دليل ياقوطة للتكييفات

كتب: فريق ياقوطة

مع اقتراب موسم الصيف ناس كتير بتفكر في شراء تكييف، ياقوطة بتقدم لكم دليل لشراء التكييف مع رد على أغلب الأسئلة اللي تتعلق بالموضوع، وهنعرض لكم مميزات وعيوب التكييفات الشباك والسلبيت والاستاند، وايه ماركات التكييفات الأكثر مبيعًا في مصر وكمان التكييفات الأقل استهلاكًا للكهرباء.  لو إنت عندك بالفعل تكييف، هتلاقي في المقال ده نصائح ممكن تفيدك للحفاظ على التكييف.

واحنا بنعمل الموضوع ده دورنا عن أكثر الأسئلة اللي أي شخص ناوي يشتري تكييف بيدور على إجابات ليها، وبحثنا عن إجابات موثوقة وسألنا مستخدمين تكييفات عشان نضمن إننا نقدم لكم كلام صحيح، لكن في خلال البحث ده لاقينا إن في معلومات مغلوطة كثير والناس بتتداولها عن التكييفات.

عشان كده قررنا نسأل«مينا نجيب» خبير التكييفات وبكدا نضمن أن المعلومات مضمونة ومن مصدر موثوق وشخص خبير في التكييفات.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
*المنتجات المرشحة بناءً على الأكتر شهرة والأكتر مبيعًا من خلال مستخدمين ياقوطة. وليس شرطًا أن يكون كل الأكتر شهرة، أو الأكتر مبيعًا هو الأفضل من حيث الجودة، والسعر، وخدمة ما بعد البيع.

معايير اختيار التكييف

  • تكييف كام حصان: على حسب مساحة المكان بتحدد قدرة التكييف كام حصان.
    المعادله المستخدمة لحساب التكييف المناسب = (أبعاد الغرفة× ٣٠٠) / ٨٠٠٠
    *أبعاد الغرفة = الطول × العرض × الارتفاع *النتيجة = عدد الأحصنة المناسبة لمساحة الغرفة أو المكان.

    مساحة المكان بالمتر المربع قدرة التكييف بالحصان
    ١٧ ٣/٤
    ٢٠ ١.٠
    ٢٢ ١.٠
    ٢٦ ١.٥
    ٣٠ ١.٥
    ٣٨ ٢.٠
    ٤٤ ٢.٠
    ٥٠ ٢.٥
    ٦٤ ٣.٠
    ٧٢

    ٣.٠

    جدول يوضح قدرة التكييف حسب مساحة الغرفة

  • لو مش عارف تحدد قدرة التكييف المناسبة: ضروري تستشير متخصص من شركة التكييفات؛ لأن لو استخدمت تكييف بقوة قليلة مع مساحة كبيرة، ده بيخلي التكييف يشتغل فترات طويلة من غير ما يفصل وبالتالي هيأثر علي عمره مع مرور الوقت.
  • مراعاة طبيعة المكان ( الشمس، الحرارة): لو إنت في دور أخير يعني منك للشمس ضروري تختار تكييف بقوة أكبر، ولو التكييف هيبقى قريب من المطبخ راعي النقطة دي برضه.
  • نوع التكييف: الأنسب لك ايه؟ تكييف شباك أم سبليت أم محمول. ( فيه شرح لمميزات وعيوب كل نوع في نهاية المقال).
  • بارد ولا بارد/ساخن: سألنا «مينا نجيب» عن إمتى نشتري بارد وإمتي بارد/ ساخن قالنا «اشتري بارد/ساخن لو إنت عايش في مدينة بيكون فيها الشتاء شديد البرودة عشان بعد كده ماتضطرش تغير التكييف أو تضطر تجيب دفاية. عمومًا التكييفات بارد/ساخن بينصح بيها لسكان المدن الجديدة زي مدينتي والقاهرة الجديدة والشروق..إلخ. » . فيه ناس عايشين في أماكن أقل برودة بتشوف إن كفاية تكييف بارد وفي الشتاء بيستخدموا الدفاية، هي أولًا وأخيرًا بترجع لاختيارك في ناس بتحب تدفئة الدفاية عن التكييف السخن.
  • الضمان : معظم التكييفات دلوقتي معاها ضمان ٥ سنين، لكن نصيحة ابحث عن الشركات ذات السمعة الجيدة والقديمة في السوق واللي عندهم خدمات ما بعد البيع والصيانة تكون مضمونة وثقة وناس كتير جربوها.
  • الميزانية: حدد المبلغ اللي ناوي تشتري بيه التكييف، بعدها هتقدر تحدد نوع التكييف والماركة بشكل سريع.
  • مصاريف إضافية: اسأل عن أي مصاريف اضافية قبل الشراء، زي مصاريف التركيب في شركات بتقدمه مجانًا وشركات تانية لأ. فيه شركات بتطلب منك تدفع ثمن بعض التوصيلات. اعرف كل التفاصيل قبل الشراء عشان تبقى محدد ميزانيتك صح.
  • تكييف مع خاصية بلازما: تكنولوجيا البلازما تساعد على تنقية الهواء، ومفضلة لو حد في المكان بيدخن أو لو حد عنده حساسية صدر.
  • تكييف مع خاصية – inverter– انفرتر: لتقليل استهلاك بنسبة ٣٠٪ ( شرح عملها في فقرة قادمة من المقال).
  • عند تركيب التكييف: في خطوة التركيب كانت نصحية «مينا نجيب» : «مش صح إنك تخرج المواسير من أعمدة أو كامر يعني تركبها في الحائط وده حفاظًا على سلامة المبنى.»
    تكييف-ميديا

التكييفات الأكثر مبيعًا وانتشارًا في مصر

وأكدنا لنا «مينا نجيب» إن التكييفات التالية هي الأكثر مبيعًا في مصر.

  • تكييف كاريير أكثر تكييف مبيعًا في مصر، يتميز بالضمان والصيانة. لو في مشكلة في التيار الكهربائي الجهاز هيقفل حرصًا على سلامة الجهاز.

ممكن تشوف تكييفات كارير من هنا.

تكييف شارب برضه الصيانة والضمان كويسين ومن أفضل خدمات ما بعد البيع في مصر هم وكاريير.

ممكن تشوف تكييفات شارب من هنا.

بتتميز تكييفات كاريير إن تكييفها بارد فقط أفضل إلى حد ما عن تكييفات شارب بارد فقط. لكن لو هنقارن بين الماركتين في تكييفات بارد/ساخن فالاتنين متساويين تقريبًا.

  • تكييفات إل جي، وتكييفات سامسونج أفضل جودة تصنيع موجودة دلوقتي في مصر، لكن سعرهم مرتفع.

شوف تكييف سامسونج ١.٥ حصان من هنا.

وتقدر كمان تشوف تكييفات إل جي  من هنا.

لو بتدور على تكييف سعره رخيص

تكييف أمريكول: تكييف من إنتاج كارير، وهو من أرخص الأسعار وضمان ٥ سنوات، ممكن تجيب منه ١ حصان بس خلي بالك إنك تستخدمه في غرفة صغيرة.
تكييف-شاربالتكييفات الأقل استهلاكًا للكهرباء

  • خاصية إنفرتر: متاحة في أغلب التكييفات الجديدة، لما سألنا «مينا نجيب» عن خاصية انفرتر قال «إنها تقنية بتقلل من استهلاك الكهرباء بنسبة حوالي ٣٠٪ وللأسف ماكانتش موجودة في التكييفات القديمة.»
  • التقنية الجديدة بتشتغل إزاي؟ كان جواب مينا  «لما التكييف بيوصل لدرجة الحرارة المطلوبة بيقلل سرعة الكباس جدًا ولكن الكباس بيفضل شغال ( يعني مش بيطفى زي التكييفات القديمة) بكده لما ييجي التكييف يشتغل تاني، التكييف بيزود بس سرعة الكباس (عشان كده استهلاك الكهرباء بيكون أقل من أي تكييف مفهوش تقنية انفرتر).»
  • التكييفات القديمة بتشتغل لحد ما توصل لدرجة الحرارة المظبوطة عليها وبتفصل الكباس، بعدين لما تيجي تشتغل تاني يبدأ يعمل الكباس من أول وجديد( في الخطوة دي بيستهلك كهرباء كتير لأنه محتاج طاقة عشان يشتغل من الأول) وده سبب من أسباب إن التكييفات بتستهلك كهرباء عالية.
  • خاصية إنفرتر موجودة في تكييفات زي كاريير وشارب وإل جي وسامسونج وميديا (هو تكييف من إنتاج كاريير).
  • التكييف اللي فيه الخاصية إنفرتر بيكون سعره أعلى شوي.
  • راجع مواصفات الجهاز واسأل عن الخاصية دي لأنها هتكون أفيد بالنسبة لفاتورة الكهرباء.

شوف تكييفات مختلفة بتقنية الإنفرتر من هنا.
تكييف-كارير
الصيانة

نصحنا «مينا نجيب» إن الصيانة تكون كالتالي:

  • صيانة تكييف بارد فقط: مرتين بحيث تكون مرة قبل الصيف ومرة كمان بعد الصيف.
  • صيانة تكييف بارد/ ساخن: ٣ مرات بحيث تكون مرة في منتصف الشتاء ومرة قبل الصيف ومرة كمان بعد الصيف.

إمتى تتصل بالصيانة؟

  • كتير من التكييفات الجديدة فيها خاصية self-detector ، لما يكون فيه عطل في التكييف بيقف ويكتب لك العطل ايه.
  • في حالة لو الكمبروسور صوته بقى عالي أوي عن الطبيعي (يعني تحس من صوته إنه شغال بصعوبة) ضروري تقفله وتتصل بالصيانة.
  • بالتأكيد لو توقف تبريد التكييف لازم تقفله وتتصل بالصيانة.

نصائح للحفاظ على التكييف

  • الصيانة الدورية.
  • ما تقللش درجة حرارة التكييف قوي بحيث مش كل فترة قليلة يفصل ( لأن ده بيجهد التكييف وكمان بيزود استهلاك الكهرباء).
  • درجة الحرارة الأفضل للتكييف هي ٢٥ درجة مئوية.
  • عمومًا معظم الأجهزة في السوق حاليًا مفيهاش درجة أقل من ٢٠ مئوية.
  • «مينا نجيب» قالنا معلومة  مهمة جدَا«مهما قللت من درجة حرارة التكييف، درجة الهواء البارد الخارج من التكييف واحدة في كل الحالات، يعني مش معنى إنك ظبطته على ١٩ مثلأ هيخرج لك هواء أبرد أكتر من لو ظبطه على ٢٢.»
  • الفكرة من درجة الحرارة اللي بتظبط عليها التكييف كإنك بتقول للتكييف يفصل لما درجة حرارة المكان كله توصل مثًلا ٢٢ درجة. لما يوصل لدرجة ٢٢ يفصل لحد ما تعلى درجة حرارة المكان يبدأ يشتغل من الأول ويبرد تاني وهكذا.
  • لو رائحة الهواء اللي خارج من التكييف اتغيرت، اتصل بالصيانة.. حذرنا «مينا نجيب» من استخدام المنظفات في التكييف «بلاش تستخدم ديتول أو أي منظفات في محاولة تنظيفه لأن كده أنت هتضر الجهاز. متخصصين الصيانة معاهم مواد كيماوية مخصوصة لتنظيف الجهاز.»
  • غسل فلاتر التكييف بالمياه فقط شيء كويس بس لو هتعرف تعمله، لكنه مش كفاية لأن الصيانة بتعمل تنظيف وصيانة شاملة للجهاز ككل.
  • منافذ الهواء: ماتسبش الباب مفتوح على الآخر أو أي منفذ هواء بيدخل هواء كتير للمكان، ممكن فتحة بسيطة تدخل شوية هوا صغيرة؛ ليه دخول كمية هواء كبيرة مشكلة؟ لأن التكييف وقتها مش بيقدر يوصل لمرحلة تبريد كاملة أو هياخد وقت طويل للتبريد، بعد فترة ممكن يحصل في التكييف مشاكل بسبب اجهاده.
  • لو حسيت إن التكييف مش بيبرد، اطفيه واتصل بالصيانة؛ لأنك لو شغلته وهو فيه مشكلة ممكن الخلل اللي فيه يزيد.

أنسب وقت لشراء التكييف

  • السعر ثابت طول السنة، لو فيه زيادة هتبقى ارتفاع السعر الطبيعي على كل التكييفات (اللي هي الزيادة على المنتج زي أي سلعة ممكن تزيد، مش مرتبط بموسم صيف أو شتاء.)
  • أي تخفيضات بتحصل في أول الشتاء بتكون بسيطة جدًا ولو فيه محلات عملتها بيكون بسبب ركود المبيعات.
  • السعر بيرجع يرتفع تاني في حدود شهر يناير حتى الصيف.

أنواع التكييفات

تكييف سبليت
تكييف-أمريكول

  • متوفر منه نوع بارد ونوع آخر بارد/سخن.
  • الجهاز منقسم إلى جزأين بيربط منهم مواسير بيمر فيها الفريون.
  • مميزات: الصيانة سهلة لأن الكمبرسور في وحدة منفصلة.
  • أسهل في التنظيف من التكييف الشباك.
  • لا يحتاج تكسير في الحائط بشكل كبير، مجرد فتحة صغيرة لتمرير وصلات الفريون.
  • وحدة المحرك – الكمبروسور- بتقدر تحطها خارج المكان اللي فيه التكييف.
  • صوته أقل من التكييف الشباك.
  • من عيوبه: سعره مرتفع عن التكييف الشباك.

شوف موديلات متنوعة من تكييف الهواء الاسبليت من هنا.

تكييف شباك
تكييف-شباك

  • فيه منه نوعين، تكييف شباك بارد فقط وفي تكييف شباك سخن/ بارد.
  • الجهاز كله وحدة واحدة.
  • من مميزاته: إن السعر أقل من التكييف الاسبليت.
  • من عيوبه: صيانة صعبة لأنه وحدة واحدة.
  • صوته مرتفع وربما يكون مزعج لبعض الأشخاص (إذا كنت لا تتحمل الأصوات المرتفعة، قبل ما تشتري عليك بالجلوس في مكان شغال فيه تكييف شباك وتحدد هل ستتحمل الصوت أم لا).
  • بيتطلب تكسير جزء كبير في الحائط.

* لو تم صيانة التكييف الشباك بشكل دوري صوت الكمبروسور مش هيرتفع بالشكل المزعج اللي الناس دايمًا بتشتكي منه.

شوف تكييف شباك قدرة ١.٥ حصان من هنا.

تكييف ستاند
تكييف-ستاند

  • هو تكييف متحرك بعجلات بيخرج الهواء الساخن بأنبوب إلى خارج الغرفة من نافذة أو فتحة في الجدار.
  • قوته تبدأ من حوالي ٣ حصان لأنه مخصص للأماكن الواسعة زي الكافيهات ودور العبادة.
  • مميزات تكييف ستاند: يتميز أنه بيتحرك بعجلات من مكان لآخر بسهولة.
  • ممكن تخزينه بعد انتهاء موسم الصيف.
  • مروحته سرعتها أعلى من التكييفات الاسبليت والشباك، لأنه مخصص للأماكن الواسعة.
  • عيوب تكييف ستاند: سعره مرتفع.
  • يجب تثبيت أنبوب تصريف الهواء كل مرة عند تغيير مكانه.
  • يستهلك مساحة من أرضية المكان.

شوف تشكيلة متنوعة من التكييفات الاستاند من هنا.

تكييف أرضي سقفي
تكييف-أرضي-سقفي

  • ممكن يتركب في السقف أو في الأسفل على الحائط تحت قوي.
  • لو مفيش مكان على الحائط، ده أفضل تكييف ممكن تختاره.
  • يعني لو في ستارة كبيرة واخدة الحائط كله أو شباك بعرض الحائط بالكامل، يبقى الحل إنك تركب تكييف أرضي سقفي.
  • مناسب للمحلات التجارية لأن الأرفف بتكون واخدة أغلب المساحة في الحائط.

شوف موديلات وقدرات مختلفة لتكييف الهواء الأرضي، سقفي من هنا.

تكييف ميني سنترال ( كونسيلد)

  • يستخدم في أي مكان فيه سقف معلق زي ريسبشن فيلا، أو في قاعات المؤتمرات والاحتفالات.
  • فيه منه قدرة بداية من ١٫٥ حصان.
  • ميزته إنه مش بيكون ظاهر وبيحافظ على جماليات وديكور المكان، كل الل بيكون ظاهر عبارة عن فتحات التهوية.
  •  ده لازم شركة اللي بتيجي تعمل المعاينة وهتحدد لك المواصفات المناسبة بالظبط وبعد كدا تحدد السعر.

تكييفات في أماكن خاصة

تكييف المطبخ

  • كان رد «مينا نجيب» لما سألناه عن تكييف  للمطبخ  «مفيش تكييف مخصوص للمطبخ». ودي كانت من المعلومات الكتير الغلط اللي ناس بتتداولها عن التكييفات. زيها زي تقليل درجة حرارة التكييف عشان يبرد أكثر وسعره اللي بينزل في الشتاء!
  • لما تيجي تختار تكييف للمطبخ ضروري تكون قدرته عالية مثلًا ( ٢٫٢٥ أو ٣ حصان) لأن المطبخ بيكون الهواء فيه سخن بسبب البوتاجاز والفرن ..إلخ
  • يُنصح بتركيب شفاط قوي جدًا مع التكييف بحيث يسحب الهواء الساخن والأبخرة اللي خارجة من الزيوت.
  • لازم يتعمل لتكييف المطبخ صيانة أكثر من التكييف العادي، نقترح عليكم صيانة ٤ مرات في السنة.

شوف تكييفات بقدرة ٢.٥ حصان من هنا.

وشوف كمان تكييفات بقدرة ٣ حصان من هنا.

تكييف الريسبشن

  • بتكون قدرته عالية لأن المساحة بتكون كبيرة، غالبًا بيكون ٤ حصان.
  • لو الريسبشن معاه مطبخ مفتوح (الأمريكي) ضروري تستخدم تكييف قدرته أعلى من المفروض تجيبه.

شوف تكييفات بقدرة ٤ حصان من هنا.

٥ من أشهر التكييفات على ياقوطة

تكييف آي كول بارد فقط بلازما ١٫٢٥ حصان من يونيون إير

المواصفات

العلامة التجارية يونيون إير.
أبعاد الوحدة الداخلية ٨٢٤× ٢٩٢× ١٨٠ مم.
أبعاد الوحدة الخارجية ٦٧٧×٥٣١×٢٨٢ مم.
الوزن الصافي للوحدة الداخلية ٨.٩ كجم.
الوزن الصافي للوحدة الخارجية ٣٠ كجم.
القدرة بالحصان

١.٢٥.

نظام التهوية بارد فقط.

شوف تكييف آي كول بارد فقط بلازما ١٫٢٥ حصان من يونيون إير من هنا.

تكييف أرتيفاي ١٫٥ حصان

المواصفات

الموديل تكييف أرتيفاي ١٫٥ حصان (يونيون إير).
القوه ١٫٥ حصان.
أبعاد الوحدة الخارجية ٦٧٧×٥٣١×٢٨٢ مم.
أبعاد الوحدة الداخلية ٨١٥×٢٨٩×١٩٦ مم.
الوزن الصافي ٣١ كجم.

شوف تكييف أرتيفاي ١٫٥ حصان من هنا.

تكييف شارب ٣ حصان بارد فقط

المواصفات

أبعاد الوحدة الداخلية

١٠٤٠×٣٢٥×٢٢٢.

أبعاد الوحدة الخارجية

٨٩٠×٦٤٥×٣٢٧.

صوت هادئ نعم.
النوع تكييف بارد.
مدة الضمان ٥ سنوات.
وزن الوحدة الداخلية ١٤ كجم.
وزن الوحدة الخارجية ٦٠ كجم.
قوته ٣ حصان.
المساحة المغطاة ٢٣: ٢٨ متر.
سعة التبريد ٢٢٤٠٠ بي تي بو.
ملحقات ريموت كنترول لاسلكي.

شوف تكييف شارب ٣ حصان بارد فقط من هنا.

تكييف كارير ٢.٢٥ حصان بارد/ ساخن

المواصفات

العلامة التجارية كارير.
مدة الضمان ٥ سنوات.
النوع تكييف بارد/ ساخن.
المساحة المغطاة ١٦ : ٢٢ متر.
القوة بالحصان ٢.٢٥ حصان.

شوف تكييف كارير ٢.٢٥ حصان بارد/ ساخن من هنا.

تكييف إل جي ١.٥ حصان بارد/ بلازما

المواصفات

العلامة التجارية إل جي.
مدة الضمان ٥ سنوات.
النوع تكييف بارد.
المنشأ كوريا.
المساحة المغطاة ٨: ١٢ متر.
القوة بالحصان ١.٥ حصان.

شوف تكييف إل جي ١.٥ حصان بارد/ بلازما من هنا.

شوف مجموعة مختلفة من التكييفات المتاحة على ياقوطة من هنا.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

One thought on “دليل ياقوطة للتكييفات”

  1. Reinard says:

    Thank yoooooooooooou

Leave a Reply

Your email address will not be published. Required fields are marked *