دليلك لتعقيم أدوات رضيعك في السنة الأولى من عمره
كتبت: يارا الحميلي
من أول ما يوصل البيبي بالسلامة، بتحاول الأم دايمًا تعتمد على الرضاعة الطبيعية باعتبارها الخيار الأمثل ليها ولطفلها على كل المستويات. لكن أحيانًا بتضطر الأم لاستخدام الببرونات للرضاعة الصناعية أو إعطاء الطفل اللبن المشفوط من الثدي خاصةً لو كانت الأم بتشتغل، وده بيتطلب استخدام عدد كبير من الببرونات اللي لازم دايمًا تكون نضيفة لحماية الطفل من الأمراض.
في ناس كتير بتشوف إن المغالاة في تنضيف أدوات الطفل بتقلّل من المناعة اللي ممكن يكتسبها، لكن الدراسات العلمية أثبتت إن السنة الأولى في حياة الطفل بيكون أكتر عرضة فيها للأمراض، خصوصًا إن لم يتم تعقيم أدواته بشكل جيد. عدم تعقيم الببرونات ممكن يعرّض الطفل لأمراض كتيرة بدايةً من الفطريات لنوبات الترجيع والإسهال. ممكن نقلّل من تعرض الطفل للبكتيريا عن طريق تعقيم الببرونات على قد ما نقدر.
ولإننا في ياقوطة عيننا دايمًا على كل اللي يهمك انتي وطفلِك، جمعنالك في المقال ده كل اللي هتحبي تعرفيه عن تعقيم أدوات رضيعك في أول سنة من عمره.
*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.
مش لازم نعقّم الببرونات بعد كل رضعة، وممكن نكتفي بغسيلها بمياه سُخنة على أن يتم تعقيمها على الأقل مرة واحدة يوميًا. لكن في حالة إن الطفل كان عيّان يُستحسن يكون التعقيم بعد كل رضعة. والمفروض إن التعقيم بيتم على مرحلتين؛ التنضيف وبعدين التعقيم.
التنضيف
قبل ما نبدأ في التعقيم، لازم نتأكد إننا غسلنا الببرونة كويس بالماء الساخن والصابون وعن طريق استخدام فرشاة تنضيف الببرونات. الأفضل إن ده يتم بعد كل مرة تستخدم فيها الببرونات والأفضل إن الفرشاة تتغير كل ٣ شهور.
شوفي فرشاة تنضيف الببرونة من هنا.
لو عندك غسالة أطباق ممكن تحطي فيها الببرونات نفسها، لكن الحلمات لازم تتغسل بالطريقة اللي قلنا عليها فوق، لتجنب تراكم البكتيريا عليها. طبعًا لو كنتي بره البيت يُستحسن إنك تاخدي كذا ببرونة بحيث ما تضطريش تغسليهم أو تعقميهم بمياه سخنة لو ده كان متاح.
التعقيم
في طرق كتيرة للتعقيم بداية من المعقم الكهربائي، للتعقيم عن طريق الميكروويف، للتعقيم باستخدام المياه السخنة أو الساقعة.
أولًا: معقم البخار الكهربائي
أسهل وأسرع طريقة لتعقيم الببرونات هي عن طريق المعقم الكهربائي اللي بيستهلك حوالي ٨ دقايق عشان يعقم و٥ دقايق عشان يبرد. طريقة الاستخدام سهلة جدًا، الأول بنزود الماء في المكان المخصص لذلك وبعدين بنحط الببرونات وممكن أجزاء معينة من شفاطات الثدي، وبعدين نشغله.
المعقم الكهربائي مفيد جدًا في حالة الرضاعة الصناعية وبرضه مفيد بالنسبة للأم اللي بتشتغل بالذات إذا كانت بتستخدم مضخات الثدي. مشكلته إنه يعتبر سعره غالي وعملية التعقيم بتاخد وقت عن الطرق التانية. في أنواع كتير من المعقمات الكهربائية زي:
معقم البخار الكهربائي فيليبس أفنت
معقمات أفنت كلها بتعقم في خلال ٦ دقايق والزجاجات والمحتويات بتفضل معقمة لمدة ٢٤ ساعة بشرط إنها تفضل جوه المعقم، وبتشيل لحد ٦ ببرونات. في نوعين من المعقمات الأفنت: «٤ في ١» و«٣ في ١». الـ «٤ في ١» بيحتوي على سلة لغسالة الأطباق، المعقم، ملاقيط عشان نشيل بيها المحتويات وكتالوج. سلة غسالة الأطباق موجودة عشان تساعد في عملية غسيل الببرونات قبل ما يتعقموا. و الـ «٣ في ١» نفس المحتويات من غير سلة غسالة الأطباق.
معقم أفنت جودته عالية جداً، وما بياخدش مكان كبير في التخزين، بالإضافة لإنه من أسرع الأنواع وبيشيل محتويات كتيرة.
مشاكله إنه بيصدّي بس سهل إن الصدأ ده يتشال إلى حد ما عن طريق المياه والخل. المشكلة التانية إنه ما بيشيلش الببرونات الطويلة، فلو هنجيبه لازم ناخد بالنا من اختيار الببرونات. وبرضه لازم نخلّي بالنا إنه ما دام اشتغل مش هنعرف نوقفه غير لو فصلنا الفيشة تمامًا.
شوفي معقم البخار الكهربائي فيليبس أفنت «٤×١» من هنا.
وشوفي معقم البخار الكهربائي فيليبس أفنت «٣×١» من هنا.
معقم دكتور براون ديلوكس
معقم دكتور براون بيعقم في خلال ١٢ دقيقة لكن بياخد وقت عشان يبرد وبيشيل لحد ٦ ببرونات. مميزاته إنه سهل في الاستخدام لكن مع الاستعمال اليومي عمره مش أكتر من ٥ شهور.
شوفي معقم دكتور براون ديلوكس من هنا.
معقم تومي تيبي
بيعقم في خلال ٥ دقايق وبياخد حوالي ٣ دقايق عشان يبرد وبيشيل لحد ٦ ببرونات. مميزاته إنه سريع وسهل جدًا في تنضيفه، لكن عنده مشكلة إن مفيهوش مساحة للببرونات الطويلة. لو هنستخدم معقم تومي لازم نوازن الببرونات عشان السلة تبقى ثابتة لإنها مش ثابتة قوي.
شيكو ٢ في ١
معقم شيكو بيشيل لحد ٧ ببرونات من أي حجم و طول. بياخد حوالي ٢٠ دقيقة عشان يعقم. من خلال تجربتي الشخصية مع معقم شيكو شفت إن مشكلته إنه مع الاستخدام بيصدّي فبيحتاج تنضيف بصورة مستمرة. والميزة اللي فيه عن الأفنت إنه مش بيسيب رائحة وحشة في الببرونات.
المعقم ده مش متوفر حاليًا في مصر.
ثانيًا: التعقيم عن طريق الميكروويف
ممكن تعقيم الببرونات عن طريق إننا نحطها مفتوحة في الميكروويف لمدة ٩٠ ثانية، لو هنستخدم الطريقة دي لازم نتأكد إننا ما ندخلش أي حاجة فيها معدن الميكروويف. وممكن نستخدم معقمات خاصة بالميكروويف أو شنط تعقيم.
معقمات الميكروويف
طريقة استخدامها سهلة جدًا عن طريق إضافة مياه للمعقم وبنشغّل الميكروويف عليه لمدة دقيقتين. سعره أرخص من معقم البخار لكن في جدل كبير عما إذا كانت أشعة الميكروويف آمنة على الأطفال في السن ده.
معقم الميكروويف فيليبس أفنت
معقم الميكروويف أفنت مناسب جدًا في حالات السفر والاستخدام اليومي، لإنه خفيف جدًا وسهل في الاستخدام. مشكلته إنه مناسب فقط في حالة الزجاجات الصغيرة، ومناسب بالنسبة للميكروويفات كبيرة الحجم. بيشيل لحد ٤ زجاجات صغيرين.
شوفي معقم الميكروويف فيليبس أفنت من هنا.
معقم ميكروويف تومي تيبي
بيحتاج ٤ دقايق في الميكروويف ويبيشيل لحد ٤ زجاجات صغيرين. وبييجي معاه ملقاط وتتينة وكباية وببرونة.
المعقم ده مش متوفر في مصر حاليًا، وممكن تشوف مستلزمات أطفال تومي تيبي من هنا.
معقم ميكروويف دكتور براون
المعقم بياخد عدد أكبر من الببرونات (٤ كبار)، مشكلته إنه بيحتاج يفضل في الميكروويف من ٥ لـ ١٠ دقايق عشان يرتاح.
شوفي معقم ميكروويف دكتور براون من هنا.
شنط التعقيم
شنط منشكين للتعقيم
عبارة عن ٦ شنط، كل شنطة بتستخدم ١٠ مرات. مفيدة جدًا في السفر.
الشنطة دي مش متوفرة في مصر حاليًا.
شنط دكتور براون للتعقيم
عبارة عن ٥ شنط، كل شنطة بتستخدم ١٠ مرات. مشكلتهم إنهم أحيانًا بيسربوا المياه والشنط صغيرة شوية.
شوفي شنطة دكتور براون للتعقيم من هنا.
ثالثًا: غلي الماء
الطريقة دي هي اللي كانوا بيستخدموها الأهالي زمان وهي عن طريق الخطوات دي:
- نحط الببرونات في حلة كبيرة.
- نحط في الحلة مية معدنية ونغطيها.
- نسيبها لمدة ١٠ دقائق.
الطريقة دي أسهل طريقة وممكن تفيد لو الأم خارجة أو مسافرة، لكن المشكلة إن مع استخدام الطريقة دي باستمرار ممكن حلمات الببرونات تبوظ.
رابعًا: التعقيم عن طريق الماء البارد
ده بيتم عن طريق حبوب تعقيم بتدوب في المياه وبيتحط فيها الزجاجات لكن للأسف مش متوفرة في مصر في الوقت الحالي.
نصائح السلامة عند تعقيم الببرونات
- يُفضل عدم غلي حلمات زجاجات الرضاعة.
- عند استخدام معقم الكهرباء يُفضل ترك الزجاجات لتبرد واستخراجها بالملقاط المخصص فقط.
- يفضل إننا نريّح المعقم ١٠ دقائق بعد كل دورة تعقيم.
- ممنوع إدخال أي معدن في الميكروويف.
- ما تسيبيش الماء المغلي في متناول أيدي الأطفال.
- ما تسيبيش المواد الكيماوية في متناول أيدي الأطفال.
- اغسلي إيديكي دايمًا قبل استخدام أدوات التعقيم.
*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.
عن كاتب المقال