كتب: محمد عبد الرحمن

ارتفاع وتغير أسعار الموبايلات كل يوم خلّى ناس كتيرة تحس إن الحصول على موبايل بإمكانيات وسعر كويسين شيء صعب جدًا. وبقى طبيعي إن كتير مننا يسمع جملة «عاوز موبايل حلو هتدفع سعر غالي».

ولإننا في ياقوطة ما يرضيناش تعب وحيرة المشتري، جمعنالكم في المقال ده أهم موبايلات بتبدأ من سعر ٤٠٠٠ جنيه لغاية ٥٠٠٠ جنيه وفيها مميزات كتيرة توازي أسعارهم، بالإضافة لأهم مميزات وعيوب وتجارب مستخدمي الموبايلات دي، ولو عجبك موديل منهم تقدر تعرف أحسن الأسعار ليه من خلالنا، وممكن كمان تطلبه ويكون عندك في أسرع وقت.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

*ممكن تشوف مواصفات الموبايلات بالتفصيل على mobihub من هنا.

موقع mobihub هو موقع مصري بيعرض عليك تشكيلة كبيرة من الموبايلات لأكبر وأشهر الشركات في مصر والعالم وتقدر تعرف من خلاله مختلف أنواع الموبايلات وإمكانياتها ومميزاتها وعيوبها وكمان أسعارها وتقدر تقارن بين أسعار الموبايلات من عليه.

١- موبايل Huawei Y7 Prime

المميزات

• شاشة الموبايل بحجم ٥٫٥ بوصة بدقة وضوح ١٢٨٠×٧٢٠ بكسل، وكثافة بكسلات ٢٦٧ بكسل، وكمان بتدعم اللمس المتعدد.
• بروسيسور الموبايل ثماني النواة Qualcomm Snapdragon 435 ورام بسعة ٣ جيجابايت، ومعالج رسومي Adreno 505.
• ميموري الموبايل الداخلية ٣٢ جيجابايت، وممكن تضيف ليه ميموري خارجي بسعة لغاية ٢٥٦ جيجابايت.
• الموبايل بيدعم تشغيل شريحتين وكمان بيدعم تقنية الاتصال للجيل الرابع، وبيشغل راديو FM، وفيه ميكرفون إضافي مانع للضجيج، وكمان بيدعم الـ OTG، ومستشعر بصمة الإصبع.
• كاميرا الموبايل الخلفية بدقة ١٢ ميجابكسل بفتحة عدسة ٢، وتقنية الـ autofocus وفلاش LED.
• سيلفي الموبايل بدقة ٨ ميجابكسل بفتحة عدسة f2.0.
• الموبايل بييجي بأحدث نسخة تشغيل أندرويد نوجا.
• سعة بطارية ضخمة وبتوصل لـ ٤٠٠٠ مللي أمبير.

العيوب

• ما تقدرش تشغل على الموبايل شريحتين اتصال وميموري خارجي في نفس الوقت ولازم تستغنى عن شريحة منهم.
• سيلفي الموبايل من غير فلاش.
• الموبايل مش بيدعم تقنية الجيروسكوب.
• شاشة الموبايل مش مزودة بطبقة حماية إضافية ضد الكسر.

تجربة المستخدم

• حجم شاشة الموبايل مناسب لهواة مشاهدة وعرض أفلام الفيديو عليه، وزوايا الرؤية والوضوح مش الأفضل خصوصًا في ظروف الإضاءة الخارجية.
• حجم الموبايل وأبعاده مناسبين للاستعمال بإيد واحدة مدة طويلة، وتقدر بإيد واحدة تتحكم في الموبايل وتوصل لكل أجزاء الشاشة بسهولة.
• زرار الباور مصمم بشكل مستقل عن زراير التحكم في الصوت لسهولة التحكم والتفرقة بينهم.
• أداء الموبايل مرضي في فتح أكتر من برنامج والتنقل بينهم في نفس الوقت، والموبايل اختيار مناسب لهواة وعشاق الألعاب الخفيفة والمتوسطة ورغم إنه بيشغل الألعاب اللي بجرافيك كبير لكن مش بشكل مميز.
• صوت سماعات الموبايل نقي، ومن الصعب إنك تسمعه لو كنت في مكان مزدحم لإنه مش عالي كفاية.
• للأسف الموبايل مش بييجي معاه «كوفر» أو غطاء خلفي لحمايته من الصدمات والوقعات مع إن ده المعتاد من هواوي، وكمان هتضطر تشتري للموبايل طبقة حماية إضافية من الزجاج لحمايتها من الكسر أو الشرخ.
• زجاج شاشة الموبايل مش معالَج ضد البصمات واللي بتظهر عليه بسهولة وبتقلل من جمال أي صورة أو فيلم بتعرضه على الشاشة.
• كاميرا الموبايل بتيجي بدقة ١٢ ميجابكسل ومزودة بتقنية ضبط تلقائي للصور، وصور الموبايل مميزة وتعتبر من أفضل الكاميرات في الفئة السعرية دي، صور مميزة حتى في الإضاءة القوية وداخل الأماكن المغلقة زي البيت والمكتب، بتقل كفاءة الصور دي بالليل لكن ده مش هيمنع من استمتاعك بيها.
• سيلفي الموبايل قوي، واضح، وصوره حلوة بفضل فتحة العدسة بتاعته، لكن صوره في الإضاءة الضعيفة مش مميزة قوي بسبب غياب الفلاش.
• في الكاميرا أكتر من وضع زي التعرف على الوجوه، الـ HDR والبانوراما.
• بطارية الموبايل بتكفي معاك لغاية يومين من الشغل من غير ما تحتاج تعيد شحنها وممكن من خلالها تشحن موبايلات تانية، لكن للأسف البطارية مش بتدعم الشحن السريع ودي نقطة ضعف قوية للموبايل.

شوف موبايل Huawei Y7 Prime  من هنا.

٢- موبايل Huawei Gr 5 2017

المميزات

• شاشة بحجم مميز ودقة وضوح IPS وكثافة بكسلات ١٩٢٠×١٠٨٠.
• بطارية بسعة مميزة ٣٣٤٠ مللي أمبير.
• قارئ بصمة مميز وسريع.
• معالج ثماني النواة من نوع HiSilicon Kirin 655، مع رام ٣ جيجا وذاكرة داخلية بحجم ٣٢ جيجابايت.
• وجود ٢ كاميرا خلفية واحدة بقوة ١٢ ميجابكسل والتانية بقوة ٢ ميجابكسل.
• كاميرا سيلفي بقوة ٨ ميجابكسل.
• الموبايل فيه تقنية عزل الضوضاء.
• الموبايل بيدعم وبيشغل نضارات الواقع الافتراضي.

العيوب

• رغم تميز أداء البطارية لكن للأسف مش بتدعم تقنية الشحن السريع.
• الموبايل مع إنه سعره غالي لكن مفيهوش تقنية NFC.
• ما تقدرش تستعمل شريحتين اتصال وكارت ميموري ولازم تستغنى عن واحد فيهم.
• فلاش الكاميرتين الخلفيتين مش مزدوج.
• للأسف الموبايل مش بيدعم تقنية OTG.

تجربة المستخدم

• سطوع الشاشة مميز حتى في الإضاءة القوية.
• تصميم الموبايل جديد ومختلف وله ملمس مميز هتحس بيه وانت ماسك الموبايل، وده بفضل المنحنى البسيط على ضهر الموبايل.
• كاميرا الموبايل مميزة جدًا حتى في ظروف الإضاءة الضعيفة، وفيه أوضاع كتيرة ومميزة للكاميرا هتغنيك عن برامج الفلاتر المشهورة.
• بصمة هواوي بتقدم مزايا تانية زي تأمين صورك وملفاتك المهمة وتقدر منها تتحكم في مجموعة برامج وتطبيقات مختلفة فمثلًا لو سحبت البصمة لتحت تفتح مركز الإشعارات وممكن تقفل منها المنبه يعني مش بصمة لتامين شاشة الموبايل وبس.
• أداء كاميرا الموبايل مميز جدًا وده بسبب مزاياها الكتيرة واللي منها درجة العزل الممتازة اللي بتقدمها الكاميرا فتقدر تركز على جسم معين وتعزل الخلفية اللي وراه وتطلع صور مختلفة وجميلة.
• كاميرا الموبايل بتقدم مجموعة مختلفة وكتيرة من الفلاتر واللي بتساعد على خروج صور قريبة من تصوير المحترفين.
• الموبايل بيسمحلك باستخدام ٢٥ جيجابايت من الميموري الداخلية.
• بييجي مع الموبايل اسكرينة بلاستيك وضهر حماية للموبايل.
• لو كنت من مدمني القراءة على الموبايلات فيه تقنية تحويل الشاشة للون الأصفر علشان يحمي عينك من أضرار النظر للشاشة لمدة طويلة.
• أداء الجهاز مميز ومش هتلاحظ بطء أو سخونة مع الاستعمال المطول ليه.

شوف موبايل Huawei GR 5 2017  من هنا.

٣- موبايل OPPO A57

المميزات

• شاشة الموبايل بحجم ٥٫٥ بوصة بدقة وضوح ١٢٨٠×٧٢٠ بكسل، وكثافة بكسلات ٢٨٢ بكسل، وكمان بتدعم اللمس المتعدد.
• بروسيسور الموبايل ثماني النواة Qualcomm Snapdragon 435 ورام بسعة ٣ جيجابايت، ومعالج رسومي Adreno 505.
• ميموري الموبايل الداخلية ٣٢ جيجابايت، وممكن تضيف ليه ميموري خارجي بسعة لغاية ٢٥٦ جيجابايت.
• الموبايل بيدعم تشغيل شريحتين وكمان بيدعم تقنية الاتصال للجيل الرابع، وبيشغل راديو FM، ومستشعر بصمة الإصبع.
• كاميرا الموبايل الخلفية بدقة ١٣ ميجابكسل بفتحة عدسة ٢، وتقنية الـ autofocus وفلاش LED.
• سيلفي مميز بدقة تصوير ١٦ ميجابكسل، والكاميرتين بيصوروا فيديو بدقة ١٠٨٠ بكسل.

العيوب

• شاشة الموبايل مش بدقة FHD، وكمان مش مزودة بلمبة إشعارات LED.
• الشاشة من السهل كسرها لإنها مش مزودة بطبقة حماية إضافية ضد الكسر.
• مفيش في الموبايل ميكروفون إضافي مانع للضجيج، ولا بيدعم تقنية الـ NFC.
• سعة البطارية ضعيفة ٢٩٠٠ مللي أمبير، ومش بتدعم تقنية الشحن السريع.

تجربة المستخدم

• تصميم الموبايل أنيق وجميل ومصنوع بالكامل من المعدن ومن الصعب إنك تلاحظ الفرق اللي بينه وبين الأيفون.
• جوانب الموبايل منحنية وبتزود من شكله الجمالي وكمان بتسهل على المستخدم إنه يمسك الموبايل بإيد واحدة لفترات طويلة من غير ما يواجه صعوبة وكمان لإن وزنه خفيف ١٤٦ جرام.
• صوت سماعات الموبايل الخارجية وواضح، وموجودة أسفل الموبايل ومن الصعب إنها تتكتم رغم إن الصوت مش عالي جدًا فهتقدر تسمع صوت الموبايل دايمًا.
• صوت سماعات المكالمات للموبايل مقبول، لكن لو كنت في مكان مزدحم هتواجه مشاكل بسيطة في الاستماع للطرف التاني.
• مكان بصمة الموبايل مدمج مع زرار الـ Home وبتستجيب بسرعة للمسة الإصبع.
• شاشة الموبايل بتقدم زوايا رؤية ووضوح مقبولين في ظروف الإضاءة المختلفة، هي مش الأفضل لكنها مش وحشة.
• زراير التحكم في الموبايل مش مضيئة ودي مشكلة للمستخدم لإنه مش هيقدر يفرق بينهم في البداية وكمان في الأماكن اللي إضاءتها ضعيفة.
• أداء الموبايل قوي في التنقل بين أكتر من برنامج في نفس الوقت ومش هتحس بأي نوع من البطء مع الاستعمال اليومي المعتاد للموبايل.
• أداء الموبايل مرضي جدًا للألعاب الخفيفة والمتوسطة، والألعاب اللي بتتميز بجرافيك عالي هتشتغل عليه لكن بجودة قليلة بسبب قلة كثافة بكسلات الشاشة، وهتلاحظ كمان سخونة كبيرة وقت اللعب.
• كاميرا الموبايل من عوامل تميزه وتفرده وصورها مميزة وسريعة كمان في التقاط الصور، وسيلفي الموبايل جميل في صوره، لكن الصور في الإضاءة الضعيفة بتقل كفاءتها والمستخدم هيلاحظ وجود Noise واضح.
• أداء بطارية الموبايل مقبول والبطارية هتكفي معاك لغاية يوم كامل من الاستعمال الخفيف أو المتوسط، وبتتشحن في مدة ٣ ساعات لشحنة كاملة وده معدل طويل حتى من سعة البطارية واللي أقل من ٣٠٠٠ مللي أمبير.

شوف موبايل موبايل OPPO A57 من هنا.

٤- موبايل Samsing G7 Prime

المميزات

• تصميم الموبايل من المعدن.
• الموبايل مزود بمستشعر بصمة الإصبع.
• شاشة الموبايل بتيجي بحجم ٥٫٥ بوصة بحجم بكسلات ١٩٢٠×١٠٨٠ بكسل وكثافة بكسلات ٤٠١ بكسل ومزودة بطبقة حماية إضافية ضد الكسر.
• الموبايل بييجي ببروسيسور ثماني النواة Exynos 7870 Octa بسرعة تردد ١٫٦ جيجاهرتز، ورامات بسعة ٣ جيجا، ومعالج رسومي Mali-T830MP2 وميموري داخلي بسعة ١٦ جيجابايت وممكن تزود ميموري خارجي بسعة توصل لـ ٢٥٦ جيجابايت.
• الموبايل بيدعم تقنية الاتصال للجيل الرابع، وبيدعم تشغيل راديو FM، والـ OTG.
• كاميرا الموبايل الخلفية بتيجي بقوة ١٣ ميجابكسل مع فلاش LED وتقنية الـ autofocus وكمان بتيجي بفتحة عدسة f1.9.
• سيلفي الموبايل بييجي بقوة ٨ ميجابكسل وأكتر من وضع تصوير وبرضه بتيجي بفتحة عدسة f1.9.

العيوب

• الموبايل مش مزود بميكروفون إضافي مانع للضجيج.
• شاشة الموبايل من نوع TFT واللي تعتبر أقل في الدقة وجودة العرض من الشاشات Super Amoled المشهور بيها سامسونج.
• الموبايل مش بيدعم تقنية الجيروسكوب ولا الـ NFC.
• ما تقدرش تجمع بين تشغيل شريحتين اتصال وميموري خارجي في نفس الوقت، وهتستغنى عن واحدة منهم.

تجربة المُستخدم

• الموبايل تصميمه قريب جدًا من الأيفون وده مدّيه شكل جمالي لامع ومميز خصوصًا إنه من المعدن.
• حجم وأبعاد الموبايل بيسهله من حمله بإيد واحدة لكن من الصعب التحكم فيه بسبب النعومة الزايدة للجزء الخلفي منه ومن السهل إنه يقع، والمُستخدم هيحتاج يستعمل جراب لسهولة التحكم فيه.
• مكان سماعة الموبايل مريح للمُستخدم وده بسبب وجوده أعلى الجزء اليمين للموبايل فهيكون بعيد تمامًا عن إيد المُستخدم ومن الصعب كتمه وبالتالي هيسمع صوته في أي مكان مهمًا كان زحمة.
• بصمة الموبايل في المكان المعتاد من سامسونج (على الشاشة الأمامية) وبتستجيب للمسة بسيطة من المُستخدم وتعتبر سريعة لكن للأسف ما تقدرش تحمي بيها أي ملفات أو برامج أو صور خاصة بيك وكمان بتسجل لغاية ٣ بصمات أصابع بس ودي سعة قليلة جدًا.
• زوايا الرؤية والوضوح للمُستخدم مميزة في ظروف الإضاءة الداخلية، ورغم قلة كفاءة الشاشات TFT عن سوبر أموليد لكن كثافة البكسلات بتدي ألوان كويسة للموبايل.
• أزرار التحكم مش مضيئة ومن الصعب على المُستخدم إنه يحس باستجابتها شوية.
• لو كنت من هواة تحميل أكتر من برنامج وتطبيق على الموبايل فالموبايل اختيار مناسب ليك بفضل الـ ٣ جيجا رام. أما لو كنت من هواة الألعاب فالموبايل اختيار مرضي ليك في الألعاب الخفيفة والمتوسطة لكن للأسف مش هتستمتع بجرافيك عالي بسبب نوع الشاشة TFT واللي مش بتكون بنفس أداء الشاشات سوبر أموليد، وبخصوص الألعاب التقيلة فهتلاحظ بطء ملحوظة في استجابة الموبايل ليك وهتلاحظ تكسير في بعض فريمات اللعبة.
• المُستخدم هيواجه صعوبة في إنه ياخد Screen Shot لإنه لازم يدوس على زرار الباور وزرار خفض الصوت في نفس الوقت واللي بيكون من الصعب إنه يتظبط من أول مرة.
• الموبايل بيقدم تجربة تصوير حلوة في ظروف الإضاءة الداخلية في البيت أو في الإضاءة النهارية، لكن مع تقليل الإضاءة المحيطة الفلاش مش بيقوم بوظيفته بالشكل المطلوب وهنلاحظ وجود Noise ملحوظ.
• سيلفي الموبايل ورغم ضيق فتحة العدسة لكن صوره مش بالكفاءة المطلوبة وبتكون مرضية رغم إنها واسعة وتسمح بالتقاط أكتر من شخص في الصورة.
• أداء البطارية أكتر من رائع وبتقعد معاك لغاية يوم ونص من الاستعمال المتوسط، ويوم كامل من الاستعمال الشاق.

شوف موبايل Samsung Galaxy J7 Prime من هنا.

٥- موبايل Sony Xperia X Compact

المميزات

• شاشة الموبايل محمية بطبقة مقاومة للخدوش ومعالجة ضد بصمات الأصابع.
• وزن الموبايل خفيف ١٣٥ جرام.
• كاميرا خلفية بدقة ٢٣ ميجابكسل بفتحة عدسة 0، وتقنية الـ autofocus وفلاش led.
• معالج سداسي النواة Qualcomm Snapdragon 650 ورام بسعة ٣ جيجابايت وميموري داخلي ٣٢ جيجابايت، وممكن تضيف ميموري خارجي لغاية ٢٥٦ جيجابايت، مع معالج رسومي Adreno 501.
• الموبايل بيدعم تشغيل شريحتين اتصال، وبيدعم تقنية الاتصال للجيل الرابع، وراديو FM، وفيه ميكروفون إضافي مانع للضجيج، وكمان منفذ شحن Type-C 1.0.
• الموبايل مزود بمستشعر بصمة الإصبع، والبطارية بتدعم تقنية الشحن السريع.

العيوب

• حجم شاشة الموبايل صغير واللي بتوصل لـ ٤٫٧ بوصة، ودقة وضوحها مش FHD.
• الشاشة مش مزودة بطبقة حماية إضافية ضد الكسر.
• سيلفي الموبايل ٥ ميجابكسل واللي يعتبر ضعيف مقارنةً بسعر الموبايل وكمان الموبايلات المنافسة ليه.
• الموبايل مش مقاوم للمياه ولا الأتربة كعادة موبايلات سوني.
• سعة بطارية الموبايل قليلة ٢٧٠٠ مللي أمبير.

تجربة المستخدم

• شاشة الموبايل حجمها صغير ومش هتكون مريحة في التصوير ولا عرض الصور والأفلام المفضلة، لكن المستخدم مش هيشيل هم تنضيف ومسح الشاشة كل شوية من بصمات الأصابع لإنها مزودة بطبقة مقاومة ليها.
• لإن حجم الموبايل والشاشة صغيرين فاستخدام الموبايل بإيد واحدة هيتم بسهولة تامة.
• الموبايل مصنوع من البلاستيك واللي تعتبر نقطة ضعف برضه مقارنةً بسعر الموبايل.
• كاميرا الموبايل الخلفية مش بارزة ودي نقطة مهمة للحفاظ عليها لو الموبايل كان موجود على أي سطح مش مستوي.
• مكان بصمة الإصبع مدمجة مع زرار الـ Home وللأسف البصمة مش بتسمح غير بتأمين الموبايل بس من غير باقي البرامج ولا الصور الخاصة.
• وجود السماعات بشاشة الموبايل ميزة قوية للمستخدم لإنها مش هتسمح بكتم الصوت مهما كان وضع مسك الموبايل وكمان مش هيكون من السهل كتم الصوت.
• أداء الموبايل مرضي ومريح في فتح أكتر من برنامج والتنقل بينهم والموبايل اختيار كويس لهواة الألعاب لكن مشكلته إن حجم الشاشة هيقلل من استمتاعك باللعب، ولإن الموبايل تصميمه من البلاستيك فمش هتلاحظ وجود سخونة واضحة.
• كاميرا الموبايل نتائج الصور الخاصة بيها ممتعة مهما كانت ظروف الإضاءة، لكن نقطة ضعفها إن فلاشها أحادي ومش بتصور فيديو بدقة 4K.
• سيلفي الموبايل ضعيف وصوره مش مميزة.
• مع إن بطارية الموبايل أقل من ٣٠٠٠ مللي أمبير لكن كفاءتها عالية وهتكفي معاك لغاية يوم ونص من الاستعمال العادي، وبتدعم تقنية الشحن السريع.
• لو كنت من الناس اللي بتركز وهي بتشحن الموبايل وبتخاف تدخل سوكت الشحن غلط فعن طريق منفذ شحن Type-C 1.0 مش هتقلق لإنه غير إنه بينقل البيانات أسرع فهو بيسمح بدخول سوكت الشحن من أي جهة من غير ما تقلق.

شوف موبايل sony Xperia X Compact من هنا.

٦- موبايل Asus ZenFone Selfie

المميزات

• شاشة الموبايل بتيجي بحجم مناسب ٥٫٥ ، وكثافة بكسلات ١٠٨٠×١٩٢٠ بكسل وحجم بكسلات ٤٠٣ بكسل ومزودة بطبقة حماية Corning Gorilla Glass 4.
• رامات الموبايل بحجم ٣/٢ جيجا وبروسيسور Qualcomm Snapdragon 615 ثماني النواة، ومعالج رسومي Adreno 405 وميموري داخلي ٣٢/١٦ جيجابايت وممكن تضيف ميموري لغاية ٢٥٦ جيجابايت.
• كاميرا السيلفي للموبايل بتيجي بدقة ١٣ ميجابكسل فتحة عدسة ٢ وفلاش LED، وكاميرا خلفية بقوة ١٣ ميجابكسل وفتحة عدسة F2.0 وتقنية ثبات ليزري مع فلاش مزدوج LED.
• الموبايل بيدعم تشغيل راديو FM، وتقنية الجيروسكوب، والـ OTG.
• تقدر تشغل على الموبايل شريحتين اتصال وميموري خارجي من غير ما تستغنى عن شريحة الاتصال.
• واجهة أسوس بتستجيب بشكل سريع للأوامر الصوتية في برنامج جوجل.
• بطارية الموبايل سعتها مقبولة وكمان من السهل تغييرها بنفسك.

العيوب

• الموبايل مش بيدعم تقنية الـ NFC ولا تقنية بصمة الإصبع.
• صوت سماعة المكالمات ضعيف شوية.
• كاميرا الموبايل مش بتصور فيديو بدقة 4K.

تجربة المستخدم

• شاشة الموبايل دقتها وألوانها وزوايا الرؤية والوضوح مقبولين في الإضاءة الداخلية، لكن الإضاءة الخارجية السطوع ما كانش كويس قوي.
• مكان زراير التحكم في صوت الموبايل موجودة تحت الكاميرا الخلفية واللي يعتبر مكان مش معتاد نهائي للمستخدمين وهتلاقي صعوبة في التعود عليهم في البداية.
• نفس المشكلة دي هنلاقيها مع زرار الباور واللي موجود فوق الشاشة وده مكان مش معتاد عليه نهائيًا، وكمان هيسبب صعوبة في الوصول ليه مع حجم الشاشة. أسوس ريحت المستخدم ووفرت ليه ميزة الضغط على الشاشة مرتين للفتح والقفل وده هيحل المشكلة بتاعة مكان الزرار مؤقتًا.
• مكان سماعة الموبايل في الجزء الخلفي لضهر الموبايل ورغم كده فالصوت هيكون مسموع وده بسبب التقوس الموجود في ضهر الموبايل.
• تصميم الموبايل رفيع شوية وفيه «كيرف» بسيط فيه من المنتصف ومع حجم الشاشة هتلاقي التعامل مع الموبايل لمدة طويلة مريح بشكل كافي.
• زراير التحكم في الموبايل موجودة بره الشاشة ومضيئة ومن السهل على المستخدم التعامل معاهم.
• أداء الموبايل في المهمات والوظايف اليومية المتعددة محتاج تعديل وتحسين شوية من أسوس خصوصًا إن المستخدم هيحس إنه بيؤدي الوظايف دي بصعوبة شوية وده بسبب الواجهة واللي بتحتاج تحسينات تسهل على المستخدم التعامل والوصول للي هو عاوزه.
• أداء الجهاز في الألعاب بجرافيك قليل ومتوسط بيكون طبيعي ومقبول جدًا والألعاب اللي جرافيك بتاعها عالي بيعرضها بجرافيك قليل شوية علشان تلاقي سلاسة فيها لكن الألعاب الضخمة هتقابل مشاكل بطء وده طبيعي بالنسبة لسعر الموبايل.
• أداء سيلفي الموبايل مرضي جدًا حتى في الإضاءة الضعيفة وده بسبب الفلاش، أما الكاميرا الخلفية للموبايل فأداءها مرضي في الإضاءة القوية والنهارية ولو الإضاءة قلت هنلاحظ Noise في الصور، وتقدر تاخد من خلالها صور بسرعة كبيرة جدًا.
• ميزة تانية للمستخدم وهي إن الكاميرا تقدر من خلالها تاخد صور بدقة بكسلات ٥٢ ميجابكسل وعيبها إن الصورة دي بتاخد وقت طويل شوية علشان تشوفها (١١ ثانية).
• أداء البطارية مميز وبتكمل لغاية ٦ ساعات وضع تشغيل شاشة مستمر، وبتتشحن في ساعتين ونص.
• أسوس زودت الموبايل ببرامج كتيرة جدًا المستخدم مش هيحتاج ليها وبتاخد مساحة ودي حاجة مش كويسة.

شوف موبايل Asus ZenFone Selfie من هنا.

٧- موبايل Tecno Camon CX

المميزات

• شاشة IPS بحجم ٥٫٥ بوصة بدقة وضوح FHD وكثافة بكسلات عالية ٤٠٤ ودقة وضوح ١٩٢٠×١٠٨٠ بكسل.
• الموبايل بييجي بروسيسور ثماني النواة من نوع MediaTek MT6750T بتردد ١٫٥ جيجاهرتز، وممكن تضيف ميموري خارجي لغاية ١٢٨ جيجابايت.
• الموبايل بيدعم تشغيل راديو FM، والـ OTG وتقنية بصمة الإصبع، والجيروسكوب.
• ممكن تشغل على الموبايل خطين اتصال وميموري خارجي في نفس الوقت.
• كاميرا خلفية بقوة ١٦ ميجابكسل بفتحة عدسة واسعة مع فلاش رباعي، وسيلفي بدقة ١٦ ميجابكسل بفتحة عدسة واسعة مع فلاش ثنائي.

العيوب

• رام الموبايل ٢ جيجابايت بس، والميموري الداخلي ١٦ جيجابايت.
• طبقة حماية الموبايل ضد الكسر والشرخ مش الأفضل في السوق.
• الموبايل مش مزود بميكروفون إضافي مانع للضجيج.
• بطارية الموبايل ما تقدرش تغيرها بنفسك ولازم تروح بيها التوكيل.

تجربة المستخدم

• أداء شاشة الموبايل مقبول في ظروف الإضاءة المختلفة، مش الأفضل لكن الرؤية فيها واضحة.
• الموبايل بييجي معاه «اسكرينة» ملزوقة على الشاشة للحماية فمش هتحتاج تشتري واحدة وتركبها.
• تكنو بتقدم ضمان مجاني على الشاشة في حالة الكسر لكن الضمان ده بيسري أول ٣ شهور بس
• زرار الباور عن زري التحكم في الصوت لسهولة التفرقة بينهم.
• أداء بصمة الموبايل مقبول جدًا وتقدر عن طريقها تفتح الكاميرا وتأمن برامجك وصورك الخاصة، لكن مشكلته للمستخدم إنه صعب التفرقة بينه وبين جسم الموبايل الخارجي لإن مفيش أي بروز بين البصمة وجسم الموبايل.
• أداء الموبايل في المهام اليومية والتنقل بين البرامج بيكون سلس وسريع ومش هتحس بأي تقل من خلاله، وأداء الموبايل في الألعاب مقبول لكن لو كنت من هواة الألعاب اللي الجرافيك بتاعها عالي فالموبايل مش هيكون ممتع قوي ليك.
• فيه إضافات مريحة للمستخدم زي إنه يقدر يرسم حرف الـ C على الشاشة فتفتح الكاميرا، وكمان تقدر تنسخ أكتر من برنامج تواصل اجتماعي عندك على الموبايل بحساب ورقم موبايل مختلف زي واتساب وفيسبوك.
• سيلفي الموبايل مميز في الموبايل وبيخرّج صور جميلة ومش هتقابلك مشاكل في الإضاءة الليلية بسبب الفلاش، ولا مع عدد أصحابك الكبير لإن عدسة الكاميرا واسعة.
• الكاميرا الخلفية صورها حلوة لكن ما تهزش إيدك وانت بتصور علشان الكاميرا مش موجود فيها مثبت بصري ضد الاهتزاز.
• أداء بطارية الموبايل معقول ومش بتوازي سعة الأمبير الخاص بيها وبتتشحن شحنة كاملة في ساعتين بس وده وقت مناسب جدًا.

شوف موبايل Tecno Camon CX من هنا.

قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.