كتبت: ميّ نور

تعتبر شركة تصنيع الموبايلات الذكية الصينية ون بلس من الشركات الجديدة على الأسواق العالمية، والجديدة على الإطلاق في الأسواق المصرية، ولو هنوصفها فممكن نقول إنها بتعمل نفس اللي بتعمله شركة شاومي الصينية لكن مع الموبايلات الرائدة، فهي بتطرح إصدارات لموبايلات رائدة بمواصفات جبارة تقدر تنافس بيها أكبر الموبايلات في السوق مع أسعار بسيطة بالمقارنة مع المواصفات دي، وده اللي شوفناه مع موبايل OnePlus 5T اللي قدر ينافس حيتان السوق زي Samsung Galaxy Note 8 و iPhone X بأدائه القوي وشاشته الكبيرة والكاميرا بتاعته والبطارية.

والنهارده في ياقوطة هنقدملكم ريفيو عن الموبايل وأبرز مميزاته وعيوبه وتجربة المستخدم الخاصة بيه، ولو عجبك وعاوز تشتريه، تقدر من خلالنا تعرف أحسن الأسعار ليه وتقارن بينهم وكمان تطلبه، وهيوصل لحدّ عندك في أسرع وقت.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعوده وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

المواصفات

المميزات

• تصميم الموبايل عصري ومميز جدًا مع شاشة بحواف رقيقة جدًا في الواجهة الأمامية.
• التليفون بييجي بهيكل معدني وحواف معدنية.
• شاشة الموبايل كبيرة، وبتيجي بحجم ٦٫٠١ بوصة، ودقتها ١٠٨٠ × ٢١٦٠ بكسل، وده بيخليها مناسبة لمشاهدة الأفلام بسهولة.
• الشاشة بتيجي مع طبقة حماسة ضد الخدش من نوع كورنينج الغوريلا.
• أداء الموبايل عالي جدًا وسريع، وده بفضل البرويسور Qualcomm MSM8998 Snapdragon 835 الرائد من كوالكوم في ٢٠١٧، بجانب الرامات العالية جدًا بسعة ٦ أو ٨ جيجا.
• معالج الرسوميات Adreno 540 هو معالج عادي الجودة وبيقدر يشغل الألعاب التقيلة من غير أي تهنيج أو تعطل.
• عدستين الكاميرا الخلفية في الموبايل بييجوا بدقة ١٦ و ٢٠ ميجابكسل والاتنين بييجوا مع فتحة عدسة واسعة جدًا، وهي f/1.7، واللي بتسمح بدخول كمية أكبر من الضوء في الصورة، وده بيساعد الكاميرا تلقط التفاصيل بسهولة أكتر.
• جودة كاميرا سيلفي الأمامية عالية، وبتيجي بفتحة عدسة f/2.0.
• الموبايل بيدعم خاصية الشحن السريع، مع شاحن Dash Charge.
• سعر الموبايل مناسب جدًا لإمكانياته.

العيوب

• الموبايل مش بيدعم أي معيار لمقاومة المية.
• الموبايل مش بيدعم راديو الـ FM.
• التليفون مش بيدعم إضافة كارت ميموري خارجي.
• سعة البطارية مش أحسن حاجة في الأسواق، وفيه موديلات تانية بتتفوق عليها.

تجربة المستخدم

• الموبايل مناسب جدًا لمحبي الأفلام والألعاب عشان بييجي مع شاشة كبيرة بجودة عالية، كمان الشاشة دي هتستحمل معاك الحوادث البسيطة والمتوسطة عشان بتيجي مع طبقة خارجية مقاومة للخدش.
• بالرغم من إن الكاميرا مش أحسن حاجة وكاميرات سامسونج وأيفون وجوجل اتفوقوا عليها، فالكاميرا تعتبر الأفضل بالمقارنة مع الفئة السعرية، فلو إنت بتحب التصوير ومش عاوز تشتري موبايل غالي جدًا الموبايل ده هيكون مناسب جدًا ليك.
• الموبايل حقيقي أداؤه عالي مع الاستخدام، وبيقدر يحافظ على ثبات الجودة بتاعة الأداء دي لفترة طويلة، يعني مش هتلاحظ فيه أي مشاكل غير على المدى البعيد جدًا مع طول فترة الاستخدام.
• دلوقتي كمان الموبايل بيدعم الأندرويد أوريو بكل مميزاته الجديدة، زي الحفاظ على طاقة البطارية واستهلاك الطاقة وسرعة الأداء وقفل التطبيقات اللي بتشتغل في الخلفية بشكل تلقائي.
• البطارية مش هتكمل يوم واحد للأسف مع الاستخدام فوق المتوسط.

شوف موبايل OnePlus 5T من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.