كتاب أسرار قلوب البنات المؤلف: أمنية أشرف العقبي

يوجد مقولة أخري لأوسكار وايلد " القلب صُنع ليكون مكسور" أيوة بس ده يتنافى مع المقولة الأولانية إزاي صُنع ليكون مكسور وإزاي غير قابل للكسر !؟ الإجابة بسيطة جداً هي نفس مثال الشباك مش هتوصلي لمرحلة غير قابلة للكسر إلا إذا إنكسرتِ وأتوجعتِ كتير يعني عايزة تفهميني إن إنكساري بداية قوتي ؟ بالظبط كده هو ده بالظبط اللي عايزه أقوله " "عندما ينكسر قلبك تزرع بذور في الشقوق وأنت تصلي من أجل المطر " أندريا جيبسون أيوة بس أنا قلبي واجعني أوي ، قلبي قايد نار تعالي أضرب لك مثالين بما إننا بنات وبنموت في الأحجار والأكسسوارات طبعاً كلنا عارفين الألماس وكتير مننا بتشبه نفسها بالألماسه وإنها صعبة المنال وعزيزة وغالية ومش أي حد يستاهلها ، هتيجي واحدة تقول لي ألماسة أزاي وأنا مطفية ؟ أنا الحزن طفاني أنتِ عارفة الألماس ده أصله إيه ؟ مش فحم لا ، الألماس أصله كربون بيتكون من ذرة كربون متحاطة باربع ذرات كربون متصلين بروابط تساهمية قوية ، وهو من أقسى المواد الطبيعية ، ومقاوم كيميائي ، وموصل حراري ممتاز ، وليه خصائص بصرية خاصة زي أرتفاع مؤشر الأنكسار ، وتشتت عالي ، وبريق عالي ، وعشان خصائصه الفريدة دي المعدن ده بقى من الأحجار الكريمة الأكثر شعبية إيه حصة الجولوجيا اللي دخلتيني فيها دي وأنا مالي بكل ده ! أصبري بس جيالك في الكلام أهو ، الألماس ده ليه أربع مصادر طبيعية بيتكون منها 1- إنفحارات بركانية عميقة 2- رواسب المحيط 3- إصطدام الكويكبات 4- النيازك ومن غير ما أطول عليكِ في حصة الجولوجيا أكتر من كدة في الأربع أحوال هو بيتكون نتيجة لأصطدامات جامدة بتنتج قوة هائلة وضغط ودرجات حرارة عالية جداً والظروف دي هي اللي بتساعد علي تشكيل الألماس.