يوميات حاج مصري أنا والبهايم

أحمد أحمد عبد الله جنينة

1- فاكرين حمامة بتاع التليفونات اللي كان في مسرحية حزمني يا بابا للحاجة فيفي عبده!!!!!

بطل قصتنا اسمه حمامة، ولكنه مش بتاع التليفونات، ولكنه بتاع الحج!

٢- حمامة شاب أو في آخر الشباب، فقد تخطى الأربعين بعامين، احتار الكثيرون في وصفه هل هو عبيط ومدي على طيبة ولا هو طيب أصلًا بس أهبل، ولكن المؤكد أنه لاسع وطايرة منه!

٣- حمامة شخص بسيط جدًّا وصاحب مزاج شرعي، يعني مزاجه وإدمانه وأفيونته هي الكورة، وهو كريم جدًّا وبخيل جدًّا وتافه، وساعات تشوفه عنده كرامة، ومرة تشوفه مهزأ، ممكن يهزر مع الواحد بدرجة كبيرة، وفي لحظة أول ما يحس أن التاني بيقل منه أو بيتكلم بجد تلاقي حمامة يطلَّع الوش التاني ويقلب اللي أمامه بكل هدوء وبدون قلة أدب منه.