تشتري إيه فيهم … PlayStation 5 ولا Xbox Series X

كتب: خالد عاصم

مرت سنة تقريبًا من ساعة ما تم الإعلان عن منصات ألعاب الجيل الجديد PlayStation 5 وXbox Series X، وعلى مدار الوقت ده كان فيه مدة أكتر من كافية لاختيار المنصتين والتعرف على إمكانياتهم الحقيقية مع ظهور عدد من الألعاب المخصصة ليهم واللي قدر من خلالها المطورين إنهم يطوعوا إمكانيات منصات الجيل الجديد عشان يخرجوا بألعاب مبهرة على مستوى الرسوميات والأداء.

وعلى الرغم من مرور السنة دي إلا إن المستخدمين بيعانوا عشان يقدروا يحصلوا على جهاز من منصات الجيل الجديد بسبب عدم توفرهم وضعف إنتاجهم اللي بيرجع لأسباب أبرزها النقص الكبير في إنتاج شرايح المعالجات، ولكن على الرغم من كده برضه، قدرت المنصات دي تحقق مبيعات كويسة بالنظر لندرة توفرهم، فمنصة ألعاب PlayStation 5 قدرت تبيع ١٣٫٤ مليون جهاز بنهاية سبتمبر اللي فات، أما مايكروسوفت اللي ما أعلنتش بشكل رسمي عن مبيعاتها، ففي تقارير بتقول إنها قدرت تبيع ٨ مليون جهاز من أجهزة Xbox Series X وSeries S ودي كلها أرقام قوية بالنظر لضعف مستوى توفر الأجهزة دي في مختلف الأسواق العالمية.

بس حاليًا رجعت تاني تتوفر الأجهزة دي في السوق، ومع رجوعها بترجع حيرة الاختيار، فهل PlayStation 5 أحسن ولا Xbox Series X أحسن، وإيه الاختلافات ما بينهم وإيه الاختيار الأفضل، وده اللي هنجاوب عنه في المقال ده من خلال مقارنتنا ما بين PlayStation 5 نسخة الأقراص وXbox Series X.

وماتنسوش إنه لو أي منصة من الاتنين عجبتكم هتقدروا تطلبوها من خلالنا في ياقوطة وهتوصلكم لحد باب البيت وكمان تقدروا تشتروا المنتجات دي بالتقسيط من خلال شهري أول وأسهل تطبيق للتقسيط في مصر واللي مش بيحتاج منك غير صورة البطاقة وصورة إيصال مرافق وبس، ومن غير زيارة ولا ضامن واستمتع كمان بتوصيل مجاني لكل مشترياتك من خلاله.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

المقارنة بين PlayStation 5 وبين Xbox Series X

الأداء والجرافيكس

على مستوى الشكل الخارجي، فالجهازين مختلفين تمامًا، فجهاز Xbox Series X هو عبارة عن صندوق حرفيًا وعلى الرغم من إنه يبدو عليه إن مايكروسوفت معملتش مجهود في تصميمه، إلا إنه من وجهة نظر تصميمه هو ببساطة رائع، لأنه بيقدم فكرة صندوق الألعاب اللي بيجمع ما بين البساطة والقوة والمباشرة، أما تصميم PlayStation 5 ففضائي حبتين ومعمول مجهود حلو في تصميمه، وإن كان في الآخر مش التصميم هو الهدف الرئيسي من المقارنة دي وعشان كده خلينا ندخل في الأداء.

الجهازين بيعتمدوا على نفس المعالج AMD Zen 2 ثماني النواة مع اختلاف في التردد، فجهاز بلاي ستيشن تردده ٣٫٥ جيجا هيرتز وجهاز اكس بوكس تردده ٣٫٨ جيجا هيرتز، والجهازين بيعتمدوا على نفس كارت الجرافيكس AMD RDNA وبرضه مع اختلاف طفيف في الترددات، وكمان الاتنين بيعتمدوا على رامات ١٦ جيجابايت رام وتقريبًا نفس المساحة الداخلية اللي سعتها ٨٢٥ جيجابايت في جهاز PS5 وسعتها ١ تيرابايت كاملة في جهاز Xbos Series X، وكمان الجهازين بيقدروا يخرجوا صورة بجودة 8K و4K لحد معدل ١٢٠ إطار في الثانية.

الجهازين كمان بيقبلوا زيادة السعة التخزينية لكن بشكل مختلف، فمنصة PlayStation 5 ممكن تغير الهارد الداخلي بتاعها لو قدرت تشتري هارد M.2 فئة SSD، وده بيحتاج معرفة مسبقة بكيفية التعامل مع الهاردوير وممكن مايكونش سهل أوي للمستخدم المبتدئ غير المحترف، وكمان تقدر تستخدم هارد خارجي لحفظ الألعاب بس متقدرش تستخدمه في تشغيلها.

أما منصة Xbox Series X فأسهل شوية ولكنها مكلفة أكتر، وده لانها بتعتمد على كروت تخزين مخصصة ممن تركيبها واستخدامها بكل سهولة على الجهاز ولكنها غالية شوية، يعني عشان تقدر تزود ١ تيرابايت هتدفع تقريبًا ٢٠٠ دولار أمريكي، ومع زيادة مساحة الألعاب وضخامتها حاليًا، كان الأفضل المنصات الجديدة تيجي بسعات تخزينية أكبر، ولكن ده اللي حصل بقى هنعمل إيه.

كل جهاز بيختلف طبعًا على مستوى السوفتوير لاعتماد كل جهاز منهم على سوفتوير تابع للشركة المطورة، ولكنهم بيدعموا مجموعة من الإمكانيات المتشابهة لتشابه الإمكانيات الداخلية، بس كمان بيختلفوا على مستوى إمكانيات تانية، وفيها بيكسب Xbox Series X بفارق يتوقف على المستخدم نفسه، يعني الاكس بوكس مثلًا بيدعم خاصية التنقل السلس بين الألعاب وإمكانية فتح أكتر من لعبة في نفس الوقت ده غير إنه كمان متوافق مع إمكانيات الألعاب في أجهزة الكمبيوتر بنظام تشغيل ويندوز، والحاجات دي كنا اتكلمنا عنها بالتفصيل في مقال سابق عن أجهزة الجيل الجديد من مايكروسوفت.

دراع التحكم

لو انت عند واحد صاحيك ومش عارف هو عنده أنهي منصة ألعاب، فكل اللي محتاجه إنك تبص على دراع التحكم عشان تعرف، فحتى لو كانت سوني غيرت شوية في شكل دراعها مقارنة بالأجهزة اللي فاتت، فمايكروسوفت لسا محتفظة بنفس الدراع من غير اختلافات عن دراع منصة Xbox 360 غير بس إنها ضافت زرار Share.

تشتري PlayStation 5 ولا Xbox Series X ... المقارنة الكاملة بين أبرز منصات الجيل الجديد

اما سوني فغيرت أولًا في الشكل والدراع بقى تصميمه أكتر انسيابية من دراع PS4 ده غير إنها كمان عدلت في إمكانياته، فدراعات DualSense الجديدة بقت بتتميز بمجموعة من المميزات زي مثلًا مقاومة أزرار الضرب اللي بقت بتزيد وتقل على حسب اللعبة وعلى حسب السلاح اللي بتعتمد عليه لو في لعبة قتال أو تصويب، كمان نظام الاهتزاز اختلف، فبدل وجود محرك اهتزاز في كل قبضة تحكم في الدراع اللي فات، بقى الاهتزاز بيشتغل في كامل الدراع وبانماط مختلفة، وده بيخلي تجربة الألعاب بالدراع ده استثنائية بس ده بشرط إنه اللعبة بتكون بتدعم الإمكانيات دي طبعًا.

الألعاب والخدمات

على مدار السنة اللي فاتت دي بدأت مكتبة ألعاب منصات الجيل الجديد تكبر، إن كانت طبعًا لسا موصلتش لمعدلات المنصات اللي فاتت بس ومفيش ألعاب بتقول إنه لازم تشتري المنصات الجديدة من قوتها أو تميزها، بس بالتأكيد مكتبة الألعاب للمنصتين بتتطور وتتحسن وعناوين الألعاب في ازدياد مستمر، كمان الحصريات اللي بتدعم بيها سوني ومايكروسوفت أجهزتها لسا موصلتش لمنصات الجيل الجديد وبعضها هيبقى متاح كمان على منصات الجيل السابق.

اما بقى الخدمات واللي بتعتبر عنصر مهم جدًا صعب أوي الاستغناء عنه فهي متوفرة في المنصتين، فمنصة Xbox Series X بتوفر خدمات متعددة زي Xbox Live Gold وGame Pass Ultimate والأخيرة دي بتتميز مش بس بإنها بتتيح إمكانية اللعب أونلاين لا دي كمان بتتيح إمكانية التحميل المجاني لاكتر من ١٠٠ لعبة، تقدر تنزلهم على منصة الألعاب أو على الكمبيوتر كمان.

أما منصة ألعاب PlayStation 5 فمن خلال خدمة PlayStation Plus بتيح الألعاب الأونلاين وكمان بتوفر لعبتين بشكل رئيسي كل شهر، وده معناه إن عدد الألعاب المتاح الإجمالي، لانه بانتهاء الشهر لو ملحقتش تضيف الألعاب دي في مكتبتك فمش هتقدر تحصل عليها تاني، أما خدمة مايكروسوفت فاللعبة بتفضل فيها مش بتشال إلا باحتمالية بعد وقت طويل جدًا.

الخلاصة

بعد بقى ما قارنا ما بين المنصتين، تقدر تقول أنهي منصة فيهم هي الكسبانة؟ الإجابة هي إن محدش كسب والاتنين كسبانين في نفس الوقت، فالمنصتين أكتر من ممتازين وإن كانت منصة Xbox Series X بتتمتع بإمكانيات أفضل بشكل طفيف وخدماتها المدفوعة أفضل بشكل واضح وكمان سعرها في السوق المحلي أرخص على عكس السوق العالمي اللي المنصتين فيه سعرهم واحد، فمنصة PlayStation 5 بتتمتع بدراع جديد أكتر من ممتاز وأكتر من ممتع، وكمان حصريات سوني من أقوى عناصر نجاحها، ده غير إن الإقبال على أجهزة سوني دايمًا بيكون أعلى ويمكن ده اللي مغلي سعرها في بعض الأسواق.

وعشان كده هنسيب الاختيار ليك في النهاية.

اتعرف على عروض أسعار أجهزة PlayStation 5 على ياقوطة من هنا.

اتعرف على عروض أسعار أجهزة Xbox Series X على ياقوطة من هنا.

اتعرف على عروض أسعار كل ما يتعلق بألعاب الفيديو من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

عن كاتب المقال

خالد عاصم مدوّن من ٢٠٠٧ ومن سنة ٢٠١٣ تخصصت في الكتابة في كل حاجه ليها علاقة بالتكنولوجيا خصوصًا الموبايلات والكمبيوتر وكمان الكاميرات. كتبت أكتر من ١٠٠٠ تقرير ومقال في مجال التكنولوجيا. بالإضافة للكتابة ليا خبرة في تسويق المنتجات الإلكترونية وده خلاني أقرّب أكتر من فهم طبيعة صناعة التكنولوجيا وسوقها، حاليًا بكتب في مواقع مصرية وغير مصرية من وأبرزها موقع مجلة ياقوطة وMobihall وMobilesgate. أول موبايل جبته كان سنة ١٩٩٩ وكان Ericsson 628 وبعده Nokia 3310 ومن ساعتها استخدمت موبايلات كتير جدًا منها سوني وسامسونج وإل جي وأيفون، واتعاملت مع كل أنظمة تشغيل الموبايلات تقريبًا من أول السيمبيان لحد أندرويد وiOS.

Leave a Reply

Your email address will not be published. Required fields are marked *