آيكيا

تقريبًا مفيش حد في مصر دلوقتي مسمعش عن ايكيا، اللي موجود في كايرو فيستيفال سيتي في التجمع الخامس. المحل يضم كل المنتجات اللي ممكن تحتاجها وأنت بتفرش بيتك، زي الأثاث والحمامات والمكاتب وأدوات المطبخ وغيرهم كتير. اكيا بيقدموا لعملائهم تطبيق على الموبايل يقدروا يشوفوا منه كل المنتجات الجيدة وصورها واسعارها، ده غير الخاصية اللي بتخليك تشوف شكل الأثاث بحجمه الطبيعي في الغرفة اللي أنت عايز تفرشها عشان تبقي مُتخيل شكله قبل متشتريه. التطبيق ده متوفر على أندرويد وأبل فقط. موقع اكيا عليه الكتالوج الكامل اللي فيه كل منتجاتهم باسعارها. ممكن تنشئ حساب على الموقع عشان تعرف تنقي اللي انت عايزه بعدين ممكن تبعت طلبك للمحل وتشتري على طول بدل ما تِلف كتير. محل اكيا مُصَمم إنه يخلي العملاء يخدموا نفسهم بنفسهم، يعني أنت بتروح المحل تتفرج على اللي يعجبك وتشوف سعره بعدين بتشيله وتاخده علي الكاشير عشان تدفع. في المحل تقدر تلاقي مكان للأطفال عشان تسيبهم يلعبوا. عندهم برده مطعم وكافيه جوه المحل لأنهم عارفين إنك أكيد هتقضي اليوم كله بِتلِف عندهم. بالنسبة للدفع فممكن نقدًا بالجنيه المصري أو بكروت الائتمان. عشان اكيا مقتنعين إن ممكن الواحد يغيّر رأيه عادي بعد ما يشتري، فسياسة الاسترجاع بتاعتهم بتسمح لك باستعادة فلوسك في خلال 30 يوم على المنتجات الغير مفتوحة بوجود إيصال الشراء. وبيرجعوا لك فلوسك بنفس الطريقة اللي انت دَفعَت بيها في الأول. لو في عيب تصنيع في المنتج اللي انت اشتريته، فريق اكيا بيفحصوا المنتج الأول عشان يتأكدوا إن المشكلة مش في سوء استخدام من المُستهلك بعدين بيصلحوا المنتج علي حسابهم أو يستبدلوه. عدد سنين ضمان المنتج بيختلف حسب نوعه. اكيا بتقدم لعملائها خدمات كتير. زي إنك ممكن تطلب توصيل الأثاث على بيتك أو تطلب حد يساعدك في تركيب الأثاث في البيت. ممكن برضه تطلب حد يساعدك في تركيب المطبخ. كل الخدمات دي بتبقي برسوم حَسَب نوع الخدمة. لو محتار في حاجة وعايز تاخد برأي حد قبل متشتري، اكيا عندهم فريق جاهز يجاوب على كل أسئلتك. وأخيرًا وليس آخرًا، اكيا بتوفر لعملائها خدمة مميزة تخليك تتخيل شكل بيتك هيبقي عامل إزاي من خلال برنامج تنزله على الكمبيوتر عشان تقدر تشوف شكل كل قطعة أثاث وبعدين ممكن تبعت طلبك للمحل وتستلم القطع اللي أنت اخترتها.