الحميلي

كتير من المصريين مش بيتقبلوا فكرة التسوق عن طريق الإنترنت، عشان عادةً بيبصوا على الشراء أونلاين على إنه شيء مش اَمن. وده دلوقتي ما بقاش مظبوط، ما بقاش فيه داعي للقلق من فكرة التسوق عبر الإنترنت.

سواء كنت بتتسوق باستمرار عن طريق الإنترنت، أو كنت لسه جديد في الموضوع ده، ياقوطة بتقدملك المعلومات الأساسية المهمة اللي هتعرفك إزاي تشتري عن طريق الإنترنت بطريقة آمنة جدًا وما تخليكش تكون عُرضة للسرقة أو التزوير الإلكتروني.

دي بعض النصائح للتسوق عبر الإنترنت بدون قلق:

١- استخدم المواقع الإلكترونية الموثوق منها فقط

لما بتشتري من موقع معروف بتبقى أقل عرضة للاحتيال والنصب. اتأكد من إنك بتستخدم مواقع موثوق بها فقط زي: amazon.com, souq.com, jumia.com للتسوق عبر الإنترنت. اتأكد برضه إنك دًخلت عنوان الموقع بال domain الصحيح. بعض المواقع بتكون copycats، بحيث إنها بتخلق domains قريبة جدَا من موقع تاجر التجزئة الأصلي. ممكن يكون الاختلاف في حرف واحد أو يكون نفس الاسم بالظبط ولكن بدل من .net .com مثلًا. دي الحيل اللي ممكن مواقع معينة تستخدمها عشان تنصب على المستخدمين، لازم تخلي بالك كويس عشان متقعش فيها. ولو مثلَا كنت بتستخدم لأول مرة موقع ممكن تتأكد إنه مش مضروب عن طريق إنك تراجع بيانات الاعتماد بتاعته.

٢- دور على «https://» أو «secure»

راجع الurl اللي في الaddress bar و دور على https:// قبل ما تدخل أي بيانات تخص الدفع. الs اللي في الأخر هي اللي بتبينلك الموقع آمن و لا لا. لو الurl فيه بس http، ماتدخلش أي بيانات عليه. وبالإضافة لده، لازم تتأكد إن الموقع اللي بتستخدمه بيحتوي على طبقة المقابس الآمنة Secure Sockets Layer. عشان تتأكد من ده، دور على رمز القفل الصغير اللي على الجنب اليمين من شريط عناوين المتصفح. وكمان هتلاقي كلمة “secure” جنب رمز القفل. لو لقيتهم فده معناه إن الموقع اّمن وتقدر تشتري منه.

٣- ما تشتريش حاجة وانت على شبكة واي فاي عامةً

تجنب إنك تدّخل أي بيانات دفع لما تكون متصل بشبكة واي فاي مش معروفة عامةً أو لما تكون بتستخدم حاسب اَلي عام، عشان عادّة مش بيكونوا اّمنين. ما تعملش أي عملية شراء لما تكون متصل بشبكة الواي فاي بتاعة المكتبة، المطار، أو أي كافيه. ولو مضطر تعمل عملية شراء أونلاين وانت بره، ومش متاح إنك تدخل على شبكة واي فاي موثوقة، استخدم شبكة المحمول بتاعك.

٤- استخدم البطاقات المدينة بدل من الدائنة

من المعروف إن بطاقات الائتمان المدينة آمنة أكتر من بطاقات الائتمان الدائنة لما تستخدم في الشرا عبر الإنترنت. معظم بطاقات الائتمان المدينة بتسمح بحماية الشراء لو تم تحصيل رسوم من بطاقتك من غير معرفتك أو لو اتسرقت البطاقة. وهي أكتر مرونة في حالة إنك حبيت ترد المبالغ المدفوعة، لو مثلًا حبيت تلغي المعاملة وترد الفلوس. راجع دايمَا مع البنك إيه أكتر الطرق أمانَا للشرا عبر الإنترنت.

في خيار تاني لما تشتري أونلاين ممكن تفكر فيه، وهو إنك تستخدم بطاقة الائتمان ذات الاستخدام الواحد، اللي عن طريقه بتتأكد إن مفيش أي موقع بيحتفظ ببيانات ومعلوماتك الخاصة. وبغض النظر ماتسمحش لأي موقع إنه يحتفظ ببيانات بطاقة الائتمان الخاصة بيك، عادةً الموقع بيخيّرك إذا كنت عايز تحتفظ بالبيانات أو لا، ويستحسن إنك ماتحتفظش بيها عشان مايتمّش استخدام بطاقتك من غير تفويض منك.

٥- استخدم كلمات سر مميزة

كلمة السر المميزة والفريدة بيكون صعب تخمينها. حاول تتجنب كلمات المرور السهلة زي ١٢٣٤٥. وحاول برضه تتجنب كلمات المرور اللي فيها اسمك أو تاريخ ميلادك.  وبرضه ماتقولش كلمة السر بتاعتك لحد وماتستخدمش كلمة المرور لأكتر من حساب واحد على الإنترنت.

٦- راجع كشوف حساباتك البنكية

راجع كشوفك المصرفية بشكل متكرر واتأكد إن مفيش أي خصم حصل عن طريق معاملة مش معروفة بالنسبة ليك.  لو ده حصل كلم البنك فورَا. وعامَة ماتستناش الكشف يجيلك عن طريق البريد، وحاول تتابع كشوفات الحساب بتاعتك عن طريق الإنترنت.

٧- احمي الحاسب الآلي الخاص بيك

أي جهاز بيدخل الإنترنت لازم يكون في إجراءات بتحميه من أي فيروسات. ممكن بسهولة تحمي الكمبيوتر بتاعك من إنه ييجي له فيروس عن طريق الخطوات السهلة القليلة دي:

• تثبيت برنامج لمكافحة الفيروسات وتحديثه.
• تمكين الـ firewall.
• تثبيت برامج مكافحة التجسس.

٨- استخدم موبايلك بذكاء

وفقَّا للاتحاد الوطني للتجزئة، 5.7% من البالغين بيستخدموا الأجهزة المحمولة لمقارنة المنتجات قبل الشرا.  ماتقلقش إنك تتسوق عن طريق الموبايل، لكن ركز في التطبيقات اللي بتستخدمها. استخدم التطبيقات المشروعة بتاعة المواقع المعروفة زي سوق، وجوميا وغيرها. عشان تعرف التطبيقات اللي بتستخدمها أصلية ولا لأ، اقرا التقييمات أو دوّر في التطبيق عشان تشوف لو كان فيه سابقة احتيال.

٩- ما تصدقش أي حاجة

لو عرض شكله مغري زيادة عن اللزوم، ممكن يكون اشتغالة. لو لقيت رسالة فجأة بتقولك ” مبروك، كسبت أي فون”، ده مش معناه إنك محظوظ، ممكن يكون معناه إنك بيتنصب عليك. فانت لازم تركز في أي عرض شكله كويس بزيادة تشوفه على شبكات التواصل الاجتماعي أو الإيميل أو مواقع الإنترنت.

نصائح عامة إضافية

• لازم تخرج من حساب التسوق عبر الإنترنت الخاص بك بعد ما تخلص عملية الشراء.
• ماتبعتش أبدّا أي بيانات خاصة بالبطاقة المدينة بتاعتك عن طريق الإيميل وماتنشرش برضه المعلومات دي على أي مواقع تواصل اجتماعي.
• استخدم متصفح إنترنت منفصل للتسوق عبر الإنترنت.
• استخدم بريد إلكتروني منفصل للتسوق عبر الإنترنت.
• وانت بتشتري عن طريق المحمول أو التابلت، اتأكد إن الجهاز نفسه له كلمة مرور. ولو كنت بتشتري من تطبيق، راجع بيانات اعتماده قبل ما تدخّل فيه بيانات الدفع.