ازاى تضمن حقك وانت بتشترى أونلاين

الشراء اونلاين

كتب: ناديه حسين

معروف إن فى مشكلة ثقة عند أى حد بياخد قرار أنه يشترى حاجة أون لاين .. فكرة الشراء اونلاين بيكون دايما معاها قلق وخوف حتى لو المنتج شكله حلو وعجبك وسعره ومواصفاته أحسن كتير من المحلات العادية.. احنا فى ياقوطة مش بنقولك ارمى فلوسك  من غير أى ضمانات .. وهنقولك تعمل ايه كمان لو حد نصب عليك.. شوف كدا كلامنا لو اقتنعت بيه، بعدها هتقدر تبدأ أول تجربة شوبينج لك أونلاين !

مخاوفك ايه ؟

  • خايف الفيزا تتسرق بياناتها وبعدين أي حد يستخدمها ويشترى بيها وفى الآخر تلاقى فلوسك طارت.
  • المنتج غير موثوق فيه. انت مقدرتش تلمسه بإيدك ولا تتفرج عليه بنفسك .. تطمن ازاى؟!
  • ايه الضمان لو المنتج جالك مخالف للمواصفات اللى اشترته على أساسها.

..فى مؤشرات حوالينا بتقول إن عملية الشرا اون لاين ممكن تكون مضمونة إلى حد كبير

 ايه ضماناتك !!

  • المتاجر دى فاتحة من كذا سنة وشغالة كويس وعندها موظفين وخدمة عملاء وسمعة كويسة فى السوق.. لوالمتاجر دى بتبيع منتجات رديئة أو بتنصب على الناس.. ازاى كانت هتستمر الفترة دى كلها !.
  • لو المتاجر اللى فاتحة أون لاين مش بتكسب وناجحة.. ليه كل فترة نلاقى متجر جديد فتح.. هل عايز يخسر هو كمان !.
  • ميزة الدفع عند الاستلام  بتوفر لك الثقة فى فحص ومعاينة المنتج لو جابوا لك حاجة غير اللى انت طلبتها.. ارفض استلامها لأنهم هم الى أخلوا بشروط عملية البيع والشرا اللى بينكم..
  • ميزة الدفع عند الاستلام هتخلى أي حد بيقلق من استخدام الفيزا على النت يبقى مطمن ويكمل عملية الشرا من غير قلق.
  • ياقوطة بتقدم لك منتجات من أفضل المتاجر الموجودة أونلاين، وبتختار المتاجر دى  بعناية شديدة.. ومش بس كدا، احنا فى ياقوطة كل فترة بنجربهم ونعمل أوردر ونشترى من المتاجر دى عشان نضمن توفير أفضل خدمة لمستخدمى ياقوطة. لأن مصلحة المتسوق أهم شىء عندنا.

ازاى ممكن تاخد حقك؟

  • انت المفروض قبل ما تشترى  تتأكد أنك هتشترى من متجر موثوق فيه وعنده ضمان وخدمة ما بعد البيع ممتازة عشان تعرف تاخد حقك.
  • لكن لو انت استلمت منتج وبعد كام يوم، فجأة لاقيته مش بيشتغل أو مخالف للمواصفات .. اتصل بخدمة العملاء وابعت ايميل للشركة تشرح مشكلتك بوضوح معاهم وكل المتاجر بتاخد شكاوى العملاء على محمل الجد لأن شغلهم انهم يقدموا لك خدمة ممتازة .. لكن لنفرض أن مفيش ضمان ولا خدمة ما بعد البيع وتتصل بالمتجر اللى اشتريت منه محدش بيهتم بمشكلتك أو بيصطنع الحجج.. وقتها لازم تاخد حقك.. قدم شكوى فى جهاز حماية المستهلك !

ودلوقتى الجهاز اتعود يفحص شكاوى المتاجر الالكترونية زى ما بيفحص الشكاوى اللى متقدمة ضد المحلات العادية.. ومتقلقش العقوبة جامدة جدا. و بتكون غرامة بكام ألف جنيه واحيانًا تصل إلى الحبس في حالة وجود غش تجاري و تقليد علامة تجارية

  • ابعت ايميل لخدمة العملاء واتصل بيهم وحاولوا توصل معاهم لحل كمحاولة أخيرة.  لو مفيش فايدة يبقى مفيش ادامك غير السوشيال ميديا. انشر مشكلتك و هتلاقي اصحابك وكل حد ممكن يكون خاض تجربة سيئة فى الشراء أونلاين و ناس متعرفهاش بتحكى قصتها وتاخد منهم نصايح تتصرف ازاى.. و لو فعلا المتجر غلط، اعمل مينشن للمتجر اللى معاه المشكلة .. .. وعموما شركات كتير بتخاف من قوة السوشيال ميديا  لأنها  بتضر سمعتهم ادام ملايين العملاء المتوقعين والحاليين..

اشترى أون لاين ومتخليش حاجة تخوفك .. المنتج كويس هتبقى انت الكسبان.. حصل مشكلة هتعرف تاخد حقك .. متخليش حاجة توقفك عن مسايرة التطور اللى بيحصل فى الدنيا.. التكنولوجيا اتعملت عشان تسهل حياتنا.. استمتع بيها وخليك أدها. متنساش تفحص المنتج كويس قبل ما تستلمه.. ودور على المتجر اللى ناس كتير ثقة جربوه وابدأ أول تجربة شوبينج أونلاين معاه.

Leave a Reply

Your email address will not be published. Required fields are marked *