Reviews of Max Grill - Mar-200 Electric Grill

• 

  سارة عمار

  (6 years, 5 months ago)

  الشواية دي تنفع بتوع الريجيم والأكل الصحي حيحبوها أوي عشان مابيتحطش فيها أي حاجات زي الزيت والسمنه عشان كده الأكل بيطلع خفيف ع المعدة وحلو للعيال الصغيرين، كمان عشان من غير فحم فأنا لقيت انها مناسبة لمطبخي الضيق واللي ريحة الفحم بتتعب صدر الولاد والحساسية بتبهدلهم، يعني كلها فايدة. بتسحب كهرباء عالية يعني لو اشتغلت 3 مرات في الأسبوع؛ الفاتورة لقيتها نطت لشريحة تانية 2000 وات كتير طبعًا. تستحمل، معدن الشبكة بتاعت الشواية حلو مش بيلزق ولما بغسله وبنشفه كويس مش بيصدي ودي مشكلة في أغلب الشوايات الحلة تبقى كويسة وتستحمل والشبكة تلاقيها خرمت وصدت. تنظيفها صعب أوي، ودي من الحاجات الوحشة اللي معرفش امتى حلاقي شواية مااقعدش ساعة انظف فيها. تحطها في أي مكان وده عشان السلك بتاعها جميل اقدر اتحكم فيه أطوله أو أقصره زي ما أنا عايزا، هوا 3 أطوال عندكم. بتسخن أوي وبتسخن المكان حواليها، العزل بتاعها مش كويس بلاقي كل حاجة سخنة ولازم أفضي المكان، ولازم ألبس جوانتي وأنا بفتحها وأقفلها، وبحطها على رخامة المطبخ، وده كمان عشان ملهاش غطا بيخليها تسخن الحيطة وريحة الدخان بتبقى في كل مكان ويزيد الطين بله لو مفيش شفاط في المطبخ وهوا شباك صغير وخلاص، ده حيخلي ريحة الشقة كلها شوي. بتنجز مش بتاخد وقت اني أحضر واسخن فحم واقعد اهوي، ولو الهوا عالي يشعلل الفحم ولو مطرت يطفى يعني دوشة، الشواية دي بتشتغل وبتنجز من غير تعب وتوضيب، وكمان الفحم بيبقى محتاج تيار الهوى جاي من مكان معين يعني لو التيار جي من يمين حتحطها جنب التيار مش في وشه أو عكسه عشان ما تشعللش أوي الفحم وتحرق اللحمة أو الفحم يهدى وينّشف اللحمة، فدي التحكم فيها أسرع وأسهل مش حتحتاجوا تظبيط ووجع دماغ. المفتاح بتاع الفتح والقفل بيعلق مع السخونية الجامدة مرة في مرة حتلاقوه محتاج تكة كده عشان يشتغل. تسوية اللحمة، مفيش فيها سياخ عشان الكفتة والكباب وده عشان اللي بيفهموا في الشوي والكباب لازم حتة اللحمة تبقى محطوطة في سيخ عشان تستوي مظبوط. تخلي بالكم من انها ماتنفعش تشغلوها وجنبكم عيال صغيرة أحسن دي لسعتها مابتهزرش -بعد الشر عنكم- فلازم تكونوا مصحصحين أوي وأنتم بتشغلوها. الشواية لونها أسود وقدرتها الكهربية 2000 وات، ملهاش لا ضمان ولا صيانة ولا حتلاقوا ليها وكيل معتمد غير هوا المحل اللي بيبعها وخلاص كده، أصل دي سرموستات خلاص كده باظت يبقى ملهاش قطع غيار، من الآخر لو عايزين الشواية تعيش معاكم وتعمر يبقى اتعاملوا معها بشويش ونظفوها واهتموا بيها شيلوها في مكان بعيد عن الرطوبة ونشفوها كويس بعد ماتغسلوها.