كتب: محمد حمدي

اختيار الأجهزة الإلكترونية بالنسبة لبعض المشترين بتكون عملية بتحصل بالبركة وبدون دراسة سابقة للمنتجات وللسوق اللي بيبيعها، وده للأسف ممكن يوقّعهم في كتير من المشاكل ويعرّضهم لكتير من التجارب اللي مش كويسة خالص. أما النوع التاني من المشترين فهو الناس اللي بتدور على الأفضل والأنسب لهم، وبتدرس السوق والمنتجات الموجودة فيه كويس قبل ما تاخد قرار الشراء، وهم دول الشريحة اللي بنشجّعها ونتمنى الكل يكون منها.

لكن المشكلة الأساسية اللي ممكن تواجه الناس دي هي توافر كمية كبيرة من المعلومات والاختيارات بشكل بيخليهم أحيانًا عاجزين عن تحديد الخيار الأفضل بالنسبة لهم. خصوصًا في سوق مفتوح زي سوق الريسيفرات في مصر واللي بنشوف فيه عدد ضخم من الأجهزة المطروحة، ومن شركات وأسواق مختلفة، بالإضافة لنصايح كتير من الناس اللي بتعتمد على الإفتاء وعدم الفهم. واللي في النهاية بتؤدي لقرار شراء غير صحيح.

ومن خلال ياقوطة هنشرح للناس الطريقة المثالية لشراء الريسيفر المناسب وهنشوف إيه الأنواع المطروحة في السوق وأسعارها وتقييم المُستخدمين لها. مش كده وبس، إحنا كمان هنعرض عليك أفضل الأسعار المتاحة للريسيفرات دي، ولو عجبك موديل منهم تقدر تطلبه من خلالنا ويكون عندك وفي أسرع وقت.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

الأنواع الرئيسية للريسيفرات

في البداية لازم نعرف أن الريسيفرات بتنقسم لأنواع مختلفة ورئيسية هي:

• الريسيفرات المجانية

والمقصود بيها الريسيفرات اللي بتلتقط القنوات التليفزيونية والمحطات الاذاعية المجانية المتاحة للجميع. بدون القدرة على التقاط القنوات المشفرة أو اللي لها اشتراك خاص. وهي أكتر أنواع الريسيفرات انتشار.

• الريسيفرات المشفرة أو المحمية

وهي الريسيفرات المخصصة لالتقاط بث القنوات المشفرة أو اللي بيستلزم دفع اشتراك لمشاهدتها زي مجموعة ART أو Bein على سبيل المثال. وفى الغالب الأجهزة دي بيتم استلامها مع باقات الاشتراك في القنوات المشفرة.

• أجهزة العرض والتسجيل PVR

وهي أجهزة خاصة مهمتها مش مجرد عرض القنوات، لكن كمان التسجيل منها واستخدام خاصية Time Machine اللي بتتيح الرجوع للبرامج أو إيقاف تشغيلها بعد عرضها بساعات. والنوع ده مش منتشر بشكل كبير في مصر.

• الريسيفرات عالية الوضوح

وهي الريسيفرات القادرة على التقاط القنوات الـHD وعرضها. لكنها في المقابل بتحتاج أنها تشتغل على تليفزيونات HD وإلا الصور مش هتظهر على الشاشة.

• الريسيفرات العادية

وهي ريسيفرات عادية ومش مجهزة لالتقاط بث القنوات الـHD، ووجودها دلوقتي محدود شوية بعد انتشار تليفزيونات الـHD وزيادة عدد القنوات اللي بتبث محتوياتها بجودة عالية.

مصطلحات الريسيفرات

ولازم قبل ما نتكلم عن أنواع الريسيفرات الموجودة في الأسواق، نتعلم مع بعض المصطلحات اللي ممكن نشوفها وقت البحث عن الريسيفر المناسب. علشان نقدر نقيم الريسيفر صح بناءًعلى المصطلحات دي.

أسئلة قبل الشراء

وقبل ما نعرف الأسعار والأنواع، محتاجين نحدد احتياجنا للريسيفر المناسب. وده مش هيحصل بدون طرح الأسئلة المناسبة. والأسئلة هي:

• هل التليفزيون عندي HD أم لا؟

والإجابة عن السؤال ده هتحدد نوع الريسيفر اللي هنقوم بشرائه.

• هل أنا من مستمعي الراديو أم لا؟

علشان بعض الريسيفرات بتلتقط بث الراديو وبعضها لا.

• هل هحتاج لتسجيل بث التليفزيون؟

علشان نحدد هل هنشتري ريسيفر بيسجل أم لا.

• هل هحتاج ريسيفر متصل بالإنترنت؟

علشان بعض الريسيفرات بتتصل بالإنترنت وبتشغل بعض التطبيقات زي يوتيوب مثلًا.

• هل أنا مهتم بمشاهدة القنوات المشفرة؟

علشان بعض الريسيفرات بتقدم خدمة فك القنوات المشفرة.

• ما هي ميزانية شراء الريسيفر؟

علشان الميزانية واحدة من أهم عوامل تحديد نوع الريسيفر اللي هنقوم بشرائه.

الأنواع المتاحة من الريسيفرات

ودلوقتي جه الوقت نعرف الريسيفرات المتاحة في السوق المصري عبر الإنترنت، واللي هنستعرض أهمها وأشهرها مع بعض.

ريسيفرات ترومان

تعتبر من أشهر وأحسن ماركات الريسيفرات في الأسواق العربية والمصرية. وشركة ترومان مش بس شركة بتقدم ريسيفرات، لكنها بتقدم أيضا أجهزة تليفزيون ومراوح وشفاطات وأنظمة حماية ومراقبة وغيرها من الأجهزة الإلكترونية، لكن شهرتها أكبر في مجال الريسيفرات.

بتقدم ترومان ريسيفرات في 3 فئات.

الأولى: فئة ريسيفرات SD للتليفزيونات اللي لا تدعم الجودة العالية HD وبتقدم في الفئة دي سلسلة ريسيفرات S وهي عبارة عن S1 و S2 و S3 و S4 وسلسلة TM اللي بتقدم تحتها موديلات TM777 و TM888و TM999

وكل فئات الـSD اللي بتقدمها ترومان بتتشابه في إمكانياتها اللي مش كبيرة. يعني كل اللي بتقدمه ميزة البحث التلقائي عن القنوات. ثم عرضها على أي نوع من التليفزيونات من خلال وصلة Audio Video اللي بتيجي مع الجهاز.

وبشكل عام ريسيفرات SD مش منتشرة حاليًا بشكل كبير مع انتشار تليفزيونات HD.

الثانية: فئة ريسيفرات HD ودي فيها عدد كبير من الأجهزة، لكنها في النهاية بتتشابه هي كمان في الإمكانيات. وبتقدر الأجهزة دي إنها:

• تعرض الصورة بوضوح كامل Full HD.

• إمكانية العرض والتسجيل عن طريق اليو اس بى.

• تسجيل قناة ومشاهدة قناة تانية في نفس الوقت.

• تقسيم الصورة حتى ١٦ قناة.

• البحث الأتوماتيكي للترددات والأقمار Auto Search.

• قائمه متعددة اللغات Multilanguage menu.

• حماية أوتوماتيكية ضد التيار المنخفض لمدخل الإشارة.

• عرض دليل القنوت EPG الإلكتروني باللغة العربية.

ولما لقينا أنواع الريسيفرات في الفئة دي كبيرة، رجعنا لياقوطة واللي رشحت لنا TM-808 واللي بيخزن لغاية ٦٠٠٠ قناة تليفزيونية ومحطة إذاعية، وفيه مدخل USB بيستخدم لتسجيل البرامج المهمة حسب مساحة الفلاش ميموري اللي هيتم وضعها له، بالإضافة لباقي المزايا الموجودة في عائلة ترومان اللي اتكلمنا عنها فوق.

شوف ريسيفر فول اتش دى TM-808 HDمن ترومان من هنا.

أما أفضل أنواع ريسيفرات ترومان كبيرة الحجم زي ما قال معظم الناس هو ريسيفر Truman premier 1 plus، لكن سعر مرتفع مقارنة بباقي أنواع ريسيفرات ترومان. لكن شهرة (بريميير) وهو الاسم المختصر اللي بيطلقه البياعين على الريسيفر ده من ترومان بيعتبر من أكثر الريسيفرات في مصر شهرة. لكن إيه المميز في الجهاز ده؟

• الريسيفر بيعمل ببروسيسور من طراز ST وهو من الطرازات القوية.

• بيدعم عرض القنوات Full HD و 3D.

• الجهاز مزود بمدخل USB لعمل صيانة للجهاز أو تسجيل البرامج من خلال توصيله بفلاش ميموري أو هارد دسك. أيضا يمكن تركيب USB HUB لتركيب عدد لا نهائي من الفلاش ميموري.

• الجهاز بيعرض ملفات الملتيميديا وبيشغّل الأفلام الأجنبية بالترجمة.

• الجهاز موفر للطاقة.

• ريموت الجهاز ممكن تظبطه بحيث لا تتعارض إشارته مع إشارة التكييف من خلال زرار مخصوص في الريموت.

• سرعة النقل بين القنوات كبيرة جدًا.

• الجهاز بيدعم كتير من البرامج زي فيسبوك وتويتر ويوتيوب وغيرها.

• الجهاز بيتصل بالإنترنت من خلال Wifi USB أو من خلال توصيله مباشرة بالراوتر.

شوف ريسيفر Truman premier 1 plus من هنا.

أما الفئة الثالثة من الريسيفرات اللي بتقدمها ترومان هي الـ Smart reciver وهي ريسيفرات بتمتاز بصغر حجمها وإمكانياتها الكبيرة وبتنتج ترومان ٦ ريسيفرات بالنوعية دي. الفرق الوحيد بينهم في الشكل. لكن كان لازم نرجع لياقوطة علشان نشوف بترشح لنا إيه في الفئة دي.

ورشحت لنا ياقوطة Truman TM-808 HD Mini واللي يعتبر من أفضل الريسيفرات صغيرة الحجم اللي شوفناها في بحثنا. والريسيفر من حيث الإمكانيات مش بيختلف عن باقي الريسيفرات كبيرة الحجم اللي استعرضناها معاكم، لكن كل اللي بيقدمه زيادة هو شكله المختلفة وحجمه الصغير اللي ممكن يتم إخفاؤه ورا التليفزيون بحيث يكون منظر المكان أفضل.

شوف موديلات مختلفة لريسيفرات ترومان من هنا.

هل دي كل حاجه بخصوص ريسيفرات ترومان؟ كان ناقصنا حاجة واحدة هي إننا نشوف رأي المشترين في الشوارع والمولات الكبيرة بخصوص ريسيفرات ترومان.

في البداية سألنا واحد من موزعي ترومان وباقي الريسيفرات واللي أكد لنا إن الموديلات الأقدم من ترومان كانت قوية وقادرة تنافس بشكل قوي في السوق، لكن مع تطور الوقت ودخول المكونات الصينية في المبيعات أصبحت قوة أجهزة ترومان أضعف يوم بعد يوم، ده ما كانش رأيه لوحده. كمان الاسطى (شعبان محمد) المتخصص في تصليح وصيانة أجهزة الريسيفر أكد لنا إن أعطال ترومان زمان كانت قليلة لكن مع الوقت بقت أكتر، وده بسبب اختلاف المكونات المصنوع منها الريسيفر مع الوقت والرغبة في المنافسة وطرح أجهزة أكبر بأسعار أرخص.

لكن المشترين كان لهم رأي تاني لما سألنا (كريم) واللي أكد لنا إنه بيشتري ريسيفر ترومان للتليفزيون الخاص بغرفة النوم واللي اشتراه من قريب، وقالنا لنا إنه كان عنده ٢ ريسيفر ترومان قبل كده وأثبتوا كفاءة وقدرة ممتازة على العمل علشان كده هو بيشتري ترومان.

أما الأستاذ (رمضان) فقال لنا إن مشكلة ترومان هي الأجهزة الحديثة الصغيرة، واللي بتسخن مع الوقت وكثرة الاستخدام علشان كده بتبوظ بسرعة، أما الأجهزة الأكبر في الحجم بتقدر تستحمل وتقدم أداء أعلى. علشان كده مهما كان سعرها أغلى هو حريص على شراء الجديد منها دايمًا.

ريسيفرات هيوماكس

وكان لازم نسيب محطة ترومان بعد ما اتكلمنا عن كل حاجة بخصوصها ونتوقف في محطة جديدة مهمة برضه. ريسيفرات هيوماكس اللي بيعتبرها كتير من البائعين أهم وأقوى ماركة ريسيفرات في الشرق الأوسط. هيوماكس بتتميز باسم قديم ومميز وسمعة طويلة قدرت تحافظ عليها لوقت طويل، لكن بيعيبها إن مفيش أنواع كتير لها موجودة في الأسواق، ده غير ارتفاع أسعارها اللي بيجعل الطلب عليها أقل ومخاطرة المستوردين في استيرادها أكبر.

هيوماكس بتقدم مجموعة من الأجهزة المنوعة ما بين الأجهزة المجانية المفتوحة Free To Air أو الأجهزة المشفرة الخاصة بمجموعة قنوات OSN أو حتى قنوات MBC اللي تعاقدت مع هيوماكس على إنتاج ريسيفرات خاصة بها. بالإضافة لأجهزة العرض والتسجيل كبيرة الحجم. والشكل التالي ممكن يوضح لكم تقسيم الأجهزة اللي بتقدمها هيوماكس وموديلاتها.

المشكلة اللي قابلتنا في استعراض أجهزة هيوماكس هي نقصها الشديد من السوق، وكل ما نسأل أحد التجار علينا يبص لنا بصة غريبة ويقول لنا (هو حد يقدر على أسعار هيوماكس النهارده) وده اللي استفسرنا منه مع الأسطى مجدي المتخصص في صيانة أطباق الستلايت وأجهزة الريسيفر واللي فهمنا إن استيراد أجهزة هيوماكس قليل جدًا في السوق المصري لارتفاع سعرها واقبال المُستخدمين على شراء الأنواع الأرخص.

المشكلة دي ما أثرتش على المعروض من هيوماكس، لكنها ضربت عمليات الصيانة وقطع الغيار الخاصة بها في مقتل. لإن قطع غيار هيوماكس سواء الداخلية منها أو الخارجية (زي الريموت كنترول مثلًا) شحيحة ومش موجودة غير عند بعض التجار الكبار وبأسعار كبيرة.

شوف موديلات مختلفة لريسيفر هيوماكس من هنا.

وعلشان نلخص لكم مزايا وعيوب أجهزة هيوماكس صممنا لكم الجدول ده اللي تقدروا من خلاله تعرفوا مزايا وعيوب كل موديل من موديلات هيوماكس.

لكن كل أجهزة هيوماكس بتيجي بمجموعة من المميزات الـ Default اللي ماحبيناش نكتبها في جدول المقارنة علشان ما نكونش بنكرر كلامنا، والمميزات هي:

• التقاط وعرض كل القنوات المجانية بجودة عالية HD.

• صوت قوي ومحيط من كل جانب.

• قوة عالية في الهاردوير بتجنب الجهاز كتير من المشاكل.

• دعم فني وتحديث السوفت وير بشكل مباشر من خلال الجهاز من غير ما تحتاج تروح لمتخصيين.

• خاصية EPG الخاصة بمعرفة جدول برامج القنوات لمدة أسبوع كامل.

• توصيل الريسيفر بالتليفزيون من خلال مخرج HDMI.

• التقاط قنوات التليفزيون وإذاعة الراديو على حد سواء.

• قوائم متعددة اللغات: عربي- إنجليزي- فرنسي- فارسي

وبعد ما استعرضنا مع بعض الأجهزة اللي بتقدمها هيوماكس، كان لازم نشوف رأي المشترين، واللي رشحوا لينا New Humax 999.

ممكن تشوفه من هنا.

وهنتعرف على مميزات وعيوب الجهاز ده

المميزات

• الجهاز بيمتاز بحجم صغير وقدرة على العمل لوقت طويل بدون مشاكل. كمان فيه مدخل USB وبيتوصل بالتليفزيون بمدخل HDMI.
• وكمان سعره مميز، واللي بنعتبره واحد من أرخص الأجهزة الموجودة في السوق.

العيوب

•  بيخزن ٥٠٠٠ قناة تليفزيون وراديو مش ٦٠٠٠ زي معظم باقي الأجهزة، وكمان سمعنا بعض المُستخدمين اللي اشتكوا من ارتفاع درجة حرارته بعد وقت طويل من الاستخدام.
•  كل القنوات اللي بيستقبلها الريسيفر هي القنوات المجانية المتاحة للجميع ومش بيستقبل أي قنوات إضافية أو مشفرة.

ريسيفرات دريك

وزي ترومان لاقينا شركة دريك مش مجرد شركة بيع ريسيفرات، لكنها بتبيع مراوح وشاشات ومكانس وأفران كهربائية. لكن محبي الريسيفرات خاصة الناس القديمة شوية في المجال شكروا فيها جدًا، وقالوا إنها منتجات مخصصة للعمل ساعات طويلة دون مشاكل، علشان كده بيرشحوا الأجهزة دي لأصحاب الكافيهات أو الأماكن اللي ممكن تشغل الريسيفر والتليفزيون لأوقات تقترب من ٢٤ ساعة.

الأستاذ (السيد عطية) واللي قال لنا إنه بيشتغل في مجال الريسيفرات من زمان جدًا، شكر لنا في أجهزة دريك، لكن في نفس الوقت قال لنا الجملة اللي سمعناها كتير أثناء عملنا على الموضوع ده: الأجهزة الحديثة مش بنفس قوة وكفاءة الأجهزة القديمة على الرغم من ارتفاع أسعارها ووعودها للمُستخدم بتقنيات حديثة ومبهرة.

على كل حال الصورة دي بتوضح لنا قائمة عائلة ريسيفرات دريك بالكامل:

كل الأنواع دي على اختلافها فيها نفس الخصائص اللي في باقي الريسيفرات اللي اتكلمنا عنها. بمعنى إن كلها بتقبل الفلاش ميموري والهارد دسك، بالإضافة لاستقبالها عدد كبير من القنوات بيوصل لـ  ٦٠٠٠ قناة مع خدمة EPG الخاصة ببرامج القنوات. لكن السؤال هو: إيه المختلف في ريسيفرات دريك؟

المختلف هو قدرة ريسيفرات دريك على فك تشفير القنوات المشفرة. وعلى الرغم من إننا مش بنشجع على أي نشاط يخالف حقوق الملكية الفكرية، لكن موضوع فك القنوات المشفرة ده فيه كلام. يعني منتشر نظام مشاركة المشاهدة أو اللي بيتسمى في مصر اختصارا (الشيرنج Sharing) أو نظام فك تشفير بعض باقات القنوات من خلال اتصال الريسيفر بالإنترنت. على كل الأحوال ريسيفرات دريك فيها إمكانية فك تشفير بعض باقات القنوات. لكن طبعًا الخدمات دي مشكوك في قانونيتها وفى مدى استمراريتها. يعني مش مضمون إن الريسيفر يقدر يفك الشفرات طوال الوقت. وفى الغالب بيحتاج تحديث للسوفت وير بعد حوالي سنة.

أما عن رأي السوق فيما يتعلق بريسيفرات دريك. فلاقينا إن أفضل ريسيفر دريك في السوق هو موديل 900 Plus Full HD.

واللي ممكن تشوفه من هنا.

المميزات

• عرض ٥٠٠٠ قناة تليفزيونية وإذاعية.

• عرض بدرجات وضوح Full HD 1080.

• جدول قوائم البرامج (EPG): حتى ٧ أيام.

• لغات عرض متعددة (من ضمنها اللغة العربية).

• مزود بمخارج HDMI و AV.

• قفل للقنوات (الرقابة الأبوية).

• خاصية  Time Shift اللي بتتيح تسجيل البرامج المفضلة والعودة لها من جديد.

• USB للعرض والتسجيل.

• مشغل وسائط متعددة قوي (فيديو، MP3، وصور).

• تحديث الجهاز عن طريق ال USB والتحديث الهوائي OTA.

• يدعم الوصول للإنترنت عن طريق ال Wi-Fi (لكن قطعة الواى فاى مش بتيجي مع الجهاز).

• يدعم الأنترنت عن طريق خدمات ال 3G

• يدعم تطبيقات الإنترنت (الطقس، جوجل، وغيرهم)

العيوب

• فتحات الـ USB خلف الجهاز، الأمر اللي بيخلي توصيل الفلاش ميموري أو الهارد دسك مش عملي أو سريع.

• أحيانًا بيتعرض الجهاز لبعض السخونة عند تشغيله لفترة طويلة.

• سرعة النقل بين القنوات بطيئة.

موديل تاني من دريك هو 850I HD  واللي تعتبر مميزات الجهاز هي نفسها مميزات الجهاز السابق، لكن بيزيد عليها المرة دي اشتراك لفتح القنوات المشفرة، بالإضافة للحجم الصغير للجهاز.

لكن زي ما بتيجي المميزات بتيجي العيوب. الجهاز لأنه صغير الحجم بيسخن بشكل أسرع من باقي الأجهزة، وممكن يتعرض للتوقف عن العمل لفترة لو اشتغل لوقت طويل بدون راحة. كمان المُستخدمين على سوق دوت كوم اشتكوا من عدم وجود مانيوال مع الجهاز لشرح طريقة الاستخدام، ومن صعوبة برمجة الجهاز ومن الصورة اللي ما كانتش بالجودة اللي توقعوها.

شوف ريسيفر استقبال 850i HD مينى من دريك بتقنية فول اتش دى من هنا.

ريسيفرات رويال تك

على الرغم من توقعنا أن رويال تك تكون شركة شغاله في المراوح والغسالات زي باقي الشركات اللي استعرضنا الريسيفرات الخاصة بها، لكن في الحقيقة رويال تك متخصصة في الريسيفرات. وفى الأساس رويال تك هي شركة تأسست سنة ٢٠٠٤ وتخصصت في استيراد الريسيفرات، ثم بدأت تفتح لها فروع في القاهرة وباقي المحافظات مع الوقت.

ريسيفرات رويال تك مش بتختلف عن باقي الريسيفرات من حيث المزايا والعيوب، لكن بيزيد عليها قدرتها على فتح القنوات المشفرة لمدة أطول وعلى أكتر من سيرفر، كمان الريسيفر بيحتوي في الإصدارات الحديثة منه على فتحات أمامية وخلفية للـ USB لضمان العملية وسهولة الاستخدام.

وياقوطة رشحت لنا الموديل X2Mini واللي هنتعرف على مميزاته وعيوبه.

المميزات

• الجهاز معاه ٢ ريموت كنترول.

• حساسية عالية لاستقبال الجهاز لإشارة الريموت بالتوجيه من أي اتجاه.

• الجهاز مدعم بعدد ٢ مداخل يو اس بي للعرض والتسجيل.

• سهولة تحديث السوفت وير والقنوات من خلال فلاش ميموري يو اس بي.

• يمكن تحميل ٨٠٠٠ محطة فضائية وراديو.

• متعدد اللغات (من بينها العربية والإنجليزية).

• يدعم خاصية EPG.

• يدعم التحكم بالقنوات (تعديل، حذف، نقل) وعمل قائمة بالقنوات المفضلة.

• يدعم تشغيل الملفات الصوتية والفيديو بامتدادات مختلفة (AVI، DIVX، MP3، JPG).

• يدعم تشغيل ال YouTube.

• يدعم خاصية IPTV.

العيوب

• السخونة الشديدة بعد التشغيل لوقت طويل.

• أحيانا لا يستجيب للعمل أبداً ويحتاج أعادة تشغيل.

• ضبط بعض الإعدادات وترتيب القنوات صعب.

شوف ريسيفر مينى عالي الدقة Royal Tech X2 Mini من رويال تك من هنا.

وشوف موديلات مختلفة لريسيفرات رويال تك من هنا.

ريسيفرات أسترا

ودلوقتي جه الوقت نتكلم عن سلسلة ريسيفرات أسترا. وهي ريسيفرات أثبتت قوة وكفاءة في السوق المصري في الفترة الأخيرة. عم (ممدوح عبد الباسط). وهو واحد من أقدم وأشهر الناس الشغالين في صيانة الريسيفرات في مصر، قال لنا إنه بينصح كل زباينه اللي بيسألوه عن أفضل الريسيفرات في الأسواق المصرية أنهم ما يبعدوش عن ريسيفرات أسترا بحال من الأحوال. لما سألناه عن السبب قال لنا إن أسترا من الشركات اللي لسه محتفظة بقدرتها على تقديم ريسيفرات قوية وسعرها مناسب في نفس الوقت.

ريسيفرات أسترا الموجودة في مصر مش بتقدم كتير على مستوى الإمكانيات. نفس الإمكانيات الموجودة في باقي الريسيفرات، حتى أن أسترا مش بتقدم إضافات زي فتح القنوات المشفرة وخلافه، لكنها بتركز على الإمكانيات الرئيسية زي جودة الصورة HD وتشغيل البرامج الخاصة بيوتيوب وغيرها من الإضافات.

والجدول التالي بيلخص ريسيفرات أسترا المتاحة للشراء.

شوف موديلات ريسيفر أستر من هنا.

ريسيفرات الهرشمان والكيوماكس

ودلوقتي لازم نتكلم عن ريسيفرات جربناها بنفسنا لكن للأسف كانت تجربتنا معاها سيئة جدًا. علشان كده مش بننصح بيها قوي.

النوع الأول هو ريسيفر كيوماكس. والحقيقة أن الكيوماكس واحد من أكثر الريسيفرات انتشارًا، وبيستورده في مصر (عبد العال) وهو واحد من أشهر مستوردي الريسيفرات في مصر ومتخصص في استيراد الكيوماكس بالمقام الأول.

الكيوماكس يعتبر تقليد للهيوماكس. وزي أي حاجه تقليد كفاءة الجهاز سيئة جدًا وبيتعرض لكتير من الأعطال طول الوقت. كمان سرعة التغيير بين القنوات بطيئة. أما السوفت وير وحش وضعيف وناقصه حاجات كتير. وقايمة القنوات المفضلة Favorite Channels بتحتاج لإعادة ضبط طوال الوقت. يعني باختصار تجربتنا مع كيوماكس كانت سيئة جدًا.

أما ريسيفرات هرشمان كانت بنفس سوء كيوماكس للأسف. وزاد عليها توقف الجهاز عن العمل بعد فترة قصيرة، بالإضافة لسخونة الجهاز بعد وقت طويل من التشغيل. الأمر اللي بيعتبر عيب أساسي في الجهاز.

الأستاذ (محمد عبد الله) المتخصص في تصليح أجهزة الريسيفرات بيقول لنا عن كيوماكس وهرشمان إنهم كانوا من أقوى الأجهزة وأرخصهم زمان، وكان (عبد العال) بيهتم باستيراد أفضل الأجهزة من الخارج وإعادة بيعها، لكن مع الوقت وغزو السوق بالأجهزة الصينية غير القوية. اتغير الحال وبقت ريسيفرات هيوماكس مش مرحب بيها في السوق، إلا للناس اللي عاوزة ريسيفرات بسيطة تقوم بأعمال بسيطة وتشتغل لأوقات قصيرة لتجنب ارتفاع حرارة الأجهزة.

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.