كتب: صفاء مجدي

تسألني مين أول حد بيفكرك برمضان قبل موعده؟ أقولك التليفزيون، كل قناة تبدأ قبل الهنا بسنة بنشر إعلاناتها عن المسلسلات اللي بتيجي حصريًا ومش في أي حتة تانية وتبدأ مزيكا أغاني رمضان تلعب على التليفزيون كل شوية. المسلسلات كل سنة بتكون كتير ولو بتفكر تتابع مسلسلات ومحتار ياقوطة جابت لكم رأي خبير من خلال لقائها مع الأستاذ «محمود مهدي» صاحب قناة فيلم جامد على اليوتيوب واللي بيراجع فيها أكثر الأفلام شعبية سواء عربي أو أجنبي، وفي رمضان برده بيناقش ويحلل المسلسلات.

السنة دي عدد المسلسلات مش كتير أوي هم على الأقل 31 مسلسل بس! يعني لو قررت حتى تتابعها كلها مش هتلاقي وقت عشان اليوم 24 ساعة بس وهتفرط في 7 مسلسلات من الـ 31.

بشكل عام الأستاذ مهدي مش مبسوط بالأداء السنة دي وقال «مسلسلات رمضان زمان يعني تقوم تتسحر الساعة 2 بالليل تخبط في مسلسل يشدك وتقرر تتابعه.. لكن السنة دي مفيش مسلسل بالشكل ده»

عمل استفتاء على صفحة فيلم جامد على فيسبوك عشان جمهوره يختار المسلسلات اللي عاوزينه يناقشها في حلقات فيلم جامد في رمضان.

نتيجة الاستفتاء كانت أن أكتر ثلاثة مسلسلات الناس مستنياها وبتتابعها وعاوزين مراجعتها هي:

1. القيصر للفنان يوسف الشريف.
2. ونوس للفنان يحيى الفخراني.
3. جراند أوتيل للفنان عمرو يوسف.

مسلسل القيصر

أما عن رأيه في مسلسل القيصر فالأستاذ مهدي شايف القصة كويسة جدًا ومختلفة عن أعمال «يوسف الشريف» اللي قبل كده، ومن المعروف أن الفنان الشريف كان له دايمًا مسلسلات فيها غموض شوية وقايمة على حل لغز وكانت بتحقق نجاح مع الجماهير.

عن قصة مسلسل القيصر

شخصية لها قدرات خارقة وبتنتمي لجماعة من الجماعات الإسلامية واللي بتعمل عملية إرهابية لكن القوات بتقدر تهاجمهم وتقضي على الجماعة كلها ويصبح الشريف (القيصر) هو الناجي الوحيد وبيتسجن في سجن اسمه المغارة ومن هنا بتدور الأحداث.

رأي مبدئي في المسلسل

مدح مهدي المجهود اللي قام به القائمين على العمل وقال أن تكلفة الإنتاج كبيرة وظاهرة في المسلسل، وواضح أن الشريف بذل مجهود بدني فظيع للقيام بالدور بشكل كويس. لكن مهدي كان مستغرب شوية من جزء في التتر مكتوب فيه أن المسلسل فكرة الفنان يوسف الشريف ومكانش فاهم ايه المقصود من حاجة زي دي. وقال أنه بيكون في المسلسلات حاجة اسمها show creator واللي هو بيكون صاحب الفكرة وكمان بيكتب ويؤلف لكن كلمة فكرة فلان دي مش واضحة شوية.

مأخذ مهدي على المسلسل أنه في غموض شوية وممكن المشاهد يحس أنه مش عارف القصة رايحة فين وجاية منين.

من فريق عمل المسلسل

بيشارك في مسلسل القيصر: خالد زكي، وياسر علي ماهر، وأحمد سعيد عبد الغني، وريهام عبد الغفور، وأحمد حلاوة. والمسلسل من تأليف محمد ناير، وإخراج أحمد نادر جلال.

مواعيد مسلسل القيصر

قناة أون تي في: الساعة 7 المغرب، والساعة 11 بالليل، والساعة 9 صباحًا، والساعة 3 العصر.

قناة أون تي في بلس: الساعة 11 صباحًا، والساعة 2 الفجر، والساعة 6 المغرب.

لو بتتابعوا القيصر عرفونا رأيكم في المسلسل لحد دلوقتي وتنصحونا نتابعه ولا لأ؟

مسلسل ونوس

عن قصة مسلسل ونوس

أول تعليق قاله الأستاذ مهدي أن ونوس على عكس القيصر واضح من البداية في قصته واتجاهه، يحكي المسلسل عن أسرة رجل اسمه ياقوت بيختفي لمدة 20 سنة بعدها بيظهر لأسرته شخص اسمه ونوس بيلعب دوره الفنان الكبير «يحيى الفخراني». ونوس بيقول أنه صاحب ياقوت اللي اختفى وهيساعدهم يلاقوا مكانه وبيقول كمان أنه بيمتلك ثروة كبيرة وعشان تتصرف محتاجين إمضاء كل فرد من أفراد الأسرة، وبتدور الأحداث عن الصراع اللي بين أفراد الأسرة.

رأي مبدئي في المسلسل

أبدى أستاذ مهدي إعجابه الشديد بالأداء التمثيلي للفنان الفخراني، وقال أن الفخراني مش من الناس اللي بتتفرج على أدائها عشان تقيمه في المقام الأول لكنك بتتفرج وتفكر في الدور والشخصية اللي قدامك، وشخصية الفخراني في ونوس جديدة ومثيرة للجدل.

وأضاف أستاذ مهدي ان أداء الفخراني هو أحسن أداء تمثيلي شافه لحد دلوقتي في رمضان 2016.

مأخذ أستاذ مهدي الوحيد على المسلسل هو الرمزية اللي فيه، من المفروض أن شخصية ونوس فيها ترميز لشخصية الشيطان ولكن من خلال مشاهد مختلفة في المسلسل كان الرمز مكشوف وواضح أوي من البداية وأضاف مهدي أن الرمزية في المسلسل في مستوى الطالب الضعيف.

من فريق عمل المسلسل

المسلسل بيشارك في تمثيله نبيل الحلفاوي، وهالة صدقي، وسماح السعيد، وحنان مطاوع، ومحمد شاهين، والقصة من تأليف عبد الرحيم كمال، وإخراج شادي الفخراني.

مواعيد عرض مسلسل ونوس

سي بي سي دراما: الساعة 6 المغرب، والساعة 10 بالليل، والساعة 5 الفجر، والساعة 12 بالليل.

سي بي سي: الساعة 7 المغرب، والساعة 2 الفجر، والساعة 9 صباحًا، والساعة 1 الظهر. وبعدها بساعتين على سي بي سي +2

لو بتتابعوا ونوس عرفونا رأيكم في المسلسل لحد دلوقتي وتنصحونا نتابعه ولا لأ؟

مسلسل جراند أوتيل

عن قصة مسلسل جراند أوتيل

أستاذ مهدي قال «دي أول مرة نروح حقبة تاريخية قديمة ويكون فيه قصة وحبكة درامية، العادة في المسلسلات اللي زي دي –زي مثلًا هوانم جاردن سيتي- إننا بنشوف الناس دي في إطار اجتماعي ونعيش معاها حياتها لحد آخر الشهر وخلاص لكن في جراند أوتيل مركزين على جريمة قتل أو اختفاء».

المسلسل بيدور في فترة الخمسينات في فندق اسمه جراند أوتيل في أسوان واللي بيروح له «علي» اللي قايم بدوره عمرو يوسف عشان يدوّر على أخته اللي اختفت واللي كانت بتشتغل في الفندق خادمة.

رأي مبدئي في المسلسل

أول حاجة شافها مهدي فيه هي المناظر الجميلة والصور الحلوة اللي بتشد المشاهد، ودي فعلًا أول حاجة ممكن تلاحظها في المسلسل اللي متصور في أسوان، أستاذ مهدي مدح التصوير الكويس جدًا والملابس والأزياء الجميلة وقال أن كل حاجة مختارة بعناية جدًا.

أستاذ مهدي صرح بإعجابه بدور الفنان محمد ممدوح واللي قايم بدور «أمين» واللي بنشوف في شخصيته لمحة من التأخر العقلي أو عدم الاستقرار النفسي واللي علق عليها مهدي بأن لو مظهرش تبرير لوجودها في الشخصية يبقى مالهاش لازمة أوي وخصوصًا أن الفنان محمد ممدوح بتظهر قدراته التمثيلية العالية في أي أداء بيعمله مهما كان بسيط.

من فريق عمل المسلسل

مسلسل جراند اوتيل بيشارك فيه دينا الشربيني، وأمير صلاح، وأحمد داود، وسوسن بدر، المسلسل قصة تامر حبيب، وإخراج محمد شاكر خضير.

مواعيد عرض جراند أوتيل

قناة سي بي سي: الساعة 11 بالليل، والساعة 5 الفجر، والساعة 3:30 العصر. وبعدها بساعتين على سي بي سي +2

سي بي سي دراما: الساعة 12 بالليل، والساعة 6 صباحًا، والساعة 10 الصبح، والساعة 2 الظهر.

قناة أبو ظبي: الساعة 10 بالليل، والساعة 9 صباحًا.

لو بتتابعوا جراند أوتيل عرفونا رأيكم في المسلسل لحد دلوقتي وتنصحونا نتابعه ولا لأ؟

مهدي أنهى كلامه بأن غالبًا ترتيب شعبية المسلسلات في موسم رمضان بيتغير من أوله لآخره، والمراكز الثلاثة الأولى ممكن تروح لمسلسلات تانية.

عشان كده لنا لقاء آخر مع الأستاذ محمود مهدي في نهاية شهر رمضان نشوف المسلسلات دي ومسلسلات تانية وصلت لفين.

قولوا لنا بتشوفوا مسلسلات ايه في رمضان ورأيكم ايه فيهم وتوقعاتكم ايه؟

 رمضان كريم.